|
زوجي يخونني و يشاهد مقاطع إباحية
السلام عليكم اخواني واخواتي
الله يعطيكم العافيه ابستشيركم بموضوع واتمنى انكم تدلوني على التصرف الصحيح والحكيم انا متزوجه لي 4 سنوات وعندي بنتين من سنتين تقرييا تصير بيني وبين زوجي خلافات على اتفه الاشياء ونجلس بالشهر مانكلم بعض وبانهايه انا اتنازل وخلي المياه ترجع لمجاريها حتى لو كان هو المخطي بحقي لاني مااقدر اعيش بهالوضع كل واحد منا بطرف ولايدري عن الثاني وش يصير عليه ابكلمكم عن زوجي نظامه في البيت انه يجي من الدوام الظهر يتغدى وينام بعدها يصحى على المغرب يصلي العصر والمغرب مع بعض في البيت وهو من النوع اللي مره متساهل بالصلاه اعجز عنه اصحيه بس مافيه فايده واذا قام يقول انا معذور لاني كنت نايم احيانا ينام قبل الصلاه ب5 دقايق احاول فيه انه يجلس لحد مايصلي وبعدها ينام مره وحده بس ماينفع معه حاولت معه باللين ومره الشده ومره باشرطه وعظيه بس فشلت معاه كل الطرق المهم بعد مايصحى المغرب يروح لاهله يتقهوى معهم وبعد العشاء يطلع مع شلته للاستراحه ويجلس لحد 2وبعدها يرجع ينام وبعدها يروح لدوامه وانا صفر على الشمال ماكاني موجوده بحياته كلمته حاولت فيه يقولي انا كنت متعود عند اهلي ان هذا نظامي قلت له طيب اللحين انت متزوج وعندك بيت مسؤول عنه وضعك اللحين مو زي ايام ماكنت عزوبي يقول انا حر اسوي اللي ابيه وبعدين مافيه زوجه تمشي رجلها على كيفها وترسم له جدول عشان يمشي عليه زعلت ورحت لاهلي وجلست 5 شهور ولاسال ولا انفق وبنهايه كلمه ابوي ورجعنا لبعض بس صار يعاندني وزاد عن اول صار بالاجازه يسهر لحد 7 الفجر وانا مالي اي حق لابطلعه ولا بجلسه مع بعض واي شي اطلبه من نفقه او غيرها يطلعها من عيوني بس منحجره بالبيت لحالي حتى الجيران مانعني اروح لهم او يجوني تبي تجيني حاله نفسيه من الوحده من اهلي للبيت ومن البيت لهلي طلبت منه يدخل نت اقضي وقت فراغي فيه ودخله بس اكتشفت بعدين انه يدخل على مقاطع مو حلوه واصدقاءه يرسلون له مقاطع اباحيه وكان بفتره روحتي لاهلي يجلس عليه وبعدين يسوي العاده وانا يشهد علي ربي ماقصرت معه خصوصا من هالناحيه بشهادته هو انا بعد ماشفت ان الوضع ماينسكت عليه صارحته قلت انت تطلع على هالمقاطع هو تغير لونه وقال مو انا قلت بس مايستخدم الجهاز الا انا وانت بس قالي احيانا اخذ الجهاز لاهلي ويمكن احد دخل عليها قلت طيب احلف لي بالمصحف وحلف قلت طيب انا مقصره معك بالفراش قال لا قلت اجل ليه بغيابي تسويها قال ماسويتها ووريته الدليل انصدم وقال انا بس احتلمت قلت ليه ماتحتلم الا بغيابي قام يلف ويدور قلت شف انا ماقصرت معك بشي بشهادتك انت وهذا الشي بينك وبين ربي وهو اللي بيحاسبك مو انا وطلعت من الغرفه المشكله انه راح وشراله لابتوب جديد وحط علي رمز قفل ويقفل على نفسه الغرفه اذا جا يستخدمه سالته مره قلت ليه شريت هذا وحاط له رمز قفل قال لان عندي اشياء خصوصيه مابي اي احد يشوفها قلت بس انا زوجتك مابينا خصوصيات قال بس انا احب اصير انسان غامض محد يدري عن اي شي اسويه وحتى جواله حاط رمز قفل وحريييص اني مااعرفه المشكله ان الثقه فيه اللحين عدم صرت شكاكه ماروح لاهلي عشان ماترك له المجال يسوي شي من وراي بس والله تعبببببت ونفسيتي زفت حتى انه احيانا من اللي فيني احط الحره ببناتي وبعدين اتندم مسكينات مالهم ذنب عايشين عيشه الله العالم فيها دايم ماتصير الهوشات الا عندهم احاول قد ماقدر اني اذا كان فيه بينا شي مانتناقشه الا بعد مانومهم بس زوجي اذا شافني ابفتح اي موضوع معه راح وصحاهم عشانه يدري اني منيب متكلمه وهن عندي وبسكر على الموضوع حتى قبل اسبوع بنتي صحت من النوم وصارت تبكي قمت دخلت المطبخ ابسوي لها رضعه لقيت زوجي حاط جواله الايفون بالشاحن للمعلوميه انه شاريه له اقل من شهر وحاط عليه رمز قفل ومايستخدمه بالبيت اطلاقا مايستخدمه الا برا البيت ومن شراه وهو متغير علي يصارخ على اتفه الاشياء ويسوي مشكله من