منتدى عالم الأسرة والمجتمع

منتدى عالم الأسرة والمجتمع (http://www.66n.com/forums/index.php)
-   العلاقات الأسرية والإجتماعية (http://www.66n.com/forums/forumdisplay.php?f=91)
-   -   كيف أحافظ على هذه الصفة فيا و أزيدها في ولدي ؟ (http://www.66n.com/forums/showthread.php?t=234713)

روح الطير 30-03-2012 11:16 AM

كيف أحافظ على هذه الصفة فيا و أزيدها في ولدي ؟
 
السلام عليكم و رحمة الله و بركاته

الأخوة و الأخوات الكرام ..

.
.

في البداية أرجو عدم نقل الموضوع لركن الطفل .. :29:
حابة استفيد من النصائح و التجارب و الخبرات ..

- أنا من يوم خلصت الثانوية، ما صرت أسمع أغاني و الحمد لله .. و قبلت بزوجي يوم عرفت إنه
حافظ للقران ..

- زوجي حافظ للقران، مجرد حفظ .. و إذا أحد فتح أغاني قدامه .. عادي ما يتكلم و لا يهمه .. و كنت
دايم أنصحه و أحاول إني أزرع بداخله كره للأغاني و حب للقران ..

- يوم رحنا بريطانيا بدينا نتابع برامج ( Got Talent ) و ( American Idol ) .. و دحين بدأوا كمان بالقنوات
العربية و صرنا نتابعه .. بس أحس إنه صارت الأغاني عادي تنفتح و ما نحس بوجود شي غريب ..

.
.

ولدي ماشاء الله عمره دحين 5 أعوام و صار يفهم كل شي و يتأثر، و أنا مسجلته بروضة خاصة و كان
زوجي رافض عشان يقول مو لازم خسارة فلوس عالفاضي، فكنت أقول له ( الفلوس بالعلم مو خسارة )

و ماشاء الله تبارك الله .. مرررررررررررررررة مرررررررررررة دحين ولدي صار يحب القران و يعشق القران ..
تأثر من الأبلة في الروضة حقته .. و دايم يقول لي ( ماما افتحي لي الأيفون حقتك عشان أفتح القران )
و دايم يقول ( بابا وديني المسجد ) .. و مرة لقي كتاب ديني و يحسبه قران ( مايعرف يقرأ لسى )
و جلس يقرا اللي حافظه من ايات ملخبطة ..

بعدين قال لي ( ماما اشتري لي قران ) ..

.
.

فين المشكلة ؟؟؟

أمس كنت جالسة و فتحت على ( عرب أيدول ) ولدي قال ماما افتحي لي فلم كرتون ، ما بغى هدا ..
انتبهت وقتها إني أمام مشكلة كوييس إني تداركتها من بدري .. و قمت قلبت القناة ..

ولدي أبغاه يكبر و يحافظ على حب القران ، بس خايفة إنه السنة الجاية وقت يدخل المدرسة ..
المدرسين الرجال ، يكرهووووه بالقران ،، لإنه أغلب الرجال ما عندهم أسلوب زي أسلوب أبلته
بالتشجيع ..

كيف ممكن أحافظ على محبة القران بداخل ولدي ؟ و كيف أزود المعيار ؟
كيف ممكن أرجع أنا بنفسي للقران زي زمان ؟ لإني بديت أهمل بسبب تهاون زوجي ..
بس زوجي يتأثر بيا .. فحابة أبدأ من نفسي و من ولدي ..

.
.

ساااااااااعدوني ..

مع العلم إنه أهلي كلهم يسمعوا الأغاني .. و عندهم الأغاني حلال لإنه مختلف فيه ..
و أنا بديت أقتنع بالرأي هذا .. لإنه مرة واحد من أخواني جلس يحاججني و سكتت ..

.
.

قبل شوي اللي خلاني أكتب الموضوع ..

