|
مارأيكم بزواج شاب عمره 19 سنه
السلام عليكم
اخواني واخواتي الأعزاء بأدخل بالموضوع على طول ولد اختي بسم الله عليه يدرس في امريكا بعثه هذي اول سنه له ومن كم يوم جا من السفر اليوم يأخذ رأيي ويقولي ياخالتي أبويا مُصر انه يزوجني واني اخذ البنت وهي كمان تبعث معاي وانا متردد ماني مستعد للزواج ماني حاط براسي هذا الشي انا دحين همني الدراسه وبس وبعدين كم يكون عمرها يعني انا ابغا وحده عاقله مو تطفشني وكل شوي تقول طلقني ولا تجلس تبكي ولا تبدأ الغيره ولايش هذي معاك ولايش هذي تدرس جنبك يقولي ياخالتي هناك غصب عني البنات يعني الدكتور يأشر على كم واحدمن البنات والشباب ويقول انتوا عندكم البحث هذا يعني غصب عني اجتمع مع بنات وكل مره كذا ... هل هي تتحمل المشكله زوج اختي يقول انه خايف على الولد من الحرام والإيدز والزنا وماودي انه يغلط مثل ماأنا غلطت في شبابي وقاله اذا ماتبغا تتزوج تحلف بالقرأن انك ماتقرب الحرام . انا مع ولد اختي مثل الأصحاب يعني عارفه اخباره وحركاته و و و ولد اختي عاااااااااااااااااااااااااااقل جدا جدا بسم الله عليه يخاف ربي يحافظ على الصلاة بالمسجد في كل فرض حتى في امريكا واكبر دليل كل شهر تبعث مديره السكن عنده اخباره كامل ايش اكل ايش صرف فين راح متى رجع متى نام يعني متابعه كامله واصحابه كثير محترمين حتى الأجانب اللي عرفهم طبعا اكيد عارفين ان المباحث ايضا متابعتهم هذا غير منظمين البعثات متابعينهم يعني اي تدهور في الدراسه او في الأخلاق يرجعوهم وكثير رجعوا من الشباب الله يهديهم. ادري اني طولت عليكم بس ايش رايكم في انه يتزوج وما رأيكم بأنه يحلف على القرآن ولد اختي مررررررررره قلقان وشايل هم وانا في السياره معاه يقول زي كذا تكون زوجتي زي هذا اليوم زوجتي معايا حسيت انهم دخلوا براسه شي هو كان مأجله وربي يسعدكم جميعا ويفرج همكم وينولكم مرادكم ويريح بالكم ويسخرلكم اختكم في الله |
اذا يبغى ياتزوج .. خلوووه ...
واذا مايبغى لاتجبرووه عشان بكرة النهار لاتصير مشاكل بينه وبين زوجته وتوصل لاقدر الله للطلاق لانه اتزوج بدون اقتناع ... ياقلبي من حلف بالله صدقووه .. وانتي قلتي البعثات بتابعهم داائما واي غلطة يرجعوون يعني باذن الله مايحصل الا كل خيييير ... نصيحتي لاتجبروووه عشان لاتندموووووا ... وكمان لاتورطوا بنت الناااااااااس ... بالتوفييييييق حبيبتي ... ان شاء الله مايشوووف شر |
لا والف لا
الزواج في هذا السن ما ينفع ابدا حتى لو كان الولد عاقل الحين لو صار عمره 26 قال ابوي جبرني انا بدور على وحده انا اختارها ابعدوه عن العذاب من الحين ودام هو يخاف ربه و محافظ على صلاته فما عليه خوف في الغربه الله يوفق الجميع |
شوفي حبيبتي.. دام هو قال مؤجل الموضوع والحين همـــه الدراسه.. فلا تجبرونه عشان اذا صار اي شي كله بلومكم.. |
الصراحه ولد اختك عقله اكبر من ابوه ماشاء الله وازن الموضوع عدل وعارف شنو اضرار الزواج في هذه المرحله
وطريقة حلفه بالقرآن غلط غلط غلط تحسسونه بعدم الثقه و اذا اراد الله ان يضله ماراح تفيد زوجه ولا غيرها وان هداه الله لن يضله شيء كلمي زوج اختك يعدل عن قراره |
شوفتي اختي اول شي ..