لاشي واذا صار برا ودقيت عليه ابسولف معه او اطلب منه غرض يجيبه يحاول قد مايقدر انه يختصر المكالمه بس كلمه ورد غطاها وعلى طول يسكر احيانا اذا كلمته اساله وين انت فيه والله انا مشتاقين لك وللجلسه معك على طول يصارخ علي انت وش دخلك وين انا فيه انا حر اروح للي ابغى واجي متى مابغيت ويسكر بوجهي في حين لو كنا بالسياره ودق عليه اي احد يساله وينك فيه على طول يجاوبه انا بالمكان الفلاني ولا رايح للمكان الفلاني سالته مره قلت ليش ماتقول لهم مالكم دخل وين انا فيه مثل ماتقول لي قال هم غير بس انت مالك اي حق تعرفين عني اي شي ودائما اذا طلبت اي شي يقولي مو فاضي عندي شغل هالكلمه دايما على لسانه يطلع من العصر ولا يجي الا 2 بالليل وطول هالفتره هذي لاتدقين ولاتسالين وينك فيه وانا بس جالسه بالبيت وانواع الهواجيس وش يسوي طول هالوقت وين يروح فيه وش هالشغل اللي مو مخلص الموقف اني بعد مادخلت المطبخ جت رساله لجواله انا مسكت الجهاز الا واشوف رساله من بنت كاتبه<< هلا قلبي بس انت احلا ياقلبي احرجتني>> ومدري وش تكملة الرساله لان الايفون اذا كان فيه رمز قفل وجت رساله يطلع اسم المرسل وشوي من نص الرساله وبعد تقريبا نص ساعه جت رساله ثانيه من بنت ثانيه تتغزل فيه انا الصراحه دارت فيني الدنيا معقوله يصير يخوني وكلمة مشغول اللي دايما يقولها لي بس عشان يصرفني ويتفرغ لهن صرت بزي الدوامه مدري كيف اتصرف اواجهه بالرسايل ولا اسكت واجلس احرق بنفسي وهو ولا داري عني وامس اسمعه يكلم يقول<< شف حسابك حولت لك المبلغ>> بعدها راح ينام وترك جهازه يشحن بالمطبخ وانا اشتغل جته رساله تقول << حولي مالا يقل عن الفين >>وبعدها جت رساله ثانيه تقول<< بس تراه مره وحده بالشهر وغير كذا مااقدر>> بالله عليكم وش اسوي اللحين مره ضايقه فيني الوسيعه احيانا افكر اقول وش ابي فيه اللي هذا هو سفريات للخارج واستراحات وكذاااااب درجه اولى ومافيه اي حس بالمسؤليه تجاهي غير لسانه السليط بس افكر ببناتي واتردد اقول مالهن ذنب يتشتتن احيانا افكر اقول اكتب له رساله اذكره بالله وحطها عند لابتوبه بس ماني عارفه وش اكتب له فمحتاااره مره ساعدوني شورو علي لو اي واحد فيكم بمكاني وش بيسوي نسيت اقولكم ان زوجي مااااكان كذا اول بس حسبي الله على اللي قلب مخه وغيره علي مشكورين على سعة صدوركم واسفه عالاطاله وجزاااااكم ربي كل خير |
مرحبا اختي..
بصراحة موضوعك أكبر من أنه يطرح هنا في هالمنتدى.. مو قلة خير أو خبرة.. لا بس الموضوع كبيييييير . لأنه واضح وضووووووح الشمس وش ورا زوجك!!!! لكن وش التصرف السليم هدا اللي يمكن نجهله.. لي عودة يالغالية.. |
روحي بيت اهلك وما ترجعي خيانه وقهر وبنات ووووووووو
|
انا اقول لازم يتدخل احد من اهلك
ما احس ولاميزه فيه حلو غير انه زوج بالاسم واذا خليتيه كذا راح يتمادى اكثر .... |
اقتباس:
طيب هل جربتي وجبتي المصحف وقلتي له احلف بعدم الزواج من أخرى جربيها وشوفي مثل مشكلتي في الموضوع |
أجل ...... سفريات لو كنتي مكان اختي لااقبل برجل الا بعد عمل تحاليل بعد السفر دم لايصير جايبه بلا والا جلا من هالديار الفاسدة ترا فيه امراض والتهابات الحين تجي من دون شي فما بالك من فاسدات
|
الله يعينك على هد الزوج صراحة ما ينطاق
ما فيه ولا شيء حلو يخليكي تصبري على العيشة معاه انا رايي من راي الاخت ام احمد لازم حد من اهلك يدخل ويسوي حل للسالفة هد |
تصدقون جته تو رساله وهو كان بدورة المياه من وحده تقول
..انا ماارضى بواحد يخون زوجته وش ذنبها المسكينه حتى لو كان بينكم مشاكل,, ومدري وش تكملة الرساله انا الصراحه جمدت مكاني وجتني حاله غريبه مدري كيف لفسرها انا مره مشوشه مدري وش اسوي نوروني وخففوا عني وفرجوا عن اختكم فرج الله همكم وقولوا لي وش اسوي اواجهه ولا اسكت واتحمل لحد ماشوف نهايتها |
[SIZE="3"][/SIZ
