الزواج التقليدي ومشاكله
 

السلام عليكم
انا مطلق وعندي 3 اولاد وعايشين معاي والحمدلله. حاليا افكر بالزواج مره ثانيه بعد ما تعافيت مِن اثار الطلاق. لا أخفيكم اخواني و اخواتي بعد الطلاق اني صرت شديد الحرص و الدقه في نظرتي الحريم حاليا.

فكرت في الزواج التقليدي او عن طريق اهلي يشوفونلي بنت بس عندي مشكله. في حال رضت البنت بتكون الخطوبه حد أقصى شهرين حد علمي وبصراحة بعد أزمة الطلاق وللاسف البنات الحين مو نفس اول احس ان شهرين مو كافي وطبعا مستحيل اهل البنت يرضون خطوبه 6-7 شهور. حاس اني محتاج وقت علشان اعرف البنت عدل وأقدر اثق فيها.

قبل فتره اعجبتني بنت بالدوام وراقبتها من غير ما اتحس وطلعت ممتازه ما شاء الله بس للأسف طلعت مخطوبه. المشكله ان السؤال والرقابه خذت مني شهرين بعدين لما كلمت اهلي قالت لهم مخطوبه ف تحبطت شوي.

ماني عارف شالحل لكن الزواج التقليدي ما أظن برتاح منه

شرايكم ؟

رد: الزواج التقليدي ومشاكله
 

اول شي اخوي اذا انت لك النظر البنات لهم نظر بعد ،، اقصد لا تتوقع انك اذا خطبت بيوافقون على طول ،، خصوصا مع وجود الابناء ،، انت بتسال عنهم وهم بيسألون عنك ،، اتمنى تكون فهمت علي ،، ثاني شي الزواج توفيق من رب العالمين ,, مهما حرصت وسالت ماتبان الامور الا مع العشرة ،، لكن هذا مايمنع انك تبحث عن عائلة طيبة ،، وارى ان تاثير الاب والام على الابناء كبير جدا وبناءا على ذلك اذا وجدت عائلة لا يكثر بينهم الطلاق وسمعتهم جميلة ومعروفين فذلك احرى ان تكون تربيتهم طيبة .

رد: الزواج التقليدي ومشاكله
 

1-قصدك الزواج غير التقليدي هو الزواج عبر التعارف والحب والغزل ما قبل الزواج؟ يا أخي الشيطان لا يضحك عليك

2-اخي انت مكبر موضوع ان هي وجدتها مخطوبة استمر في البحث والسؤال وتقدم لفتاة اخرى واذا صار هناك رفض تقدم لاخرى قد تنجح في المرة العشرون، المهم المحاولة

رد: الزواج التقليدي ومشاكله
 

اوقات ينجح الزواج التقليدي .. واوقات يفشل .
والزواج غير التقليدي اوقات ينجح واوقات يفشل ..

الموضوع مو انك تحدد اذا تقليدي او غير تقليدي ..
اما مثلك تزوجت زواج تقليدي وبعد سنه ونصف انفصلت لأسباب ما اخذت بالي منها في فترة الخطوبه مع انها كانت 3 شهور .. اعتقد كان لجهلي بهذه الأمور ..

بعد الطلاق ب 3 اشهر .. انخطبت وكانت فترة الخطوبه نفس فترة الخطوبه الأولى 3 اشهر وتزوجت والحمد لله فرررق شاسع واستقرار ولله الحمد وحياه هادئه وجدا مبسوطه لدرجة كل يوم اقول الحمد لله اني تطلقت ..

مافي فرق عن زواجي الاول والثاني كلها تقليديه وكلها 3 اشهر ..

بس عارف لاحظت الفرق في ايش ؟؟ لأني بعد الطلاق صرت حريصه على اختيار الزوج وبحكم عاداتنا ما نقدر الا ع الزواج التقليدي غير كدا ممنوع من ناحية اهلي ..
لكن الفرق الي لاحظته واخذته في بالي من ايام الخطوبه الثانيه .. انتبهت لشخصية الرجل من بداية الخطوبه .. اسأله اسئله تفيدني جوابها في شخصيته
الاحظ شخصيته من ناحية التفكير ؟ من ناحية المزاج ؟ من ناحية خفة الدم . المود ؟ وكل شي اقيس عليه اذا انا اقدر اتحملها او لا ؟؟ مع اني خلال ال 3 اشهر قربني منه كثير وحاول ينسيني كل شي صار بحياتي الا اني كنت متفقه معاه خلال ال3 شهور لو حسيت اني ماحقدر اكمل معاك حقولك .. وقال اوك وكان هذا اتفاقنا ولو هو حس اننا مانقدر نكمل حيقولي ..
وكنا طيلة الثلاث الاشهر نسأل بعض عشان نكتشف بعض وكان بيننا الصراحه التاااااامه ..
حتى اني جلست اسأله عني حياته السابقه وطلبت منه يذكرلي بعض المشاكل الي واجهته وكيف تصرف فيها وهو طلب مني نفس الشي ..
ولاحظنا اننا ارتحنا لبعض وشخصيتنا قريبه من بعض جدا .. ولله الحمد ..


