|
غلاء المهور كابوس يمنع الشباب من الزواج ...!
والله قهر
خلوني اسلم لانسى السلام عليكم ورحمة الله وبركاته مساكم الله بالخير احس فيني حرة وحرار لازم اطلعها وكتبت الموضوع با ادخل بالسالوفه على طول قبل شوي طالع بروح اشتري لي بيره عادية من دون كحول ^ ^ ^ ناوي اخربها < المهم ودخلت السوبرماركت واخذت البيره ووقفت سرى مع الناس الي بيحاسبون وهذا بزر يلعب هو واخته منحاش بالعربيه ومدري الا العربيه << موب القناه << يامصلك : الا العربيه خاشه بظهري الله لا يعيدها من بيره المهم ويوم وصل لي السرى وجيت باحاسب وافتح المحفظه طلع مافيه الا ريال شوفي وجهي بين الناس المهم واطلع من محفظتي بطاقة الصراف واعطيها المحاسب قام يطالعني بنص عين ابو هنود ولسان حاله يقول شكله توه مطلع بطاقة صراف والناس وراي تطلع فيني يققولون وش يبي ذا بيره وبريلين ومسوي زحمه المهم ماضبطت العمليه كل شوي العمليه غير مقبوله كالعاده المهم قال لي الهندي صديق في صراف برى روخ سوي صرف مشين ( machine )خراب عاد انا قلت مشين خراب مشين خراب نروح نصرف بس ماراح اوقف سرى المهم رحت اصرف وانا اصرف طلعت حسابي الا كان بحسابي ......................... رقما ما وبهذه اللحظه جلست افكر بالمستقبل تذكرت على طول اخوي اخوي زواجه ان شالله يوم السبت حياكم الله كلكم يوم السبت هناك الساعه 9 بعدد العشاء لا حد يتاخر ومالكم عذر المهم بدخل بالمهم والي يرفع الضغط تصدقون يا ناس اخوي وباقي الشباب بشكل عام عشان يتزوج يكلفه زواجه حوالي 180 الف او اكثر ليش يا ناس والله لو تفكرون بعقل في ناس بيقولون عادي والله ما تكلف وانا اقولهم الا تكلف ونص اذا انا الحين لي متوظف حوالي كم سنه ماقدرت اجمع المبلغ ويوم جمعته طارت بالاسهم بلله عليكم متى بيتزوج الشاب؟ اذا كان الشاب بشكل عام اول مايتخرج من وظيفته اول مايفكر بعد مايتوظف وشلون يشتري سياره يروح يداوم عليها انا هنا اتكلم عن الطبقه العظمى من المجتمع في ناس اوكيه الله منعم عليهم وتلاقي الواحد ابوه يتكفل فيه الين يتزوج انا لا والله لا ابوي بيقولي خلاص توظفت انت مسئول عن نفسك عندي غيرك 10 بيقول لي الي علي درستك وربيتك وعلمتك والحين جاء الباقي تكمل طريقك بنفسك معه حق كثر الله خيره الي وصلني الى نص المشوار المهم بعد السياره هذا اذا اشتراها كاش والغالب تقسيط اذا خلص التقسيط بعد سنتين وبداء يجمع للزواج بلله كم يبي له عشان يجمع حق الزواج انا باقول مثال قريب مني واشوفه الان قدام عيني اخوي يوم جاء يخطب دفع مهر 70 الف ريال حلو القصر وماني عارف ايش كلف حوالي 35 الف حتى الان 105 الف شقه ايجار شبكه حوالي 30 الف ^ ^ ^ كم وصلنا حوالي 135 الف حلو تاثيث الشقه حوالي لو قلنا اضعف الايمان لا يقل عن 20 الف وصلنا لـــ 155 الف شهر بصل حوالي 15 الف 170 الف غير الصباحيه غير الكماليات واشيياء ماذكرتها سقطت سهوا ايه لا تنسون الطقاقات الظاهر بحوالي 8000 ريال البطاقات بـــ 4000 ريال انا عارف فيه اشياء بتقولون مو محدود يسوي بذا السعر فيه اشياء ارخص بس برضوا الناس الي جاي تخطب بنتهم لازم ترضيهم مو بنت ما خذه من الشارع صح ان البنت ودها مثل باقي البنات بس المساله معقده بجد معقده بلله ياناس وش تتوقعون حياة واحد تزوج وبداء حياته بالدين وش الحل شباب نجلس عزاب ونستمر بالنت ولا نتزوج من برى ارخص ومو احلى بس ارخص ^ ^ والله الموضوع جد المهور غاليه V V V V V V V V على فكره انسدت نفسي وما شريت البيره ملطوش من منتدى |