اخوي متزوج2 انا قلتله مره يحلف على شي انه ماسواه وحلف لي على المصحف انه ما سواه وهو كااااااذب والدليل اشوفه قدامي ويقول مو انا يعني بالاخير الدعوه مستويه عنده يحلف على مصحف ولا لا كيف تبيني احلفه انه متزوج زوجه ثاتيه اكيد بحلف مثل المره الاولى ماعنده اي مشكله |
السكوت له هو تماديه بزيادة وواضح انه ما يحسب لك اي حساب
ويجب عليك مواجهته واذا لم تفلح المحاولة استشارة احد من اهله حكيم في الأمر والخوف من ان ينقل اليك الامراض وعليك بالاستغفار والدعاء والاكثار من الطاعات وياليت ترسلين الرابط هذا اليه http://www.66n.com/forums/showthread.php?t=218860 |
الله يصبرك .. أكثري من الدعاء له بالهدايا بس حاسي في خلفيات للموضوع وتراكمات كانت هي السبب في كل البحصل معك منها ذهابك لبيت أهلك والجلوس فيه بالشهور.. صدقيني ربما اعتقد بأنها لوي زراع .. والرجل خاصة في شخصية زوجك صعب تجيه بهذه الطريقة لأنه بيعتبر هذا نوع من الندية .. وجايز يكون هو انسان غير مسؤول .. بس شخصية المراة برضه ليها تأثيرها وليها أيضاً طرقها في جعل الرجل يحب بيته ومملكته كمان اختيار الوقت المناسب للحديث والتحاور .. وتقديم بعض التنازلات .. وتهيئة البيت للراحة والنظافة صدقيني الرجال صناديق مقفولة .. مفاتيحها التجارب .. وأنت بعقلك وحكمتك سوف تصلي في النهاية إلى مبتغاك وهذا كله في ميزان حسناتك .. وفي سبيل الحفاظ على مملكتك لا تيأسي من المحاولة مراراً وتكراراً .. وللانسان لحظات ضعف فاغتنميها |
اقتباس:
يعني في تظرك وشو نهايتها؟!!!!! شكله شخصيتك ظعيفة مررررررررة.. صدقيني زوجك ماراح يصحى إلا لما تكونين قوييييييية وتوقفين هالمهزلة!!!! لا تكونين سلبية .. قولي له شوف بتكلم معاك بموضوع .. يا انك تنهي لي ياه .. يا أنسى انه لك زوجة!! ولا تخافين انه يتركك ولا تقولين اخاف على بناتي وش دنبهم.. واحد مثله مو حسافة خسارته.. قولي له: انا لما تشوفني ساكته لا حسبالك اني غبية.. انا ساكته كنت ملتمسة لك العدر.. وقلت يمكن لا انا غلطانة .. أنا فاهمة غلط .. لا تظلمينه.. لكن لكل شي حد.. وصبري له حدود.. أول شي: ترجع من الدوام تنام وتصحى تروح لاهلك وبعدين تروح لربعك وماتجي إلا 2 بالليل!!! وانا مالي اي معنى بحياتك!!! وإدا قلت لك مايصير وانا ماتقعد معاي ووو الخ . تقول مو انتي اللي تمشيني على كيفك!!!!!!!! قلنا امنا بالله.. تطلع لابتوب جديد وتحط رقم سري وقلت لك انا زوجتك ما بيننا أسرار قلت لا في اشياء خصوصية (( وانت عارف السبب الحقيقي اللي مخليك تقفله لا خصوصية ولا شي)).. قلنا براحتك. لكن تقفل جوالك برضو لنفس الخصوصية !!!! إلا هنا وبس. أنا شفت الرسايل... وإهمالك لنا وتطنيشك عشان تغرق بنات الحرام بكلامك معاهم!!! تتركني لحالي عشان تتواجد معاهم!!!! تحرمني من اني التقي مع الجيران قاعدة منطقة 24 ساعة لا انيس ولا ونيس وانت تلعب بديلك!!!! لا ياحبيبي .. أنا مو مهزلة لك .. أختار.. الان تفتح الابتوب قدامي وتلغي الارقام السرية.. أصحابك السيئين الان تقطع علاقتك منهم.. سفر بدوني ماراح أسمح.. هدا في حال انك تبي تحافظ على بيتك.. ولا مع السلامة انا لايمكن اكمل حياتي مع واحد ظالمني بحقوقي وقبل كل شي يخون ربي وينتهك حرماته. أستجاب لك كان بها ما استجاب لك روحي لأهلك ولا تعلمينهم عن شي.. أصبري شوفي وش ردة فعله.. لو دق عليك واعتدر ووعدك يترك اللي يسويه قولي له خلاص لكن اي هفوة منك ماراح اسامحك وراح أكلم أهلي وهديك الساعة راح يكون تفاهمك معاهم مو معاي.. ولو طنش معناته الرجال بايع.. في هالحال انتي بيعيه. |
اقتباس:
لأنه إن شاءالله فيه رجا انه يتعدل وغصبن عليه خليك قوية معه بلسانك وحطييه قدام الأمر الواقع .. مثلا قولي له كيف تتكلم مع حريم وابليس يزينلك الحرام قدام عيونك هل ترضى رجل يسويها لأختك المتزوجة انت لازم نسويلك كشف وتحليل لعلاقاتك الكثيرة أو أنك تعقل وتصير رجال وكذلك هدديه انك بتعلمين اخوك الكبير وبفضحه وخاف الله يارجل وإن شاءالله يتعدل والله يوفقك |
الله يهديه ويسخر قلبه لك يارب..