ف انا انصحك انك تخطب وتتوكل على الله صدقني 3 شهور كافيه ولو تطلب اكثر ممكن الى 4 او 5 اكثر من كذا احس مبالغ ..
وحاول تكتشفها وتكتشف شخصيتها .. واخر نصيحه لو حسيت للحظه انك صعب تعيش معاها لسبب تفكيرها او تعاملها او اسلوبها انهي الموضوع تماما .. راح تلقى الي تناسبك بس اختااار صح حتى لو تجلس سنه تخطب وتفسخ اهم شي راح تلقىالي تفهمك وتعوضك وتعوضضها

واسأل الله العظيم ان يرزقك الزوجه الصالحه الي تفهمك وتفهكها وتقدرك وتقدرها ..

رد: الزواج التقليدي ومشاكله
 

الحكايه مو طول المده او قصرها حكايه توفيق من الله وخبره الاثنين المخطوبين في كشف الشخصيات الذكي يحتاج شهور قليله للتعرف والحكم على الشخصية
بس اللي ما عندو خبره بالناس لو مرت سنه عليه ممكن ما يستوعب او ما يقدر يفهم الشخص الاخر وللاسف انا من هذا النوع الغبي اللي ما يفهم الطرف الاخر بسرعه
الله يرزقك الزوجه الصالحه اللي تخاف الله فيك وفي اولادك
والزواج التقليدي احيانا ناجح واحيانا فاشل هذه ارزاق توزع والحمدلله على كل حال

رد: الزواج التقليدي ومشاكله
 

الزواج عمياني اللي اليوم الشوفه ابو 5 دقايق وبكرة العقد و بعد شهر الزواج هو اللي سبب المشاكل ووجع الراس.
أتزوج تقليدي لكن قبل لاتعقد عليها أتعرف عليها كويس وافهم مين هذي البنت اللي بعقد معها مشروع الزواج وبعيش عمري كله معاها ، فتح عيونك وعقلك و اترك قلبك على جنب

رد: الزواج التقليدي ومشاكله
 

أشكركم اخواني و اخواتي على الردود لكن اتوقع اني ما وصلت الي بقوله عدل

الي بقوله اني ودي اشوف البنت واراقبها من غير ما تحس لفتره من الزمن بعدها اكلم الاهل علشان تخطبها مثل ما صار معاي مع البنت الي معاي بالدوام.

ما ابالغ لكم اني لما كلمت أهلي كنت جدا جدا مرتاح بعد ما فقدت الثقه في جميع النساء مع العلم اني ولا مره كلمتها حتى بالدوام. ما ابالغ اني حتى حسابها في تويتر راقبتها والبنت جدا رزينه و ملتزمه بصلاتها في الدوام ومحترمه ومالها حس فوق هذا ك شكل نفس الي في بالي ولكن قدر الله وما شاء فعل والبنت طلعت مخطوبه.

الزواج التقليدي بيكون كل واحد فينا مثالي على قد ما يقدر وبيطلع نفسه اب احسن صوره.

انا ما قلت اكلمها بالتلفون بعدين اشوف اذا عجبتني أتزوجها. انا قلت رقابه من بعيد والسؤال عنها مثل ما صار مع البنت الي معاي بالدوام.

شغله ثانيه بكون حريص جدا عليها واهي ام البنت. واضح ان الام ضروري جدا جدا تكون مثال وقدره حسنه للبنت لان باجر سبحان الله اذا صار شي بينا دور الام بيفيد وايد. قلت هالكلام لان زواجي الاول طليقتي كانت امها متوفيه من عمرها 3-4 سنوات وللاسف طليقتي لجأت لعيال الشيطان ودمروها وحاليا لا اهل لا حتى عيالها يبونها ( اللهم شماته )

لا تلوموني يا جماعه بس ودي ارتاح واطمئن واعيش حياة سعيده مع زوجتي وعيالي. قسما بالله تعبت

رد: الزواج التقليدي ومشاكله
 

مثل ما لقيت البنت الي معاك بالدوام ان شاء الله بتلقى غيرها..

صحيح الطريقة التقليدية في بلدك صعبة شوية خصوصا على المطلقين لأننابنفقد الثقة بعد ما شفنا المستخبي من الطليق(ة)

فكرة متابعة البنت من خلال منشوراتها+ صداقتاها+ كل ماتتابعه على مواقع التواصل، اشوفها مهمة الى حد ما لانها بتعطيك فكرة عن عقلية البنت و طباعها..

الله يوفقك

رد: الزواج التقليدي ومشاكله
 

اذا عندك اخوات اكيد هم بيقدرو يشوفو بنت في محيطهم ويتعرفوا على شخصيتها زين وبعدين يقترحوها عليك لان الاخت تعرف اخوها اي بنت بيرتاح معها..

رد: الزواج التقليدي ومشاكله
 

عجبتك اللي معك بالدوام !
معناه غالباً أنت من الخليج مو السعوديه صح ؟