منتدى عالم الأسرة والمجتمع

منتدى عالم الأسرة والمجتمع (http://www.66n.com/forums/index.php)
-   المشاكل المحلولة (http://www.66n.com/forums/forumdisplay.php?f=42)
-   -   شيروا علي..بسررررررعة.. أبغي أنفصل وفي نفس الوقت مابغي (http://www.66n.com/forums/showthread.php?t=90641)

مــريم 18-06-2006 10:02 PM

شيروا علي..بسررررررعة.. أبغي أنفصل وفي نفس الوقت مابغي
 
أرجوكم يا أعضاء.. كل واحد يعطيني رايه...
مب عارفة أشلون أبدأ الموضوع وأسمحوا لي إذا أفكاري معتفسة.. وأسلوبي مب مفهوم..
أولا يمكن تعرفون إن زوجي من ديرة غير ديرتي.. وهذا أكبر هم..
ثانيا: لما تقدم لي وعدني يسوي ويسوي.. وكلامه راح في الهوا..
كل يوم ندخل في مشكلة ونطلع من مشكلة.. مادري العكس..
المهم..
هو كل يوم باع سيارته وخذ غيرها..
غير جواله وخذ غيره..
عنده كرتين..
واحد دائم والثاني يتغير..
وده في شي ياخذه على طول..
إذا بغى يسافر (طبعا بالسيارة) لأنه يخاف من الطيارة..
سحب فلوس من التوفير وسافر..
غير إنه ياما وياما خذ مني فلوس ولا رجعها..
وإذا ذكرته بها قال: تمنين علي وتعايريني..
لين صرت أسكت ويضيع حقي..
مع إنه عنده.. ولا عليه قصور.. ولكن لنفسه بسسسسسسس..
حطيت تقويم أسنان من فلوسي..
دخلت معهد أدرس من فلوسي..
جبت لي شغالة.. بتوصل أول الأسبوع من فلوسي..
قلت له أبغي أسافر..
قال إنتي ماتراعين..
أقول له لو تقلل سفراتك وتوفر فلوسها كنت قدرت تسفرني..
يقول: يعني أحكر نفسي وأتم متضايق..
من شوي طلعنا..
ومرينا على محل كبير..(غالي)
من تزوجت وأنا أتمنى أدخله..
قلت له خلنا ندخل..
قال: أعور قلبي وأطلع؟؟
قلت له: أنا إذا في خاطري شي باخذه..
مارضى.. تدرون ليش؟؟
هو إذا يبي يروح مكان يروحه..
وإذا مابغى.. مايفتكر في رايي أبغي أو لا..
المهم:
طلعنا ومارجعنا إلا بهوشة..
وقال أنتي ماتفهميني ولاتراعيني..
وأنا أبغي الزوجة اللي تفهمني..
تدرون ليش؟؟
لأني قلت له لا تقفل ولا تعصب..
قال إنتي 5 سنين ولا فهمتيني أنا مب مقفل..
مع إني أشوف الشرار يتطاير من عينه..
في النهاية..
قال إذا مب مرتاحة معاي قولي..
وأنا ما أرضى أني أجبر نفسي عليج..
قلت له: أي أنا من تزوجت وأنا مش مرتااااحة..
قال خلاص مايصير خاطرج إلا طيب..
قلت له أنا ماقلت مابيك..
بس الصج إني مب مرتاحة..
نزلني البيت وقال خلاص بعدين نشوف..


ياناس شاسوي معاه..
مابيه.. وأبيه..
متعبني واااااايد..
بس عندي بنتين منه..
شاسوي؟؟

بنت طيبة الطيبه 18-06-2006 10:13 PM

طيب هو كيف في دينه وأخلاقياته بشكل عام لأن الصورة اللي وضعتيها عن زوجك ضبابية نوعا ما ؟؟؟؟

مــريم 18-06-2006 10:16 PM

سألني من يومين أش رايج في الهامر..
طبعا مل من سيارته اللي ماصار لها شهرين..
قلت له بصراحة أنا ماحب الهامر ولا تعجبني..
اليوم يقول: الزوجة العدلة لازم ماتقول لا ما أحبها..
لازم تقول: حبيبي إذا عاجبتك إخذها أهم شي راحتك..
أنزين.... هو طلب رايي وأنا جاوبته..


وعلى فكره.. ترو شور الانفصال من زمان يجيني وأتعوذ من ابليس..
لكن لي متى أستحمل.. قسما بالله تعالوا شوفوا الشيب اللي طلع من شعري..
والله مابالغ.. يمكن أمي أقل مني في الشيب..
إني قمت أصبغه..
نفسيتي والله زفت وفي الحضيييييض..
أحس إني باموت من الهم..

أبو فيصل 18-06-2006 10:16 PM

إهدأي الآن ولا تتهوري ، فيبدو ان المشكلة حصلت للتو ، ولذلك تكتبين الموضوع ونفسيتك تعبانة جدا وهذا واضح من عنوان الموضوع ومن صياغته ، ولذلك لا تتذكرين الأن سوى السلبيات .

بصراحة أنا لن أقدم لك حلا الآن ، ولو قدمت حلا فقد أظلمك أو أظلم زوجك إلا بعد أن أرى ردودك وردود الأعضاء غدا أو بعد غد عندما تهدأ نفسيتك وتكتبين برواقة .