حاولي الأهتمام فيه أكثر.. أبتعدي عن مقاطعته .. أو بدأ أي مشكله معه تعلمين بالتجارب أن مناقشته فيها لا توصل لحل.. أهتمي بنفسك وشكلك.. وجسمك.. حاولي تكون دائما متأنقة.. كل هذا مع حلاوت اللسان.. والبسمه الطيبه.. الاستقبال الحار من العمل..والدعاء له عند الخروج.. التزمي بهذه الطريقه شهر.. بدون نقاش او سؤال: ( وين كنت .. ليش اتأخرت ).. والأهم من كل هذا صلاة الليل.. والدعاء له بالهداية.. كرري له هذا الدعاء في الثلث الأخير من الليل : (اللهم ياحي ياقيوم ياذا الجلال والإكرام أسألك بأن تهدي زوجي وتجعل منه رجلاً ديناً صالحاً تقياً عابداً قائماً بالليل صائماً بالنهار , مطيعاً لك باراً بوالديه , مراعياً لي ولأولاده , يخافك ويخشاك في كل أموره , محافظاً على الصلوات في أوقاتها . اللهم أره الحق حقاً وارزقه اتباعه وأره الباطل باطلاً وارزقه اجتنابه . اللهم اشرح صدره بالإيمان ونور قلبه بنور القرآن . اللهم تب عليه من المعاصي والآثام. اللهم إني أسألك بكل اسم هو لك سميت به نفسك أن تعطيه من خيرك أكثر مما يرجو . اللهم عظمه في قلبي واجعله ماء عيني ودم قلبي ودفء حياتي واسعده بي واسعدني به. اللهم صب الإيمان وحبه لي في قلبه صباً صباً وأرني ذلك . اللهم انظر له من فوق عرشك قائلاً للملائكة إني أحب عبدي هذا فأحبوه . اللهم لا تجعل الدنيا أكبر همه ولا مبلغ علمه . اللهم لا تتوفاه إلا وأنت راضٍ عنه . اللهم اجعل قبره روضة من رياض الجنة وأدخلني وإياه الجنة ).. صدقيني لازم يتغير.. لو كان حجر.. لازم يتأثر.. لأزم يحن.. إذا لم يحصل تغير .. وهذا نادر.. ساعتها.. عليك بكلام أختنا الغالية أحلاهم واتحداكم.. مع امنياتي لك بالتوفيق والسداد..والله يصلح حالك.. |
الله يكون بعونك ..
مالك الا اهله تقولي لهم من طأطأ الى السلام عليكم .. انا رجعت من حبي لولدكم لكن للأسف فيه وفيه وفيه وعقب الرسايل اللي من البنات ما اظن عقب هذي شيء وانا ماراح اسمح لنفسي بالامراض !! اهلك لاتقولين لهم والله بينغثون ومابيديهم شيء حرام يشيلون همكم وهو مايستاهل ظفرك .. اهله اهله اهله تكلمي مع خالتك او خالك وشوفي شنو يصير اصلآ بيخافون من الفضيحه وبيأدبون ولدهم لأنه بزر مع احترامي لك مايستاهل الابوه .. وانتي ان وقفوا معك وادبوه حلو مره ..اصلآ بيتفشل احسن خله يعرف انك قويه وان كذبوك ولا قالوا هذا اللي عندنا قولي انا بس ابين لكم وش حياتي معاه وعشان مابي اصدمكم وانا ابي الطلاق اذا انتي كارهه العيشه معاه .. ان شاء الله ربي يفرحك ويعوضك بالاخير والصالح يالغاليه .. |
حسبي الله ونعم الوكيل
الله يكون بعونك من شروق الشمس لغروبها من جد ماينعطى وجه ياختي روحي لاهلك وصارحيهم علمي ابوك علمي اهله الانسان هذا لازم يكون له وقفة عشان يصحى من غفلته اذا تهاوشتم لا تروحي له خليه تنازلك له هو السبب سكوتك هو السبب روحي لبيت اهلك ياختي انتي بيوم بيطق فيك عرق مايستاهل الصبر عليه وعارفة انك صابرة لاجل بناتك بس الي متى؟ سفريات وتاخير برى البيت وجولات ولاب توبات وبلاوي مابي اكبر غبينتك بس سكوتك كذا واستسلامك مارح يزيده الا دمار بدمار تحركي اختي شوي اي شى حتى وان طلبتي الطلاق لمجرد تخويفه وش بتمين حياتك كذا؟ لا نفسك اولا ياختي وربي ماخلق الطلاق الا عشان ذا الامور بس من جد مايستااااااااااااااااااااااهلك انقهرت من قريت موضوعك الله يرزقك صبر ايوب ويعوضك صبرك خير قلبي معك حبيبتي |
والله ياأختي أوجعني قلبي عليك ,أنت خايفة من الطلاق وتشتيت بناتك لكن ماخفتي أنها ينقل لك الأمراض والبلاوي من ورى علاقاته المحرمة والآن القهر والكبت يسبب أمراض نفسية وعضوية أعظمها الأورام , مثل ماقالوا البنات حطي حد لحياتك معه وخيريه بين امرين , يايترك المهزلة الي عايش فيها أو يتركك وخلك جاده معه, وإذا هو ضحى بك وبناته عشاان شهوااته فلاترجين من وراه خير , وذكريه من زنى زنى بأهله ولو بعد حين .