موضوعك خفيف دم اقرأ واضحك بس انقهرت يوم جت سالفة تزوج من برا :29:
مصاريف هالزواج مهي غالية وبس الا نااااااااااااااااااااااااااااااااااااااااار مهر غالي وشبكة غالية موت انا عندي الشبكة ب15 ألف غالية مرة وكشخة بعد وش أبغى بالناس يجون الكوشة لونها كذا العروس لو تسريحتها كانت كذا كانت أحلى.. زواجهم روعة بس طقهم مهو زين شفتي امالمعرس شلابسة الله يفشلها.. العروس شوي وينشق فمها فرحانة << الحمدالله اكيدفرحانة ليلة عمرها تبونها مكشرة!! وآخرتها يدخلون ياكلون ويرقصون يشبعون ويطلعون ينتقدون وهالفلوس وهالخساير ضاعت عشانهم قههههههههههههههر الا والله هالمصاريف الواحد يحفظها ويمتع نفسه بشهر العسل ويروح لأحلى الأماكن ياحلو الزواج العائلي فيه بركة |
ما أمر الله ولا رسوله بذلك وإنما هو من تفاخر النساء فيما بينهن
وضياع كلمة الرجال للاسف 00 والنتيجـة : يختنق الشاب بديونه وتكاليف المعيشـة فلا يجـــد وقتا للحــب ولا المودة ولا الرحمة لزوجته وإنما ينشغل باله بسداد الديون ويواجه ضغوط تكاليف المعيشة ، فتكون نفسه عصبية وعند أتفه مشكلة يحاول التخلص من أعباء الزوجة بالطلاق للتفرغ لتسديد الديون ، وهذا من أكثر وأهم أسباب كـثـرة الطلاق في مجتمعنا ولا حول ولا قوة إلا بالله 0 اسأل الله أن يوفقك أخيك بالحياة الزوجية ويعينه وكل شاب 0 |
والله المهور غالية
وما راح اقول لكم كم دفعت اسد نفوسكم وخاصة الشباب المقبلين على الزواج خلها مفتوحه أحسن ولكن اشعر أن الامور هذه الايام تغيرت شوي وصارت أقل أما الزواج من الخارج فأنا من اشد المعارضين له وعلى فكره فيه شباب تزوجو من الخارج وبعد مضي كم سنه وتغير جمال الزوجة التي تزوجها لجمالها تركها وترك اطفاله وبدأت المشاكل . وللمعلومية هذا الكلام لا ينطبق على الكل لأن ما فيه مثل بنت البلد تفهمك وتفهمها وعادتكم وحده ووصيك ياخوي لا تتزوج الا وحده تدفع لها مهر يناسب إمكانياتك وحتى لو تأخرت واحسن النية وتوكل على الله وبيوفقك الله . تحياتي وفي حفظ الله |
يمدحون البيرة هولستين بالتفاح :d
|
بصرف النظر عن المبلغ حتى لو دافع اقل انا ما ائيد غلا المهور
لكن ادا بتشتري سياره كم بتكلف 100 او اقل شوي وشوف كم مره بتصلح وتزين فيها مستخير على نفسك زوجه وام عيال مدى عمرك وتحسب حسابه والسياره لا ابد عادي مو غاليه عليك ولا على اصحابك الي بيركبوها معاك لا تقولي سيارتك صغيره ورخيصه بقول انك منت خليجي او سعودي الزواج حياه مو حسبه كم ادفع وكم احط |
السلام عليكم انا مش من راى صاحب راى سديد مع العلم اننى افضل قرات مواضيعه وردودة ولكن انا من بلد عربى ومتزوج من خليجى ولكن انا وهو بيننا توافق كبيييييييير والحمد لله وفى الاخر الموضوع نصيب ولكن يوجد عيب من الزواج من برة بلدك وخصوصا السعوديه وهو موضوع التصريح للزواج من برة المملكه مفروض كل الدول العربيه يكون بينها وحدة مش بيعذون الرجل لكى يصحب الزوجه معها الله يهدى علينا الحكومات
|
السلام عليكم ..