خليه يستخير الله فما خاب من استخار الله سبحانه وتعالى.. وتاني شي انا تزوجت زوجي وكان عمره 19 سنة والحمد لله كل شي طبيعي مع انه كان جاي للدراسة هنا وما كان حاطت براسه موضوع الزواج ابدا لكن الغربة ومصايبها تخلي الغفلان يفتح عيونه عشان كذا نوينا الستر ووالده خايف عليه لانو يعرف شو اللي ممكن يصير معاه لانو جرب والحمد لله ربنا رزقه بابن عاقل جدا بس بردو خليه يستخير الله لانو الزواج متل ما الكل عارف فيه رزق وبرقة ان شاء الله والله يقدم اللي فيه الخير |
اختي الحبيبه كبريائي
كلامك سليم فعلا مانقدر نجبره ولانقدر نظلم بنت الناس مشكوره على مرورك ربي يسعدك ويفرج همك وينولك مرادك ويريح بالك ويسخرلك الزوج الصالح اختي الحبيبه عبوره مشكوره على مرورك هذي وجهة نظر اختي وياما ناس نعرفهم كذا حصلهم تزوجوا بدري وبعد فتره يقول مو هذي اللي ابغاها ويطلقوا بعد كم طفل وجهة نظرك سديده ربي يسعدك ويفرج همك وينولك مرادك ويريح بالك اختي الحبيبه ضايعه في الدنيا.<<<<<<. بسم الله عليك المشكله هو طيوب وحنون يعني لو رصوا عليه شوي يوافق يضغط على نفسه على حساب غيره بس كلامك سليم وان شاء الله خير ربي يسعدك ويفرج همك وينولك مرادك ويريح بالك ويسخرلك اختي الحبيبه المهمومه<<<<<<<<<<<الله يفرج همك ( اذا اراد الله ان يضله ماراح تفيد زوجه ولا غيرها وان هداه الله لن يضله شيء) كلامك رااااااائع بأرسلها لزوج اختي واختي وان شاء الله يخفوا شوي على الولد ربي يسعدك ويفرجهمك وينولك مرادك ويريح بالك تصدقوا ولد اختي يقول (على قد ماكنت مشتاق اني اجي ياليتني ماجيت عشان مايفتحوا الموضوع) مشكورين حبيباتي على مروركم وان شاء الله خير ربي يحفظ الجميع من كل مكروه اختكم في الله |
اختي الحبيبه شخصيه مجهوله<<<<<<<<<بسم الله عليكم انت وزوجك
فعلا يبغالي اذكره بصلاة الإستخاره الله يكتب له الخيره وان شاء الله خير ربي يسعدك ويفرج همك وينولك مرادك ويريح بالك انا سألته انت راغب بالزواج حابب تتزوج وتستقر مع زوجه تشاركك غربتك ؟ رد (الوقت غير مناسب دحين ابغا امشي بدراستي شوي على الأقل كم سنه وبعدين اتزوج) (اذا فكرت اني ابغا اتزوج بأكلمكم واقولكم جهزوا العروس)<<<<<<<<<<<على باله جالسه تنتظر اشارته وان شاء الله خير |
هههههههههههه
ضحكني تعليقك الأخير.. عزيزتي.. الأب بصراحة ماينلام.. هو خايف على اينه من الانحراف.. مثل ماصار له.. وخصوصا إنه توه شاب ويدرس بالغربة.. ومعاه بنات من جميع الاشكال والأجناس.. لكن.. في نفس الوقت هو صغير جدا على الزواج.. حرام.. توه ماطلع من البيضة....خخخخ فأنا من رايي دامه واثق من نفسه إنه ماراح يغلط بإذن الله.. فمافي مانع إنه يحلف على القرآن.. على الأقل أبوه يتطمن عليه وهو بعيد.. والله يبعده عن الحرام.. ويبعد الحرام عنه.. بالتوفيق.. |
اختي الحبيه بحرينيه ولكن
