|
اختي انخطبـت - ساعدوني ماذا افعـل .؟
[B
]السلام عليكم اخواني وخواتي اتصلت بوالدتي أٌم من احد العوائل تخطب لابنها الشاب... 27 سنه لتخطب اختي الكبرى 27 سنه والتي لم يرها احد قط رؤية شرعيه .. عطونا اسم الشاب وقالو يعمل في احدى الاداراة الحكوميه .. وبصراحه انا خايف مادري من ايش ( خايف من شعور اختي المسكينه اخاف يشوفها ولا تعجبه ..) وانا للحين ماسالت عن الشخص ومادري وشلون اسال عنه لاني لااعرفه ولا عمره شفته للحين .. والمشكله ان ام الشاب راح تتصل بكره تستفسر وش صار ..! لانه دقت تخطب يوم الاثنين الماضي ...وتبي تدق بكره .. وش الراي ياخواني . عودتونا على نصايحكم وارائكم اللي تجبر الخاطر والله .. انتظر ردود اخواني واخواتي .. واللي عندو سؤال يتفضل يستفسر .. تحياتي[/B] |
والله اذا هو غير جيد ليش توافقوا
|
اقتباس:
انا عدلت بالموضوع,, الان جاهز للتعليق.. |
ياأخي دعه يراها الرؤية الشرعية وعندها تتحدد الأمور لكن لاتدعه يأتي حتى تسأل عنه جيرانه وأصحابه في العمل فإذا أثنوا عليه فليراها ولا يداخلك الخوف على أختك فليست بالأولى ولا الأخيرة التي لايحصل لها النصيب بعد الرؤية الشرعية ولماذا هذا التشاؤم أصلا قد يعجب بها ويرى منها مايدعوه لنكاحها ...
|
انت ماتدري عن الاذواق يمكن انت تعتقد ان اختك ماراح تعجبه وربي يوفق بينهم وتعجبه او على الاقل يرتاح لها
واكيد امه حكت له عنها اعرف واحد راح خطب وحده جميله ولما شافها قال انا ما ارتحت لها وراح خطب وحده ثانيه مو حلوه ويقول ارتاح لهم راحه عجيبه اهم شئ اخلاقه والله يوفقهم واذا ما اعجبته كل شئ نصيب |
أرى أن توافقوا على ان تتم الشوفة الشرعية لكن بحضور النساء فقط من عائلته فاذا أعجبت النساء اسمحوا له برؤيتها حتى تتجنبوا الاحراج.
|
اخوي لاتخليه يشوفها الا لما تسأل عنه حرام اي واحد ويجي يشوفها وبس!!
وانا مريت للأسف بأكثر من شوفة شرعية بعضها مباشرة مايصير نصيب وبعضها يتطور الموضوع لخطبة رسمية ومهر وغيره ثم سبحان الله يتوقف الموضوع!! يعني الإحراج موجود موجود.. انت حاول تتسهل مع اختك وماتحرجها بالكلام وحاول بين لها ان اصدقاءك كلهم مرو مع اخواتهم بللي هي تمر عليه عشان يقل خوفها انا اطلع مع ابوي والللي مريحني ابو ي كبير في السن ومع ذلك انحرج منه مرة شلون لو صار اخوي!! اصلا اخواني لما احد يتقدم لي اموت من الحيا وهم ماكلموني لأنهم شباب شلون اختك الله يكون بعونها.. مع ان البنات يختلفون ماهو شرط تكون مثلي اولا.. خله يجي بيتكم تتعرفون عليه وعلى كلامه << مايصير تطلعون البنت لرجال حتى شكله ماتعرفونه!! بعد كم يوم اذا سألتو عنه خله يجي ويشوفها والله يكتب لها الخير ويوفقها |
اقتباس:
كلامكـ جميــــــــــــــل شو بارد ايضا ردك حلو وجميـــل ( لكن يااخوان امه راح تتصل بكره وانا للحين ماسالت عن الولد ... ؟ وش الراي وش اقول لامي عشان تقولهم ..؟ اااحراج ياجماعه ..؟ ) |
خل والدتك تقول.. اخوها يبغى يشوف الرجال ويتعرفون عليه وتعطيها رقمك
يدق عليك هو ووصف له البيت ويجي واسمعو كلامه وتعرفو عليه أكثر اذا عجبكم وضعه أسألو عنه ثم دق عليه وقل تعال شفها وانتهينا!! |
كلام شوبارد صحيح..
