منتدى عالم الأسرة والمجتمع

منتدى عالم الأسرة والمجتمع (http://www.66n.com/forums/index.php)
-   الريجيم والحمية وضبط الوزن (http://www.66n.com/forums/forumdisplay.php?f=120)
-   -   تجربتى وكيف انقصت وزنى 20 كيلو فى سنه دون ريجيم او رياضه (http://www.66n.com/forums/showthread.php?t=198359)

fatoushi 16-12-2009 12:34 PM

تجربتى وكيف انقصت وزنى 20 كيلو فى سنه دون ريجيم او رياضه
 

[quote]
صباح الفل يا بطابيط :d


بما انى عضو فى المنتدى الجميل ده وكلنا اخوه وبنساند بعض، قلت لازم وضرورى ادخل القسم بتاع الدايت واشارك
وبعدين قلت طاب ما احكى للبنات قصه كفاحى مع الدايت 17 سنه:25:

ونبدأ القصه
كان ياماكان كان فيه واحده اسمها فتوشى .......أنا يعنى

انا قبل الجواز كان مقاسى 8 وزنى كان 52 كيلو وطولى 170 وكنت غصن لبان وكانوا يتريقوا على بطنك لاصق بضهرك هههههه:23:
بعد الجواز بقيت مقاس 10 وبعدين 12 وبعدين14 ماشاء الله على منظمه حتى فى التخن!!!!!
وزنى فى حملى الاول زاد 50 كيلو ونزلت منهم 40 وفى الحمل التانى زاد 40 كيلو ونزلتهم وفضل منهم 10 على ال10 اللى زدتهم بعد الجواز فجأه وزنى ثبت عند 85 كيلو:(
وما اقولكمش بقى 17 سنه جواز منهم 16 سنه بؤس وشقا واكتئاب وحرمان وعزله ورفض لشكلى وياسلام لما ادخل محل والاقى مقاسى مش موجود يا الله جنون .....او ابص على مقاس خصر البنطلون الاقيه متر تقريبا انقهر وما اشترى الا اخس شى وكأنى بعاقب نفسى
كذا دكتور وكذا دايت
بطلت اخرج عشان حيره اللبس وشكلى:mad:
وطليقى كان يتفنن انا اقول هعمل دايت من هنا ووالله احس انه بيعاندنى يملا البيت تورت وكيك وعزومات بره .....لئيم .....واذا ما اكلت يزعل واذا نبهته يزعل ويقول انتى اللى ماعندك اراده
وكأنه تحدى القوه .......:rolleyes:
المهم بعد المعاناه دى وفى الفتره بتاعه الخناق قبل الطلاق قررت انى احب نفسى
ولقيت فتوشى جوايا زعلانه اوى منى ومستخبيه ومكسوفه
بدأت افتكر شكلى زمان وازاى كنت بنت حلوه وبالبس براحتى
وقررت انى انزل وزنى بنفسى مع نفسى ومش هعمل دايت ولا هعمل رياضه
التخن معناه كتير اوى لو دى مش طبيعه الجسم او لو مش من الصغر اننا بناكل عشان نسد فراغ عاطفى......او خوف او عدم امان .......
و برضه ربنا كريم حتى فى المصيبه دايما بيبقى فيه طاقه نور
قلت انا هحب نفسى انا ما استاهلش اللى بيجرى لى ده وشكلى يبقى كده ولا استاهل انى اعانى فتوشى احسن من كده
وبدأت فعلا قسما بالله يا بنات قسما برب العزه فى ظرف سنه وزنى نزل من 82 ل65 كيلو:14:
مقاسى بقى 10:17:
وبدأت فعلا مع نفسى ومن غير ما تقولو دى مجنونه فعلا كأن جسمى اتحول لطرف تانى بيستجيب لى بسهوله جدا جدا .......كل ما امشى على برنامجى الشخصى جسمى يكافئنى بنزول مؤشر الميزان
وطبعا قريت لما عيونى ضعفت فى موضوع الوزن ده واحدث الطرق وكتب ومواقع بالهبل يعنى ممكن اعمل موسوعه الحين
بجد يا بنات لو حبيتو نفسكم وفهمتم مشاكلكم وانتو بتاكلوا ليه ده يعتبر نص المشوار

يارب موضوعى يعجبكم


helwaya 16-12-2009 01:44 PM

موضوع تحفة ... بس ماقولتيش السر فين طيب ..

