ياأخواتي المتزوجات ..أريد مشورتكم ضروري
 

اليوم أنعرضت علي وظيفة مدرسةفنون في مدرسة خاصة يعني الراتب 1600 ريال ولكن انا متزوجة وعندي 4 أطفال مابين سادس ابتدائي الى 3 سنوات وماعندي خادمة
وترى انا ماكنت ادور على الوظيفة جاءت من الله فرحت بها ولكن قلت للمديرة افكر لأني متخوفة من اني ما اوفق بين البيت والمدرسة أو أقصر في حقوق زوجي واطفالي وبيتي
أريد رأيكم لأني معتمدة على الله ثم عليكم في الرأي ؟
أفيدوني...

الأخت الفاضلة ،

آمل منك كتابة موضوع في قسم الرسائل ا لخاصة للأهمية بعنوان للمراقبة Reemona
لاستمرار فاعلية عضويتك


http://www.66n.com/forums/forumdisplay.php?f=29


تحياتي

والله ياعزيزتي إذا كانت ضروفك المادية صعبة شوية وأنت في أمس الحاجة لهذا الراتب فتوكلي على الله وأستخيري أول شي وأما إذا كانت الشغلة بس مجرد وظيفة جاتك وماتبغي ترفضيها فما أنصحك لأنه مهما حاولت إنك توفقي ماراح تقدري غير إنك راح تضطري لوجود شغالة وهذي بحد ذاتها مصيبة أخرى وبصراحة الراتب مايستاهل الهجولة والتعب .. وأنا أكلمك وأنا قد رفضت الوظيفة الحكومية الي راتبها أضعاف راتبك في سبيل إني ماأضيع أطفالي وأقوم بحقوق زوجي ... أجلسي بينك وبين نفسك وازني بين المساوىء والإيجابيات وراح تشوفي إن كلامي صحيح الله يسر لك الخير وين ماكان .....

أختاه رأيي من رأي أختي بنت طيبة الطيبة ...

وازني بين أيجابيات الوظيفة ومساوئها .. وأيهما رجحت كفته فأعمليه..

فأنت وزوجك فقط القادران على أن تحددوا قبول الوظيفة أو رفظها ..

أتمنى لك التوفيق دائما .....

اختي برايي والله 1600 ما تستاهل انك تهملي اولادك عشانها وخصوصا اذا مو محتاجة واصلا رح تصرفيها كلها بس في اللبس والكياج والعطور والمجاملات اللي مالها داعي
بس اذا محتاجة توكلي على الله

أخواتي جزاكم الله خيراً أنا مثل رأيكم ولكن
أنا وزوجي قررنا ندخل أطفالنا مدرسة خاصة يعني سواء توظفت أو لا
وعندما ذهبت لتسجيل بناتي اليوم قالت لي المديرة ابغاكي عندنا في المدرسة وكنت أكلم وحده من المعلمات قالت لي : بناتك اذا تبيهم في نفس المدرسة وانتي معلمة فيها يكون الرسوم النصف
أما عن وضعنا المادي فهو متوسط ولله الحمد هذه السنه عندنا التزامات كثيرة فحبيت اساعد زوجي في المصاريف لفترة محدودة حتى تعدي الأزمه بس متخوفه من التقصير وبعد ماأتوظف زوجي لا يتفهم الوضع

زوجك وبيتك وأطفالك في حاجه لك أكثر من الوظيفه
وثلاث أرباع راتب الوظيفه راح تصرفيه على الشغاله
لأنك بالتأكيد راح تحتاجي لها في الآخر

أنا مع كلام بنت طيبة الطيبة إلا آخر سطر أعارضه بشدددددددده

لأنه خطأ إن الموظفات مقصرات بأداء واجبات أزواجهن

بالعكس لو طالعنا لورى شوي نلاقي جداتنا كانوا يشتغلون و لا تسبب ذلك في خلل في تربية أمهاتنا ولا نحن أيضا

المرأة بطبيعتها لو هي انسانه واعيه راح تهتم في بيتها حتى لو كانت مراه عامله

و لو هي مهمله فحتى لو هي فاضيه اربع وعشرين ساعه ما منها فائده

مو قاعده ان الحريم اللي جالسين بالبيوت هم فقط المهتمين بأزواجهم و اطفالهم

فأنا أعرف الكثير مهملات من كلا النوعين عاملات وغير عاملات

أنا معاك ياعبورة والتعميم في كلا الحالتين خطأ لكن أنا ماتكلمت من فراغ لأني أشوف أوضاع أحيانا مزرية للي أمهاتهم عاملات وحدة منهم تقول أنا لي يومين ماأشوف أطفالي أو أكثر لأنها مبرمجة حياتها على نمط معين يتماشى مع وظيفتها والأطفال مرميين عند الشغالة ومواقف كثيرة يخجل المرء من إيرادها وهناك نماذج حقيقة مشرقة للعاملات ولكنننننننن قليلة للأسف بل وحدة أعرفها حق المعرفة تقول عندما أرادت أن تطبخ أستغرب ولدها الصغير قال لها ماما إيش هذا لأنها لاتطبخ أبدا ....