جالسة أخلص أشغال بيدي ، و فتحت اليوتيوب عشان أشغل نفسي بأي صوت ..
و قلت أفتح أي مقطع موسيقي .. و بعدين قلت استغفر الله من زمان عن القران ..
و فتحت على صوت الشيخ المفضل عندي ( الشاطري ) و سورة البقرة ..

.
.

أبغى أرجع مثل زمان ..

و الله و أنا أكتب اخر حرف دحين ، عدت الاية هذه ..
( ثم قست قلوبكم من بعد ذلك فهي كالحجارة أو أشد قسوة ) ..

من جدددددددددددد حسيت إنها موجهة لي أنا ..

.
.

و زمان قبل لا أتزوج و وقت كنت أدرس بكالوريوس و فترة تركي للأغاني، كنت أقول أتمنى إذا جاني ولد
إني أخليه يحب القران و المسجد .. و الحمد لله إنه ربي حقق لي من عنده .. و كنت بفترة الحمل
دايما افتح على إذاعة القران .. و كانت أمي تقول وقت ولدي كان رضيع .. إنها يوم تفتح القران أو تقرا
إنه ولدي يهدأ و يسكت ..

بس أخدته بريطانيا معايا و صار يكره صوت الاذان و القران لإنه هناك يشوفوه شي غريب و مو متعودين
عليه ،، و كان ولدي يقفل المسجل إذا فتحت له عالقران .. فمبسوطة إنه دحين من حاله صار يحب
القران و إذا جو أطفال صحباتي عندي أو أطفال أقاربي ..

يمسك الأيبود و يفتح لهم برامج القران و يتحدوا كلهم بعض مين يقرا أحسن من التاني ..

فالحمد لله و الشكر عالنعمة هذه ، و حابة أحافظ عليها و أشجعه أكثر ..

أم يوسف2 30-03-2012 11:35 AM

روح فقدتك اول شي
يارب تكوني انتي و عيالك و اهلك بالف خير
بس طمنيني كيف الامومة من جديد ..

اعذريني مو قادرة ارد عليك لاني بنفس المركب
على الاقل انتي رجعت السعودية وممكن تتحكمي بالوضع

لكن انا لسه باوروبا و الاغاني بكل مكان لدرجة على قولتك صار عادي و ما نستغربها
الا صرنا نستغرب اذا رحنا مكان هادي :(

بصرحة اللي اقدر اقوله لازم نبدا من انفسنا
من فترة عاهدت نفسي احفظ ما اقدر عليه من القران وكنت كل ما فضيت اقعد اسمع القران
و احفظ و الحمدلله حفظت ما يقارب الجزء و شفت ابني تاثر كثيير فيني
صار كل مايشوف كتاب بالعربي يحسبه قران و يقعد يقرا
و يقول علميني اقرا لي حق الناس (سورة الناس )
اخر فترة اهملت للاسف و انشغلت بالسفر و امور ثانية
و ابني نسسسسسسى كل شي رجع الان ما على لسانه الا
you like it move it move it

والان معاهدة نفسي ارجع معاه من جديد و الله يعين .. الخطوات اللي بطبقها ...
** بالبيت لا لاغاني .. و باحط قران
** باتعمد اخليه بشوفني اقرا عشان هو كمان يتشجع
** قبل النوم افتح على سورة معينة صغيرة عشان يحفظها
**هو يحب اهلي كثير .. فا بتعمد امدحه قدام اهلي و اقولهم يوسفي صار يقرا قران
و يحفظ .. واقولهم يمدحوه .. عشان يتشجع و يفرح اكثر

و ان شاء الله استفيد من موضوعك باشياء اكثر والله يعينا على تربيتهم يارب

روح الطير 30-03-2012 12:05 PM

نورا ..

اشتقت لك موووووووووووووووووت .. و الله إني مشغولة مع الدوام حالياً و مضغوطة .. و بس أضمن الترقية
و أرجع أخلص إجراءات الإبتعاث للدكتوراة بإذن الله و أرجع أطييييييير ..

