السلام عليكم ورحمة الله وبركاته

اسعد الله اوقاتكم بكل خير

انا متزوج منذ ثلاث شهور

مشكلتي معناتي مأساتي مع زوجتي أو في زوجتي

1- الشعر اللي بالجسم
2- تشقق بكعب القدمين ( تكرمون ) وناشفه
3- لا تريد التغير ( العناد )



1- الشعر اللي بالجسم:
الشعر موجود المناطق المعروفه كالذراعين وغيرها ..
ما ادري هو اهمال هو عدم نظافه هو ايش ما ادري ......
هي للأمانه تزيله بالماكينه,ولكن احس ان المكينه ماهي مقديه أو ما تشيل ممتاز
طبعاً ترددت كثير بأني افتح معها هالموضوع اخاف تزعل أو تنجرح أو اي شي,ولكن وصلت حدي
قلت لها :وكلمتها بالموضوع بعد فتره ان هالشي يضايقني ولا يعجبني وكلمتها بهدوء ورزانه
قلت لها:بالحرف الواحد كذا ( انتي ليش ماتستخدمين الحلاوه لأزالت الشعر احسها افضل من الماكينه
قالت لي:الحلاوه لازم تذوب أو تلين وتعور شوي
قلت لها:لأن الحلاوه افضل وتعطيك نعامه اكثر بإزالت الشعر )
وقفلنا على هالموضوع وانا صراحه ماني بطايق هالشغله لأنها قرف , واحيان لا اجامعه بسبب هالشي كل ما طرى على بالي ممكن اجلس اربع او خمس ايام أو اسبوع ولا اجامعها , وإن جامعتها خلال هالايام ليس شوق لها ولكن عشان الشهوة.

المهم تقفل على هالموضوع غبت اسبوع عن البيت بسبب سفره ولما رجعت طبعا الموضوع في بالي قلت اكيد الحين هي فهمت وش قلت لها وسوت اللي ابيه واكيد غايب اسبوع اكيد بتكون متزينه لي ومتزهبه
اللي فا جئني انه ولا كأنه شي صار بالعكس حسيت ان الشعر زائد عن أول.

صح أن هالشي خلقه من ربي , وهي بالأساس عندها كثافه بالشعر , ولكن يوجد متابعه وعنايه ونظافه.
ــــــــــــــــــــــــــــــــــــــــــــــــــ ــــ
2- تشقق بكعب القدمين ( تكرمون ) وناشفه:
تشقق الكعب كلمتها فيها وقلت لها حاولي تهتمين بكريمات أو مرطب بـ هالموضوع , ولا تمشين حافيه , ولا تلبسين الصنادل ( تكرمون ) وحاولي تلبسي شراب.

ولكن لا حيااااااااة لمن تنادي.

يوم تحط من الكريمات وخمس ايام لا ,
والصنادل تقول:ما تغيرها ما تحب الجزم ( تكرمون ) المقفله
ونوب تلبس نعول ( تكرمون ) فالبيت ونوب ما تلبس < ارضية البيت رخام >
ــــــــــــــــــــــــــــــــــــــــــــــــــ ــ
3- لا تريد التغيير في حياتها ( تحب العناد و تجادل بالمواضيع )

بمواضيع كثيره تحصل بيننا اقولها:يابنت الناس انتي الحين في بيت زوجك لازم تقتنعي أنك متزوجه
وأنك ليس فـ بيت والدينك
تقول:انا تربيت كذا وما احب اغير شي فيني
يعني تبي اذا صار بينا موضوع وزعلت تبيني اجيها واراضيها واعوضها باللي صار
تحاول ان كلمتها هي المسموعه فالبيت وهي اللي التمشي بنسبة 90 % واللي تبيه هو اللي يصير واللي تعودت عليها فـ بيت اهلها يصير عند زوجها.
حسيت إن في بيت اهلها اذا زعلت يراضونها و واحيان يخلون كلمتها هي الماشيه او المسموعه.

قلت لها:هالكلام مايصير عند زوجك وما ينفع , ولازم تمشين على كلامه
تقولي:انا ما احب وتربيت على كذا وصعب اني اتغيير
وتقول:انت بعد ما تقدر تغير شي فيك ولا انت ملزوم تتغير.
وقلت لها:من ايام الملكه الرجل ما يحب زوجته تعانده بـ اتفه الامور ... ولكن !!!

