|
خـــطـــيـــبي و الــــــــشــــــــك
السلام عليكم ورحمة الله بركاته...
أنا عمري 20 سنه... مخطوبه (مالكه) من تقريبا 6 شهور.... خطيبي يكبرني ب4 سنوات... هو إنسان جدا طيب, ويحبني واااايد, مدين ماشاء الله ويخاف الله... وحنون لأبعد حد... وأنا صج صح أحبه حب يفوق الحدود... وما أتخيل الدنيا من دونه.... الحين بتقولون وين المشكله إذا هو يحبج لهدرجه.... المشكله تكمن انه خطيبي شكاك بدرجه فضيييييعه! يعني إذا طلعت مع أهلي لازم أقوله بالتفصيل وين رحنا وشنو سوينا ومنو شفنا... وإذا جتني مكالمه من إحدى صديقاتي أو حتى إخواني لازم أعطي تقرير كامل عن المكالمه... وإذا اتصل ولقى تلفوني مشغول يجن جنونه ويكلمني باسلوب استفزازي عن الشخص المتصل... وإذا طلعنا مشوار مع بعض.... أول شي يسويه يجيك تلفوني, ومسجاتي, والأرقام اللي فالتلفون... أكيد بتقولون هذا الشك ما يجي من عدم.... السبب الأول والرئيسي انه خطيبي كان على علاقه ببنت حبها تقريبا 3 سنين قبل لا يعرفني... وعلى حسب كلامه كانوا يكلمون بعض بالساعات يوميا... بس للأسف خانت حبه وهدها ومن يومها فقد الثقه في كل البنات... وفي عامل ثاني يمكن له دور, اللي هو انه أنا اعترفتله اني كنت على علاقه بشخص قبل الزواج كنت أحبه ويحبني... والحمدلله تبت... أدري بتقولون المفروض ما كنت أقوله بس صدقوني كان يلح علي وايد وكان يبي يحلفني عالقرآن, وطبعا ما أقدر أحلف جذب عالقرآن... وعدته وحلفتله انه ما راح أخونه لو شنو ما يصير وهو وعدني بنفس الشي... كانت بينا جلسات مصارحه كثيره أبدأها أنا محاولة مني في اني اساعده يتغلب على شكه, بس يرجع يقولي انه شكه ناتج عن علاقة فاشله كانت تربطه ببنت... عيزت وأنا أحاول أخلي يثق فيني.... بس 6 شهور والحال من سيء لأسوأ... من فتره يحن علي يقولي الطريقه الوحيده اللي اتخليني أثق فيج هو انج تحلفيلي عالقرآن انج ما راح اتخونيني طول ما أنا على ذمته... وأنا ما راح أخونه بس كلكم اتعرفون شنو معنى انسان يحلف عالقرآن وشي أبدا مو سهل,,, إذا من البدايه جذي الله يعيني بعد ما انصير فبيت واحد والله تعبت منه.... أصبح وانا أبكي وأمسي وأنا أبكي, صرت ما أطلع من البيت بس عشان ما يشك.... لا اتقولولي اتركيه ما اقدر.... وايد أحبه والله... علاقتنا صارت رسميه... وبارده وأنا أخاف حبنا يموت آسفه جدا على الإطاله ساعدوني الله يخليكم... |
اقتباس:
اختي الكريمة نملة :d من الواضح ان الشك سيقتل الحب عاجلاً ام آجلاً 000 أتوقع بعد الزواج أن يضيق عليك أكثر 000 رأيي طولي مدة الخطوبة الى ان تشوفين تحسن 000 اما اذا لم يتحسن فتخرب الحين احسن من تخرب بعد الزواج 000 |
كلميه ووقفيه عند حده..
