خادمتي ستسافر.. ماذا أعلم الجديده؟
 

السلام عليكم ورحمة الله وبركاته

مادري اذا مكان الموضوع مناسب بس انا عندي مشكله مع خدامتي

هي تشتغل عندي من 3 سنوات يعني من اول ما تزوجت و هي عندي

و الحين هي بتسافر تقريبا على شهر 5

و راح اجيب خدامه ثانيه بس المصيبه اني ما اعرف في سوالف البيت

غسيل و تنظيف و الخ الخ

الطبخ مش مهم لاني بجيب طباخ

المصيبه الحين ان الخدامه الحاليه تبط جبدي انا متحملتها من زمان لانها نافعتني و تساعدني مع العيال

بس فيها اشياء ما ابي الخدامه اليديده اتعلمها

في ناس قالوا لي يبي اليديده قبل لا تروح الاولى عشان اتعلم منها و ناس قالوا لا لا تخلينهم يلتقون عشان ما تخترب اليديده
و انا محتاره!!!

الاشياء اللي ما احبها في الاولى:
1- تنام وااايد يعني تنام الساعه 9 و نص او 10 بالكثير 10 و نص اذا طولت و تقوم الساعه 7 الصبح و تنام الظهر ساعه و نص

2-تطلع مع خدامات ام زوجي مع السايق يعني السايق يوصل الخدامات للمول
و انا بصراحه اول مره اشوف خدامات يطلعون
انا ما احب انها تطلع بس اخليها عشان تكون اوكي معاي و لانها متعوده على هالشي قبل عرسي يعني من كانت في بيت اهل زوجي

3-تناحسني مرات خاصه اذا رحت ابات عند امي تناحسني و تقول ما ابي ابات هني ابي اروح بيت ماما(عند ام زوجي)

4-اذا خليتها تبات في بيت امي غصبا عنها تقول حق ام زوجي ان امي تهاوشها و امي و لا عمرها هاوشتها و حتى ما تطلب منها تسوي شي

5- مره طلبت انها تشتري جوال لان خدامة ام زوجي عندها و انا رفضت و زوجي رفض و قلنا لها مافي بس اكتشفت انها اشترت تلفون

صديقتي قالت لي لا تخلين الخدامات يلتقون و اذا يات اليديده خليها اتعلم عند امج لانها لو راحت بيت ام زوجج بيخربونها الخدامات اللي هناك و بتحط في بالها ان ام زوجي هي اللي مسؤوله عنها فكلما بتصير مشكله بتروح لام زوجي

بس المشكله ما اقدر اوديها عند امي لان زوجي بيتدخل و انا متأكده و لو صار شي بيقولون من امج

ارجوكم ساعدوني في هالمشكله و اذا عندكم اقتراحات لاشياء اعلمها الخدامه اليديده بليييز اقترحوا علي

شفت قبل كم يوم فيديو


خدامه تعذب لها طفلين تعذيب مو صاحي


فحاولي ما تخلينها تنفرد باعيالك أبد

و تفقدي عيالك بين فتره و فتره و خليهم يحكون لك عن سوالفهم وأنت مو عندهم


هذي نصيحتي و الباقي يفيدونك فيه البنات

1- تنام وااايد يعني تنام الساعه 9 و نص او 10 بالكثير 10 و نص اذا طولت و تقوم الساعه 7 الصبح و تنام الظهر ساعه و نص

خليها انتام ترها انسانه وتحتاج حق وقت للراحة ، من بعد ما يتعشون الجهال ماراح تحتاجينها ، وعشاج انت ووجك أنت الي جهي يعني مسأله النوم ما يحتاج انج اتكبرينها ما شوف فيها مشكله

2-تطلع مع خدامات ام زوجي مع السايق يعني السايق يوصل الخدامات للمول
و انا بصراحه اول مره اشوف خدامات يطلعون انا ما احب انها تطلع بس اخليها عشان تكون اوكي معاي و لانها متعوده على هالشي قبل عرسي يعني من كانت في بيت اهل زوجي؟؟؟؟؟
بالنسبة للسوق هي كل اسبوع مثلاً اتروح وله بين فتره وأخرى ؟؟
اذا كانت بين فترة وأخرى عادي جداًً مسكينة تبي تشتري حاجاتها .

3-تناحسني مرات خاصه اذا رحت ابات عند امي تناحسني و تقول ما ابي ابات هني ابي اروح بيت ماما(عند ام زوجي)؟؟؟
أحسن من انج اتخلينها في البيت بنفسها ، ودام هي ترتاح في بيت أم وجك لانها تعودت عليهم وبت امج ما تعودت عليهم يعني فكه منها ، مو حلوة الخدامة 24 ساعة معاج وبالنسبة حق اليهال استحمليهم هاي اليوم وأكيد أمج وخواتج بيساعدونج ..