أخي الفاضل .. كلامك هذا المفروض كل أب وأم يسمعونه وغير تكلم كثيييير .. بس , لا حياة لمن تنادي .. والله من جد مصارييييف بالهبل , أنا مافي الا شي واحد قاهرررني ( الحين الزوج يحط كل هالفلوس بس علشان يونس العالم , بقاعة مدري بكم وعشاء على طاولة نص كيلو طولها , وكروت منقوشه بمدري ايش والطقاقة لازم تكون برتني سبيرز والا شاكيرا , مدري بكم ألف .. يعني كأنهم يدفعون مهر للطقاقة بعد .. , ووو الخ ) فلوسك هذي خلها لك ولزوجتك وبيتكم .... اما بالنسبة للمهر آآآخ , من جد شي يقهر , يعني الواحد بعد ما يدفع اللي عنده ويتنتف , يجي بعد الزواج هو وزوجته ( يناظرون بعض ) فلوسهم راحت .. وتبدأ مرحلة الديون عاد الله لا يبلانا بس .. وهذا من اسباب عدم زواج البنت هنا بالسعودية ( ماخذين ان المهر شي يكشخون فيه قدام العالم , أووه هذي بنت فلان مهرها بكذا وكذا ) ليييييش ؟ بضاعة هي ؟؟ والا سلعة ؟؟ .. لو تتعدل مشكلة المهور كان كل واحد تزوج .. وكل وحده تزوجت .. وكل اثنين متزوجين يصير عندهم فلوس بعد الزواج ( يلعبون فيها لعب ) .. يووووه .. بهالموقف اذكر حال صديقي .. راح خطب وحده , ام البنت وابو البنت قالوا له .. خذها بملابسها والمهر اللي تبيه .. والشخص هذا تزوج أمس ( أمسسسس ) تصدقون ؟؟ وفلوسه رح يدلع بها زوجته سفريات وطلعات وهدايا وشقة وسيارة ... ووو الخ .. الله الهادي بس .. أخوك More Than a MAN |
صح الزواج الخارجي ارخص بأوله لاكن بالتالي بتبلش بفيز ابوها وامها واخوانها يبون يجون ويبونك توفر لهو وظيفه
اجل وش ماخذتك علشانه علشان سواد عيونك هههههههههههههههههههههه اهم شيء صف النيه وانا معاك ان المهور صارت غاليه بس فيه ناس تبي الستر حق بناتها اهم شيء تكون صالح وشهاده معتبره ووظيفه وماراح احد يردك علشان فلوس بالتوفيق |
السلام عليكم ..
اختي الفاضلة .. ام مزنة .. السيارة لو ماشريتها , محد رح يتضرر .. انا البنت لو ما تزوجت , شوفي كم مشكلة رح تصير لها مستقبلآ . والسيارة اقدر ابيعها متى ما بغيت , واحتجت فلوس ,, لكن زوجتي لأ والسيارة اقدر اشتريها مستخدمة وبسعر رخيص .. لكن زوجتي لأ .. مرة ثانية .. اسيارة لو ماشراها الشخص , عادي مارح يتضرر ( في مليون طريقة ) .. لكن الزوجة لو احد رجع عن زواجها لسبب المهر .. محد رح يجيها الا بعد ما يعدي أحلى عمر للزواج عليها .. فعشان كذا , المهر لازم يكون قليييييل , وبعدين فلوسه يقدر يشتري أي سيارة له هو وزوجته وبأسمها لو يبي بعد .. والسيارة من الاشياء المهمة بعد الزواج , كلن رح يستفيد منها ( حتى يمكن ولده بما يكبر ياخذها ) ليش لأ . أخوك More Than a MAN |
اقتباس:
ام مزنه مااعتقد انك خليجيه ابد // انتي عممتي او انك ماشاء الله عليك عايشه ومتدرين من وين تطلع الشمس الناس في بطاله -- الاكثريه خسرانه في الاسهم -تدرين ليش لانه يبي يامن المال لزوجة التعاسه الله لايبلانا ساضرب مثل بسيط : رجل راتبه 4000 ريال وتوه موظف كيف راح يتزوج ؟ ساترك الاجابه لكي / يمكن تحلين لهم العقده هذه ويدعولك الليل والنهار ويقولون الله يجزى ام مزنه بالخير في الانتظار |
