بيتنا صالة العاب
مساكم الله بالخير بالخير ماهو مثل مساي اللي منيل بسته وتسعين الف نيله ادري اني بنفك فكه من زمان ما انفكيتها بس قسم بالله ياقلبي مليان باقي تكه وينفجر من وضع اجتياح الجعاري هذا خلاص بموت عيال اخواني ما اقدر اتحملهم اكثر من كذا اصبرو لي يومين بالكثير وبتلاقوني ترند بتويتر أقحوان تعنف الفئه الضالة من بزارين عايلتهم ما اقولكم عن الهدوء اللي رمى نفسه مع الدريشه ولا عن الخصوصية اللي طعنت نفسها وماتت ولا عن الاشياء اللي اتركها بمكان وفي جزء من الثانية تختفي ولا عن الازعاج اللي ما يخلص مع العلم ان كل اللي بقوله غيض من فيض مدري فيض من غيض موب هذا المهم انا ممكن اتحمل هذا كله يوم بالاسبوع لكن كل يوم خير من الساعه 2 الظهر لصباح اليوم الثاني على هالحال المزري هذا غير المخلفات اللي تبقى بعد عملية التطهير الشامله هذا اخذ وضعيت الميت هنا والثاني يصيح يبي ينام بعد واللي منخش ورى الستارة واللي بالخزانة 🤦🏼♀ اطلعهم مع الباب الرئيسي الاقيهم داخلين مع الباب الخلفي اقفل البابين يطلعون لي مع الدرايش نقفل الدرايش يطلعون لي من تحت السيراميك لو افتح الحنفيه نزلو لي منها الجلطه موب هنا الجلطه اللي حاطه رجل على رجل ولا تسأل تطلعهم من هنا وتقفل الباب عليهم من هنا عشان تقطع عليهم خط الرجعه يطقون الباب لين يدوخون ما تفتح وتجي امي تسوي فيها اللي كبروا عقولكم وخلاص مره سفلت فيها تتوقعون طلعت بنتيجه ؟ ابد مسويه نفسه مجنونه ما تفهم ما تركت شي ما دعيت به عليها ابتداءاً من الساحق الماحق وانتهاءاً بالمر المستمر ولا زالت حاطه رجل على رجل 😔 بس كذا ! لااااا بعد فيه جلطه ثانية اكبر من كذا امي لا تكلمونهم ولا تطلعونهم برا ولا تجرحونهم ولا تقولون لهم لا ولا يطولون واقفين ع الباب واكلوهم وشربوهم والخدمات لا يلمسونهم يقالها امينه اللحين اذا امه ما تدري عنه اتعب نفسي انا ليش الزبده نظام يا انتو تراكضون وراهم يا انا وصلت لمرحله اتركها تراكض وراهم واسوي نفسي ما اشوف ابيها تفهم ان الموضوع زاد عن حده لانها هي السبب ما تبي تحط حد ولا تاركتنا نتصرف كذا بس موتي وانتي ساكته قسم بالله صايرة اجيب لنفسي شي ادخله البيت تهريب تقل بدخل بلاطة حشيش وكله كوم والنوم كوم ثاني اقفل الباب بنام يتركون البيت كله وتمسك معهم يلعبون قدام باب غرفتي طيب ليش ! هذولا لو اجيب لهم اسد يفترسهم ما علي لوم ويمكن اخذ اجر بعد الله يصبرني بس قسم بالله دايخه نوم و💔🤕 |
رد: بيتنا صالة العاب
مساك الله بالرضا
موضوعك ممتع بأسلوبه الشيّق والمرح لا أظنّ أن روحا بهذه اللّطافة تُقدم على مناداة الأسود لافتراس الأطفال متّعك الله بالصحّة والرّزانة والعقل الحكيم,, |
رد: بيتنا صالة العاب
ما فهمت وش مشكلتك وايش دخل أمك بالموضوع وليه دعيتي عليها وسفلتي فيها؟
|
رد: بيتنا صالة العاب
فين أمهم وأبوهم عنهم؟!
