|
زوجي خانني وهو اللي فضح نفسه (حُلت المشكله)
السلام عليكم...
اكتب وماادري وش اكتب ومن وين ابدأ بداية.. انا تزوجت من قريب لي والحين لنا سنتين بالضبط من زواجنا احب زوجي وهو يدعي انه يحبني لكن ف يوم او بالأصح قبل كم يوم اكتشفت وسمعت بأذني زوجي حبيبي ابو ولدي اللي بالطريق يضحك ويسولف مع مجموعة بنات مو وحده بقول لكم السالفه من البدايه كنت معزومه ف ذاك اليوم... وجلست اصلح حلى علشان اخذه معي... اكتشفت ان فيه شي ناقصني من البقاله... على طول دقيت على زوجي اللي كان طالع بحجة الدوام.. كلمته وقلتله اللي ناقصني من البقاله... قال وانا راجع بشتري الناقص بعد ماطلع دق علي مره ثانيه... يسألني وهو متواجد ف البقاله اذا فيه شي غيره؟ قلت لا مشكور انا وقتها كنت بالمطبخ اصلح طبقات الحلى واللي ناقصني الطبقه الاخيره قلتله مشكور مع السلامه وحطيت الجوال من كثر ماني مشغوله وماسكرت الخط اعتمدت عليه قلا اكيد هو بيسكر الخط بعدها بدقيقتين تقريبا جهازي طلع منه نور.. طالعت يقول البطاريه ضعيفه بدون صوت تأملت شوي لقيت الخط مفتوح لسى ماتسكر من زوجي اخذت جوالي وحطيته بأذني واناديه الو ... الوووووووووووووو وارفع صوتي علشان يسمعني سمعت صوت بنت.. سكتت لحظتها وعرفت انه بالغلط ماسكر الخط الاخ معه جوال ثاني واللي زاد الطين بله انه فاتح السبيكر وانا اسمع حتى البنت وش ترد عليه كأنه يقول لي يلا اسمعي انا قاعد اخونك ومعي جهاز مخبيه عنك شوفوا كيف ربي فضحه والبنت اللي تكلمه عندها بنات كثير ويستهبلون واللي ضايقني اكثر ان زوجي الموقر يقول كلام شين وانا اسمع المحادثه رحت ركض اشحن الجوال بطاريه لانه بيتقفل وبعدها فكرت بفكره حلوه اني اسجل مكالمته مع اللي تكلمه لاني اعرف زوجي ياما واجهته على امور ويكذبني وبنفس الجهاز سجلت المكالمه بعدها شاف خطي مفتوح وسكر الخط انا على طول دقيت عليه مارد علي طبعا دقيت مره ثانيه انتظاااااااااااار شكله توهق ويستشير احد مارد.. وانا ارجف من الصدمه وقتها... حسبي الله ونعم الوكيل المهم انتظرت شوي دقيت عليه ,, ورد قلت اهلين وينك؟؟ وربي وربي صوته وكلامه واااااااااااااااضح الخوف عليه وانا سويت نفسي طبيعيه ماسمعت شي لان الحكي بهالموضوع بالجوال ماينفع ابيه يرجع للبيت وبعدها لكل حادث حديث قال انا يمكن اتأخر قلت ليه؟؟ انا انتظرك خلص الحلى باقي اخر طبقه قال معليش بتأخر قلت لا الله يخليك تعال الحين جب الطلب اللي معك وارجع اطمئن من كلامي وشككته اني ماسمعت قال خلاص انا قريب وانا انتظره ارتجف وخايفه من المواجهه مااحب هاللحظات :24: واقول بيني وبين نفسي ياربي ثبتني وقلبي يرجف بقوووووووووووووووه ولاتنسون اني حامل دخل وشرف الخاين ولابس نظاره شمسيه تغطي عيونه الخاينه :( ودخل المطبخ ييحط الغرض على الطاوله ومايطالعني مع انه لابس الشمسيه جيت قربت منه وطالعته رفع راسه وطالعني مديت ايدي بكل هدوء واخذت النظاره ابي اطالع عيونه وجلست اطالع شوي قال وهو متلعثم وش فيك تطالعيني كذا؟؟؟ قلت انا نص الكلام اللي قاله للبنت قال وشو؟ وش تخربطين انتي؟؟؟ عدت الكلام وطالعته قت ليه يا .....؟؟؟ ليه؟؟؟؟؟؟؟؟؟؟؟؟؟؟؟؟؟؟؟؟؟؟؟ قال وشو اللي ليه؟؟ قلت ليه تخونني؟ ليه قال اقول بدت خرابيطك يلا انا بروح ناديته بأسمه طبعا بوقتها خلاص ماقدرت امسك اعصابي قلت تكذب اذاني اللي سمعتك تضحك وتسولف؟؟؟؟؟؟؟؟؟؟ وانكر طبعا على طول يجحد قلت له كنت متوقعه هذا ردك علشان كذا انا سجلتك قال وبكل ثقه روحي جيبي التسجيل!!!!!!!!!!!!!!!!!!!!!!!!!!!!! (شين وقوي عين) لحظتها... خلاص نفذ صبري اقول له سمعتك باذاني يقول بدت خرابيطك اقول له مسجله محادثتكم يقول روحي جيبي اللي سجلتي خلاص قمت اصيح واصارخ بأعلى صوتي وانا اصارخ اقول له انا مقصره معك بشي؟ جاوبني يقول : لأ ويقولها بعد المهم بعد حكي طويييييييييييييييييييييييييييييييييييييييييل وداني بيت اختي دلوني وش اسوي؟؟ اسامحه ؟ او لأ؟ جرحني وانا كنت وااااااثقه فيه :29: جرحني جرح عمري ماراح انساه والله لايحطكم بمثل هالمواقف لاني تعبت وربي تعبت انتظر ردودكم واي استفسار انا حاضره لاتبخلون علي بالدعاء حتى الوالده متوفيه والله المستعان.......... |
طيب عطينا معلومات عن شخصية زوجك ، علشان الاعضاء يقدرون يعطونكِ الحل الأنسب
لا تخافين الاعضاء ما راح يقصرون معك إن شاء الله |
اممممممم شخصيته طيب اذا طلبت منه شي يحاول انه يلبيه
ومع الناس احس فيه حياء شوي وبأمور الفزعات مايقصر مع الناس بس ماادري ليه سوى كذا يوم قلت له عطني سبب واحد بس قال كذا بكلم بجرب المكالمات بعد الزواج واللي حارقني ومضايقني اني قبلها كنت اسأله فلان انت تخونني؟؟ يقول لأ ويحلف بربه العظيم انه مايخون لدرجة مره حط ايده على بطني ودعا على الجنين اللي ف بطني انه يموت اذا كان يخون يعني دعا على ولده بالموت طيب ليه كذا يسوي؟ ليه يدعي على انسان برئ مابعد طلع على الدنيا وبالنسبه لصلاته الحمدلله يصلي احيانا بالمسجد واحيانا اذا فاتته بالبيت افيدوني بأرائكم الله يجزاكم خير تعبـــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــا نه تعبانه حيل |
يا اختي يا حبيبتي الله يصبرك ويثبتك ادري الموقف صعب عليك والنفس ما تتقبل الخيانه ولكن العفو من شيم الكرام