بكرة لما تتصل والدة الشاب.. خل الوالدة تقول لها إنك تبغي رقمه.. وإنت دق عليه.. وتواعد معاه.. وأقعد معاه.. تعرف عليه.. وقضوا يومكم مع بعض.. على الأقل تاخذ فكرة مبدئية عنه..وإذا ارتحت له تقول له جيب هلك.. وبعد مايجون أهله يشوفون البنت.. وبعدها تسأل عنه.. وإذا سمعت عنه كل خير.. ذاك الوقت يجي للنظرة الشرعية.. بالتوفيق.. |
أنا من رأييى ما تضيع وقت وتروح الليلة ومعاك اسمه بالكامل والمنطقة اللى يسكن فيها وتسأل عليه فيها وتسأل عن مدى التزامه وأخلاقه وعمله وهل يصلى الفروض أم لا وان شاء الله تلاقى 1000 واحد يساعدك ويقولك كل اللى تبيه. ولو اطمانيت صلى الاستخارة ورد على والدته بكره بالموافقة.
|
اقتباس:
بعد ما تقعد مع الشاب وتقتنع بيه وبعد السؤال عنه حدد معاه موعد عشان يجي يشوف البنت الشوفه الشرعيه.واذا شافها واقتنعو ببعض خلي الوالده تكلم امه وتقولها الله يحييكم عندنا.. انا ما انصح انه الحريم يجو يشوفو البنت ويقلبوها كانها بضاعه انا انصح طالما الموضوع دخل فيه الرجال يجي الولد يشوف البنت قبل الكل لانه ( الرجال يشوف شي الحريم ما يشوفوه ونظرة المرأه غير نظرة الرجل).،، وبالطريقه هذي فيها اقل احراج للبنت لو انه ما صار نصيب. |
أنا أشوف إنه احراج أكبر لما البنت يشوفها الشاب وماتعجبه يرفضها..
كم واحد ممكن يجيها وتكشف وجها.. وشعرها ( بعض الناس يعملوها ).. وبعدها يقول السلام.. الحريم يشوفونها أولا أفضل.. على الأقل مب كالرجال الأجانب.. وإذا عجبتهم يقولون لولدهم عن مواصفاتها وإذا عجبته يشوفها.. |
انا من رائيي يجي الخاطب يشوفها بغد السؤال عنه افضل من جيه الحريم الرجال اي بنت تدخل تعجبه اذا ارتاح لها بس الحريم يصير عندهم طلبات خاصه في الشكل والجسم بعدين الي بيتزوج الرجل مو اهله
وقبل هذا عليها بالاستخاره والله يوفقها |
اقتباس:
انا افضّل انه الرجل يشوفها اقل احراجا لانه الرجل لو ما صار نصيب مارح يقول في يوم من الايام اني رحت للبيت الفلاني وما عجبتني بنتهم اما الحريم ممكن يعملوا كذا.هذا غير انه البنت اذا ما عجبت الشاب تضمن انها لن تقابل هذا الرجل بالصدفه مره اخرى في حياتها عكس الحريم اللي ممكن تقابلهم مره اخرى في اي اجتماع نسائي،، اخيرا وليس آخرا وهو الاهم ان الرجل له مقاييس تختلف عن الحريم يعني ممكن الحريم يكونو دقيقين خصوصا في مسالة الجمال ويتناسوا الروح اما الرجل عند الشوفه الشرعيه فهو غالبا يطلب الشكل المقبول والراحه النفسية.. |
لا تقلقي نفسك وتنزعجي
كل شيء قسمة ونصيب والله هو الوهاب العاطي وبأرادته وبمشيئة الله ستنتهي كل شيء من مخاوف وهواجس ورهبة الموقف ان شاء الله ربنا يرزقها بالزين الصالح |
انا مع كلام اختي بحرينية ولكن ...
