|
زهــور في الظـــلام
السلام عليكم
يؤسف أن تشعر بعض المتأخرات فـي الزواج أو المطلقات والأرامل في منازل أسرهـن أن وجودهن غير محـبذ ، وأن الأسرة بانتظـار الخلاص منها ، وقد تستشف ذلك من التعامــــل غـير الأريحـي ، من قبل الأخوة والأب والأخوات و من طريقـة الكلام الجافـة بعـض الشـئ 00 وكثرة الانتقـادات لتصرفاتـها وخاصة من قبل الأم ، لدرجة ان تشعر البنت أنها غير محبوبة ويصعب الأمر حين تكون الفتاة خجولة حساسة كتومة فلا تملك سوى إحراق نفسها ويحيرها السؤال لما يفعلون ذلك ؟ معظم الأسر تمارس مثل تلك التصرفات مع المتأخرات بالزواج أو المطلقات والأرامل ليس كرها فيهن ولا ملل من وجودهن ، ولكن تصرف لا إرادي لممارسة ضغوط عليها كى لاترفض من قد يتقدم إليها في المستقبل نتيجة تخوفها من الزواج أو اشتراطات غير مبررة ، أما كثرة انتقادات الأم لها في كل كبيرة وصغيرة فذلك ناتج من شدة الحنان والخوف عليها فكل أم تتمنى أن ترى ابنتها عروسا في بيتها ، وتأخر ذلك يصيب الأم بالخوف على ابنتهـا فلا تجد ماتفرغ به هذه المشاعر سوى إبنتها وكانها تلومها لحظها مع ان الفتاة لاتملك شئ لنفسها والأم تعلم ذلك ولكنه تصرف لا إرادي من الأم المسكينة 0 أيضا هناك فتيات يساهمن بصنع تلك الانتقادات فتجدهن كثيرات الكسل والنوم مزاجيات في كثير من تصرفاتهن ، وهذا يغضب الأم ويشعرها أن ابنتها لامبالية وغير قلقة حسب تصورهـا ولكي تزيلي كل تلك المشاعر واحساسك بعدم الرغبة في وجودك عليك : بمزيدا من النشاط والحيوية في الأسرة المشاركة الفعالة في بعض شئون البيت دافعي عن نفسك أمامهم بإشعارهم باعتزازك بذاتك حتى لو لم تتزوجي كوني صاحبة كلمة مسموعة ورأي اظهرى تألقك في اللبس وحيويتك ولاتقولى انا داخل المنزل ولاداعي لذلك تعلمي النظام والتنظيم في غرفتك والبيت وانتقدى من يصنع الفوضى بذلك سوف تكوني اقوى بشخصيتك وأهميتك أمامهم وستلاحظين اختلاف التعامل واختفاء انتقادات الوالدة وكثرة ملاحظاتها 0 اسأل الله ان يوفق كل واحدة منكن بالزوج الصالح والحياة الزوجية الهانئة إنه سميع مجيب أخوكن الكـبـير |
اخي الكبير والله اني اعتز باخوتك واتمنى ان تقبلني اخت لك
موضوع رائع كل مره اقرأ لك موضوع احس بانه يمسني انا شخصياً احس بانك تحكي للجميع ما يحصل لي وقد سالت مره كيف تعرف كل ما يحصل لنا نحن الفتياة؟ حتى لو كنا نخبرك بها كيف يمكنك نقلها بكل هذه الواقعيه والاسلوب المقنع؟؟ ربي يوفقك ويعطيك كل ما تتمنى وييسر امرك ويجعلك من عباده الفائزين جزاك الله كل الخير |
أختى الريم 80
انت بالفعل اختى التى اعتز بها وهمومك هي همومي وانا معك اخ احاول ولو بكلمة تذكيرك بأنك زهرة جميلة ستشرق عليها بإذن الله شمس السعادة قريبا ، اشكرك وتقبلى خالص تقديري واحترامي |
السلام عليكم ورحمة الله وبركاته
أخي المبدع دائما بارك الله فيك وفيما تكتب ونفع بك. كلمات رائعة وتوصيات جميلة لأخواتنا. |
والله انك صادق. انا صايرة مزاجية.. انا في الآونة الأخيرة ماتحمل حرف من امي على طول نتشاد في الكلام واذا زعلت اروح الاحقها والله اني احبب يدينهاورجولها عاد امي يبدا عندها الثقل والتغلي ههههههههه