عيوني ما ابي اكلمك بالمنطق والعقل لا ابي استجدي فيك الزوجه الحبيبه والصديقه لزوجهاا واقولك الحياه الزوجيه ما تخلى من مواقف منها الجارح ومنها الي يصدم ومنها الي يعذب بس الحكمه وانا اختك في هالمواقف هي سيده القرار عمر العجله ما عمرت بيت انتي الحين استهدي بالله كم يوم بعدهاا انااقولك توضي وصلي ركعتين في جوف الليل وقولي يارب ثبتني وانطق الحق على لساني وقوي نفسك بالله بعد كذاا جهزي لليله حلوه بينك وبين زوجك جهزيهاا باغراض وشموع ومااعلمك انتي ادري وفيكي الخير والبركه واجلسي مع زوجك فيها وانتي بكامل زينتك وباهدى اعصابك اكليه بيدك وشربيه وامسكي يده وطالعي في عينك واساليه وقتهاا ليش سويت كذاا انا مقصره معك بشي شفت مني شي ما عجبك ولقيته بغيري صارحني قوليله اليوم انا زوجتك وبكره بكون ام ولدك وضحيله انه جرحك وانك كنتي تثقي فيه وكيف شرخ هالثقه وتفاهمي معه صدقيني عيوني بيستحي بينه وبين نفسه وقتها حتى لو ما بين لك وبيفكر بنت الناس ما تستاهل وانا غلطان وتلقينه يرجعلك يالغلا بس اهم شي عالجي الموضوع بحكمه الصراخ والعناد ما يجيب نتيجه وانا اختك وانتي لازم توريه شوف انا ما قصرت معك يكفيك تانيب نفسه له لا شافك كذاا تعاملينه اختي اكثري من الدعاء له واكثري من قول اللهم سخر لي زوجي اسال الله ان يصلح حالك زوجك ويهدء سركم |
وعليكم السلام ورحمة الله وبركاته
أختي الكريمة الله يكون في عونك ويصبرك انصحك تصبرين على زوجك في حال كان محافظ على الصلاة ومعطيك حقوقك كامله وليس مقصر معك في شي واخلاقه وتعامله معك مميزه فربما تكون هذه نزوه . واكثري من الدعاء له بالهدايه ويجب ان تقفي في وجهه وتحاوريه لماذا فعل هذا الشي ولكن بعد ان تهدأ الامور بينكم . اما إذا كان مقصر في دينه وحقوقك يجب ان يكون هذا الشي سبب ان تاخذي منه وعد ان يعدل امور دينه لأن فعلته بسبب ضعف الوازع الديني والاخلاقي وفقك الله ورعاك |
والله قهر .. لكن يا اختي الحل هو في جلسه مصارحه هااااادئه ... تكلمي معه بكل ثقه و حطي عينك في عينه .. حافظي اختي على نبرة صوتك اوعي ترفعي صوتك .. اختي اوعي تبكي امامه .. خليك متماسكه عشان ما يحس انك ضعيفه .. طمنينا اختي عن اخر اخبارك .. |
انا اشكرك كثير على اهتمامك بزوجك وبيتك واشكرك على حسن تعاملك المواجهة :16: كانت جدا من صالحك يتبقى عليك كيف تعيدين الخائن :d اسف زوجك اليك باقي الأمور الثانية خليها لا تفكرين فيها :19: المواجهة معه كفاية والاحداث اللى صارت انسيها امسحي التسجيل :25: امسحي من ذاكرتك هذا اليوم وساعدي زوجك على مسحه |
الله يفرج همك
الحزن الشديد يضر الجنين حبيبتي حاولي تهدين والكمال لله لكن عالجي المشكلة لاتسكتين ولاتمسحين التسجيل لأنه ورقة رابحة في ردعة عند الحاجة واستمرار الخطأ إذا احتجت اللجوء لأحد والديه فقد يكذبك فاحتفظي بالدليل للحاجة فقط واستشيري أخصائي نفسي ضروري عندهم حلول حلوة ومريحة وصحيحة للخيانات الزوجية أهم شيء لاتفكرين تنفصلين هذه غلطة وتتصلح كوني قوية وأكثري الدعاء |