الافضل الحريم اول .. لانهم يعرفوون ولدهم وايش يبغى .. |
شكرا على الردود
لكن انا معكم ياللي قلتو ان الحريم اول يجون ويشووفوون البنت هذا بعد مااسأل عن الشاب ,,, لان الحريم يعرفون وش يبي ولدهم من مواصفات ,, بعدها راح يدقون هم ويقولون خلاص يبي يجي يشوف البنت .. اتوقع ان هذا الحل الاقرب بعد الســؤال عن الشــاب الخــاطــب شكرا للعموم .. |
أسأل عنه قبل مايشوفها وإذا كان الولد كويس
فالنظرة تحدد وترى كل شيء قسمة ونصيب والجمال ماله دور كبير لانه ليس الدافع الوحيد للزواج الله يكتب مافيه خير |
الله يكتبلها اللي فيه الخير وان شاء الله يطلع انسان صالح ويكون من نصيبها وتكون قرة عينه باذن الله
|
اقتباس:
والله يسعدها يارب .. ويوقها وييسر لها امورها يارب.. الجمال جمال الروح اخي .. الله يسعدها.. وعلى الشوفه الشرعيه .. خليها مناسبه ثانيه بعد شوفة النساء ..هو يكون معاهم;) مع السلامه/حبووبه |
الله يجزاكم خيرر
ويزوجكم ياشباب ويابنات ادعو لاختي ياجماعه فانا احس فيها انها تمر في مرحلة صعبه ادعو لها بالزوج الصالح .. وانا بعد لاتنسووني لكن خلوني بعد ماتدعون لاختي ادعولي .. |
شف اذا اتصلت امه قلولها خلي الولد يجي يتفضل عندنا 00 وقعد معاه ودردشو يعني شف شخصيته من خلال سواليفه
بعدين اسئله عن موقع عمله واسم المدير اورئيسه بالعمل واسأله وين بيتهم علشان تروح تسأل عنه بالحاره وسأله عن المسجد اللي يصلي فيه واسأل الجيران عنه واصدقائه بالعمل وقله يطيك مهله اسبوع علشان تسأل عنه بعدذالك اذا كان كفو اعطيه الموافقه النهائيه ثم الشوفه الشرعيه 00 وقبل هذا كله خلي الام تتفضل عندكم علشان تشوف البنت وبس وهذا اللي ماشين عليه الناس |
ديمو
مشكوور على المعلومات كلامك صحيح .. سلام عليكم |
هلا بشرتنا بآخر الأخبار ؟
أسأل الله أن ييسر أمرها .. وأن يسخر لها ما فيه خير وصلاح لها .. *** |
والله يا اخت عبير الاحلام اولا اشكرك على اهتمامك ..
ثانيا .. والله ماتصلو للحين ؟ مادري ليش .. يمكن هونو او شي.. بس اتضح من البحث ان الشاب اللي متقدم راتبه ضعيف جدا .. ولا يستطيع ان يتحمل تكاليف البيت .. وانا حقيقة لم اسال عنه جيدا .. الله يكتب اللي فيه الخير سلام |
أخي الكريم ..
مقدار أختك من مقدارك .. ولولا مكانتك في قلوبنا ما سألنا ثم .. الراتب الضعيف ليس بمشكلة مطلقاً فليست الماديات هي الأهم رتب الأولويات في سؤالك عن هذا الشاب وشاور أختك في الأمر فالدين والخلق أولاً .. فإن تجاوز هذا الامتحان انتقلا للخطوة التالية تأملا في مواصفاته عامة .. الراتب .. المستوى الاجتماعي .. الخ ولتسأل أختك نفسها هل هي على استعداد للتعايش مع هذا الشاب بوضعه الراهن أم لا .. أسأل الله أن يكتب لها ما فيه خير وصلاح .. وأن يرزقها من تقر به عينها و .. لاتنسَ الدعاء لها .. *** طمنا أول بأول أرق التحايا |
اقتباس:
|
لا تستعجب
بل هي فرصة للتمحيص والسؤال عنه بدقة كما هي فرصة لأختك لتكرار صلاة الاستخارة والله اسأل .. أن يكتب لها ما فيه الخير *** |
اقتباس:
يمكن يتصلون ويمكن لا لاتتكلمون عنهم كثير عند اختك نصيحة كأن مافيه موضوع من الأساس وبس الله يوفقها |
اقتباس:
كلام حلوووو وجميل وانا معه |
مسكينه اخييتي
اللهم زوجها عاجلا الزوج الصالح |
النظره الشرعيه ماتكون الا بعد السؤال عنه والرضااا والقبول
مو معقوله كل واحد يخطب نقول له تعال شفها وبعدين حط ببالك واختك كمان ان الجمال مو شرط ليوافق الخطيب يمكن تكون مقبوله الشكل ويكون طاير فيها ويشوفها الزوجه المناسبه الله يوفقهاااا ويسعدهااا واذاا ماحصل نصيب الله يكتبهااا في الايام القادمه |
| الساعة الآن 07:07 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©