الله يدوم عليك الضحك والوناسه ولايكدر خاطرك شي يعني حبيبتي هذا رأيك انه عادي يحلف بالقرآن لأن ابوه قاله ياتقول ايه ابغا اتزوج ياتحلف على القرآن ياناس انا ماشفت مثل زوج اختي معقول لهدرجه طيب ممكن انه يلعب هنا وهنا ويجيه ايدز <<<بسم الله عليه الرحمن الرحيم وعلى كل شبابنا موشرط هناك في الغربه وان شاء الله خير الله يهدي شبابنا وبناتنا عن الحرام اللهم ادخلهم بدرعك الحصين واسترهم بسترك الواقي اللهم اكفيهم شر شياطين الجن والأنس مشكوره يابحرينيه على مرورك ربي يسعدك ويفرج همك وينولك مرادك ويريح بالك اختك في الله |
والله صغير يااختي حرام يتغرب
وبعدين هو راح يشوف بنات الدنيا انا الحين مع زوجي بالغربه ووالله اني اخاف عليه خااااااصه بالجامعات البنات حلوات واللبس فننننن والحركات خصوصا لما يعرفوا انه سعودي وبعدين سالفه السكن وانهم يطمنونكم عليه يمكن بس مايقدرون يراقبون تصرفاته ابداااااااااا اساليني انا انا عايشه بالغربه مع زوجي واشوووووووف اشياء بعيوني مو احد يقولي واذا هو ملزم يروح لازم يكون معاه مرافق وهذا كمان على حساب البعثه الله يستر عليه ويووفقه هو وزوجي وجميع شباب المسلمين يارب |
إذا لدية المقدرة المالية ولدية القدرة العقلية وتحمل المسئولية فليس هناك أي مانع بل هذا هو عين الصواب وكان الى وقت قريب الرجال يتزوجون وهم دون العشرين والحمد لله مشت أمورهم على خير مايرام إذا أنا أؤيد الزواج في هذا السن لكن بشرط القدرة المالية والقدرة على تحمل المسئولية ، وكان اشباب في صدر الاسلام يقودون الجيوش الجرارة لحرب الاعداء فعلى سبيل المثال لا الحصر نذكر أسامة بن زيد رضي الله عنه _- الإمام على بن أبي طالب كرم الله وجهه ورضي الله عنه--محمد بن القاسم فاتح بلاد السن والهند --هارون الرشيد) هؤلاء وغيرهم كثير قادوا جيوشا لنشر الإسلام وهم دون العشرين فكيف لا نعد شبابنا لتحمل المسئولية الزواج وهي أقل شراسة من الحرب في سبيل الله والله الموفق
|
أختي عمر العمر ما يحكم أحيانا ولد عمره 19 يكون أحسن من رجال بالأربعين بس إذا هو ما طلب لا تجبروه
ويحلف ويكمل دراسته والله يوفقه يا رب ويخليه لأبوه ويفرح أبوه فيه يارب يرفع راس أبوه وأمه ويبيض وجيههم |
إذا ابن أختك ملتزم بدينة وأخلاقة وعاداته ماراح يؤثر فيه اللي يشوفه بالغربة أبدا ، على طول ذكرتيني بابن أختي عاش تسع سنوات برة أربع سنوات في شرق آسيا وخمس سنوات في بريطانية وصل يوم الخميس ، يوم الجمعة على طول راح المسجد واستمع إلى خطبة يوم الجمعة بالصدفة إمام المسجد في هذا اليوم خطبته عن الشباب في الغربة وما يحدث لهم وأيضا كان يحث على الزواج لكي يحصن الشاب نفسه ، ابن أختي جاء وقال لي أنا لا أعرف أحدا هنا ولا يوجد عندي أصدقاء ولكن الإمام يتحدث والكل ينظر الي بالمسجد وكأنه يقصدني بالكلام وقال لي ليس معنى ذلك ان كل شاب يذهب للخارج ينحرف وأنا الحمد لله لم تغرني المثيرات أبدا وها هو الآن في بلده مرتاح وكون له الكثير من الصداقات وملتزم بدينه وحصل على وظيفة محترمة جدا والحين احنا ندور له على العروسة المناسبة ربي بوفقة ويوفق الجميع .