نصيحه مهمه اختي صعب اتخاذ اي قرار و انتي حامل لانه الهرمونات تلعب اب جسم المراه و تخليها تقول و تسوي اشياء مو اب وعيها ... اول شيء روحي بيت اختج و بينيله عن غضب و انه خلاص .. خليه يعترف و يقول ليش سوه جذي و انه خلاص كل شيء منهد .. خل يعرف مقدار الجريمه الي ارتكبها اب حقج .. قوليله انج بتروحين بيت اهلج فتره تفكرين اهناك و تتخذين القرار المناسب بشان حياتكم سوا .. روحي بيت اهلج خليه اي وراج و يركضلج و يحاول يراضيج و يوعدج و يحلفلج على القران انه ما يعيد ولا يفكر انه يخرب بيته اكثر من جذي .. هم لا تعطينه الجواب قوليله محتاج افكر .. هذا افضل حل انج تعاقبينه اشويه .. المهم بعد فتره اذا يالج لا تضحكينله ولا شيء ردي بيتج و نامي يمه و لكن لا تحسسينه اب شوق او اي شيء .. على شان يحس اب فداحت الي صار و اذا عصب قوليله ليش الي صار اشويه !! لو انا الي كنت امسويه شان قطيتني بيت اهلي !! تحلل على نفسك و تحرم علي !! ولا لي هل الدرجه على بالك انا نفس الكمبيوتر ديليت و خلاص .. اكيد بيحز اب نفسي لاني عطيتك كامل الثقه و احتاج وقت ... اذا شفتيه تعدل و مهتم فيج بالاخص انج جااامل ما راح يقصر معاج حاولي تنسين الزله و الله كريم (تره هل الشيء مجرب لازم عقاب على شان ما يتمادي)
اختج بني |
و علة فكره لا تمسحين التسجيل و خلي اهلج يعرفون على شان اذا عادها اهلج عندهم خبر .. خل يعرفون و لكن لا يتدخلون حلي المشكله لوحدج هل المره و تقومين بالسلامه يا رب و على طاري انه دعا على ولدج تره غالب الرجال ما يقولون انهم يخونون احتي ههههه ف هذا شيء عادي انه يقول لا و يحسسج انه ماكو شيء .. ف لا تفكرين اب شيء و سوي الي قلتلج اياه
اختج بني |
وعليكم السلام ....
فعلن موقف صعب . عند حصول الخيانه لازم تتوفر ثلاث اشياء مهمه 1 الدليل 2 الخطه 3 الهدف انت معك دليل فجربي تلاقي خطه توصلك لهدف خذي موقف صارم من الموضوع ولا تخليه يمر مرور الكرام اتمنى تكوني فهمتي قصدي وان شاء الله الاعضاء يساعدوكي |
والله العظيم من كثر المشاكل صرت أشك بزوجي الله يستر علينا بس ويفرج همك أختي
|
ما يتأمنو هالرجال الله يصبرنا
مثل شعبي قديم جدا يقول يا مأمن للرجال يا مأمن المي بالغربال تموت الةحده وفورا بالعزاء بيكون عم يبحث عن غيرها طبعو ما رح يغيرو وانتي لو سامحته الآن رح يفضل الشك بقلبك يوضع يده على بطنك ويحلف كذب بالمولود ليش اصلا هو حاسس بتعبك حمل تسع شهور انا لو كنت مكانك اصالحو واخليه يحس بعد مده انو اخونو امثل عليه احضر رقم تاني وارسل لنفسي مسجات غرام ما حدا احسن من حدا ما تعملي مثلي انما هذا انا اسقيه من نفس الكاس اخليه يكلم نفسو هو وماشي |
اقتباس:
|
اشكركم الف شكر على ردودكم الاكثر من رائعه
حسيت ان احد متفاعل معي ويسمعني الله يوفقكم كلكم وبالنسبه لي اتعبني التفكير بهالموضوع وماقدرت انسى مكالمته تتردد على مسمعي الله يهديه هو مقصر معي بالرومانسيه والحب هذا اللي دايم اشتكي منه والله يصبرني ويثبت حملي واهم شي يكون الجنين سليم معافى الله يستر دعواتكم لاعدمتكم |