لازم يعرف إنه إذا ماعنده ثقة فيج فحياتكم مستحيل تستمر.. |
بالاضافه الى كلام اخوي كاره الرياضيات
انت غلطتي يوم قلتيله عن الماضي (علاقة الحب القديمه ) ، الان انتبهي لا تكررين هالغلط مرره ثانية ولا تستسلمين لضغوطه !!! انتبهي لأن بعد الزواج راح يضيق عليك بزيادة ، الحل اطلعي مع اهلك ، زيارات عادي ، وفي نفس الوقت عطيه الامان حسسيه انك انسانه عاقله وصادقه. واذا تمادى وقفيه عند حده عشان يخاف ويراجع تصرفاته تمنياتي لك بالتوفيق .................................................. .................................................. .. |
اقتباس:
مشكوره على الرد.... قلتي وقفيه عند حده؟! شلون؟! شنو لازم اسوي؟ |
اقتباس:
مشكوره على الرد حبيبتي... والله كلمته وااااااااااااااااايد ما ينفع معاه... كيف أوقفه عند حده؟! ساعديني |
اقتباس:
مشكور أخوي على الرد |
اقتباس:
حاول هالمرة تتخذين موقف القوة.. خلي نبرتك قوية وواضحة وجادة.. وقولي له ترى مثل ماتشك فيني وتراقب تحركاتي وجوالي ووو.. أنا أقدر أتخذ نفس الأسلوب معاك وأضيق عليك الخناق.. بس أنا ماخليت الشك يدمرني ويخرب علينا حياتنا.. لا تكون إنت الطرف اللي تخرب حياتنا.. وإذا كان كلامك له دايما بالقوة.. جربي العكس.. كلميه بهدوء وبلطف.. وبانكسار.. خليه يزعل على نفسه.. ويتضايق من تصرفاته ويحس بالذنب.. خليه يشوف الدمعة فعينك من الضيق. وصدقيني دموعك نقطة ضعفه.. الله يوفقكم.. |
لازم توقفينه عند حده خليج قويه معاه لو مره وحده و عطيه جمله وحده قوليله انا احبك وابيك و عمري مافكرت اخونك او اعرف غيرك واذا بتظل تشك ترى ماراح يفيدك بشي بس انه راح تعيشنا بمشاكل و انا مااحب الي يشك لان معناته انك مو واثق فيني .. وجذي خليه يتوب ..
|
لازم تفهمي خطيبك انه اللي حصل حصل ولايمكن يتكرر ... لانه الحكاية مو لعب ... اذا من البداية يعاملك بهذي الطريقة
أجل وش بيصير بعد ماتصيروون في بيت وااحد ... انا اقلك كييف توقفيه عند حده .... ؟؟.. كلمييه قوليله لمتى بنقعد زي كذه ؟.. ولمتى بتشك فيني ؟.. انا زوجتك والمفرووض تكوون بيننا ثقة متبادلة والابعدين مانقدر نعيش مع بعض ... لازم تغير اسلوبك معايا والا ما أقدر أستمر معاك ... وأنا متاكدة بيقلك كلام سئ ويحسسك انك لعابة لكن اتحملي واذا اتغير معاكي حااولي تكسبي ثقته ... هذا كل اللي عندي اتمنى اكوون افدتك ... الله يعينك حبيبتي .. لانه الثقة أهم شي بين الزوجين ... |
اختي الغاليه..........سبق وان طرحتي هذه المشكله ........ ولا اعلم ماهي الاساليب التي اتخذتيها معه طوال تلك الفتره؟؟؟؟؟؟؟
و اتوقع حبك له سيمنعك من اتخاذ موقف جاد معه...........فلو قلت لك اتركيه فلن تستطيعي........مع ان هذا هو الحل في نظري!!!!!!! واتمنى ان تستشيري طبيبه نفسيه او معالج اسري؟؟؟؟؟؟؟ فمشكلتك ليست بالسهله ونتائجها وخيمه....... اعذريني على القسوه في كلامي........فوالله انه من باب الحرص عليك فاكثر الفتيات قبل الزواج تحكمها العاطفه ولاتفكر صح واولهم انا...........فلا يحدث لك ماحدث لي......... نصيحه اكثري من صلاة الاستخاره والدعاء..........والله يوفقك. |
اقتباس:
إختي الغاليه الحنين... كلامج كله صح.... مع إني حاولت مرات كثيره اتخاذ موقف جاد معاه... حولت القسوه واللين.... قلتله ليش ما انروح دكتور نفساني أنا وانته.... يقولي انه مش الطبيب اللي راح يعطيه الثقه فيني.... مع انه مو ضد زيارة معالج نفسي... ما راح أقدر أتركه.... أحس راح تدمر نفسيتي أكثر إذا تركته.... صدقيني والله كرهت الحياه وصرت إنسانه كئيبه والسبه هو! بإختصار يئست مشكوره حبيبتي على الرد مره ثانيه.... كلامج كله عين العقل الله يوفقج فحياتج إن شاء الله |