اقتباس:
بس اقولك شي احيانا لما اشوف حال (بعض) شبابنا اليوم من استهتار امثال الشباب اللي بغى يتزوج على زوجته عشانها ما بترقصله واللي يبغى يطلق زوجته عشانها مو رومنسيه اقول احسن خليهم يدفعو دم قلوبهم عشان يعرفوا انه مافي شيء يجي بالساهل اما لو انه اخذها بالجاهز مسهله كان هددها كل شويه بالطلاق لانه ما تعب فيها على قول المثل الانجليزي easy come...easy go! |
^
^ ياحلو كلامك ياكريستاله يبرد الخاطر :22: |
اقتباس:
يابنت الحلال حتى الضعوف يبون يضعفون الواحد الرجال اذا جاهم قالوا اكيد مالقى الا حنا ! واذا ماجاهم احد قاموا يقولون بنتنا عنست ! واقع مشاهد لايوجد حل كل يزوج على هواه بريال بمليون انت وحظك كانك داخل يانصيب |
أخوي ساري
كلام كريستالة في البداية كانت تتكلم عن الشاب الذي لم يسبق له الزواج.. وفعلا معاها حق أنا لما أقرأ مواضيع بعض الرجال ومتطلبات البنت واهلها واستغرب من قال ان كل الناس يطلبون مهور عالية؟ ومن قال ان كل الناس يبغون حفلات كبيرة!! وصدقت كريستاله اخوي يوم بغى يتزوج بس يدفع على اتفه شي وانصحه ولايسمعني يقول نذلة انت منقهرة لأني بدفع لها!! والحين بعد مرور شهر تقريبا على زواجه فجأة انقلب يقول راحت فلوسي على خرابيط الله يقطع الزواج!! وزوجته طلبت مبلغ معين ورفض!! علما بأنه الأسبوع اللي راح أعجبتها (مستحية اقول وشو لأنه شي تافه جدا ) بألفين ريال وأخوي المسكين شراها لها يوم كان طاير بها وصحصح هاليومين بس ردة فعله عكسية !! وفعلا الرجل الغير مقتدر او الضعيف يدور له على بنت بمثل حالته ترضى فيه مويروح لوحدة اعلى منه ثم يقول الناس يتشرطون!! |
اقتباس:
أنا لا اقصد الجنسيه انسي الجنسيات أنا اقصد البيئة والعادات والتقاليد أنا أفضل التي تكون من بيئتي وعاداتها مثلي وكل بلد فيها حقها من الطيب والردئ تحياتي وفي حفظ الله |
الله المستعان لو نتكلم ونتكلم إلى أن يسمعنا الجميع , لن يصغي إلينا أحد .. هذه هي مجتمعاتنا :( |
اقتباس:
لا الحمدلله هذي السالفه مو ماره علي وان شاء الله زوجي ماهو من هذي الفئة اللي يدور على زوجته اي غلطه صغيره عشان يطير يتزوج عليها (عموما هذا ليس موضوعنا) انا كنت اقصد انه لما اشوف حال (بعض) الشباب اليوم وسطحيته وتفاهته اقول احسن خليه يتمرمط الين يتزوج عشان يعرف انه المسأله ماهي لعب. اقتباس:
وبالمقابل اشوف كمان شاب توه متخرج ماله سنتين واتسلف من هنا ومن هناك عشان يعطي زوجته مائة الف ريال رغم انه محد طلب منه المبلغ هذا (هذا حصل مع قريبتي)!! ليه هذا الاسراف ليش يلبس ثوب موب ثوبه (رحم الله امرئ عرف قدر نفسه).. |
تصدق أخوي
وحدة من ربيعاتي ماشاء الله عليها جمال وذكاء .. وفي واحد جا يتقدم لها ... بس شرطت عليه المهر و الباقي قالت مب لازم تصدق إنهم ما ما سووا حفلة عرس سافرت 3 دول كشهر عسل....................إنت قول صلحتها من هني وخربتها من هناك بس زوجها ماشاء الله عليه ..