|
انا اخوي تزوج وعمره 19 بس عن افتناااااااااااااااااع تام
لا تجبروا الولد حرام عليكم خلوه على الاقل سنتين |
بالنسبه لي افضل قول الرسول صلى الله عليه وسلم ((( من يستطع منكم الباءة فليتزوج )))
ويمكن انتي افهم الخارج والدراسة برا كيف بتكون ، الفتن التي من حوله 0000000 الخ في نظري يتحمل غيرة زوجته ومتاعب الزواج زي ما يقول ، ولايقع فيما لايحمد عقباة هذه وجهة نظري واسال الله ان يحرسه ويرجع سالم 0 |
اختي الغاليه المغتربه......الله يرجعكم بالسلامه
كلامك صحيح ربي يسعدك ويفرج همك وينولك مرادك ويريح بالك اخي الفاضل الثعالبي....الله يرضا عليك في الحقيقه كلامك رائع بس عندي سؤال ما المقصود بالقدره الماديه؟ هو يستلم الأن من البعثه 5 الاف ريال طبعا حولها بالدولار يقولي انا اخر خمس ايام اجلس على المكرونه وما اطلع واوقف السياره واروح بالدراجه هل معقول تكفيه مع زوجه وهي كمان تبغا تدرس اكيد ولا ايش رايك يعني لو في احد بالغربه مع زوجته ممكن يقولنا كم تقريبا تكاليف الشهر اخي هو مورافض الفكره بس يقول ابغا امشي بدراستي ماني مستعد أبد دحين اخي طيب ايش رايك يحلف؟ ومشكور اخي على وجة نظرك ربي يسعدك ويفرج همك وينولك مرادك اختي الحبيبهlovely luluالله يتمم عليكم كلامك صحيح آمين الله يسمع منك ويهديه يبعده عن الحرام ربي يسعدك ويفرج همك وينولك مرادك ويألف بين قلوبكم ويجمعكم على خير اختي الحبيبه سرور العمر....الله يطول عمرك بالسعاده حمدالله على سلامته وعقبال ولد اختي يرجع متخرج وكلام ولد اختك صحيح مو كل الشباب اللي يروحوا يخربوا الله يحفظهم وربي يسعدك ويفرج همك وينولك مرادك ويريح بالك اختي المرتاحه .......الله يزيدك راحه وهنا بسم الله عليه اخوكِ ويوفقه انا قلت له انت تبغا تزوج قال لأ وان شاء الله خير ربي يسعدك ويفرج همك وينولك مرادك ويريح بالك اختي أم معاذ ........ ربي يجعله بار فيكم كلامك ادهشني واعجبني وان شاء الله خير ربي يسعدك ويفرج همك وينولك مرادك ويريح بالك اخواني واخواتي اليوم كلمني يقول اقدر احول دراستي هنا عشان يلغوا الفكره!!!!!!! السؤال هل في ناس ترضا تزوج بنتها لواحد لسه يدرس وبهذا العمر ويغربوا بنتهم؟ |
العمر مو مشكله ممكن اللي عمره 19 يكون اعقل من رجل في الاربعين من عمره
و يمكن الرجل الناضج يكون تفكيره مثل تفكير ابن عشر سنوات!:23: المشكله انه ابن اختك ما عنده رغبه في الزواج و المفروض انه لا يجبر على الزواج انا اقترح انه ابوه يروح يزور ولده في امريكا عشان يشوف الوضع صحيح انه فيه فساد بس مش مثل ما الاب متخيل انا درست هناك لفتره |
حبيبتي المبلغ اللي قلتيه فعلا مايكفي زوجه معاه