طيب اختي......................حاولي مرتين وثلاث لاتيئسين كذا ............خلي عندك شجاعه وقوه..ومثل ماقال احد الاعضاء حاولوا طولوا الملكه.............. وصدقيني مع الوقت راح يتغير..........واستغلي نقاط ضعفه في انك تطلبين منه مره ثانيه انكم تروحون لطبيب او على الاقل تكلموه ...وقولي له مجرد استشاره و مراح يضرنا شي اذا رحنا ؟؟؟؟؟؟؟ولا تحسسيه انه مريض لازم يتعالج .................؟؟؟؟؟؟ او احكي له ان وحده كانت كذا وراحت للطبيب الفلاني وارتاحت؟؟؟؟؟؟؟
وان شاء الله نسمع اخبارك بحياة سعيده ان شاء الله........... |
الللي اقدر اقلك هو الله يعينك ولكن احسن شي في الانسان انه يكون حازم في مواقفه اسالي نفسك ازا دحين كدا بيعمل معاكي ايش رح يعمل بعدين
ازا مو عاجبك هادا الشي حاولي تغيريه وبأي اسلوب بينيله خطوره الموقف وايش ممكن يسوي الشك في حياتكم وكيف ممكن يدمرها بعيد الشر لو كان يحبك رح يفهمك وربنا يريحك عيوني |
اشعر وكأنك تتكلمين عنى
مشكلتى نفس مشكلتك والفرق انه خطيبى كان يعلم بخطوبتى السابقة وكل مرة كان بيقولى اكيد كانت بتحصل بينكوا اشياء وقولى لى وانا مش راح ازعل بالرغم من انى كنت بحلفله ماكان بيصدق ونفس الحكاية لما تليفونى بيبقى مشغول بيقلب الدنيا ولما ما اسمعه ويكون على الصامت بيقولى انتى اكيد خرجتى وخايفة تردى علشان ما اسمع صوت الشارع بتعرفى شو سويت؟ قلتلو انا مو موضع شك وعمرى ماراح اقبل ان احد يشك فى واذا عندك ذرة شك فى اتركنى ولقيت ما فى منه استجابة واتغيرت معاملته لى للاسوء وتركته وكنت كتير بحبه وحاول يرجع لى وما كان متوقع ابدا انى ممكن اتركه والحين كل يوم اتصال وردى زى ما هو لما تبطل الشك ممكن افكر ارجع لك لان الشك مرض ما اله علاج وممكن يخلى حياتى جحيم وانت لازم تعملى وقفة وتقوليله ماراح اقبل انك تشك فى ولما تبقى تشوف منى تصرف يستدى شك وقتها ابقى حاسبنى وحاولى لما تخرجى انتى اللى تحكيله بالتفصيل الممل شو سويتى ووين رحتى ووقتها ما راح يسألك ولا يحقق معاكى والله يوفقك ويهدى الامور |
اقتباس:
الله يفرجها عليك وعلي وعلى جميع البنات إن شاء الله.... والله إنه الشك يخلي الإنسان يكرهه الدنيا خصوصا لما ما يكون في شي يستدعي انه الطرف الآخر يشك.... والله لا بدر مني تصرف يخليه يشك ولا قلت شي عشان يشك وهذا الكلام على لسانه هو مش أنا اللي أقوله.... ودايما يردد انه شكه هذا من الشيطان مش مني أنا... قلتله طيب شنو تبيني أسوي! يقولي إحلفيلي عالقرآن ما اتخونيني! قلتله ما أبي أحلف عالقرآن شنو السالفه غصب! يعني ما تثق فيني إلا إذا حلفت! إذا حلفت الحين بكره ما راح يصدقني في أي شي إلا إذا حلفتله... والله تعبت منه يا إختي مره سويت مثل ما انتي سويتي... قلتله أنا ما أقدر أعيش مع إنسان ما عنده ثقه فيني! يعني لين متى راح إنظل على هالحال... قلتله حرام عليك يا ابن الناس امتعبني ومتوهم أشياء لا صارت ولا راح اتصير.... قال أنا أحبك وما اتهونين علي أشوفك تعبانه وتبكين ليل ونهار... إذا تبين نترك بعض.... قلتله وايد سهله على لسانك نترك بعض... قالي والله شي مو سهل بس عشان انتي ترتاحين ما أبي اشوفك على هالحال والسبه أنا... قلتله والله قلبي مو لعبه عشان تتركني متى ما انت بغيت... والله ما أدري شنو أسوي.... ما أعرف غير إني زهقت وتعبت من هالحال... انتي ماشالله عليج قويه قدرتي تتركينه أنا إذا تركته تتدمر نفسيتي والله... مشكوره حبيبتي على الرد والله يسهل أمورج ويسخرلج ريلج ويسعدج دنيا وآخره... |
حبيبتي السبب فانه بعده يشك انك رفدتي انك تحلفين ع القران انك ما بتخونينه ودام انك ما حلفتي معناه الاحتمال قائم ولا تنسي حبيبتي ان علاقته الاولية مأثرة فيه وايد وبعدين على ما اضن انتي ماراح تخونيه طول ما انتي على ذمته فمافيها شي انك تحلفي دام انك متاكدة ان هالشي ما بيصير و الله يوفقك.