الرجال و الخيانات
تعبولنا أعصابنا احتفظي بالتسجيل في سي دي و حطيه في بيت أهلك في مكان أمين و لازم يعترف بغلطه , ارجعي بيتك لكن خليكِ في حالك , أكثر من طعامه و شرابه لا تهتمي فيه خليه يحس على نفسه |
اقتباس:
7 7 الأخت صاحبة المشاركة في الأعلى لا يا أختي طريقتك ليست صحيحة الرجل غير المرأة ، هذا هو الواقع الرجل لا يعتب عليه الناس عندما يخطئ كما يعتب على المرأة و أنا هنا لا أبرر للرجل و لكن أبين لك أن المرأة كاللؤلؤة تضرها الخدوش فيذهب بريقها هذا أولا و ثانيا هل تقبلين أن تجعلي نفسك موضع شك لا بل بيني له أنك أشرف و أرقى و أنقى أما إن شككتيه بنفسك هل تتوقعين أن يأتي إليك و يقبل رأسك و يقول أنا آسف؟ بل ربما يرتكب فيك جريمة.... لأنك في ذلك الوقت ستكونين في نظره مثلك مثله خائنة و العياذ بالله ::::: و بالنسبة لك أختي صاحبة الموضوع أُحيي فيك صبرك و حرصك و أعجبني تماسكك قبل المواجهه ما دام زوجك محافظ على الصلاة اصبري عليه فمن يصلي يرجى أن يكون فيه خير بإذن الله تعالى إذا حاول إرجاعك لا ترفضي و لكن بيني في البداية ما تريدينه و استخدمي أسلوب الإقناع قولي له : هل ترضى أن أخونك ؟ كيف لك أن تكون أنت الخائن؟ قولي له: أنت الآن تنتهك أعراض المسلمين و تعبث مع بناتهم.. ألا تخشى أن تبتلى في أهل بيتك؟ ألا تخشى أن يعترض طريقي أحد الذئاب البشرية؟ ::: في الختام 1-أوصيك أختي بالدعاء صلي في الثلث الأخير ..تضرعي إلى الله ..اسأليه من فضله و أن يعيد إليك زوجك و يغض بصره عن الحرام 2-حاولي جاهدة (مستعينة بالله)إبعاد الأغاني و الموسيقى و أسباب الغفلة عن بيتك 3-تفنني لزوجك و تزيني له و جددي>و أنا لا أقصد أنك مقصرة و لكن أقول لك واصلي و جددي :::::::::::: أسأل الله أن يجمعكما على الخير و أن يبعد عنكما وسوسة الشياطين |
بس صعبة يقوووووووووووول لك أبي أجرب المكالمات بعد الزواج
كان سكت أو إعتذر طيب """"""""""""""" لكن بيني و بينك الخيانة أصعب شيئ في الحياة الزوجية أصبر على كل شيئ إلا الخيـ ــ ــ ــ ــ ــ ــ ــانة لأنها تقضي على الحب أو الحياة بأكملها |
وسعي صدرك اكثر الرجال كذا انا زوجي لما كشفته انقهرت مره خصوصا لما كلمت اللي هو يغازلها بغيت اموت من القهر قلت طيب لو ماتركت المغازل هددته اني ادخل شاتات واقعد اغازل وحده بوحده و اقعد اخوفه واذا شلت النت عني بسيطه فيه بلوتوث وفيه مليون طريقه عشان اخونك مثل ماتخوني لكن ماصدقني وصرت لما افتح النت واشوفه جاي اسكر كل شي وكاني مختبه انقهر مره مني بس صار يشك فيني لما بطل بطلت هذي الحركات وقلت مثل ماتنقهر انا بعد انقهر ومثل ماتخوني لا تامن اني اخونك صحيح انو غلط الوحده تفكر مثلي لكن مابيدي الا هذا الشي لان النصيحه ماتنفع معاه و رجعت المياه لمجاريها والحين تمام الحمد لله