إنتِ مو مسؤولة عن أطفال أحد، لا مسؤولة عن تربيتهم ولا عن تعليمهم الادب والسلوك الجيد ، ولا مسؤولة عن توجهيههم و منعهم من المخاطر. لو كانت امهم اختك او ابوهم اخوكِ ،أمهم و أبوهم المسؤولين عنهم فقط ، وإن أردتي تحمل جزء من المسؤولية فبإرادتك ورضاكِ وليس رغما عنكِ فأنتِ غير مجبرة على تحمل الازعاجو الفوضى بسبب أطفال أي أحد . |
رد: بيتنا صالة العاب
اقتباس:
التي هي أم الاطفال المزعجين |
رد: بيتنا صالة العاب
اقتباس:
يبي يجي يوم واسويها اذا مو عشان تاكلهم عشان تخوفهم وما يجون 🙁 |
رد: بيتنا صالة العاب
اقتباس:
بالمختصر زوجة اخوي انسانه تبي عيال ما تبي تتعب وتربي وكذالك اخوي فاللي صاير من يصحون لين ينامون الصغار وهم جالسين عندنا نطلعهم ما تفتح لهم الباب عشان يرجعون مره ثانيه لنا ويزيد الوضع سوء اذا كانوا خواتي عندنا مع بزارينهم وامي بتموت على اولادها وعيالهم وحريمهم لحد يزعلهم وكانت النتيجة بيتنا ازعاج وبيتهم هدووء تام ورواقه فهمت ليش ادعي عليها لان متحملين شي فوق طاقتنا وغصب بعد 😤😤😤 |
رد: بيتنا صالة العاب
اقتباس:
ابوهم يشوف الوضع عادي بحجة يحبونكم طيب يمكن انا ما احبهم استشيروني ياخي وامهم تبي الفكه منهم مع شوية حركات منا ومنا انا ادري اني موب مسؤولة عنهم وهذا اللي يغيض لما تسوين شي مجبره وانتي تدرين انو مو من مسؤلياتك في الحياة لكن عشان ميمتي ما تزعل نظطر نسكت وحتى لو اتحلطم عندها تعطيني نظرة يالك من فتاة سيئة بعذري والله السوء موب جاي من قليل عاد اصبر بس مو غصب ولو بكمل بتجيك صدمه انو في ناس كذا !! |
رد: بيتنا صالة العاب
الله يكون بعونك , اذكر صديق لي عنده خوات خمس متزوجات واخوانه اربعه متزوجين ويتجمعون كل خميس عند بيت ابوهم الشايب الكبير وطبعاً كل وحده جايبه 3 اولاد اقل تقدير والبيت بيت حكومي مايتجاوز 300 متر مربع وازعاج ولجه ويتهاوشون مع بعض وصراخ والثلاجه اذا جو فاضيه ، بسبب الوراعين ، المهم ابوهم الكبير الشايب جمعهم وقال كل وحده احدد لها يوم تجي زيارتنا موكلكم تزورونا بالخميس وحدد لهم الوقت الساعه 10 مساء الكل مغادر لبيته والي ماينفذ كلامي قسماً بالله العصايه الي بإيدي لكسرها على ظهوركم نعنبوكم شايب عمري بالتسعين زوجتكم ابي منفعتكم وماهي حاصله الا المضره والازعاج بعدها اصبح البيت هدوء ونظام وموكلهم يجون بيوم واحد ...
لكم الحق تنزعجون لان الصغار الله يصلحهم طاقات وحيويه ومايقعدون من مكان لمكان وهذا جزء من نموهم هم ماينلامون يحتاجون بديل اما استراحه يطلعون فيها او ملعب او صالة ترفيه اما اذا قعدوا بالبيت ابشروا بالازعاج وخاصه وقت الاجازه والصيف... |
رد: بيتنا صالة العاب
تعالي يختي تعالي بالاحضان ماحدش حيفهمك غيري jytt
والله قبل يومين نمت وحسيت اني اول مره انام بشكل كافي ورحت سالتهم ايش صار اول مره اشبع نوم ؟؟حسبت وضع مو طبيعي في شي غلط؟؟ طلعو حد راح نزهه وحد راح سوق افتقدنا الخصوصيه حتى كوب شاي ما تقدري تحطيه اي مكان لا امسكيه في ايدش حتى تخلصيه ولا بتحصليهم صبغو لك البيت بالشاي مو متعودين يكونو معانا اطفال والحين فجاءه صار معانا عيال خوات تطردي اختك من نزهه ولا تتحمليها وتاخذيها معم وتقضي يومك كله تربي وتبدلي وتاكلي ومطاليب وتتنازلي عشان الاطفال لايمرضو والله صارت بعض تفاصيل الحياه مملة منهن jyf اففف كدرتي لي مزاجي انا كان نسيت مشوار امس الملي بالازعاج لا وياريت بعد الازعاج والروتين اللي قضيناه سمحو لنا ننام مثل الخلق والله صرت اشحتهم مكان عشان ننام بس وماشي يفقد عصابي وخلا كل اطفال العائله وحده يدخلو غرف وشخبطو ع كتب وشطرو دفاتر !!! لا والامهات ولا عبالهن يجابين لي اوراق ممزقه هاذا لك؟؟ لا سلامات مو لي لجيران كله كوم واسلوبهن معهم وقت الاكل ينرفزز عادي يفسد الاكل اهم هز ياكل ويمد ايده ع اللي يريده وهم يسو اللعاب الناريه وانتي بعدين نظفي معهم ب ختصر للك السالفه حريم اليوم مو حق تربيه وعيال ف مفروض يطبق عليهن قانون الصين انه كل وحده تجيب طفل ولا اثنين nhg اما الي مسويه نفسها الولود الودود وترمي عيالها عند الناس تتقصر ghgjgf |
الساعة الآن 07:03 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©