و مضغوطة كنت مع النقل من البيت و مع النونو حبيبي و مع الشغالة و خلال شهرين بإذن الله تبدأ الضغوطات
تخف عني و أفضى لكم .. :D

.
.

تعرفي ، لإنه بإذن الله حاسبة حساب إنه ما تعدي 6 أشهر أو بالكثير سنة .. إلا و نكون رجعنا سافرنا من جديد ..
فحابة ولدي يتأسس كويس و إذا رحنا للخارج ، أسجله بمدارسهم و نفس الوقت أسجله بالتحفيظ ..
يعني أبغى أستغل كمان الفترة هذه ، و استغل المرحلة العمرية من سنه ..

.
.

و ماشاء الله ( يوسفك ) ربي يحفظه لك .. ( حق الناس ) هههه يسعده يارب .. ^^

.
.

زوجي الحمد لله قبل لا ننام دايم يترك التلفزيون مفتوح على قناة المجد للقران .. و الشيخ يقرأ ..
لإنه متعود عند أهله يفتحوا دايما إذاعة القران 24 ساعة ..

.
.

بس أحس إني مقصرة في حق ولدي ..
و يبغالي اهتم من جدددددد ..

و النقاط اللي اضفتيها مرة كويسة و بأطبقها من اليوم إن شاء الله ..
و كنت زمان وقت ما كنت حامل ، كنت قبل النوم أمسك ولدي و أراجع له السور القصيرة و كان يفرح و ينبسط ..

و بأحاول أشجعه أكثر ..

رياض الأمل 30-03-2012 12:49 PM

اختي روح الطير أرسلي لأخوك هذا الحديث الدال على تحريم الأغاني

جاء عن اﻺ‌مام الطبراني بسند صحيح رحمه الله قال رسول الله صلى الله عليه و سلم ( ليكونن من امتي أقوام يستحلون الحرَ و الحرير و الخمر و المعازف و لينزلن أقوام الي حيث علم يروح عليهم يسارحن لهم يأتيهم لحاجة فيقولون إرجع الينا غدا فيبهتهم و يضع العلم و يمسخ آخرين قردة و خنازير الي يوم القيامة) , و هذا الحديث فيه دﻼ‌لة على تحريم آﻼ‌ت العزف و الغناء .

قال النبي صلى الله عليه وسلم : ( فِي هَذِهِ الْأُمَّةِ خَسْفٌ وَمَسْخٌ وَقَذْفٌ . فَقَالَ رَجُلٌ مِنْ الْمُسْلِمِينَ: يَا رَسُولَ اللَّهِ ، وَمَتَى ذَاكَ ؟ قَالَ : إِذَا ظَهَرَتْ الْقَيْنَاتُ وَالْمَعَازِفُ وَشُرِبَتْ الْخُمُورُ ) رواه الترمذي (2138) وصححه اﻸ‌لباني في صحيح الترمذي .
فاﻸ‌مة مهددة بهذه العقوبات إذا ظهرت المعازف والقينات (المغنيات) .



ويا اختي أحذفي القنوات اللي فيها مغنيات ونساء ساقطات فكيف تريدين لولدك ولنفسك وزوجكِ الصلاح ولديكِ مثل هذه القنوات الفاسدة وأدخلي ولدكِ في حلقة تحفيظ القران الكريم

روح الطير 30-03-2012 02:35 PM

القنوات هي ( إم بي سي ) و فروعها ..

و أنا أصلا ماني من متابعات التلفزيون أبداً و لا للمسلسلات ..
لكن زوجي يحب الأفلام ، و لو منعته بيتفرجه مع أصحابه و برة البيت ..
و حذف قناة الإم بي سي .. ليست ( بحلّ ) .. و خاصة مع نوعية زوجي ..

و إذا فيه قنوات فيها نساء ساقطات أو مسخرة و تفاهة و رقص و استعراض فقط ..
بنقلب القناة .. و نحذفها ..