لاانك لو اتحوليها للدولار تقريبا راح اتصير حوالي الف دولار وحاجه بسيطه والشقق هنا غاليه ان كان بيجلس في مكان نظيف وبعيد عن الاماكن المشبوهه ..فالسكن بيكلفه ..غير المصاريف الثانيه من اكل ولبس وطلعات ثانيه حبيبتي انا عاذره ابوه بصراحه انا في امريكا واللي اشوفه شي يشيب الراس وانا دايم احمد ربي ان زوجي ماجا من دوني ولا جا قبل الزواج ....مغريات بالهبل ...والفتن تلاحقك حتى لو كنت في بيتك واهنا شباب اكثير عاملين العجب عايشين مع القيرل فريند ومتفقين قبل الرجوع بينفصلو عن بعض يعني اشياء ملخبطه اهنا ولا اخفي عليك ...حتى الملتزم احيانا هنا يخف التزامه الى اقل من النص وش اقوللك يااختي زواجه الحين وبهالظروف صعب اشوي ...بس اعتقد لو زوجته تنظم معاه في البعثه راح يصرفو لها راتب ؟ صح ؟ عموما لاتضعغطو على الولد لاان مثل ماقالو الاخوان ان تزوج من غير اقتناع وجابها معاه في الغربه ومع المشاكل بالعكس راح يتبهدل عن الدراسه ويتشوش بس بماانك انتي خالته وصديقته دايم نصحيه ..وان شاء الله اتخللص مدة دراسته على خير يارب |
أختي الكريمه
انت اعرف بولد أختك الله يخليه لكم بعض الرجال تكون طاقته كبيرة للزواج والبعض الاخر يكون اقل فأنا اعرف واحد تزوج وعمره 18 سنه وواحد تزوج عمره ثلاثين فالرجال يختلفون في شدة الرغبة . فإذا كان ولد اختك لديه رغبه كبيره فزوجوه افضل حتى يرتاح باله لأن الزواج سيكون معين على الدراسة بشرط أن تكون زوجته لا تدرس حتى تكون عون له في غربته وتستقبله حين عودته من الدراسة في البيت وتهيئ له البيئة المناسبة للدراسة . وأنا اخاف عليه من شئ واحد فقط وهو (( الحب )) من زميلات الدراسة لأن عواطف الانسان لا يستطيع ان يتحكم فيها . تحياتي |
اخي الفاضلMr.Dad
كلامك صحيح وفعل ولد اختي موراغب بالزواج المشكله ابوه لأن ابوه من اكثر من عشرين سنه كان ببعثه وماترك شي ماعمله والأب خايف ان ولده يعمل مثل ماعمل الفرق في (النيه) ان الأب كان رايح للعب والمصخره والأبن رايح للدراسه طبعا الأب الله هداه الحمدالله عشان كذا محاصر ولده ومن ناحية انه يروح له في امريكا الولد كل يوم مع اهله على الماسنجر بالكميرا يعني معاه اغلب الوقت ربي يسعدك ويفرج همك وينولك مرادك ويريح بالك اختي الحبيبه نرجس الله يسعدك ويحفظك انت وزوجك كلامك صحيح مافي بلد مافيها خراب بس الله وحده هو الحامي وصح ان البنت اذا راحت بعثه يصرفوا لها راتب بس اعتقد ان مايكفي لأن دحين هو وواحد من الشباب متقاسمين الشقه كيف زوجته ان شاء الله خير وربي يسعدك ويفرج همك وينولك مرادك اخي الفاضل صاحب الرأي السديد <<<<الله يسدد خطاك احرجتني من اني اعرف بولد اختي بس كلامك صحيح فعلا عندي اثنين من اولاد اخواتي كل واحد منهم يختلف عن الثاني واحد يبغا يتزوج بأي طريق المهم يتزوج بيموت على الزواج والثاني الا هو هذا عادي عنده موذاك الشي مره سألته .... يقول في احد مايحب يتزوج <<<<<<<<<<احرجني بس من ناحية انه