مرهقه من متابعة ابنائي دراسيآ وسلوكيآ
 

السلام عليكم و رحمة الله و بركاته

بدون مقدمات معليه ..

ولدي الكبير في الصف التاني .. ما اذاكر له شي ..
ما عندي وقت اجلس معاه او اسمع له او اهتم فيه ..
( كنت اهتم دائماً و اذاكر له اول بأول )

الي شوي يخفف عني تأنيب الضمير انه في مدرسة خاصة
و بينجح في كل الحالات .. لكن ماني راضية عن نفسي و لا عن أداءه

و الي يخفف عني تأنيب الضمير تجاه دراسته انه مازال في الصف التاني


ولدي التاني عنيد و عصبي و غيار و نكدي و كل شي ..
كل وقتي معاه و له هو و بس .. تعبني مرة ..

ولدي الصغير .. اغلب الأوقات مع الشغالة و يادوب وقت الرضاعة
هي الي احاول اني اعوضه فيها عن انشغالي عنه مع الوسطاني

.
.

الوسطاني من كثر ما يبغاني معاه و يتعبني و شخصيته أقوى من الاثنين
مرات افقد السيطرة على نفسي و اضربه ضرب مبرح ..
عمري ما ضربته الكبير و لا الصغير و لا اي طفل في حياتي ..

مرات أكرهه غصب عني و أمسك نفسي اني ادعي عليه ..
ماعمري كنت كذا أبدا ..

الدليل الكبير ماشاءالله عليه .. شخصية محبوبة و متزنة و الكل يمدح فيه ..
لكن الوسطاني كرهني في كل شي ..

اشتريت 4 كتب اقل شي عشان اقدر اتعلَّم كيف اتعامل معاه
لكن ما زالت الكتب في الأدراج .. ماني لاقية وقت بسببه ..

و بسبب انشغالي معاه؛ هو سبب لي تقصير من ناحية تعاملي مع اخوانه ..

ساعدوني ..
حتى يمكنني إنقاذ ما يمكن انقاذه ..

تم تعديل العنوان ليتناسب مع المضمون

رد : فقدت السيطرةبكيفيةالتعامل مع أولادي وخاص
 

مع العلم اني بمرحلة إعداد نفسي و ظروفي لإكمال دراستي باذن الله ..
و مضغوطة مع العمل .. و انا حتى في العمل اهيء نفسي للدكتوراة ان شاءالله ..

و انا بأخذ الوسطاني معايا للحضانة ..
حتى هناك في العمل .. مرات اخرجه من الحضانة و اخليه معايا اذا عندي وقت فراغ لمدة ساعة ..

لكن حتى لما اتركه في الحضانة ..
يبكيييييييييي و يصيييييييييييييح .. جننننني و خبلني ..
مو عاجبه شي أبدا ..

رد : فقدت السيطرةبكيفيةالتعامل مع أولادي وخاص
 

خليه يتعود بالحضانه
ولدك الكبير بمرحله تاسيس
سالفه ينجح ماينجح مش معيار
اخطر عمر الابتدائي ان ماتاسس خلاص بيتعب باقي عمره
للاسف المدارس ماعاد تاسس
ومدرسه خاصه يعني اي كلام بعد
حبيبتي امسكي ولدك واساسيه وانتي الاعرف بمستواه
جيبي له معلم بالبيت او معلمه اذا انتي مهمله ناحيه التدريس
الوسطي الصبح بالحضانه خليه ينام بكير
اشغليه بالعاب قطارات فك وتركيب الوان العاب تعليميه
يلعب مع اخوه الكبير والصغير
الصغير لا تخليه مع الشغاله طول الوقت
لاعبيه وخلي الوسطاني يشاركم اللعب

رد : مرهقه من متابعة ابنائي دراسيآ وسلوكيآ
 

لازم يبعد عنك شوي ويرتبط باولاد من سنه ..
لازم تلقي وقت تقري الكتب اللي اشتريتيها لانها راح تعطيك صبر ودافع وامل بان الامور للافضل باذن الله

رد : مرهقه من متابعة ابنائي دراسيآ وسلوكيآ
 

ولدك الأوسط كان متعلق في أبوه صحيح ؟
ربما يفتقده وسلوكه كاعتراض على فقده لوالده

أيا كان السبب عادة الأطفال المتعبين بعنادهم ومشاكلهم في الطفولة هم أطفال أصحاب شخصيات قوية ومستقله
لا تواجهين عناده بعناد

أخبريني عن مشكلتك الرئيسيه معه وأساعدك بإذن الله
هل هي العناد أو ............؟؟

تفرحين فيه كبير بإذن الله

رد : مرهقه من متابعة ابنائي دراسيآ وسلوكيآ
 

الوسطاني يغار من الصغير .. بس يضربه
و يأخذ أشياء الكبير ..

بيحاول يستفزني و يشد انتباهي باي طريقة ..
و بس يصيح ..

صرت دحين لما يصيح بدون سبب ..
أخده و احطه في الغرفة و اصك الباب عشان يسكت من حاله ..

