|
كشتتنا يوم الاحد الماضي ..
مساء الخير ...‘
الاسبوع الفائت كانت الاجواء جدا رائعه ... وبناء ً عليه قررت عائلتنا الذهاب الى البر - كشته - ونوينا نتعشى هناك مندي .. :22: اخترنا مكان بعيد عن العمران .. الجو رائع والكثبان ناعمه والناس حولك مستمتعين ,, http://www.mlfnt.com/lives6/13336281833.jpg جلسنا حول هالمكان بس كنا فوق تل - طعس- صغير .. http://www.mlfnt.com/lives6/13336281832.png وفرشنا وحطينا الاغراض ولفوا الرواق - ماااااااحبه ابدا :( بس ابويه مرن الحمد لله صارت الاغراض على الفرش واحنا جالسنا برا على الرمل :) وصرنا مشغولين بالمندي وين نحرف ومتى نبدا .. http://www.mlfnt.com/lives6/13336281831.png اخترنا المكان وبدينا بالتحفير مره بشكل يدوي ومره بالكريك وكل شوي نجرب قدر المندي زمان كان عندنا برميل .. واشترينا قريب زي قدر بس مفتوح من الجهتين وتتركب قطعتين فوق بعض ثم تفصلهم وتحطهم بالشنطه الحافظه له .. طبعا يبقى زائد عن الارض مقدار يمكن 10 سم او 15 من القدر عشان ماينكب الرمل جوه وتنطفي النار .. http://www.mlfnt.com/lives6/13336281849.jpg بعدها نشعل النار جوه ونحط تقريبا ربطتين حطب من الصغار .. بهالوقت كان اخوي يقول النار شوي ماراح تولع الحطب وامي تقوله اصبر هي بتولع من نفسها .. لاتحقر من النار شريره - تصغير شرار النار .. التفت لي الله يحفظها وقالت بقولك قصة قديمه مع مثلها .. واحد خطب بنت وكانت صغيره . فاابوها رفض الخاطب وقال البنت صغيره وماراح ازوجها . وهي كانت تبي تتزوج .. وبيوم كانت تبي تولع لها نار .. وكانت النار المولعه قليله فقال لها ابوها يابنتي هالنار ماراح تولع لك الحطب.. ردت البنت وقالت يايبه .. (( لاتحقر من النساء صغيره ولا من النار شريره )) :22: السموحه منكم الصور ناقصه لاني ماصورت كل مرحله وماكان في بالي .. وقت ماانتظر الحطب يصير جمر .. نروح نبهر اللحم بملح وكركم ويكون الملح شوي زايد .. بعد تتجهز النار نحط اول المركب - قاعده معدنيه نحط فوقها قدر الرز .. زي هالصوره .. او حتى الشبك بقاعده .. http://www.mlfnt.com/lives6/13336306522.png من النت .. بعدها نحط الرز والمويه في القدر العادي وملح وبهارات صحيحه - قرفه- هيل - ورق غار - قرنفل - ليمون اسود .. http://www.mlfnt.com/lives6/13336306521.png من النت هذا مره مناسب عشان المسكه من فوق لان قدر المندي بيكون حار .. فلو توفر هذا كويس واحنا تعبنا شوي في تنزيل قدر الرز نسينا السلك المعدني عشان نلفه على القدر من فوق وننزله لكن نزلناه بحذر ... بعدها نحط الشبك فوق يثبت بطريقه معينه فوق ونرص اللحم .. ونغطيه بالقصدير بشكل كامل ثم نحط غطا القدر ..- ممكن تحطون ورق زبده عشان يمتص قطرات البخار ثم نجيب خيشتين ونبلها بشوية مويه وننفضها ونحطها فوق غطا القدر ثم نهل عليه الرمل ونرتبه ونحط علامه لاحط يدوس ولا شئ :) http://www.mlfnt.com/lives6/13336281834.jpg جلسنا ننتظر وكل شوي نناظر الساعه .. طبعا حسب النار وحسب اللحم يكون الوقت مثلا لحم حاشي ساعتين .. لحم غنم - تيس - ساعه ونص .. مره نقعد نسولف ومره كلن يروح بناحيه اللي يخط على الرمل والي جالس بالسياره واللي يمشي والي يتقهوى وننتظر الوقت يمشي .