|
أختي الحبيبة وفقك الله ورعاك لمافيه الخير
أولا أنصحك بالقرب من الله والصلاة والدعاء في آخر الليل فمن كان مع الله فالله معه ثانيا إن كان بإمكانك قضاء كم يوم بر البيت مع الطناش له ورفضك العودة إلا بعد مناقشة الموضوع وإنهائه تماما أو أمكثي في بيتك وطنشيه أيضا حتى يناقش الموضوع ويوعدك بعدم العودة لتلك الأمور وإن فشلتي فاحتسبي واصبري وتذكري أن هناك ضيفا في الطريق سيغير كثيرفي حياتك وستنشغلين به |
اختي انصحك انك تمسحين التسجيل
وش بتستفيدين منه ولا تخلين أي أحد ثاني يسمع هالتسجيل مو حلوه في حق عيالك ان ابوهم يسوي هالشي لأن هالشي بيبقى في ذاكرة الي سمعتيهم مين ما كان والله يعينك ويثبتك على الفعل الصحيح الي ينور على زوجك ويهديه ويترك هالأمور والله يسخرلك زوجك ويسخرك له ويقومك بالسلامه ويرزقك بطفل معافى حسن الخلق والخلقه |
سبحان الله
الله مايستر على الخاين طال الزمن ولا قصر (كيف الانسان يجمع بين حسنه ومعصيه بنفس الوقت واذا فيه خوف من الله ليش يسوي جذي؟؟ هالموضوع يحتاج استضافة دكاترة علم نفس_ _ نرجو من ادارة المنتدى تحقيق ذلك_ وشكرا |
اختي انا مارح ازيد على اللي قالوه الاخوان والأخوات
المصارحة والمحافظة على هدؤ اعصابك الى اقصى درجة تستطيعيها وخليك شوية بعيدة كم يوم وربي يوفقك ويساعدك |
الف شكررررررر على اهتمامكم
احتجت اسمع ردودكم وتهمني كثير الان انا عند اختي ويرسل مسجات يقول عطيني فرصه اخيره وانا راح اعطيه فرصه اخيره مو علشانه علشان البيبي وبطمنكم علي قريبا دمتم بود......... |
الحمد لله على كل حال أختي الحبيبه بما أنه ارسلك مسج يرضيك فيه ارضي وأرجعي
وأطمئني مرت علي مثل مشكلتك من شخص قريب لي، امراة زوجها يكلم بنت وهاملها لما اكتشفت وصارحته أنكر المهم بعد ما جابت اول طفله بدأيترك البنت اللي يكلمها وغير رقم تلفونه وان شاء الله اذا ولدتي وشاف انه صار له عائله وطفل بيتغير صدقيني واكثري من الدعاء والاستغفار والله يهديه ويصلح بينكم ويسعدكم |
السلام عليكم
حبيتي لا تتصرفين اي تصرف احمق لين ما تولدين علا وعسى يتغير ريلج من يشوف المولود الله يهديه يارب و الله يعينج |
خاطري اعرف سمعتو عن زوج ما خان زوجته
؟؟؟ هالحاله منتشره والعياذ بالله |
الله يكون بعونك ويصلح احوالكم
نصيحتي لك امسحي التسجيل وافتحي صفحه جديده في حياتك والله يوفقك |
اخي اطياف