وأذا غلطة من النادر انها تعترف بغلطها ومن النادر أنها تعتذر أو تقول معليش أنا غلطة هالمره أو تقول ماكنت اقصد.
صارت سالفه قبل فتره
( ملابس لي على الارض بالغرفه تمت الملابس تقريباً حوالي اسبوع بمكانها ولا شالتها مع العلم انها واضحه لها لأنها تشيل الاشياء اللي بجنب الملابس وتترك الملابس , وبعد اسبوع شالتها
قلت لها:اخيراً شلتي هالملابس
تقولي:ما نتبهت لها الا الحين
اقول لها:يابنت الحلال اسبوع وانتي رايحه جايه من عندها واسبوع وانتي تشيلي اللي بجنبها ولا شفتيها
تقول:ايه ما شفتها الا الحين !!!!
انا تنرفزت قلت لها:(بصوت عالي)حاولي تهتمي اكثر بأمور البيت ونظافته.
سالفه ثانيه
( تكرمون دورة المياه عند البلاعه أو مكان التصريف اللي بالارض تجمع وصخ ,
مره قلت لها:انتي نظفتي الحمام
تقول:ايه
قلت لها:شلون نظفتيه وعند البلاعه متجمع وصخ
قالت:لا , نظفته
طبعاَ انا هالوصخ ملاحظه من كذا يوم
قلت لها:يابنت الناس انتي ما نظفتي زين
تقول:لا انا نظفته اليوم
قلت لها:روحي وشوفي بعينك ولما شافته
قالت:ايه صح الحين انظفه !!!!!

تغطية عيونها ( غطاء العيون )
هي تتبرقع قلت لها مليون مره ما يعجبني هالشي ولا ابيه في زوجتي البسي الغشوه الخفيفه على عيونك تقولي ما احب اغطي عيوني
يا بنت الناس يهديك يرضيك تقولي ما احب , و تقولي كيف اشوف !!!!
وتقولي هذي حريه .



في جميع المواضيع اللي تصير بينا احيان اتكلم بهدوء وعاطفيه واحيان اتكلم بعصبية ونرفزه واعلي صوتي , ولكن بدون الغلط عليها.

أنا الحين لي خمس ايام هاجرها وانام بالمجلس , من بعد موضوع صار بينا
وهي احسه زعلانه من هالشي أو مو عاجبها , ولكن لي الحين خمس ايام ولا جت قالت لي انت ليش نايم برا الغرفه و حتى اللحاف اللي بالمجلس ما تشيله تخليه بمكان نومي بس ترتبه وتصفطه وتخليه بمكان نومي بالمجلس.

امها وابوها , حسو بان في شي بينا و أن في مشكله وكلموني
قلت لهم:ما في شي الامور زينه لا تشيلون هم . شوية امور بسيطه وماتذكر تحصل بين الزوجين وأنتم أدرى بالسوالف هذي , وهالامور اللي تصير البسيطه احيان تكون ملح للحياة الزوجيه . انا ماحبيت اقولهم شي مع العلم أن امها اصرت انها تعرف
وقالت لي:اي شي تبيه ابشر فيها اي شي ملاحظه على بنتنا كلمني وعلمني
قلت لها:ما في الا كل خير ,
انا ما ودي احرجها مع اهلها بـ هالامور وافشلها


يا جماعه وش الحل الحين أحس الامور تراكمت على بعضها وهي لا حياة لمن تنادي , واحيان احس أني ما طايقها , وش الحل يا جماعه ؟؟؟

قـــــد يفكر بعض الاعضاء أني غريب أو كيف هالرجل يقول هالكلام عن زوجته ...
يا جماعه طفشت وصل حدي , ولا ودي احد من اللي يعرفونها يدري لأني ما ودي احرجها معهم.

وحاولت جاهد باني احل هالامور ولكن ... دون جدوى.
الكلام بهدوء ما فاد , العصبيه والنرفزه وعلو الصوت ما فاد , اعطيها فلوس بزياده , الحرمان ما فاد , اشري لها هدايا ما فاد , والهجر للحين مو جايب نتيجه !!

والمعذره أذا طلعت كلمات او جمل غير لائقه,ولكن من اللي فيني قلتها.