ولاتنسين الأستخارة والله يكتب لك اللي فيه خير. |
اشكر كل اللي ردوا علي الله يجزاك كل خير ولا يحرمكم الاجر يارب
بس ياختي احلاهم هي مو مساله ضعف انا كذا مره واجهته باشياء سواها من وراي بس وش توقعين ردة فعله بدل مايتاسف ويعترف بخطاه قلبها علي وصار بدل مانا اعاتبه هو يعاتبني وقلب الطاوله علي بحجة اني اتجسس عليه وجلس شهر مايكلمني وسبب عدم مواجهتي له اللحين عارفه ردت فعله بيقلبها علي ويعتبرها اشياء خصوصيه مالي اي حق فيها فانا كتبت قصتي ابي حلول غير المواجهه ودي احافظ على بيتي واكون اسره مترابطه متفاهمه بس كيف هذا اللي ابيكم تدلوني عليه |
اقتباس:
لكن لكل شي حدود.. عارفة ليش قلب الطاولة عليك.. هذا هم بعض الرجال.. إذا حسو بالضعف قلبوا الطاولة.. لكن لو كنتي حكيمة وعندك منطق واسلوب وعرفتي شلون تحاصرينه ماكان استمر على وضعه.. بس معليش .. هذي المرة لو قلب عليك الطاولة .. قولي له : خلاص انا عندي راي.. ندخل واحد حكيم من أهلك.. وقوله كل اللي عندك .. وأنا أقول له كل اللي عندي .. ونشوف شنو راي الحكم.. لأانه خلاص ماعاد اقبل بهذا الوضع.. وانتبهي في نقطة لازم تحطينها في بالك.. لا يعرف انك عارفة بسوالفة وساكته.. لأنه راح يعرف انك ضعيفة وراضية بالمسخرة اللي هو فيها ولا راح يعمل لك أي حساب. في حال انك ماتبين تواجهينه خلاص اكتمي الموضوع بنفسك ولايدري أنك عارفة.. ومحد راح يتضرر غيرك.. هو عايش حياته طول وعرض.. وبناتك لازم تخفين عنهم القهر اللي انتي فيه عشان مايكرهون ابوهم..وعشان لا يحسون بالظلم .. وعشان يعيشون حياة كريمة بالصـــورة.. وانتي اللي راح تبقين مظلومة ومقهورة ..حقوقك ضايعة.. رجل خاين.. ما اقول غير الله يهديه .. ويصبرك.. |
ام عزام انا بافتره اللي كنت فيها عند اهلي كلمت اخته حسيتها قريبه مني وحكيمه قلت لها ياليت تكلمين اخوكوتصلحين بين اتوقع بيسمع منك اكثر من اي احد ثاني
والله اني احبه واغليه بس هو الله يهديه 24 ساعه برا مانشوفه واغلب وقته بالاستراحه والله اني اخاف عليه اصدقاءه مابهم خير ابد يرسلون له مقاطع اباحيه واذا جلس عندنا ليله مايخلونه على طول يدقون عليه انت وينك تعال كمل الفريق عشان يلعبون بلوت اعوذ بالله 24 ساعه مقابل هالحرمه اطلع خلها تنفس ماكان متزوج الا انت بعدها يلبس ثوبه ويطلع وش ردها علي بعد هالكلام قالت وانت تبي تسكرين عليه خليه يروح للي يبي لاتردينه وبعدين اخوي اعرف اصدقاءه خيرين خافي ربك جالسه تبلينهم وانت وش مجلسك كل هالفتره تبينه يجي يبوس الايادي عشان ترجعين لا ترا بدل الحرمه حرمه واخوي تراه ينخطب وكل يتمناه بس انت مادري وش شايفه نفسك عليه جاحده النعمه اللي انت فيها والله لو يفسخك ويجلدك ويرميك بالشارع ماتقولين له كلمه وحده هذا زوجك جنتك ونارك الى اخر كلامها اللي يغث ولاطلعت منه باي نتيجه اترك لك التعليق |
اقتباس:
أخت تتكلم بالطريقة هذي .. فيه اكثر من أحتمال.. الأول - انها تكلمت معاك بالاسلوب هذا عشان تتفه الموضوع ولا يكبر. الثاني- أنها شايفة أنك أنتي مكبرة الموضوع أو أنه عندك أغلاط.. الثالث- يكون زوجك متكلم عنك عندها وموصل لها صورة مغلوطة عنك.. المهم- الاخت هل علمتيها شنو اللي قاعد يصير من أخوها غير قضية روحته للإستراحة؟ يعني مقاطع الاباحية.. الابتوب اللي شفتي فيه مقاطع وصخة وقالك أنه هو كان يروح عندهم ويمكن احد منهم اللي فتحها!! قلتي لها انه الان عنده لابتوب وحاط رقم سري.. قلتي لها عن جواله والرقم السري بعد والرسايل اللي تجيه من البنات؟؟ إذا كانت حكيمة خليها تعرف جوانب الموضوع كلها.. وقولي لها انا أبي الستر عليه.. وأبي مصلحته وراحتي.. محد يرضى بالغلط.. وأنا ماجيتك أنتي بالذات إلا عشاني عارفة أنه تهمك مصلحة أخوك أكثر من أي أحد. وقولي لها أنتي تقدرين تتقصين الموضوع وتشوفين إذا أنا صادقة أو لأ!!! إذا كان كلامي صحيح علمني وش أسوي.. وإذا كان كلامي غلط توجهيني.. |