.
.

الصغير انا اغير له .. و اروشه .. و ااكله و أشربه ..
و البسه و اشيله و أرضعه و العبه .. عشان كذا الوسطاني يغار و نفسيته تعبانة ..

اقصد انه الصغير يكون مع الشغالة ؛ لما اروح العمل ؛ لما أكون اطبخ ؛
لما اجلس اذاكر للكبير دروسه ؛ لما اجلس مع الوسطاني و احاول افهمه و اتفضى له ..

الكبير ماني مهملته مرة مرة .. لكن ماني لاقية وقت أبدا ..

.
.

حاليا كل الي قدرت اعمله ..

اني طلبت تخفيف بشكل كبير عني في العمل .. الترم القادم ..
بمقابل انه يتم خصم بدل من البدلات .. لكن مو مشكلة

عشان اتفضى لأولادي اكثر .. و انتهي من إجراءات قبول الدكتوراة باذن الله ..
و لو ضغطوني الترم الجاي .. راح اسحب عليهم و اقدم على اجازة أمومة ..

رد : مرهقه من متابعة ابنائي دراسيآ وسلوكيآ
 

سماء العدالة

انت حللتي ماشاءالله تبارك الرحمن شخصية الوسطاني

فعلا هو متعلق في ابوه ..
و نفسيته تعبانة بسبب ابتعاد ابوه ..

ماعرف .. كيف قدرتي تحللي ماشاءالله بشكل سريع !؟

ابوهم يشتغل في مدينة تانية .. و يشوفوه مرة وحدة في الأسبوع ..

.
.

حتى انه صار دحين يعض أصابعه و أظافره ..

.
.

و قالت لي وحدة أخصائية تربية ..
انه شخص بيكون مميز و ذكي و لا أقابل عناده بعناد ..

و قالت لي ..
اهتمي فيه لانه له مستقبل باذن الله ط


ليت تساعديني بجد

رد : مرهقه من متابعة ابنائي دراسيآ وسلوكيآ
 

على فكرة ..

80 ٪ وقتي مع الوسطاني و مو عاجبه كمان ..
و 20٪ مع الصغير و الكبير ..

الكبير فقط 1 بالمئة .. من العشرين بالمئة هذه ..
يا دوب اجلس معاه يحل واجباته اليومية فقط ..

اعوضه عن غيابي و انشغالي عنه .. اني اعمل له ساندويتش للمدرسة
و اني أعطيه مصروفه و اني اهتم فيه ( ماديا ) .. لكن معنويا .. احسه مفتقدني ..

مع العلم انه الكبير ؛ ابوه ما يهتم فيه .. عشان كذا انا ابغى الكبير اهتم فيه ..
و أتخلص من ازعاج الوسطاني و مشاكله الي ما تخلص أبدا

الوسطاني ماخد كل اهتمام ابوه ..

.
.

رد : مرهقه من متابعة ابنائي دراسيآ وسلوكيآ
 

قبل كم يوم ..

ولدي الوسطاني عمره 3 سنوات .. اخد من يد الكبير ( قلم ملون ) ..
سحبه كذا غصبا عن اخوه ..

الكبير أتضايق و صاح ..

ابوه خاصمه و قاله انت كبير .. خلاص اتركه ..

.
.

انا اخدت القلم من الوسطاني ..
و قلت له ( ماحد ياخد القلم ) .. تتعلم مرة تانية ما تاخد اي شي من يد اخوك ..

.
.

و رفعت القلم فوق .. بس عشان لا اكسر كلمة ابوهم ..
و عشان لا يتقاتلوا

المهم ..
الوسطاني جلس يبكي و يصيح .. و انا طنشته ..
و قلت له بصوت عالي و عشان الكبير يسمع ..

مرة تانية ما تاخد أشياء احد .. تتعلم الشي هذا ..
و تركته يبكي و يرمي نفسه عالارض .. لحد ما سكت من حاله ..

رحت و شفت الكبير عيونه تدمع و جالس لوحده في الغرفة ..
سألته ايش فيك حبيبي !

رد : مرهقه من متابعة ابنائي دراسيآ وسلوكيآ
 

سالت الكبير ايش فيك حبيبي !؟
قالي : اي شي انا أخده من يد اخويا .. بابا يقول أعطيه هو صغير !؟
و هو عادي .. اي شي ياخده من يدي و ماحد يخاصمه ..

قلت له ..
بابا يقول كذا .. عشانك انت عاقل و عقلك كبير ..
بس شوفني؛ اخدت القلم من يده و شلته لك .. حطيته فوق الدولاب ..
روح خذ القلم من هناك ..

بس شوف انا عشان كذا خاصمت اخوك .. عشان ما ياخد مرة تانية اي شي مو حقته من يد اي احد
حتى اسمعه جالس يبكي دحين .. بس مرة تانية خلاص ما ياخد اي شي من اي احد ..

بس هو عشان لسى صغير ما يفهم ..
انت عاقل و كبير حبيبي ..

قلت له ..
خلاص روح خذ قلمك بعدين من هناك ..