معقوله المرأة العامله ماتدري عن اولادها وبيتها
الله المستعان من جد والله شكلي بتراجع

هناك نماذج حقيقة مشرقة للعاملات ولكنننننننن قليلة للأسف ؟؟؟؟؟؟؟؟؟

كل المجتمع اللي محيط بي عاملات طبعا كثيرات جدا

وكل وحده تنافس الثانيه في اهتمامها بزوجها ووحده فقط جالسه بالبيت وليتها اهتمت بعيالها وبيتها

و عشان ما أكذب في جاره من جاراتي جالسه بالبيت تهتم بزوجها ولكنها اربع وعشرين ساعه زيارات و طلعات برا البيت وما تدخل المطبخ لأنها تعلم شغالتها الطبخ على قولتها من اول ما تجي

يعني بالنسبة لوضعي انا ما أطلع أثناء ايام الدوام برا بيتي الا قبل الغروب شوي نلف بالسياره ومعانا العيال

و شغالتي والله العظيم انها مستحيل تمد يدها وتقطع حتى بصل و هذا حال كثيرات عاملات معي في مجال عملي

اعذريني طولت عليك بس حبيت اوضح لك :15:

ختي عبوره تنصحيني بالوظيفة أم لا بما انك موظفه

لله يجزاك خير (ريم المدينة )ونعم الأخت ان شاء الله

أختي الغالية أم الـبـراء

سامحيني لأني تأخرت بالرد ولكن هاليومين مريت بضروف بعدتني عن النت شوي

أكيد أنتي في البداية مقدمة طلب وظيفة معلمة رسمية اللي يبدأ راتبها من 4000 ريال و يبدأ يزيد

و حتى الان ما صار لك تعيين
و أنتي ذكرتي إنك بحاجة للوظيفة حتى تساعدي زوجك و دخلكم متوسط

من رأيي

إنك تقبلين هذه الوظيفة لأنها تعطيك شهادة خبرة تضاف إلى ملفك

وبعدين يالغالية تعرفين الوضع في المصاريف كيف صارت نار

يعني لو توظفتي راح تساعدين زوجك في تحمل الأعباء مثل ( شراء ملابسك – تسديد فاتورة جوالك )

و عيالك ما شاء الله بيدخلون المدرسه يعني ما تخافين عليهم بالبيت

الوظيفة تساعدك حتى في تنظيم وقتك و تحسين حتى بالنشاط والحيوية

مره أخذت إجازة شهرين حسيت بالكسل و ما فيه إي انتظام وما صدقت إن الاجازة تخلص و ارجع لدوامي

الشيء المقلق في الحكاية هو إن المبلغ بسيط

انتي داومي و جربي لو ارتحتي في الدوام و انبسطتي كملي (((طبعا في البدايه ما راح ترتاحين لأنك لسا جديده مو متعوده و بعدين راح تتأقلمين)))

ولو حسيتي انك ما قدرتي توفقين بين البيت والمدرسة فإنسحبي

طولت عليك
الله يكتب لك إللي فيه الخير

اختي الكريمه يعتمد عملك
على عدد الحصص و هل تعملين ايام الاسبوع كلها ممكن تتفقي مع الاداره ان يضع كل حصص الفنون في 3 ايام بالاسبوع مثلا

لا اعرف نظام المدارس
فقط فكره طرات على بالي
الان و انا اقرا مشاركاتكم
الله يصلح احوالكم و يصلح احوال المسلمين

أقترح عليك عدم قبول الوظيفة للأسباب التالية :
1- الراتب قليل جدا ولايكفي مصاريف التنقل الملابس الخ ........
2- سوف تزيد الاتعاب عليك لان التدريس مهنة شاقة ومتعبة .
3-لديك ابناء صغار يحتاجون لجهد كبير في رعايتهم وتربيتهم ومساعدتهم في الدراسة .
4-حبك لزوجك لايعني ان تقومي بمهامه بجلب المال فالرجال يحبون المرأة الي تهتم بهم
ولاتنشغل الا بهم وبالابناء .