جيبه مليان ... ( بس هذيك الأيام كان يمر بخسارة في الاسهم) بس هي قالت ليش خسارة العرس و البهذلة ... أحسن شي نستفيد منها نحن ... سووا ملكة ويوم عرسها ... راحت الصالون تعدلت واكشخت من مهرها ولبست ... تصدقون ما شرت أشياء وايد وبعدين زفوها سيده عالطيارة ... وردت بعد شهر و10 أيام ... أحلى من مية عرس والله طبعا زوجها قدر لها موقفها هذاك .. وأول ما رجعوا من الرحلة ... شرالها سيارة لكزس آخر موديل -لمن تحسنت ظروفه- ... والحين هي مرتاحة وسعيدة والله يهنيها وكل حد يسألها تقول مهما كان زوجي غني .. بس إن الله لا يحب المسرفين.............. تصدقون إن أم الولد كانت رافضة مبدأ إن مافيه عرس وإن مهرها قليل؟؟؟؟؟؟؟؟؟؟؟؟؟؟؟؟؟؟؟؟؟؟؟ بعدين هي أقنعتها ...وأقنعت الجميع حتى حفلة صغيره ما سوت .... بس صراحة زوجها للحين ما ينسى هذيك الأيام ودوم تقولنا إنه يقولها """ فضلتي تقعدي معاي ... على إنج تسوي حفلة زواج وتجابلي خلق الله """ الله يهنيهم |
اقتباس:
أحس الأب يبالغ ..:29: صح غلاء مهور ، ما اختلفنا لكن مب لهالدرجة !:23: تحياتي لج ، إختج : خلك إيجـــــــــابي ! |
خلك إيجابي...
شو نسوي مزودها الأب ... بس أونه قال يبى يمنع غلاء المهور .. وهذي جابوها عندنا بالأخبار المحليه وبالجرايد خخخخخخخخخخخ ما أتصور الوالد -الله يرحمه- يخلي مهري درهم !!!!! |
ساري ان شاء الله الادره بترد عليك
|
ليه المهر سبعين
اربعين يكفييييييييييييييييييييييييييييييييييييييي وخمسين يوفي وزيااده والشبكه مالها داعي اصلاااااااااااااا والا تكون باقل من العشررررره والقصر ليه 35 فيه اقل كل هذي فشخره وبس اخوي زواجه كله كلفه 80 الف والحمد لله واغلب اخواني مثله مادري وش غلاء تتكلمون عنه كل واحد ياخذ له من طبقه تناااسبه وبعدين الدين لابد منه خاصه للشاب الي ماعنده دخل غير راتبه تبون تتزوجون ببلاش والا برخيص عشاان بعدين تجلسوون تعايرونها يا ام ريال والله ماينعرف لكم يالشباب الله يصلح الحال بس معليش عصبت بس والله ان اختي مهرها ثلاثين واحنا مانشترررررررط الا رجل ذو خلق ودين بس وينه ماجاااااااء الله يعين اعذرني اخي بارك الله فيك |
أنني أرفض زواج الشباب من أجنبيات
لكن هناك قول يقال وهو أن أردت أن تطاع فأمر بما يستطاع فمن أين للشباب بهذا الغلاء الرهيب في المهور الذي سيؤدي بنا إلى نتيجه عكسيه * سيتزوج الشباب من أجنبيات وبالتالي لن نفتخر بعد اليوم بأصولنا العربيه الأصيله لأختلاف الأمهات أي أصبحنا هجين وخليط بين الجنس العربي وأجناس مختلفه هذا غير الأتجاهات السياسيه وربما الدينيه التي من المؤكد ستتغير بتغير النوع وسيترتب على ذلك عدم الأنتماء لهذا الوطن وللدين أيضاً وحينها حدث ولاحرج .....!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!! وهذا كله نتيجة بعض الأباء الطامعين والذين يتاجرون ببناتهم وهذا هو الرقيق الأبيض ولكنه مقنن . * سينحرف الشباب ومنهم الكثير الذي سيصبح لص لجمع المال ليصل لطموحه للزواج من بنت بلده وللأسف الشديد هذه المشكله موجوده في جميع البلدان العربيه دون أستثناء وأأسف على هذا أتقوا الله أيها الأباء في بناتكم وتأكدوا سيعذبكم الله بما تفعلونه اليوم ببناتكم لاحول ولاقوة ألا بالله العلي العظيم وللأسف مهما قلنا لنا يسمعنا أحد لأنها تجاره لاتبور ألايوم القيامه يوم لاظل ألا ظله وحينها أين وماذا سيكون حال هولاء الأباء أنني أتمنى أن أرى يوم عذابهم الذين يتاجرون ببناتهم ويبيعون لمن يدفع أكثر من الأخر ... أستغفر الله العظيم . أخوك في الله |