ياخذ البنت من غير ماتدرس مشكله فعلا تخيل معايا صغيره بالعمر يعني لسه ماشافت وشبعت وماعندها دراسه وبالغربه ولوحدها من غير اهلها وزوجها مشغول بدراسته بتنجن وتجنن زوجها معاها ياأخي انا وهي انا اللي شبعت من الدنيا والسفريات لو بأسافر مع زوجي للخارج<<<<<<<<<<<ياحلو هالكلمه يارب يبلغني ولايحرمني ويبلغ الجميع احب اني اخرج وانطلق واشوف العالم واكيد اني بطفش لوحدي لما يكون يدرس<<<<<<اقصد يشتغل مشكله الين دحين يدرس<<هاهاهاها وصدقت اخوي وانا كمان خايفه من الحب وهالحركات بس الله الهادي ويكفيه شر الحاسدين وشر بنات الحرام وعيال الحرام وشر شياطين الجن والأنس ربي يسعدك ويفرج همك وينولك مرادك ويريح بالك ويسخرلك ويرضا عليك اخواني بكره بيجي عندي وبأخليه يقرأ الموضوع ويرد عليكم اذا وافق وان شاء الله يكون لقى الحل المناسب الله يكتب له الخيره الطيبه استودعكم الله |
اقتباس:
|
من استطاع منكم الباءة فليفعل فإنه أحصن للفرج وأغض للبصر
والله تعالى يقول (( أن يكونوا فقراء يغنهم الله من فضله )) والسلام |
بصراحه لا تغصبوا عليه موضوع الزواج وأنا أوافقه الرأي تماماً هو لازال صغيراً على تحمل هذه المسئولية وبما أن الشاب الآن مركز على دراسته فهذا دليل أنه لا يوجد لديه أي تفكير بالموضوع وعلى فكره مشاعره الآن غير ثابته يعني من الممكن أن يعجب بمن ستكون زوجته الآن ولكن بعد مرور عدة سنوات قد تعافها نفسه نتيجة نضجه العقلي والعاطفي وتكون الصورة الواضحة لديه لشريكة العمر المناسبة وحين مقارنتها بزوجته التي تزوجها في سن المراهقة عندها تعافها نفسه
أسأل الله أن يثبته على أمور دينه ويعينه في شؤون دنياه وفقه الله لما يحب ويرضى |
عمره صغير على الزواج وطبعا هذا السن خطر جدا انا اشوف انه يصبر شوي على الاقل لين ينتصف بالمده على الاقل
منها يكبر والي بيتزوجها يكون عمرها مناسب انا شوف يصبر شوي مادام انه عاقل ماشاء الله عليه ودايم ذكريه بربه الظاهر ان الي يروح بعثه طالب يعطونه 1150 دولار وذا تزوج يعطونه مثلها بعد لزوجته |
اختي( شذى )
والنعم بالله وربي يسعدك ويفرج همك وينولك مرادك اختي الحبيبه (دلع ودلع) الله يرزقك بزوج يعيشك بدلع فعلا حبيبتي هذا عين العقل وهذا اللي احنا نقوله لأن الواحد يتغير تفكيره بس الله يعين ويكتب الخيره الطيبه ربي يسعدك ويفرج همك وينولك مرادك ويريح بالك اخي الفاضل (نايف) اسعدك الله وريح بالك انت وزوجتك الغاليه التي احببتها في الله صدقت اخي هو مو حاط الموضوع براسه هو يبغا يمشي كم سنه وبعدين يتزوج بس اللي حط الموضوع في راسه واصر عليه ابوه خايف عليه من الإيدز الله يكفينا الشر. وهل صحيح اخي اذا تزوج يعطون لزوجته مثل مايأخذ؟حتى لو مادرست؟ عموما اخي اسعدني مرورك وافتخر فيه ربي يسعدك ويفرج همك وينولك مرادك ويريح بالك ويسخرلك ويعلي مراتبك ويرزقك الذريه الصالحه الباره ويجعلهم قرة عين لكم ويألف بين قلوبكم حصنتكم بلا اله الا الله |