في هذه اللحظات أحسن شيء لك الإستغفار وترديده كثيرا كثيرا كثيرا ، وتشوفين وش يحصل لك بعد شوي إن شاء الله


أهم شيء الآن وفي هذه اللحظات تكونين هادئة ، ويمكن لك أن تتوضأي وتقرأي القرآن وتصلين ليهدأ بالك ، أو تغتسلي بالماء البارد بعض الوقت .

تحياتي،،،

مــريم 18-06-2006 10:22 PM

اقتباس:

المشاركة الأصلية كتبت بواسطة بنت طيبة الطيبه
طيب هو كيف في دينه وأخلاقياته بشكل عام لأن الصورة اللي وضعتيها عن زوجك ضبابية نوعا ما ؟؟؟؟

تبون الصج؟؟؟
مقصر في صلاته..
ولايعرف القرآن..إلا ما رحم ربي..
أخلاقه:
عصبي..
يوم يبخل علي ويوم لا..
(بس لما يعطيني.. يحسسني بطريقة غير مباشرة إنه ضغط على نفسه عشاني)
مشاعر وكلام حلو...بالمووووووت..
القبلة.. أطرها منه..
والضمة.. أخذها بالغصب..
إذا اشتهاني جاني..
وإذا أنا اشتهيته وهو لا طلع ألف عذر وعذر..
ليلة ينام في غرفتنا..
وليلتين في غرفة بنتي وهي تنام معاي..
وعذره:
أنتي تقصرين على التكييف وانا أبغي الغرفة باردة..
أو.. أبغي التلفزيون..
(لأن ماعندي إلا غرفتين.. اللي فيها سرير بنتي فيها تلفزيون..)
أو إذا شوي فيه زكام او كحة.. قال أخاف اعاديج أنتي واليهال..
مع إنه أغلب الوقت إذا نايم معاي يكون صاد..
حتى وإحنا سمن على عسل.. والسبب:
ماعرف أنام وانا نقابل حد...!!!

إذا في استفسارات أنا حاضره..

صاحب رأي سديد 18-06-2006 10:23 PM

بصراحه أختي الفاضله
ما دام عندك بنتين أصبري والله يعينك
الانفصال صعب وفكري في بناتك
الله يفرج لك همك

مــريم 18-06-2006 10:24 PM

شكرا يا الشقة..
أنتظرك بكرة.. لا تخذلني..
لأني هالمرة أقرب إلى الانفصال في رأيي..
صاحب رأي سديد
يهمني رايك..

المحترمة 18-06-2006 10:25 PM

بحرينية

لا تهتمين كثير

انتي لازم تقدرين زوجك يمكن زوجك من النوع اللي يحب يبذر ويمتع نفسه بس

لازم تتكلمين معاه وقولي له كل اللي في خاطرك وصارحيه

لا تعودين الرجال انك تتدفعين دايم

لازم يحس بالمسؤولية

وهدي نفسك لا تشوفي عيوبه بس تذكري محاسنه وتذكري انو فيه ناس متعذبين من جد ما يصرف الزوج ولا ريال على زوجته

وعذره انه متفضل عليها وتركها تشتغل


تعوذي من ابليس

ولا تجيبي طاري الانفصال ابد في بالك

تذكري بنتك ولا تتشكين دايم وخليك مرحة معاه واضحكي دايم

مــريم 18-06-2006 10:31 PM

اقتباس:

المشاركة الأصلية كتبت بواسطة المحترمة
بحرينية

لا تهتمين كثير

انتي لازم تقدرين زوجك يمكن زوجك من النوع اللي يحب يبذر ويمتع نفسه بس

لازم تتكلمين معاها وقولي له كل اللي في خاطرك وصارحيه

لا تعودين الرجال انك تتدفعين دايم

لازم يحس بالمسؤولية

وهدي نفسك لا تشوفي عيوبه بس تذكري محاسنه وتذكري انو فيه ناس متعذبين من جد ما يصرف الزوج ولا ريال على زوجته

وعذره انه متفضل عليها وتركها تشتغل


تعوذي من ابليس

ولا تجيبي طاري الانفصال ابد في بالك

والله يا أختي المحترمة..
مشاكلي مش كلها على الفلوس..
لو هو يعوضني بشي ثاني كنت سامحته..
أنا ماعندي أهل هني..
وهو مايطلعني إلى بالكثير في الأسبوع مرة..
أنا زهقت من مجابل الطوف..
إذا طلعني.. يدور بي في السيارة ويرجعني..
يقول أنا ما أحب أروح مجمعات مع هلي..
انزين.. أنا ودي أدور بالمجمع.. لا مايهمه رايي..
أنزين.. ودني مكان ثاني أنزل أتمشى.. يقول لا حر.. وأنا ماحب أمشي..
من كم يوم أقول له .. تدري .. بنتك أقل طفلة من بين كل الأطفال اللي تطلعها وتيوديها الألعاب..
قال:: أدري... !!!!!!!!!!!!!!!!!


صاحب رأي سديد..
إلى متى الزوجة تضحي عشان أبناءها؟؟؟
وين حقي بحياة سعيدة.. من غير مشاكل وهموم وعوار راس؟؟
ليش الزوج مايضحي؟؟

مــريم 18-06-2006 10:33 PM

بسمة رضا..
جودي علي برايك


الساعة الآن 03:44 AM.

Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©