و المسابقة تبع ( عرب جوت تالنت ) مثلا .. فيها مسابقات و اراء و تعليقات الحكام ..
و هي سبب متابعتنا له ..

.
.

و مدرسة تحفيظ القران ، اللي عرفته من زوجي إنه المدرسين في التحفيظ ( يضربوا الأولاد ) إذا ما حفظوا الاية ..
و أنا ما أبغى أعقد الولد من صغره و أكرهه بالقران ..

أبغى طريقة تحببه في القران ..

مثل وقت سجلته في روضة ، أنا بنفسي رحت و شفت تعامل المعلمات مع الأطفال ..
و شفت النتيجة أمامي حالياً ( محبته للقران ) و الحمد لله ..

أما الطرق - الروتينية - ليست بحلّ أبداً ..

و يا كثر اللي يحفظوا القران و لكن ما يطبقوه .. و أولهم زوجي ..
حافظ للقران لكن مجرد حفظ و بالإجبار حفظ .. و ما أبغى لولدي يحفظ غصب عنه ..
أبغاه يحفظ بحب و شوق ..

عشان كذا جيت سألت ..

روح الطير 30-03-2012 02:37 PM

و الأحاديث تبع تحريم الغناء ..
لو قلتها لأخوي فما راح يقتنع إلا بالشي اللي هو مقتنع فيه ..

فصرت أتجنب النقاش معاه ، عشان لا يأثر علي ..
سواء في الموضوع هذا أو غيره ..

Nourh 30-03-2012 02:44 PM

موضوع روعه يا روح الطير جزاك الله خير
فعلا الاطفال يتأثرون بوالديهم كثير
اولادي الثلاثه الكبار تربو في جو ايماني رائع خال من القنوات الفضائيه
وكان كل وقتي معاهم تحفيظ وتعليم ومذاكره وبعد دخول التلفزيون البيت دخل الشيطان معاه وخرب الحفظ واتلخبط كل شئ
اسئل الله ان يصلح احوالنا ويعننا على تربية اولادنا كما يحب ويرضا وان يجعلنا لهم قدوة صالحه

روح الطير 30-03-2012 03:50 PM

عزيزتي Nourh

المشكلة إنه عندي 3 أطفال
زوجي و الولدين .. :D

زوجي أول ما تزوجته كان ( مجنووووووون ) شي اسمه تلفزيون ..
لإنه ما كان في بيت أهله تلفزيون ..

فصار يتفرج الصالح و الطالح .. المهم شي اسمه تلفزيون ..
فصرت اجلس معاه و أقول له ، هذا المسلسل ماله هدف غير قلة الأدب و المسخرة ..
و أشغله و أكرهه بالمسلسل ..

مثلا أفلام تاريخية أو كوميدية أو أكشن و كذا .. اسكت و أخليه يتابع ..
بس لو فيه مقاطع ، كنت أقلب .. و خلاص صار هو من حاله دحين يعمل نفس طريقتي ..

صح بداية الزواج كنت أزعل و انقهر ، بس قلت يتفرج بالبيت عالتلفزيون ..
و لا إنه يروح مع أصحابه و الصاحب ساحب .. و ما تعرفي توجهات أصحاب زوجك ..
و هذا سبب سكوتي بالبداية ..

و كنت لو عدى مقطع موسيقي ، أخفض الصوت مثلا ..
و لحد دحين إذا كان بيأذن ، علمت زوجي و ولدي إنهم ( يقفلوا الصوت ) تبع التلفزيون ..

فأنا ماني حابة أمنع التلفزيون بشكل نهائي ..
عشان تتكرر نفس الأشياء هذه في ولدي ، و إذا في يوم زار أحد من أقاربه أو أصحابه ..
عيونه ما تفارق التلفزيون ..

