|
ساعدوني الله يخليكم
اول شي السلام عليكم و ثاني شي عساكم بخير و صحه و سلامه ,,والله يا الطيبين عندي مشكله مطلع روحي و ما ادري اشلون احل هذي المشكله ,,مشكلتي زوجي يموت و يحيئ بلجسم الابيض ,,اذا شاف حرمه بيضه يتخريط حاله و ينقلب وجهه ميت شكل و يضل يقول كلام ,ما يصيطر علئ نفسه ,,انا طبيعت جسمي لونه حنطي ,مع سمار بعض الاماكن ,,جربت اشياء وايد علشان يصير جسمي ابيض بس ما في فايده, طلعت روحي ,والله من اشوف زوجي يغازل الحريم علشان اجسامهم اموت من القهر ,,بس هو ما يغازلهم الهم ,يعني يقول كلام موجهه لهم و ما يسمع الكلام بس انا و هو ,و خصوصا احنئ بلغربه و تخيلوء معي ,,كلهم بيض الاجانب و انا رايحه فيها ,,كولولي شنو اسوي اذا الله خالقني جذي وين اروح ,والله بتطلع روجي ,,رغم ان زوجي مقصر معاي باشياء وايده الا و كل هذا يبي حرمه جسمها ثلج مثل ما يدعي زوجي الكريم ,,تصرفات زوجي علئ نظرته للحريم خلتني انسئ نفسي و اهمل نفسي مع اني والله دائما مرتبه و محضره نفسي مثل ما يقولون اخوانه المصاروء علئ سنكت عشره ,,بس من كبرت سالفه و شفته بعد ما يقدر يضم الي بقلبه صرت مهمله لنفسي مو من ناحيت البس لا من ناحيت جسمي ,,بدئ يمتن <<يسمن >><<بلمناسبه احنه اقصد اهلي عندهم وراثه اذا الواحد فيهم يعصب وين يطلع العصبيه مالته ,بل اكل ,و هذا الي كاعد يصير معي من اعصب اروح للاكل و ضل اكل و اكلي مو طبيعي ,,لا تحسبون اكل مثل الي مو شايف لا والله مو جذي بس اكل اكثر من طاقتي و فوق كل هذا اخذ ادواء مال مرضئ نفسين ,,الله يخليكم ساعدوني
|
هوني على نفسك اختي!
الموضوع أسهمل من كذا بكثير بس أنت اللي يهديكخربت على نفسك! أولا الزوج ما يحب الوحدة لانها بيضاء والا سمراء ولا حنطية والا مو حنطية! ولا حتى جميلة قبيحة طويلة قصيرة... هذي كلها خرابيط ما لها أي قيمة صدقيني الرجل يحب المرأة الواثقة من نفسها!! صدقيني كثير جدا من النساء ما يعرفون هالفن! صدقيني هذا فن اسمه الثقة بالنفس! انت من كثر مت تحترقين على هالموضوع وهو حس فيك وصار يزيد عليك!! اكسبي الرجل بشخصيتك... خليه يحبك لاجلك انت لأجل عقليتك ثقافتك تفكيريك اهتماماك طريقة في الكلام الخ! هذه هي الأمور التي تعلق الزوج بزوجته وغيرها أبدا أبدا ما له أثر... واذا شفتيه يمدح وحدة على شكلهااو بياضها علقي معاه!! ايه ليش لا قولي فعلا بيضاء... خليه يحس أنه مو ناقصك شي.. لكن لما تبينين له انك مقهورة راح يفهم إنك حاسة بنقص وأنت منت حلوة وشكلك مو مرة ووو الخ! حتى لو كنت فعلا ملكة جمال! بس إنت حسستسه بأنك واثقة من نفسك مرة ومو هامّك الأشكال اللي تشوفينها راح تلقينه هو نفسها ماراح يناظر او يهتم ... وحسسيه أنك تملكين شي فوق الجمال وهو الشخصية! إذا قدرت فستمكلين قلب زوجك للأبد! الله يكتب لك اللي فيه الخير |
حبيبتي اختي اتكاء حرف ,اشكرج من كل قلبي لان انتي الوحيده الي ردت علي ,ما ادري شفيهم الاعضاء البقيه ,علئ كل حال ,,اختي ما اعتقد ان الريال في فتره الخطوبه يعرف الحرمه ,بذات و انا غريبه عن زوجي و ما يعرف عن طبعي وايد ,وثانيا استمرت فتره الخطوبه مالتنه 3 اسابيع ,كان بايام الخطوبه يقول انا اموت بلجسم الابيض و المسكين كان متوقع ان جسمي ابيض ,لان كل من يشوف ويهي يكول انتي بيضه,,طول فتره الخطوبه زوجي ما شايف شي من جسمي و بعد الزواج تكدرين تقولين مثل الي نصدم لان كان متوقعني بيضه ,بس هو سكت و مضت سنين و