|
خجل خطيبي وبروده معي
مساء الخير
بحكم ان اغلبكم متزوجين ومرو بفترة الملكه شفت ان هذا انسب مكان اضع فيه مشكلتي الصغيره ان شاء الله واسمع اراءكم .. انا مملكه ( معقود قراني ) من 4 اشهر وبقى ع الزواج ( شهر ) الشخص ان شاء الله انه طيب وهادي وخلوق ماشفت منه شي مشكلتي معاه في الخجل هو انسان خجول ويقلي كذا انا خجول وتواصلنا جداً بسيط لا يتجاوز السوال عن الحال و الاحوال فقط والمواضيع العامه في الحياة .. لا يوجد مشاعر ولا تعبير عن المشاعر وانا ك انثى مليت ماينقصني شي عشان الاقي الجفاف هذا منه ، حتى اطراء على لبسي او شكلي لا يوجد ، يزورني في المنزل نجلس مده طويله بمفردنا حتى مسكة يد لا يوجد .. ماقد قالي وحشتيني حتى ، يجي ويده خاله من اي هديه طول الفتره السابقه وبديت اشعر بالاحراج من اهلي اني اقوم اطبخ له وازين له العشا والحلى واتكلف فيه وهو مايتكلف عشاني ، اعرف ان الهديه مو مقياس للسعاده لكنها جبر خاطر .. مابقى ع الزواج شي وانا خايفه لان في امور احس مفروض تنتاقش فيها من بدري وماتكلم ابداً وصعب ابادر انا ك انثى ، وضعنا كاننا اصدقاء امكن صديقتي لو ارسل لها صورتي تثني علي وهذا مايثني ولا يعبر .. الكل يقول عن فترة الملكه انها حميله ومليانه مشاعر وكل واحد يبين الجانب الجميل عنده عشان تجي المحبه ، مرا صارت مشكله خارجه عن ارادتي وارادته ورجع اعتذر وقال انا حابك وشاريكي وان شاء الله كل شي بعد الزواج يتعدل ، لكني اشعر بخيبة امل اش حيخسر لو عبرلي عن مشاعره او حسسني باي شعور جميل ، وترا بادرت من ناحية الاتصالات والكلام الطيب اللطيف واي مناسبه اكلمه ع طول ماقصرت معاه حتى هو يقول ماقصرتي بشي ، وحاليا الزواج مو متحمسه له ابداً .. انصحوني للمعلوميه هو ابن خالي ( هو من طلب من اهله ان يخطبني يعني انا اختياره من زمان ) وفرق العمر بيننا جيد 7 سنين وكلنا متعلمين .. ماعندي نيه ابداً ابداً في الانفصال ولا احد يجيب طاريه ، ابغى حلول ونصائح فقط 1/ هل خجل الرجال طبيعي في فترة الملكه وهل حيتغير بعد الزواج ؟ 2/ هل طبيعي انه مايعبر عن مشاعره وهل طبيعي انه حتى يدي مايلمسها وطول الفتره ماصار اي شي بين الي يصير بين المملكين ؟ 3/ منحرجة من اهلي وحضوره بيده الفارغه هل اقطع زياراته خلاص ام اوضح له ؟ 4/ بخصوص برود المشاعر هل اتفاهم معاه وافهمه اني انثى ومحتاجه احس اني مرغوبه وحابني ، او اطنشه ؟ بشكل عام طمنوني وارشدوني احد مر بحالتي وتغير بعد الزواج ساعدوني .. |
رد: المتزوجين و المملكين احتاج
اعتقد من الصعوبة بما كان الحكم على الشخص من خلال اساليب معينة يتخذها على أنها هي الأساس في شخصيته، مسكة اليد أو عدم جلبه لهدية، قد تكون أشياء لاتخرط على باله وأنه يجب أن يعملها، وقد يكون ذلك مؤشر على أنه إنسان كويس، وليس بالضرورة أن الأشياء الصغيرة هذه يجب أن يفعلها الجميع، ولا يعني أن عدم فعلها هو نهاية الدنيا، الرجال بشكل عام يفكرون بعموميات تختلف عنكم أنتن النساء اللواتي يعني لهن التفاصيل الدقيقة، ومن هذا الاختلاف يجب أن يكون الفهم.