المشكله اختي صابره بدنيتي لو اطلب الطلاق اتوقع مو متردد دقيقه وحده لانه على اتفه الاشياء يقولي والله لاوديك لاهلك والله لاطلقك
واذا صرنا بلحظة صفاء وشوفي عاد متى تحصل هالحظه اعاتبه اقوله انا مليت من تهديداتك لي انا ماتزوجتك عشان على الطالعه والنازله تهددني الحياة مو مستمره بهالطريقه انا مااحس معك بالامان والاستقرار انت باي لحظه تقدر تتخلى عني والله تعبت من اسلوبك وتجريحك وعدم احترامك لي قال اصلا انا ماقول هالكلام الا اذا عصبت ولو ماابيك ماخليتك عندي دقيقه وحده يعني لو ابطلب منه الطلاق على طول يفكر اني جالسه اتحداه او الوي ذراعه فهو على طول يبي يثبت رجولته ويطلق حتى لو هو مايبغى بس كل شي بالحياة يعتبره تحدي ولازم هو اللي يفوز بلاخير ويمشي كلمته ورايه حتى لو كان على حساب اهله |
اقتباس:
دخلت موضوعك وماقدرت ما ارد اتمنى مايصير مصيرك كمصيري ادخلي على الروابط ضروري http://www.66n.com/forums/showthread.php?t=218426 http://www.66n.com/forums/showthread.php?t=218860 |
الله يعطيك الف عافيه اختي احلاهم على وقفتك معي واعطائي الحلول الله يجعلها في ميزان حسناتك ولايحرمك الاجر
حبت اقولك انا ماقلتلها عن الاحداث الاخيره اللي هي قفل الجوال والرسايل والابتوب اللي شراه وحط عليه قفل لاني حسيت بعد مكالمتي لها اللي ذكرت تفاصيلها انها تبي تدافع عنه واني انا اللي جالسه اتبلى عليه ومو مصدقتني ابد وماني بطالعه بنتيجه مثل مكالمتي الاولى معها |
دلوعة مودي مااملك الا ان اقول الله يلطف بنا وينصرنا على من ظلمنا ويرزقنا الصبر وسعة البال ويسخر لنا ازواجنا ويهديهم ويردهم لنا ردا جميلا
ربي كن بعونا وارحم ضعفنا وعجل لنا بالفرج سبحانك انت القادر على كل شي |
اقتباس:
طيب .. اعطيها تفاصيل حياتك الجديدة.. (سواء حبيتي تواجهين زوجك أو حبيتي تكتمين داخل نفسك).. وخليك هادية باسلوبك معاها.. وبيني لها انه أهم شي عندك انك تحافظين على بيتك قدر الامكان.. وانك جاية تكلمينها عشان لو عندها حل تتحرك.. ماعندها حل يصير عارفة عن اخوها.. وقولي لها : انا ماسريتك بالموضوع إلا لسببين.. الاول متعشمة فيك الخير والحكمة والاصلاح.. والثاني راح تحفظين السر وماراح يحز بخاطرك عليه لأنه أخوك.. ولو ربي ماكتب لنا نكمل مع بعض إلا على الأقل مايصير بخاطركم علي.. وأني أنا السبب بالانفصال.. لأنه لكم مكانة كبيرة داخل نفسي.. ومالكم ذنب باللي يسويه زوجي.. |
طيب كيف علاقتك مع اهله؟
ممكن لو جيدة تدخليهممم وتكلمي اهلك الله يصبرك ويعينك فعلا |
السلام عليكم
أسأل الله أن يفرج كربك ويعظم أجرك السبب والله أعلم رفقة السوء أسأل الله أن يبعد عنكم شياطين الجن والإنس إنه على ذلك قدير أختي تحتاجين لدليل إدانة قوي ترينه لوالدك أو أخوك الأكبر أو أي فرد له عقل راجح حاولي أن تصوري هذه الرسائل من جواله إن أتيحت لك الفرص ولو بجزأ منها بجوالك وخزنيها لديك كدليل قوي وأريها لأهلك أسأل الله أن يدفع عنك البلاء |
الله يعينك اختي والله ما تنالمين
ما راح ازيد على كلام الاخوان والاخوات ولكن ما فكرتي في يوم ليه زوجك يسوي كذا مع انك تقولين ما كان كذا ما فكرتي في يوم انك يمكن تكونين سبب في تغييره احنا سمعنا من طرف واحد مهما كان لازم نسمع من الطرفين انا ما اقول كذا يعني اخطيك لا والله ولكن حبيت انبهك لشي اللي اهو يمكن تغير حالته بسببك يمكن فكري في كلامي هذا رغم تعاطفي معك وتضايقي من تصرفات زوجك لكن فكري يمكن تكونين سبب في بعض الامور الله يوفقك ويسعدك واياه ولا تنسين ان الحل الوحيد لرجوع الامور لمجاريها ونجاح اي علاقة زوجيه هو الرجوع لله الله يعينك ويوفقكم واسف على اي خطأ |