بس شسوي اتنرفز من كلامها بعض الأحيان..اذا رحنا لأي بيت وعندهم بنت تبدا المقارنات.مثلا تقول شوفي فلانة هادية ورزينة مو مثلك ماتصدق تسمع شي يضحك تكركر وتضحك واذا جو حريم يشوفوني للخطبة تترجاني تقول شوبارد لاتستحين تخيلي نفسك مع صديقاتك ترى الناس يبون وحدة مرحة فرفوشة<<< تناقض! اذا رحنا لزواج وشافت بنت تمشي من عندها كل شوي وتحرك شعرها وتتدلع يوووه.. شوفي البنات يضبطون امورهم عشاني ناظرتها قامت تترزز عندي وانت لو احد شافك على طول تسوين نفسك ماحسيتي ولاتقومين ولاشي كل هذا كرامة وكبرياء هذاك قاعدة لارجل ولاشي واللي اقل منك شوفي كل وحدة كرشتها قدامها حامل اقعدي يالكرامة << انواع التحطيم كل ماقعدت معها ماتتكلم الا عن الزواج والرجال وامهات الأزواج وشلون نتعامل معهم وووو وفلانة تزوجت وفلانة وفلانة وانت الظاهر فيك عين او مسحورة الظاهر يابنتي السالفة سحر انا تذكر مرة كذا وكذا..وش رايك نروح لشيخ في المنطقة الفلانية!!! ومأنكر انا نفسيتي تغيرت بعد.. اول احب اطبخ واتفنن الحين مالي خلق ابداااااا الا اذا جت عزيمة اشتغلت بس!! وغيره والله مااسوي شي.. اول احب اسولف معها الحين يضيق صدري كلامها كله عن الزواج وبصراحة بصراحة انا وجهي يتقلب وحالتي حالة اذا قامت تسولف عن فلانة وعلانة احسها تثيرني تولد فيني احاسيس والله ماقد حسيت فيها! مرة جت وهي حالتها حالة قلت وش فيك قلت كلمتني زوجة عمك وقالت بعزمك تصدقين ياشوبارد سخنت عظامي وقلبي يدق بسرعة قلت ليه؟ قالت احسبها تقول بنتي تملكت!! قلت يماه شفيها قالت وش وشفيها لو بنت عمك تتزوج قبلك بموووووووووت بنهبل انت وياها من العايلة متأخرين ووشلون تروح قبلك بس ابشرك صارت عزيمة عادية !!!! مرة قلت للمدرسات المتزوجات عن حركة شفتها بمحل تنفع هدية للرجال واقترحت عليهم يهدون أزواجهم.. المهم قالو شرايك نعطيك الفلوس وروحي اشتريها قلت اوكي واقول لأمي ومعي المبلغ.. وامي ايه وانت خدامة لهالمتزوجات وش دخلك فيهم ..الله يخلف عليك وتشترين لرجالهم بعد متهنيات ومبسوطات وانت مقابلتني وبتسعدينهم بعد !! رحنا المحل واحنا في الطريق كرهتني بعيشتي من كلامها والله دخلت المحل واشتريتهم ودموعي ملت غطاي من القهر.. في البداية كنت متحمسة للمدرسات والله فرحت انهم اعتمدو علي بعد وحسيت بالسعادة اني بدخل لقلوبهم الفرحة وعلى ازواجهم بس بعد كلام امي ودي كل وحدة ارجع لها مبلغها وامشي!! اركب السيارة ونفس الكلام اسمعه ويوم جا بكرة والله اني عطيتهم بدون نفس مع انهم شكروني ودعو لي وانبهرو منها لكني تندمت لييييه ماادري. امي ولدت عندي احساس بالغيرة صراحة احساس بالحقد تجاههم!! انا مانكر اني اغبط لكني والله مانقهر وماحسدهم على عيشتهم.. والله امي مامثلها بهالدنيا تبيني اصير احسن البنات كلهم وماتبي احد احسن مني وحنونة لأبعد حد بس تأخري أثر عليها بشكل غير طبيعي شسوي ماهو بيدي حتى هي لها دور قوي كانت ترد الناس يوم كنت ادرس الله يفرح قلبها عاجلا غير اجل. عالعموم انا امي تعتمد علي بأشياء كثير كوني اكبر بنت ولي رأي وصوت بس مو مثل اول انا صرت اتهرب بصراحة فضفضت وهذا جزء بسيط جدا مناللي اشوفه كل يوم الله يجزاك خير اخوي الكبير.. على فكرة العنوان روعة جعلنا نزهر في النهار قريب هههههه |
أخي الكبير
بارك الله فيما كتبت وفيما تكتب موضوع رائع والله يجزاك خير عليه الله يحفظك ويوفقك |
تشكر اخوي الكبير على موضوعك