الحين الاخ رجع مراهق يناظر الحريم الي اجسامهم بيض و انا والله شاهد ما ابين له شي ,مثل ما يكولون ماخذه الموضوع بروح رياضيه ,بس من داخل راح اموت من قهري ,,هو جنونه جسم الابيض ,,والله والله يا اختي انا ما ابين لزوجي اني مقهوره او الغيره ذابحتني ,ساكته و اذا كلمته يقول لي انتي مقهوره اقول له لابلعكس بس انا ما احب اشوفك طالع الحرام و ناسي رب العالمين ,,يترك هذي الحاله مده معينه و بعدين يرجع لها ,,ومن ناحيت ثقه انا عندي ثقه مئه بلمئه بنفسي من كل النواحي و اشوف نفسي حرمه كامله مكمله علئ شهادت الجميع و علئ قول زوجي ,,بس سبب اهمالي لنفسي الله عليكي يا اختي اذا كان زوجك جذي ما مهتم فيكي و انتي مدمره نفسك و تسوين له المستحيل علشان تسعدينه و يكون هذا جزاك ,ادري اغلب الريايل عيونهم زايقه ,بس مو مثل زوجي ,زوجي ما راحم احد ,من يشوف وحده بتلفزيون يقول هذا هي يبوها لي ,يقول كلام والله يخجل ,وغير و غير اشياء وايد تاذي من عند زوجي ,,اهمال الي و ما في بيني و بين زوجي اي شي غير اذا بقئ شغلته يصيح لي ,,هذا كل الي باقي بينه ,,شنو الي مغيره الله يعلم ,من ناحيتي ما مقصره معا و الله شاهد
|
زوجك فيه عدة مشاكل مركبه ......يعني عيونه زايغة+مقصر معاك+ يمدح حريم قدامك+مو راضي بشكلك.....مع اني احس ان مومتضايق من شكلك والا كان ردة فعله غير يعني كرهك بالمرة او كان بينصدم فيك او ابتعد عندك لاسمح الله...لكن كل الي فيه بقايا مراهقة وبنفس الوقت حاس انك ناقصة وماعندك ثقة....لو حس بقوة شخصيتك ماتجرأ ومدح حريم قدامك...علشان كذا نصائح اتكاءه حرف راااائعة...ابدأي من اليوم ورايح اظهري قمة الثقة بالنفس وامدحي نفسك وشكلك دااائما وقولي له ان الناس انهبلوا عليك في اي مناسبة.....وقولي له كل المدح الي تتلقينه على شكلك....واذا علق على وحدة ياتشاركينه في المدح او انك توقفينه عند حده بعده طرق...لأنه بصراحة عيب...وشي مايجوز اصلا.....انه يناظر بشهوة....ممكن تقولين له ترضى اقول هالكلمة عن رجال؟...أو مثلا قولي له :لو ماهمك انه حرام،ترى بالاتيكيت اكبر خطأ ان الواحد يمدح حرمه بحضور زوجته وانا سكت بس الظاهر حسبتني موافقة.....او اي كلمة بالصميم بعدين قومي
وطبعا ماوصيك بالنحف والتجمل...ولو ظهر فيك عيب لااا تقولين له وبيني له انه شي طبيعي في كل الحريم....او مثلا شوهي صورة الحرمة الي يمدحها ههههههه قولي له ماتدري عن المناطق الي ماتبان فيها ترى اغلبهم مليانين نمش او نقط بنية او اي شي هههههههههه حطي حيلك بهالاجانب.....لكن اظهري قمة الثقة نصيييحة...بيني ان الناس يشوفونك ملكة جمال ويقولون ياحظ زوجك فيك هههه |
ياختي إسأليه قولي ربي خلقني كذا شتبيني أسوي؟؟
وقولي له إذا مو راضي فيني ليه أخذتني وإذا راضي فيني إيش هدفك من الكلام اللي قاعد تقوله؟؟ والله يصبرك يالغالية |
والله يااختي خليك واثقة من نفسك اولا...وتاكدي ان اللي خلقك وخلقه اهو الله سبحانه
ومع احترامي لكن والله هذا مو اسلوب واحد متزوج وعنده حرمة... يعني حركاتها حركات مراهقة.... اهتمي بنفسك عدل .......... وذكريه بربه وانه يقدر يمنع عنه هالنعمة اللي قاعد يستغلها بالخطا |
حبيبتي
اتوقع زوجك يقول هذا الكلام بس كذا يعي عشان تبان غيرتكي عليه لا تضغطي على حالك و اهتمي بنفسك تحياتي |
طنشي يعني خليك واثقة من نفسك وحبي اللون
إلي ربي أعطاك هو ولو تبغي تحسني حسني بس مو قدامه يعني لمن تسوي أقنعة وكريمات مو لازم قدامه |