شوفي اختي الكريمة انا انصحك باللين معاه وذكريه بالله تعالي وبان الله يراه وان عقابه يعتبر مضاعف والله اعلم وذلك لانه رجل متزوج ويري هذه المقاطع الساقطة وحاولي ان تحثيه علي تقوي الله من اجل اخرته ومن اجل بناته واسأل الله العظيم ان يهيديه ويحسن خلقه هو وسائر المسلمين
|
مساوؤ زوجك كثير مو وحدة ولا ثنتين (( مايجلس بالبيت خير شر - مهمها طولت مدة الزعل مايفكر يجي يراضيك _متساهل بالصلاة_حاجر عليك بالبيت _يحلف بالايمان كذباا_ يهددك بالطلاق وماعنده مشكلة يطلق_ وفوق هذا كله مقاااطع ابااحية _ مكالمات ويمكن طلعات مع بنات وهذا بناءعلى الرسائل اللى قلتي عنها _العادة السرية ))
عزيزتـــــــــــــــــــــي الله خلق الانساااان وكرمة عن بااااقي المخلوقااااات لازم الوحدة تحفظ كرامتهااا وماتلغي وجودها او شخصيتهاا في بيتهاا وعند زوجهااا انتي بنفسك قلتي : نفسيتي تعبت احط الحرة ببناتي بس خايفة اتطلق عشانهم العكس انتي كذاا تعيشينهم في جو من التوتر والمشاحنات والمشاكل اللى تنعكس على نفسيتهم ونفسيتك ارحمي نفسك اذا في الانفصاال سعة ورااحة بالبال وهدؤ واستقرار لك ليش لا هذا صاير زوج بالاسم بس وفوق هذا كله نكدي مايبيك لا تروحين ولا تجين عموما انا ما احرضك على الطلاق انا اقوول في البداية وقبل اتخااذ اي قرار مصيري حاولي معاه مرة ومرتين وثلاث وادعيله بالهدااية وان شاء الله ربي يصلح الحااال واذا ماتعدل................ ((امساك بمعروف او تسريح بإحسان)) |
الله يكون بعونك أختي
صدقيني الموقف يبغالة وقفة حازمة منك أنا شاب متزوج وزوجتي ما قصرت معي ومع الأسف مريت بمثل ما مر فيه زرجك ويمكن أكثر واجهتني أكثر من مرة ما نفع أتهرب منها وأقلب الموضوع عليها بعد فترة زاد الوضع وأنغمست في علاقاتي وسبحان الله مع أنه ما عندها دليل علي الا أن عندها حاسة غريبة جدآ رغم حرصي علي عدم كشف نفسي الا أنها تحس أني مسوي شي بس تسكت وضعت حد وقالت يا أنا يا علاقاتك توقعت أنها فترة وبتعدي لكن أصرت علي موقفها قلت خلاص لمجرد الخلاص من الأزمة وفي يوم من الأيام كنت طالع من البيت وعندي موعد من مواعيد الهوي أرسلت لي زوجتي مسج ودعت علي دعوة قلبت كياني وخلتني أتغير جذريآ وكنسلت الموعد وبعدها بديت افكر الي متي وأنا علي هاذا الحال ودعيت ربي أن الله يهديني والحمدلله ربي هداني وقطعت كل علاقاتي وكله بفضل من الله ثم زوجتي سردت لك قصتي لأن فيها الكثير من الي عايشته والوضع يبيلة وقفة حازمة منك حتي لو من دون دليل قدام أهلك وخلي الموضوع بينك وبينه أفضل صدقيني مهما طال الزمن أسبوع أو شهر أو شهرين مسيرة بيندم وبيرجع لك بس خليكي علي موقفك ولا تتنازلين والله يوفقكم والله يهدي زوجك |
لا تنتظرين على ما ينقل لج الأمراض خلج حازمه وياه!! يا تتعدل وتصير خوش رجال .... أو ردني بيت اهلي وخل بناتك عندك << لأن هو يبي يلعب ماعنده وقت انه يعتني ببناته... ف هذي بعد وسيلة ضغط عليه إلا شلون علاقتج بأهلج؟ لو يوم من الأيام فكرتي بالانفصال راح يستقبلونج؟؟ |
الاخوان والاخوات اللي قالوا اراجع نفسي ممكن اصير انا السبب باللي جالس يسويه
اقول انه ماتغير علي الا بعد مارجعت من اهلي ودخل النت وعاد قلب علي مره وصار عاملني معامله الله العالم فيها بعد ماشرى الايفون وانا دائما اساله اذا انا مقصره معك بشي او ضايقتك بشي قلي ودااااااائما رده والله ماشفت منك الا كل خير انا هذا اللي ذابحني لو اني مقصره معاه بشي اقول ممكن تصير تصرفاته هذي ناتجه عن تقصيري بس هو معترف اني ماقصرت معاه ليييييش طيب يسوي فيني كذا؟؟؟؟ |
