أسأل عن بوتيكات للأزياء في الإمارات
 

السلام عليكم ورحمة الله وبركاته ..

مرحبا بأخواتي الغاليات ..

أتمنى انكن تكونن في أحسن حال ..

الي عندها فكرة عن محلات تبيع قمصان وتنانير جاهزة نفس ستايل مانجو .. تفيدني بليز ..

لانه كل معارفي يلبسون من مانجو وحلو الواحد يكون مميز ..

اريد شغلات حراير وشيفون ..

محلات في العين أو بوظبي أو الشارقة .. الي عندها فكره بليز ما تبخل علي ..

أنا اعرف انوتا ومونتانا في صحاري مول .. وكان كان والحريبي في العين مول .. الي عندها اسماء محلات غير تفيدني يزاها الله خير ..

ولكم مني خالص الدعاء بالعفو والعافية في الدنيا والآخرة ..

والله وانا في العين وادور مثلك عن المميز والله مليت من سبلاش وبرمود وغيرهم وغيرهم .....فيه محل اسمه عديل في العين عنده شغلات حلوة لو تحبي ادلك عليه بالضبط .....عنده تنانير بس كلهم طويله وحرير وشيفون وساتان وعنده مجموعه قمصان لا باس بها الوانها حلوة بس موديلاتها عاديه

وفي محل في الجيمي مول بس والله مو ذاكره اسمه .....يعني ممكن تحصلين عنده كل شي كويتي ..موديلاتهم اغلبها كويتيه ......زمن تنانير وبناطيل وقمصان وبديات

وان شاء الله استفدتي مني :23:

هلا توته ..

مشكورة اختي ... بس محل عديل وين مكانه في العين ؟؟

وهذا المحل الي في الجيمي مول .. اي واحد تقصدين ..

ولج مني جزيل الشكر ..

حبيبتي محلات عديل بالضبط فيه تقاطع الاشاره الكبير اللي عند الساعه معروف في العين .......او كانك جايه من جنب حديقه الجاهلي باتجاه الاشاره .....تاخذي الفلتر اليمين بدل ما تروحي سيدا باتجاه الاشاره .....وعلى طول ثاني دخله على اليمين جنب الفاين فير وجنبه وكاله جمبو للالكترونيات يعني مكانه معروف اي ابو تكسي يوصلك

المحل اللي في الجيمي والله مو ذاكره اسمه هو في الطابق الثاني ...جنبه على طول محلات لبيع فساتين السهره......اذا رحت هاليومين اجيبلك اسمه وادللي