خليك واثقة من نفسك وحببي نفسك وهو كمان زوجك بلونك يعني لو قلك سمرا قوليله السمارة آمارة
وإذا تبغي تصيري بيضا لا تسوي شي قدامه عشان لا يحس إنك منتي راضية وإذا تبغي خلطات تفتيح أنا في الخدمة |
اقتباس:
|
والله صدق قهر
الله يعينك اختي لو انا بمكانك ما عرف شو كنت بسوي اكيد كل يوم بكون بمشاكل معاه يا ريت لو بيدي شي اسويه لك ولا اساعدك فيه لأني صدق حاسه بمشكلتك والله يكون بالعون حبيبتي (صدق رياييل ما تملا عينهم الا التراب) |
اشكركم حبايبي علئ الردود ,انا عمري ما بينت له اني مقهوره او الغيره تاكلني بس دائما اذكره برب العالمين ,بس الظاهر لا حياه لمن تنادي ,,الظاهر انا كنت عميهء ,كنت اشوفه ملتزم و يخاف من الله ,بس كل هذا طلع كلام بكلام ,,خلوها علئ الله و هو الي يعين
|
اختي
نصائح الاخت اتكاءه الحرف ممتازه اما من ناحيه تغزله بالنساء بشكل صريح امامك لا بد تنبيهه وايقافه ولو باسلوب مزحه بردحه لما يوصف وحده والا يتغزل فيها قدامك بعدها بشوي اذا شفتي رجال في التلفزويون او اي مكان امدحيه وحاولي تشوفي اشياء ناقصه او ماهي موجوده في زوجك وكأن الرجال الاخر لفت نظرك لان هالصفات فيه |
يقول كلام موجهه لهم و ما يسمع الكلام بس انا و هو
.................................................. .................................... اختي مع احترامي لك.....زوجك مو محترمك بالمره... شلون يوجهه كلام لحريم بوجودك.؟؟؟......وانتي شلون ساااااكته عن تصرفاته الغبيه.....اللي استنتجته من كلامك ان افعاله انعكست بشكل سلبي عليك لدرجه انك اهملتي نفسك وبدأتي تسمنين...... حبيبتي المفروض تكونين وااااااااااثقه من نفسك مو اي كلمه تهزك....... ولااازم تتصرفين من ناحيه كلام زوجك عن الحريم.......لازم توقفينه عند حده....والله انها افعال حتى المراهق يستحي يسويها اما عن سمار بشرتك فهذا خلقه ربك.....ومابيدك حيله......و زوجك تزوجك وانتي على هالحال......واذا مو عاجبه ليش من الاول تزوج.....!!!والله انه قهرني.....وانتي قهرتيني زياده على سكوتك عن افعاله السخيفه.... حبيبتي فهمي زوجك ان الاجنبيات اللي قاعد يخز فيهم ليل ونهار مو احسن منك.......يكفي انك مسلمه وانظف منهم.... وقولي له ان الاجنبيات بس منظر واذا قرب منهم راح ينصرع من ريحتهم اللي تصحي الميت......وكلهم امراض الحمد لله الذي عافانا.....وخصوصا الامراض التناسليه......فلا ينغر زوجك بالمظاهر...... الله يستر عليه من الغربه دووووووت |
قولي لزوجك ذا القروي هذول البيض اللي يقول عليهم يسوون برونزاج في الصيف
لان البياض هذا عندهم عادي ويموتون عالسمار ودايم مصممي الازياء يطلبون من العارضه البرونزاج اذا كانت بيضا عشان البشره السمرا الساحره تبرز جمال الفستان والبنات الحين معاد يحطو مكياج عادي الموضه البرونز بس اهم شي تهتمي بالنضاره عشان تبرزي ملامحك وفي الوان حلوه تكون عالسمر بس انت جربي ودايم امدحي نفسك وقولي بس حسافه زوجي ميقدر اظرب لك مثال الاجانب يعتبرون السمار جمال مثل بينلوب كروز وانجلينا جولي وجينيفر لوبيز كلهم سمر ويعتبرونهم اجمل جميلات هوليوود وقوليله الممثل توم كروز كان متزوج من نيكول كيدمان ابيض من كذ مافي بس خانها مع بينلوب كروز السمرا لانها جذبته اكثر اقهريييييييييييييييييييييييييييه لانه قاهرني |
| الساعة الآن 07:00 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©