من جد الزواج عندنا يكسر الظهر
انا لي اكثر من سنتين اقنع اخوي اللي أكبر مني على طول يتزوج عشان يفتح لي المجال عشان اتزوج لاني من جد ودي اتزوج من زمان والحمد لله تزوج وفتكينا منه :d وزواجه كان قبل شهر المهم سألته كم بالله كلفك الزواج من الى قال أكثر من 100 الف بصراحه يوم قالي كذا قلت بقلبي ياليتك ماتزوجت اقل شي تونسني يوم أنك بالبيت :( ولي الامر وبناته مايفكرون الا بالمهر مافكرو الفلوس هذي من وين جت وان كلها ديون بديون الظاهر اني ببطي ماتزوجت يعطيك العافيه |
ان ا قول الحل عند ما تتغير العادات حقت مجتمعنا
ويتفهمو اولياء الأمور الوضع انو اذا مارخص مهر بنتو ولا ساعد العريس البنت حتجلس عندوا في البيت إلين ما تعنس والحل الثاني الزواج الجماعي |
والله ياشباب من وجهه نظري ان المهر اذا كان كثير شوي ولكن غير مبالغ فيه
لان الشباب لو شاف لامهر رخيص بيحسب الزواج لعبه كل يوم والثاني وهو متزوج لان الزمان هذا كثر بما يسمى اشباااااااااااااااااااااه رجااااااااااااااااااااااااااااااااال |
بصراحة شيء مؤلم جداً
والله هذا اللي يعانيه اغلب الشباب و انا منهم خسرت كل حاجة لكن الله كريم اخي وربي في ناس ما تخاف الله المهر من حق الفتاة لكن لازم يكون معقول لكن في ناس من غير المهر يطلبوا ذهب للبنت و لأمها و الذهب لا يقل سعره عن مبلغ كبير و قدره.... خليها على اللي ما تنام عينه سبحانه و تعالى هذي الدنيا الشقى لازم فيها مهما كان |
السلااااام عليكم وبعد 00000000000 اسال الله ان يوفق الجميع الى مايحب ويرضى وان ييسر كل عسير 00000000 انا قصتي مشابه لصاحب البيره بس فيها اختلااااف شوي ولكن اغلب الناس الحين يوم تجي تبي تتزوج يسالونك والله اول سوال وهو كم راتبك 000؟ مو هل انت تصلي او تخاف الله 000000 ؟وانا على فكره تعقدت من شي اسمه زواج بسبب المهور الغاليه وانا على فكره جيت ابخطب ولكن الحمد لله اني ماكملت وورطت نفسي لان البنت تبي مهر وامها تبي فلوس وابوها يبي واخوانها واخواتها وياويلي والله وجاي ابسوي فيها هامور اسهم وطاحت براسي والحين زاد الطين بله وهو اني ماخذ قرض ابي ادخل اسهم وجااااات الطااااااااااااااااااااامه اقساط عشر سنوات 000000000 ياويلي والراتب سته الاف ولا يخارج في قسط بيت وقسط سياره وقسط بنك 00000000ينااااااس والله انا الان زي المجنون واخيرا شكلي ابزوج بخمسه الاف من برا عشان اخاف اجي الحراااااااااااااااااااام والا وش رايكم تكفون رددددددددو علي انا طفيت ؟؟ ولانقول الا حسبنا الله ونعم الوكيل 00000000000
|
جزاكم الله خيرا
غلاء المهور سبب رئسي من اسباب العنوسه ، وتمت مناقشة الموضوع من جوانب عده ووضعت لها الحلول المناسبه يمكنكم مطالعتها بمفضلة القسم يغلق الموضوع |
| الساعة الآن 01:42 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©