و أنا عشت ببيت ، التلفزيون فيه 24 ساعة .. و الكل يتابع بشغف ..
لكن الحمد لله ما أدور أبدا عالتلفزيون و إذا فتحت التلفزيون مرات لوحدي ..
يا أفتح ( فتافيت ) أو ( برامج مثل أوبرا أو دكتور أوز ) أو زي كذا أشياء مفيدة ..

فما أحس إنه منع التلفزيون ( حل ) خاصة في العصر هذا ..


و ربي يثبت أولادك و يزيدهم من فضله ..

.
.

أنا المشكلة جات فترة أحس إني بديت أهمل و أطنش ..
و يمكن مع الضغوطات الحالية و انشغالي مع مية شغلة ؟

فحابة أرجع و حابة أعمل أشياء تأثر في ولدي و تزيده ..

aseera 01 30-03-2012 03:53 PM

عندك حق يا نورا
انا عندي نفس الحال في كل مكان اغاني ..بالراديو بالمدرسة وحتى احيانا بال kindergarten :23:
اطفي الراديو مثلا بعد ما اسمع النشرة واخبار الطقس عشان بعدها على طول اغاني القى ابني بيغنيلي الاغاني اللي سمعها من اصحابه بالمدرسه (هو بالصف الخامس) واخته تردد وراه :29:
وكله الا you like it move it move it هذي عندي وعندك واحد:14::14:
انا الحمد لله احاول استمع للقرآن اذا حبيت اسمع شيء وتقريبا توقفت عن سماع الاغاني عن قصد ..الله يعيني واتوقف تماما
بس همي الاولاد لان المجتمع هنا زي ما قالت نورا في كل مكان الموسيقى حتى المحلات فبيكونوا الاطفال متأثرين جدا بها
ربنا ييسر لنا وننهي غربتنا على خير ان شاء الله لنبعدهم عن هذا الجو :24::24:
حاولي يا روح تخلي دايما القرآن شغال عشان ابنك يتعود حتى لو سافرتي ومفيش اذان وهذا اسوأ شيء في الغربة يبقى القرآن على الاقل مألوف ومحبوب في اذن الطفل
بين قوسين..افتقدناك ياروح الطير
..

روح الطير 30-03-2012 06:03 PM

أسيرة حبيبتي ..

خوفتوني أكثر من الغربة و خاصة إنه ولدي دحين بدأ يفهم ماشاء الله ..
بس يارب أقدر ألاقي له هنا ( معلم قران ) تعامله رائع مع الأطفال ..

قلت لأخوي الصغير يسأل لي و وعدني بيشوف لي و يسأل أصحابه ..

و إنت وحشتينا أسيرة ..

.
.

مرة ماني لاقية وقت و يارب بس تعدي و تخلص الشهرين هذه على خير ..
و بيني و بينك ، بعد وفاة الوالدة الله يرحمها .. صرت مرات أتقصد أشغل نفسي للنخاع ..
عشان لا أجلس مع نفسي ..

بس حاسة إني مضغوطة حاليا بزيادة ..
و ماشاء الله ، جالسة اكتب دحين و فارشة الأوراق و الأقلام و الكتب ،، و ولدي راقد جنبي
و فاتح الأيفون على سورة البقرة و يردد الايات مع السديس ..

و سامعة صوت التلفزيون مفتوح في الصالة عالأفلام كرتون ..

سألته ، ليش ما تروح تتفرج تلفزيون ؟
قال لي : ما أبغى تلفزيون و ما يبغى أحد يكلمه .. يركز مع كلمات القران و يقول لي
( ماما ، سمعت الشيخ يقول امييييين زي الأبلة )

ربي يزيده .. و يساعدني على المحافظة على النعمة هذه ..

الصراحة مافيش أحد من أهلي حافظ للقران ..
عشان كذا ما عندي خبرة ، و أهل زوجي فيه اللي حافظين قران ( بشكل اجباري ) بس من ورا أهلهم كل شي فريييي ..

فما أبغى لا إفراط و لا تفريط ..


الساعة الآن 11:09 PM.

Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©