4-اذا خليتها تبات في بيت امي غصبا عنها تقول حق ام زوجي ان امي تهاوشها و امي و لا عمرها هاوشتها و حتى ما تطلب منها تسوي شي
الأفضل أنج ما تأخذينها معاج ، عشان تفتكين من السانها ..

5- مره طلبت انها تشتري جوال لان خدامة ام زوجي عندها و انا رفضت و زوجي رفض و قلنا لها مافي بس اكتشفت انها اشترت تلفون ؟؟
سالفة التلفون الي فالب علينا ترى مهما نمنعهم بعد عندهم طرق أخرى يعني أما تلفون البيت أو تلفون السايق ، يعني لو شغالتي أطلبت مني تشتري تلفون ماراح أمنعها والله أعلم يمكن يكون عندها في الاساس لانها كل أسبوع تتصل حق اهلها من تلفون البيت عن طريق الكرت واهلها دايم يتصلون فيها .

وبالنسبة للشغاله الجديدة اذا فيج شدة انت اتعلمينها الشغل كله علميها سفري الشغاله بعدين جيبي الجديدة ، أو خليها عند هلج لين اتروح القديمة بعدين جيبي الجديدة البيت .

الله يحفظ خادماتنا ويبعد عنا شرورهم ...

مشكله ذا الشغالات اذا اجتمعن

ناس تخرب ناس

خلاص انتي علميها شغل البيت شدعوه اختي اسمحي لي كل هذا ماتعرفين البيت وش محتاج من نظافه

ولا تخلينها تحتك بخدامات ام زوجك الا ماندر

ومم على كيفها تختار المكان الي تنام فيه

عوديها على هذا الشئ

ويفضل ما تحتك بشغالتك الحاليه علشان ماتخربها عليك

وبالتسبه للنوم عادي دامنك منتي موظفه خليها تنام

واذا على الجوال انا ما احبذ لاني الي اشوفه من الشغالات ومعاهم جوال

ماغير ضحك وكركره والجوال مايسكت رن ورن

الا مارحم ربي

والطلعه بعد لحالها مالها سنع لا وبعد مع شغالات ثانيات

والله من هينا يجي الخراب

تبين اغراض على العين والراس انتي وديها للي تبيه

والامر راجع لك

مشكورين عالرد

اخت محمد هيا
انا ما اعترض على نومها بس واااااااايد تنام انا اشوف خدامات الناس يقومون 5 الفجر او 6 و ينامون الظهر ساعه و نص و يسهرون لين 12 و ساعات 1

و عن الطلعه تطلع كل شهر او شهر و نص و انا مب معترضه عالطلعه بس معترضه على الروحه بنفسهم مع السايق و لمده طويله


اقدر استحمل عيالي بس المصيبه اني حامل في الشهور الاولى و اتعب وااايدو عيالي صغار 7شهور و سنتين
و امي مسفره خدامتها لان لقتها تغازل سايق بيت ام زوجي و تكلمه نص الليل و هو اللي جايب لها الجوال (انا ما قلت حق زوجي او امه عشان ما يقولون ان احنا نطلع سوالف)
يعني امي ما تقدر تساعدني و ما عندي الا اخت وحده ما تعرف تبدل الحفاض بس تساعدني قد ما تقدر و مسكينه وراها دراسه و جامعه


الجوال ما يعجبني لاني اخافها تتفق مع السايق او اي حد يدخل عندها الغرفه او يسوون فينا شي

اخت جينز

بحاول من الحين اتعلم من امي الاشياء الاساسيه اللي ممكن اعلمها اليديده و بحاول ايب اليديده و في نفس اليوم تسافر اللي عندي

^^^^
حبيبتي مبروك الحمل والله يثبته لج ، ما في حل غير انج اتعلمين الشغاله الجديدة كل شئ بنفسج عشان ما تخلينها تاخذ من طبايع الاولى ولمه توصل خليها عند هلج يعني ممكن امج اتعلمها الطبخ مثلاً ولين اتسافر الأولة اخذيها عندج البيت ، والله هاي الخدامات بلاوي الله يعينا عليهم الكل مبتلي فيهم بس ما باليد حيله احنا محتاجينهم خصوصاً اذا كنت موظفه وهي اتشوف اعيالج فلازم ما نضغط عليهم ..

الله يكافينا شرهم

هلا حبيبتي

انا قلت لكم زوجي بيسوي لي سالفه خصوصا ان علاقته بأمي مش اوكي
فأكييد بيقولي انتي علميها او طرشيها بيت امي يعلمونها هناك

بس تدرين انا فكرت اني انزل موضوع استفسر فيه عن الاشياء اللي ما افهم فيها و انتم ان شا الله بتساعدوني