|
واضح أنه مريض لأنه شكه ليس طبيعي أبداً في البداية عندما يطلب منك تقرير مفصل لكل ما قمتي به لا تقولي بالتفصيل أبداً مجرد مختصر مفيد وكأنه كلام عادي وإن طلب المزيد امتنعي وأصري وأخبريه أنكي تحبيه ولا داعي لهذا الشك وأنك الآن زوجته ويجب أن يحترم الرباط الذي يجمعكم ولا تقومي بسرد أي وقائع وزعلي ولكن أحب أن أخبركي بأنكي أنت أيضاً من زاد الطين بله حينما صارحته بعلاقتك السابقة ولا تقولي أنه قد أصر عليكي حتى وإن كان كذلك فمن المعروف أن الرجل لا يغفر ولا ينسى بعكس المرأة
ونصيحه أخيره كما قال الأخوة إذا كان من بدايتها هكذا فما هو الحال بعد ذلك لذا إن استمر على هذا الحال فالانفصال أفضل |
اقتباس:
أنا مو ضد إني أحلف... بس إذا حلفت هالمره راح يخليني أحلف على كل شي عشان أصدقه... |
اقتباس:
|
بليز اللي بيرد علي لا يقولي انفصلي واتركيه لأنه هذا هو الحل.... أكيد في حل ثاني... كل إنسان ممكن يتغير للأحسن بس السؤال كيف وشو الطريقه! أنا ما أقدر أتركه لأنه ببساطه أحبه من كل قلبي وعمري ما حبيت ولا بحب إنسان كثره... صح يشك فيني وهالشي وايد يجرحني ومرات يجرحني بكلامه لما يكون قاسي بس صدقوني أحبه وما أقدر أعيش بدونه بليييز بلييييز اللي بيساعدني وبيرد على موضوعي... تكفون لا اتقولون اتركيه...
السموحه |
الزواج الذي يبنا بالشك لن يكون زواج ناااااااااااجح
الثقه لازم تكون بين الزوجين بغض النظر عن الماضي يعني لازم كلاهما يثق في الاخر طبعا مع وجود الغيره البسيطه لان الغيره هي دليل الحب واذا ذهبت الغيره راح ملح الحب فأنا ارى ان تتركيه لان ورغم الحب الكبير الذي في قلبك سيختفي هذا الحب مع مرور الوقت بسبب هذا الشك ولن يبقى الا الحزن والزعل اسأل الله لك التوفيق وان تختاري ما هو صالح لك ولمستقبلك لـــــــــوزه |
الانسان ماتعرفين قيمته ولا حبج له اذا كان صج حب او بس مجرد اعتقاد انج تحبينه الا لمن تبتعدين عنه ..
الغالي مانشعر به الا بعد فقدانه .. فماتدرين اذا انتي صج تحبينه ولا لا.. وماتشوفين عيوبه .. |
شكرا لكل من رد على موضوعي.... الله يجزيكم خير ويوفقكم لكا ما فيه الخير يا رب...
محتاجه دعـواتكم |
نصيحتي لك وانا اخوك هجي عنة (فكة من جحا غنيمة) هذا من اول شهر .المفروض فية رومنسية
ودلع عرسان وهذا علي طول اخذ الدعوة شك وقلة ثقة |
| الساعة الآن 08:17 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©