يعني عملتي ايه

انا عن نفسي مؤمنه ان السر في الاعتدال

وان الواحد مايحرمش نفسه ياكل الحاجة اللي بتخن بس يبقى حاسبها

وتاني يوم يا يتحرك او حتى يتنازل عن حاجة تانية عشان يوزن اموره

انا مؤمنه كمان بإننا لازم على الاقل نكون بنحب الحاجات اللي بناكلها .. ومهم نستمتع بيها جدا.. حتى ولو كمية صغيرة

ومهم يكون اللي بنحبه من كل نوع ومتوازن ... مش من الحاجات اللي بتودي في داهية وبس !!

مافيش حاجة اسمها انا باكل وخلاص !!!

fatoushi 16-12-2009 02:18 PM

حلوايه نورتى:d

اقولك السر كله وللا نصه وللا ايه؟؟؟؟؟؟:25:

هتدفعى كام؟؟؟؟:25:



طاب مش قايله !!!!!!!!!!!!!













يا ستى المشوار والله طويل جدا بس مش مرهق
مش هكدب واقول ما اخدتش مساعدات لا اخدت وبصراحه فعلا ساعدتنى اكيد بس الاصل مش هى هى كانت زى نفسيا كده بتقرب المشوار
شويه معلش وهرجع لك حالا يا بطتى

مشكلتي اصدق 16-12-2009 03:00 PM

الحقيني بالطريقه يا ست البطابيط

ام تالة وتولين 16-12-2009 04:09 PM

تصدقوا كان وزني قبل الزواج مايزيد عن 50 طولي 160 لكن بعد الزواج صار يزيد وزني من اقل شي مادري ليه والزيادة كلها تحت وشوفوا حالي كل فترة اجرب شي فيه اللي جاب نتيجة معايه زي حبوب ردكتيل وشاهي جامو والله اكره السمنة بس انصحكم جربوا الاشياء الطبيعية حتى لو مانفعتك ماراح تضرك زي شراب الملفوف

fatoushi 16-12-2009 04:21 PM

مشكلتى اصدق
كنت بزعل منك واتفرس افتكرتك متزمته وهجوميه بس لقيتك فرفوشه انا كمان عفوت عنك ايتها البطه:14:

بصى انا لازم انزل ضرورى اودى الاولاد النادى تمارييييييييييييييييييييييييييييييييييييييين:29:

على بال ما ارجع بعد ساعتين عشان دى هتبقى سهرتنا الليله الموضوع ده

انا هقول لكم طريقتى والله العظيم بس لو عرفت عن عاداتك الغذائيه هعرف اساعدك احسن

وهتدفعى انتى كمان مش كونى حبيتك هتاخدى كل حاجه ببلاش:25:
ارجعى لردودى فى قسم المشاكل فى محتاجكم ساعدونى وردى عالاسئله اللى انا كتبتها له فى كل مشاركاتى يمكن نحتاجها

وهبقى اقولك بعدين التمن ايه؟
باى يا قمر وبطلى تصدقى بقى
:22:

maimai 16-12-2009 04:44 PM

فتوشي ... ضرتي الجميلة .. انا عندي نفس المشكلة ووزني لازم ينزل صحيا عشان في ضغط وكوليسترول .. لو تقوليلي السر ادعيلك على طول ..

معلش انا اليومين مشغولة ويادوب بفوت اتصفح وما بيكونش معايا وقت ارد واتابع ..

مشتاقة لكم جدا :)

noriin 16-12-2009 04:51 PM

فتونشي الحقي البطه نورين:)
مش بطه بس شويه

Loulou.. 16-12-2009 08:01 PM

يلا يا بطة يا حلوة عايزين نعرف عشان انا بعمل دايت بس كنت فكرا اني هنزل بسهولة زي قيل الزواج لاكن بعد الزواج حاجة تااانية!!

fatoushi 16-12-2009 09:48 PM

والله انا لو بعرف ان موضوع الدايت ده هيلم شمل الحبايب والدرر هاه الدرر يا ماى لكنت فتحت لكم مركز صحى فور فرى على حساب البطه الام اللى هى انا:22:
تعرفوا ان حكايتى مع الخسسان زى حكايه البطه السودا اللى بقت بجعه هههههههه قمر يا ناس دمى عسل :23:
هاه متشوقين طبعا