كلام جميل ، بس ما ينفع في بعض المجتمعات!!! اخوي الصغير اللي توه طالع من البيضه (وصف مجازي)!!! (اذكر كنت اعطيه الرضاعه ، وانومه في حضني ) الحين يطول لسانه علي ، وما اقدر اروح للمعهد الا بعد اذنه ، وما اقدر اطالع التلفزيون الا على القناة اللي يبيها!!! وهذا غيض من فيض الله يهديه ابوي ، مخلينا يالبنات مالنا كلمه ولا قدر ولا حتى رأي الشغالة اللي في بيتنا لها كلمه ، تسكت اخواني اذا ازعجوها!!!!!!!!!!!!! والله اني في نفسي اقول لو تزوجت بكره ان شاء الله وجاني بنات وعيال ، لو يمد الولد يده على اخته لأكسرها له (بطلع حرتي) تحياتي |
اخوي الكبير بارك الله فيك تقدر توصف أحاسيسنا ومعاناتنا بدقه شديده وهذا شي يثير الإستغراب والتعجب وكأنك جالس تعاني مثلنا أو شاهد على معاناة أحد يشبه لنا عموماً يجزاك ربي الف خير على كل كلمه تكتبها
شوبارد كلامك الصادق جداً يحزني كثير وادعي لك من كل قلبي ان ربي يزوجك بالرجل الصالح عاجلاً وليس اجلاً وهذي الساعه من يوم الجمعه ساعة اجابه واقولها لك من كل قلبي وبصدق شديد يارب يارب يكتب لك الفرحه هذا الإسبوع وما يجي الإسبوع الجاي الا ونبارك لك يارب ومع السلامه |
أخي سنون ومنون
جزاك الله خير أنت ايضا على ماتكتبه من مواضيع جميلة مساهمة في تبصير وتذكير اخواتنا بالخير اسأل الله يوفقك ويجزاك خير ولك تقديري واحترامي أختى شوبارد مشكلة أمك وكثير من الأمهات اللي ضايقه صدورهن على بناتهن مايعرفن أن الدنيا تغيرت ومعظم البنات ماعاد يتزوجن قبل 25 الا ماندر ، يعنى الحين تعتبر بداية السن المناسبة للزواج ، على بالهن زمان اول تتزوج الوحده 17 سنه 0 وأمك حتى لو سمعتك كلام جارح أحيانا ترا غصب عنها مو بيدها تطلع الكلمات غصب وتستفزك وانت بعد ماشاء الله قلبك ابيض ومن النوع اللي يثور بسرعه بس ماتحقدين وتحبي تخدمي قريباتك وزميلاتك حتى اخواتك هنا أنا ملاحظ حنانــك عليهن من خلال ردودك وتلطيفك للمشكله بكلماتك وروحك الحلوه 0 بالنسبه للمزاجيه عادي تراها خاصة الايام هذى ( حر وفراغ وسهر ) كل أكثر الناس كذا ، على فكره انا وصلت لأفكار مساعدة في الزواج للبنات والمطلقات والأرامل النشيطات فقط بكتبها هاليومين الله يوفقك ويسعدك ويسهل امورك وجميع الأخوات ولك تقديري واحترامي أستاذنا صاحب رأي سديد جزاك الله خير وبارك فيك وجهودك وحنيتك على اخواتنا هنا تقبل خالص تقديري واحترامي أختى The Swan سبحان الله الرجال صلفين انا عندي طفل 9 سنين يامر أخته 15 سنه تقل اصغر منه مع اني اهوشه واطلبه يحترمها ويقدرها لكن طبع ، لكن ماعليه تحملى وإن شاء الله الوضع مو مطول وبكرا يرزقك ربي بإذن الله الله يسعد قلبك ويوفقك للزوج الصالح ولك تقديري واحترامي أختى ورده انا احس واشعر فيكن ورغم انى ماعندي الا اخت كبيرة 65 لكن احس فيكن وأقرأ واتفاعل مع مواضيعكن الله يسعدك ويوفقك للزوج الصالح وكل الأخوات ولك تحياتي وتقديري |
انا لم يحاول الى الان احد من اهلي ان يشعرني بذلك لكن مع هذا انا في داخلي اشعر اني بدأت اكون ثقيلة وانهم في داخلهم ينتظرون ان اذهب انا قوية امامهم ولا احاول ان اكون سلبية في المنزل لكن مع هذا فإن ابسط خطأ اصبح يحسب له الف حساب عكس السابق وهذا يؤثر علي نفسيتي كثيرا |
| الساعة الآن 08:26 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©