وجا الوقت المناسب وشنا الرمل والخيش .. http://www.mlfnt.com/lives6/13336281835.jpg وفتحنا الغطاء شايفين البخار :28: http://www.mlfnt.com/lives6/13336281836.jpg هنا اللحم مررره كان لذيذ محمر :22: http://www.mlfnt.com/lives6/13336281847.jpg وهذا الرز - طبعا مانحط زيت عليه لان اللحم معاه شحم ويقطر على خفيف على الارز .. http://www.mlfnt.com/lives6/13336281848.jpg هنا كنت ارتبه بالصحن > الشئ الوحيد اللي سويته :d وسلامتكم وان شاء الله استفديتوا واستمتعتوا .. والسموحه على القصور.. |
ماشاء الله
الله يسعدك غاليتي ويحفظلكم الوالد والوالده الله يعطيهم العافيه باين على المندي لذييييييذ ويشهي خاصة بهالجو |
زعلانة منك
يعني كشتة ووناسة ومندي وماتعزمين ماشاء الله بالفعل طلعة تجنن ياليت أروح بعمري مارحت والله تسلم دياتك والكل باين لذيذ موفقة |
ماشاءالله رووووووعه
فعلاً مايصلح البر من دون المندي ,نفس طريقتنا بالمندي:) تسلم الايادي ,,والله جوعتينا:15: |
وش ذا الزين ما شاء الله عليكم بالعافيه ذكرتيني ببيتي القديم كان عندي حفره في الحوش وكانت اكثر كشتاتنا فيه اعماق كشته حلوه ما شاء الله |
امس رديت عليك بالصور اللي نزلتيهن بس الأخت شقردية الله يهديها كنست ردي كالعادة :26:
عموماً أنا أحب شي أسمه مندي خصوصاً لكان مسوى من سعوديين أو بالبر زي كذا مو من المطاعم، وبالذات لما يكون لحم، ماشاء الله عليكم والله غبطتكم ماودكم تعزمونن لأنه شكله ماشاء الله مندي على سنع ؟ :d ، شكله خطير خصوصاً أني بالغربة تعذبت زيادة لما شفت الصور، لكن إن شاء الله برجع بعد شهر وبأكل حق سنة. http://www.mlfnt.com/lives6/13336281833.jpg تقل موهب غريب علي هالمكان :rolleyes: عندي أسألة لأني مصمم لما أرجع أسوي هالمندي: تعرفين بالمندي ماتقدرين تتحكمين بالنار !! يعني لما تكون النار قوية يمكن ينحرق الرز واللحم ما استوى ويروح مندينا وطي !! أو تكون قليلة وتطفى ولا الرز ولا اللحم يكون استوى، وش الحل ؟ وش كثر الماء لما تحطونه في الرز ؟ هل اللحم نضج مية بالمية ؟ وين أحصل برميل المندي وغطاه ؟ شكله مرة مريح هل دفنتوا البرميل بعد ماحطيتوا اللحم والرز ؟ أخيراً بالعافية عليكم والله يسعدكم. شكراً لك أختي الكريمة. |
ماشاء الله كشتة ممتازة
كن البر مافيه غيركم.. وش حقه الشراع :d تدرين وش تمنيت أن أبوي يقلط على أخر صورة :d يحب يابعدي هو هذي الحركات الصراحة كنت اتفرج على موضوع ابو فيصل عن هونج كونغ ومنه مباشرة جيت لموضوعك حسيت فعلا بمعنى الجفاف :d تسلمين على الموضوع الحلو |
كشتة روعة من المكان للاكل
والأكل شكله لذيذ جدا ادام الله لكم السعادة |
اقتباس:
تسلمين على الدعوه الطيب .. نورتي .. |
ماشاء الله تبارك الله
اجواء رائعه ومندي ولاأحلى يسلموا أناملك على الجو الحلو اللي عيشتينا حسيت أني معكم بالكشته :) |
| الساعة الآن 12:01 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©