واللي سالوا عن علاقتي باهله كانت حلوه بس بعد مارحت لاهلي وتدخلوا بينا صدرت منهم اشياء ماكنت متوقعتها منهم وتوترت العلاقه بيني وبينهم
|
اخويfeeilng مشكووور على سردك لتجربتك واسال الله ان يثبتك على دينه وان يبعد عنك شياطين الجن والانس
انا اللحين مصوره بعض الرسايل اللي شفتها بجواله من خلال تجربتك اللي مريت فيها هل تؤيد اني اوريه الصور واواجهه فيها بالرغم اني عارفه درت فعله بيقابها علي ويعتبرني اتجسس عليه بيقول اناو حر اسوي اللي ابيه مافيه اي احد يرده او يحاسبه ولا اسكت وادعيله بالهدايه وان ربي يرده لنا ردا جميلا بالرغم انه صعب علي اشوف الاشياء هذي قدامي واسكت واسوي نفسي ماشوف |
من ممكن يستحمل هالحياة الصراحة انتي وايد عجبتيني لان ما شاء الله عليج صبورة واااايد الله يفرج همج ويعطيج على قد نيتج
|
السلام عليكم
أختي الكريمة: وضعك صعب، وأنت بين أمرين أحلاهما مرّ. أقترح عليك: الصبر، ومواصلة النصح والوعظ والدعوة بالتي هي أحسن، فربما ينفع هذا يوما من الأيام حتى لو بعد عشر سنين أو بعد عشرين سنة، أو أكثر. لا تكوني واضحة وصريحة في وتحاولي اكتشافه، لأن هذا سيحزنك ويحزنه، حاولي معالجة الموقف بكل لطف، فالرجل عنييييد، ربما يأتي يوم ويكون بجحا ووقحا ويبدأ في الصراحة، وما دام يستحي أو يخاف منك فهذا أفضل من أن يتبجح أمامك. ربما هو يحاول التوبة لكنه لا يستطيع، لا تطلبي الطلاق إلا في حال كان لمعيشتك خطر عليك أو على أولادك من ناحية التربية، أو لم يكن يجوز لك شرعا البقاء معه، مثل: ترك الصلاة بتاتا. أكثري من الدعاء له بالهداية. أسأل الله أن يهديه للصواب، ويرزقه حبك وترك ما هو عليه. أنصحك بعدم إدخال أهلك أو أهله، إلا إذا أحسست أن أحدا منهم قد يكون سببا في هدايته، واحرصي على عدم فضحه، فهو زوجك، وفضحه سيسبب مشاكل كثيرة بينكما، وأيضا بين أهليكما. |
شين وقوي عين!!
لا حول ولا قوة الا به،،،،،،،،، والله الذي لا اله الا هو وبحكم انني شاب ارى في مجتمع الشباب المتزجين مثل صنف زوجك الكثير!! استهتار مابعده استهتار ....سهر وخيانه وسفر وكلن يقول للثاني من باب الرجوله" يارجال الرجال مافيها خير اذا سمع حرمته وخلها عنك واترك دلعها ولا يكبر راسها عليك انت رجال خلها تتطق ريح راسك" اسمع الفاظ وكلمات وامور اكبر واعظم!! يعني هن حافظات لبيوتكم ومربيات لابنائكم ومطيعات لكم ومحبات لكم وانتم والله مافكرتو فيهن!! يا كثر هالنوعيه ياختي الصابره لكن عسى ربي يعينك ...في رايي المتواضع لا تعلمين احد احد من اهلك وتسوينها مشكله لكن رااي عليك تقولين لواحد من اخوانك وتقولين له صارحه ووقف معه وقفة رجال وخله يايتعدل ويحس ويضمني باحسان والا يتركني اعيش بسلام وطمئنان في بيت اهلي معززة مكرمه!! طبعا اخوك اتفقي معه ما يقول لاهلك يعني جلسه بينه وبين زوجك .. الله يوفقك ويصبرك ويخليلك بناتك يارب |
اقتباس:
العفو أختي والله يجزاكي خير المواجهة ضرورية حتي لو ما عندك أثبات لأنك متأكدة 100% من علاقاتة ما بالك لو عندك أثبات يعني ما فيه مجال وبعدين لو قام يلف ويدور خليكي ثابته وقوية وقولي أنا ما عندي أستعداد أعيش مع واحد خائن ويا أنا يا علاقاتك وبتفرق كثير لو قدرتي تروحي لبيت أهلك كم يوم وتحججي بأي شي لهم وأنصحك بكتم الأمر عنهم ولو حسو بأي شي قولي خلاف عابر وبينتهي بأذن الله الأمر يحتاج قوة وحزم في المواجهة والله يعينك والله يهدي زوجك ويبعد عنه وساوس الشيطان |
| الساعة الآن 03:19 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©