مبسوطه وبضحك لوحدى زى الخبله


عشان ما تزهقوش همشى معاكم خطوه خطوه والله بفكر اتخصص فى القصص دى واهى ضمن حل المشاكل برضه ما انا بقيت خبيره من شغلى فى المنتدى هنا:25:

الاول نويت والنيه لله انى اتغير خالص لان كان عندى هدف لنفسى انا
لازم ارجع زى زمان انا احسن من انى ابقى وحشه ودبه .......انا هخس عشان انا بحب نفسى
لو هخس عشان هدف او ان اعجب الناس هرجع تانى ما انا لى 17 سنه فى القصه دى
لالالا انا هخس عشان البس واتشيك وارجع صبيه
انا دلوقت عارفه كويس اوى اوى انا بتخن ليه وازاى وفاهمه جسمى بيشتغل ازاى .
:14:
نزلت السوق اشتريت اكبر زجاجه خل تفاح ، وبن من ارخص الانواع قهوه تركى ارخص نوع فى الدنيا بس كميه واشتريت شمر وشاى اخضر وthermos ترمس احط فيه المشروبات ، وكمون مطحون وليمون ، وكورن فليكس دايت وبران سيريال وفاكهه وشوفان وبذر كتان من السوبر ماركت وزبادى بالهبل منزوع الدسم ولبن منزوع الدسم وبقسماط سن وزيت رش فريسكو وزبده رش فريسكو وتونه مدخنه وتوست سن وعيش سن وبيبسى دايت او ماكس وشويه زبيب وجزر بيبى وكرفس عيدان وجنزبيل اخضر،وحبوب سيبوتريم وزينيكال ولبن رايب دايت
و2 دامبل الواحده 5 كيلو بس وميزان ديجيتال
عارفه ان الحاجات كتير :o
بس معلش ده خزين لفتره طويله جدا جدا لان اول ما الحاجات دى هتقرب تخلص هنزل اجيب غيرها لانها لو خلصت هرمرم من التلاجه
عملت جدول لروحى وحطيته للتلاجه انى هنزل بالشهر 2 كيلو ونص وقسمته ايام ومهام واسبوع وتقييم منى لنفسى وكنت حريصه جدا انى ما اغشش روحى ولا اكسف نفسى واخذلها قدام نفسى الجدول كان فيه كمان الاهتمام بالنفس والشعر والجلد يعنى الماسكات والحنه وكده

بسم الله
صليت لله وطلبت انه يساعدنى انى اشفى من مرض السمنه كل يوم كل يوم كان ده طلبى وكل ما وزنى ينزل اسجد شكر لله

بالليل قبل ما انام اغلى كوب ميه واحط فيه ملعقه كمون مطحون صغيره وعصير نص ليمونه وبعدين احطها هى نفسها وحته جنزبيل اخضر وانقعهم طول الليل واغطيهم بطبق فنجان وحطيتهم فوق ترابيزه المطبخ لان ده اول مكان بدخله الصبح

اصحى الصبح اتوضا واصلى واخد حبه سيبوتريم عالريق واشرب المنقوع ده طبعا كان مر فى الاول بس بعد كام يوم بقى عادى.....طليقى كان بيقوللى انتى مش هتقفلى المعمل اللى انتى عاملاه ده انتى ايه بتحضرى عفاريت والله ما هتخسى ...يا بنتى دى اراده :19:.......وانا إذا الحيط رد ارد انا .....بصراحه ما كانش يهمنى اعرفه او لا لان ده شى لنفسى وخاص بى والتحدى مع فتوشى مش معاه
المهم
احضر له فطاره وفطار الولاد وينزلوا كلهم بالسلامه

أغلى براد الميه واجيب الترموس احط ملعقه ونص صغيره شاى اخضر ومعلقه شومر او شمر حب مش مطحون واملاه ميه لانه كان صغير ياخد يادوب تقريبا لتر او لتر ونص واحطه جنبى على ترابيزه المطبخ مكانى المفضل اللى بقضى فيه اليوم وبكتب لكم منه كل يوم واحط كوب جنبه

طبعا كنت بحضر القعده دى كأنى ملكه وده اشيك مكان فى العالم ويمكن احط ورده فى فازه كمان لو اتوفرت ......انا مش بعاقب نفسى لا انا بحب نفسى وبساعدها وكنت مقتنعه فعلا بده