صحيح أن بعض الرجال قد يكون الدافع لبعض الأعمال هو البخل كما هو في مثال عدم جلب الهدية أو عدم الرومانسية فيما يتعلق بمسكة اليد أو البوسة، ولكن هذا لايعمم على جميع الرجال، فكثير من الرجال تصرفاته تلقائية ولاتعكس أي معنى ممكن أن تفهمه الأنثى. الرجل يفكر بالمعاني الكبيرة مثل توفير السكن توفير النقل شراء الحاجيات، بينما المرأة تفكر بالتفاصيل نوعية الأثاث لون السيارة وموديلها والميل للكماليات. |
رد: خجل خطيبي وبروده معي
اهلاً بك عزيزتي
طالما اخلاقه وتعامله معك ممتازه لا تفكري في الكماليات لان بعض الرجال ما يهتمون فيها ولا تجعلي الشيطان يفتح لك ابواب اخرى موفقه خيرر |
رد: خجل خطيبي وبروده معي
بالنسبة للزيارات برأيي اقطعيها خصوصا باقي على الزواج شهر واحد بس!
وهذي الفترة لاتبادري بشيء، لا بإتصال و لا بسؤال خليه هو يشتاق و يدور عليكِ ، و إذا جا كلمك وسألك عن سبب تغيرك قولي : مشغولة ! واذا كلمك وتفاعل معك تفاعلي معه ولو عبر عن اشتياقه عبري إنتِ كمان. ولاتلوميه على برودة مشاعره، كلها شهر وتعيشي معاه وتعرفي السبب ! احنا مانقدر نحكم عليه بسبب هذه المواقف البسيطة واللي يمكن يكون مو منتبه لها. |
رد: خجل خطيبي وبروده معي
مساءك أنوار وسعادة باقي على الزواج شهر! الفترة هذه حساسة جدا كلّ الهواجس والمخاوف تأتي على البال, تكون الفتاة فيها متخوفة من الحياة المجهولة التي هي مقبلة عليها, خطيبها يبدو لها غير مناسبا وكثير من تصرفاته لا تعجبها, لكن هناك أمور لا يلتفت لها إذا كانت مجرّد تحليلات وتأويلات, فانت ترين خطيبك خجول, هذا مردّه للبيئة أو الوسط الذي نشأ فيه, هو ليس تصرفا سلبيا وإنّما صفة تذهب مع ذهاب ظروفها, الملكة في نظره لا تتخطى اللقاءات الحييّة, ويكل بساطة هو يحترمك ولا يريد أن يكسر هذا الحاجز, هو قال لك عبارة المفروض تذهب عنك كلّ الهواجس اللي في راسك: (( رجع اعتذر وقال انا حابك وشاريكي وان شاء الله كل شي بعد الزواج يتعدل ،)) فلا تتركي الشيطان يفسد عليك فرحتك واستعدادك وإقبالك على الزواج,,, بالنسبة للهدايا, انت قلت أنّه ابن خالك, فيمكن هذا يخليه يفهم انه ليس بحاجة لأن يتكلّف يجيب شيء في ايده, اسألي والدتك عن طباعهم, ولا تنحرجي, هو قريب لأمّك قبل ان يكون خطيبك, عموما بعد الزواج, من البداية غيري عنده هذا المفهوم, وعوديه تأخذي ما يناسب عند زيارتك لأهلك, اسأل الله أن يشرح صدرك ويزيل عنك ما يكدّر خاطرك,,, |
رد: خجل خطيبي وبروده معي
يااختي انتي عاطفيه جداً وترغبين بتبادل المشاعر بينك وبين عريسك والرجال في كثير من الاحيان يحب الرسميه وكذلك عندهم خجل وعدم جرأه خاصه اذا ماهو راعي سوابق ونظيف وملتزم مايتجرأ يفعل كل الي ذكرتيه ، انا اشوف الميانه وطيحت الكلافه بينكم بعد الدخول وليس الان ....
|
رد: خجل خطيبي وبروده معي
اعتقد انه يجب عليك عدم التعجل مع مثل هذه الصفات خاصه ان الرجل يشوفك ولابه اي مشاعر حب اخشى ان بعد الزواج يصير ملل وهروب من المنزل وقضى معظم الوقت خارجه
|
رد: خجل خطيبي وبروده معي
اقتباس:
أتمنى أنك سعيده بحياتك jyh |
رد: خجل خطيبي وبروده معي
واضح من كلامها انه رجل بخيل والرجل البخيل يكون بخل مال ومشاعر والله يعينا يارب
|
| الساعة الآن 05:08 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©