وأخيرا إذا كان الرجل يرى ان زوجته تقوم بكل جهدها في العناية به وبالابناء فسوف يحفر في الصخر ليوفر لها
وللأبناء لقمة العيش .


وجهة نظر شخصية قد تناسبك او لاتناسبك .

كلام سليم 100%

أخواتي الحبيبات كلي شاكرة لكن على آرائكم التي حسستني بأننا فعلا أخوات في هذا المنتدى وأقول لكم بالأمس تكلمت مع زوجي في هذا الموضوع وكان مبسوط جدا فأنا توقعت مبسوط عشان الراتب ولكن قال لي الراتب قليل جدا يعني (لملابس المدرسة ومكياج لك انتهى الراتب يعني محنا مستفيدين منوا شي بس أنا أبغاكي تتوظفي عشان تشوفي نفسك وعشان تغيري من روتين البيت (طبخ وغسيل وكوي وتنظيف )وقال لي أيضاً عندما تذهبين للوظيفة وترجعي مثلي مثلك ولا تطالبيني (مثلاً نبغى نخرج طفشانين وانت منت مهتم فيني ..)لأن زوجي مايحب أني أخرج خرجات وزيارات مثل الحريم .يعني دايما في بيتي وان كان خرجنا نكون مع بعض .
وقال لي بالنسبة للغداء يصير تطبخي من الليل ولكن إلى الآن أنا متردده وفي حيرة من أمري

اختي توكلي على الله

ما دام زوجك متفهم
و اولادك كبروا
ستلاحظين فرقا كبيرا في خروجك من المنزل و تكوين علاقات اجتماعيه
حتى لو كان الراتب قليل
لكن كونك موجوده في المدرسه مع اولادك تجعلك متطمنه عليهم
و معرفه بمحيطهم المدرسي و المدرسات



و من الناحيه الماديه الخصم في اقساط المدرسه ايضا يضاف للمرتب

خطوه تستحق التجربه

اختي العزيزة لو الشغل مو ضروري بلا منو

وخدي بالك من اولادك وزوجك احسن ليكي

اختي انا اعمل بمدرسة خاصة


ومعاي موظفات متزوجات وعندهم اطفال

ووحدة جدة بعد!! عمرها 45 سنة وعندها بنت متزوجة واولاد وبنات

اذا عندك رغبة وقادرة على تنظيم وقتك توكلي على الله

أخواتي الحبيبات الله يجزاكم خير على مشاركاتكم لي
وأخص بالذكر (ريم المدينه وعبوره وأم أثير أم سامح ابتسامة رضا شو باردبنت طيبة الطيبة فرح فديت زوجي ام البنينreemonsرازجي امل الحياة uuu333
وغدا حيكون الرد للمديرة وطبعاًحاأقولكم ايش سويت
لا تنسوني من دعائكم

السلام عليكم الصراحة أنا أشجعج على العمل حتى لو كانت ظروفج جيدة لأنك بتكسبين خبرة كبيرة من خلال تعرفج

على الأخوات هناك، وبخصوص عيالج شوفي إذا كانت ساعات العمل قليلة ماتتعبين إن شاء الله ولكن إذا شفتي إنها

طويلة أنصحج لا توافقين ، وجربي الشغل قدرتي عليه كملي ماقدرتي إستقيلي بس لا تحطين العراقيل قبل التجربة

سبحان الله مايدريكي ربما إرتحتي....واستحظري النية أختي أنك ستعملين بهدف الدعوة إلى الله فهناك الكثير من

يحتاج إليها الهدف الثاني تكسبين خبرة تثقفين بها أبنائك تتصدقين ببعض الراتب ....

وقبل كل هذا صلي الإستخارة وإللي فيه خير الله سيوفقك له فما خاب من إستخار ولاندم من إستشار.........

( إن شاء الله) تكتب هكذا

اولا زوجك هل هو موافق اولا ؟ لانه اذا موافق بيتحمل اشياء كثيره ؟تبين رايي اذا انت ماانت محتاجه للفلوس لاتقبلين الوظيفه بيتك واولادك اهم لان مع الوظيفه الا مايكون تقصير والله يوفقك

أخواتي وأخواني .....
أخيراً قررت وقبلت الوظيفة ورديت للمديرة بالأمس وتصدقوا حاسه بنشاط وحيويه وحاسه اني مبسوطه
وتصدقوا زوجي اللي كان عصبي ومتغير علي أصبح لطيف معي ويشاركني الحديث واتمنى انوا يكون كدا على طول يارب..
حبيت اقولكم ايش صار معايه وتشاركوني فرحتي