اعمل كوب نسكافيه تلات ارباعه ميه والباقى لبن منزوع الدسم انا عمرى ما اكلت سكر اصلا بس يا بنات اللى مش واخده على كده ما تعملش زييى عشان ما تكرهش النظام ده تقولى وانا اقولها تتصرف ازاى
اكل 4 بقسماط او 6 ساعات ابقى جعانه اوى عادى يعنى والحمد لله انا عملت الفطار كده واكلت وشربت الكلام ده كله على 8 او 9 الصبح بكون خلصته

أحضر بقى يا خلطه الشعر وللا الجلد ايا كان اللى عليه الدور فى الجدول واحطه على وشى او شعرى واربط راسى واتحول لمحاربة نينجا فى البيت ......رفايللو:cool:

انظف البيت بهمه عاليه لانى موسوسه نظافه واغسل الحمامات وامسح الارض و اغسل الغسيل ممكن اجوع يا اشرب بيبسى دايت يا إما اكل تفاحه صغيره او اى حاجه تسد جوعى جزرتين ، بقسماطه ونسكافيه كوب لبن رايب كده يعنى
ادخل عالمطبخ احضر الغدا لهم
وادخل الحمام اخد دش ......استحمى كويس بالليفه تمام ........وبعدين اجيب قبضه كف بن وادعك بيها جسمى كله لان عندى سيلوليت وافضل ادعك لحد ما ايدى تخدل
واشطفه واحط بعدها شويه خل تفاح على نفس الاماكن ......انا كنت حاطاه ببخاخ عشان السهوله
وادعكه بالراحه يعنى يادوب كده مسح عادى واشطفه واحط شاور جل عشان الريحه ودهون القهوه ......
كل الموال ده بياخد ربع ساعه


يرجعوا من بره اغرف لهم الاكل وييجى دورى انا بقى
احط قبضه ايد شوفان وقبضه ايد بران سيريال وقبضه ايد كورن فليكس دايت ومعلقتين كبار بذر كتان وكوبايتين الزبادى الدايت واقطع اى فاكهه موجوده عندى زمنها الموز واحده كبيره كمان أى فواكه كأنها سلطه ومعلقه كبيره زبيب
وهم يا جمل .......أكل وابقى خلاص اتمليت مش قادره اكمل الطبق ساعات

اشيل السفره واغسل الاطباق واحضر لهم الحلو ياكلوا ويريحوا
اوضب خلوتى انا بقى واشرب كوب شاى اخضر او اتنين على حسب الوقت اللى هقعده مع نفسى فى مملكتى
واعمل عشر عدات بس بالدامبلز لكل ايد وتمارين الاكتاف وشد عضلات الضهر 10 عدات بس من دون تكرار وممكن اقل لما كنت ابقى تعبانه كلهم كلهم هيطلعوا تقريبا 50 مره هياخدوا دقيقتين انا كنت بعمل ده لانى بكره الترهل:18::18:

يصحوا من النوم نتكلم ونعمل اى حاجه طليقى وقتها كان بيحب جديد وقلبه سعيد :14::14:فكنا بنخرج تقريبا نمشى فى الاسواق عشان يشترى لبس شهر العسل بتاعه مع القطه الجديده ......نفضل نمشى على قد ما تقفل المحلات من 7 ل9 مثلا واشترى كوب نسكافيه او كابوتشينو او لاتيه واحط عليه كريمه واقول للبنت كريمه دايت

نرجع البيت خلاااااااااااااص احضر عشاهم واعمل ساندوتش 3 طبقات توست سن وبينهم تونه مدخنه وخس وخيار وممكن ملعقه صغيره مسطرده
واشرب ميه .........ويناموا ادخل تانى اوضب المطبخ والبيت عشان لما نصحى الصبح البيت يبقى حلو كده مش مبهدل
واقعد تانى مع روحى اكتب واسمع الراديو واكمل باقى الترموس كله واغسله واحضر منقوع الصباح بتاع تانى يوم

واصلى وادعى ربنا اخس ويخلصنى من معتقل المغول بتاع حسن الهلالى ويبعد عنى شر بدران هههههههه

هكمل حالا


الساعة الآن 05:18 PM.

Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©