اخواني واخواتي اشكركم على مروركم ومشاركتكم
اليوم ولد اختي قرأ ردودكم وكأنه بدأ يقتنع وقالي خلاص دوروا لي زوجه صالحه وعاقله الين السنه الجايه لما اجيكم وان شاء الله خير وطلبت منه صلاة الإستخاره والله يوفقه ويكثر من الدعاء وسألته عن مواصفات الزوجه اللي يبغاها خصوصا المواصفات اللي يخجل منها الشباب ان يصارحوا بها اهلهم والله يكتب له الخيره وربي يسعدكم جميعا ويفرج همكم وينولكم مرادكم ويرزق الشباب زوجات صالحات يعينوهم على طاعة الله ويرزق البنات الأزواج الصالحين اللهم ماسألناك اياه الا اعفافا لنا واعفافا لهم برحمتك يارحيم اختكم في الله |
ولله يا اختي روح الغالي حسب معلوماتي
ان الطالب اذا كان متزوج واخذ زوجته معه يصرف لها الاثنين مثل بعض وهذي صارت مع اختي وزوجها من زمان |
بصراحه شديده انا مع الاب في حاجه وحده وهي انه يحلف انه مايتوطأ بفتاه لان ابوه حاس وشايف اللي الولد ولا انتي شايفينو ومادام انتي تقولي انه الولد عاقل ويخاف الله وأصحابو محترمين وعليهم مراقبه أخلاقيه هذا مايمنع انه يحلف لأبوه علشان يتطمن عليه . وأختلف مع الأبو انه يزوجه البنت غصبا عنه لأن هذا الشئ راح تكون ردة فعله عكسيه وبالذات ان الولد مو حاط فراسه الزواج وبصراحه الولد بدري عليه يحمله مسؤلية زواج لانه الزواج ليس فقط جنس بل هو مسؤليه كبيره جدا ولنفترض انه تزوج وسافر والبنت حملت وانتم عارفين انه المراه قد ايش تتعب بحملها هالمسكين وش ذنبه يقعد يذاكر والا يداري حمل زوجته وتعب طفله ومذاكرته وهو على حد علمي انه يدرس وش لون بيصرف عليها
انا اقول للأب الحنون خلي ولدك يعيش حياته في ظل القران واصرف نظر عن زواجه , الا اذا جاك وقلك ابي أخطب وزوجني يبه وقتها يالاب الحنون خلي عنك التدخل ولا تفرض عليه وحده مايبيها ,,,,,,آسفه طولت عليكم |
ورود وزهور
احترت انت مع او ضد عموما الأب ماغصب الولد على وحده معينه وانت كلامك صحيح 100% ماعليه خلاف وانا مثل ماقلت الولد وافق ان نبحث له على زوجه بس شرط شرط واحد..............(انها تكون عاقله وتخاف الله ) وقال بس تلاقوها كلموني اجي اشوفها واللي ربي كاتبه انا راضي في. طبعا الله يعيننا يبغالها بحث شديد لأن صعب نلاقي بنت بهذا العمر واهلها يرضوا يزوجوها ويغربوها انا وصيته بصلاة الإستخاره وحذرته اذا عرضنا عليه بنت يوافق من غير اقتناع لأن مالها البنت ذنب واحنا نتمنى للبنت مثل مانتمنى لنفسنا اللهم ماسألناك اياه الا اعفافا لنا واعفافا لهم ومشكووووووووره على المرورك ربي يسعدك ويفرج همك وينولك مرادك ويريح بالك اختك في الله |
| الساعة الآن 12:43 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©