انا والحمد لله ملتزمه بديني تزوجت وتغربت كان الكل يقول لي بس تسافري رح يطير الحجاب تفتجأت انه كلما جاءت احد القريبات تسلم عليه يقبلها اتاري العادات انو الواحد يقبل زوجة صاحبو ويصافح صاحبو باليد واحيانا تكون القبله علي الفم حاولت جاهده اقول له لا يجوز حرام انه ليست اختك ما كان يرد بالآخر قلت له اذا قبلت اي وحده انا رح اقبل زوجها استغرب انما كنت جاده بكلامي وخاف ومن وقتها حتى اخوته ايضا وتوقف الجميع عن هذا العادات انما الحق يقال ما شفتو يقبل حد من فمه انما اعطيهم المجال يعملو ابوها في ناس ما تيجي الا بالتحدي الله يصبر صاحبت الموضوع ويجعل لها مخرج يرضيها ما عليكي الا بالاستخاره وخصوصا انك حامل حافظي على صحتك وصحة المولود ما يسوا الزعل عشان البيبي حكمة الله كشفه لكي ربما يكون درسا لن ينساه في حياته ونصيحه انتي اقوى من اللي يكلمها انه حلالك لا تتنازلي عنه انا امنع زوجي يبتسم لأي شخص يبتسم لي اولا ومن ثم يبتسم للناس جميعا انا احارب واطالب بحقي ممنوع يكلم حد اي كلمه جميله لازم اسمعها انا قبل غيري انا مش فقط اعيش معه على الضراء انما على السراء ايضا كل المهار يشكو المرض والوجع واذا احضرت له عصفور يجلس يغني له انا اولى من هذا العصفور انه لي انا ملكي انا حياتي انا مش كل يوم الوحده تغير رجال المهم انو تقدر تغير طبعو للاحسن قصه قديمه جدا تقول ان امرأه ذهبت تشكو زوجها لرجل صالح فقال لها الحل الوحيد انو تجيبي لي ثلاث شعرات من شوارب الاسد قالت: مستحيل قال : ما في حل غيرو والله ذهبت وصارت تتحايل على الاسد وتتودد وسحبت اول شعره ثم الثانيه ثم الثالثه وذهبت مسرعه الى هذا الاعرابي ليعطيها الحل فقال لها : المرأه التي استطاعت ان تروض الاسد وتأخذ برضاه ثلاث شعرات اكيد بحنكتها وذذكائها تستطيع ان تغير طباع زوجها |
لو كانت اول مرة حاولي تقعدي معو وبهدوء كلشي بيصير وما تنسي انك حامل يعني اهتمي بحالك
وكلشي بالتفاهم بيجي طمنينا شو بيصير معك |
نتمنى أن ترجعي لبيتك في أقرب وقت وان شاء الله ترجع المياه الى مجاريها
واعلمي أنك لست الوحيدة من تعاني من خيانة زوجها بل هناك الكثيرات مثلك نسأل الله أن يكفينا جميعا شر الخيانة |
اختي خلي عنك العواطف واللي يقولك سوي له ليلة رومانسية وشموع وخرابيط. مثل المواقف هذي يبغى لها موقف حازم لأن لو عدا هذا الموقف عليه بسهولة صدقيني راح يتمادى اكثر وهذا شي مجرب وخاصة من كثير من الزوجات اللي مروا بخيانات مع ازواجهن . انا لا احرضك على الطلاق لا والف لا ولكن اتخذي موقف قوي وصدقيني هذا وراه شلة هم اللي جروه لخيانة والعلاقات المحرمة. حاولي تعدلين من وضعه الديني وانتشاله من شلل الفساد.
|
عزيزتي
عليك باأستغفار والدعاء والله لن تندمي وأقلها ان تشعري بالراحة النفسية وهناك ادعية كثيرة انصحك بها وقبل البدأبالدعاء عليك بالوضوء وصلي لله صلاة خاشعه وفي السجود _لان العبد اقرب مايكون لله في سجوده ثم ابدأ دعائك باثناء على الله لما هو اهل له واسغفري الله من كل ذنب قد يكون السبب في ماوصلتما اليه وصلي على النبي _صلى الله عليه وسلم_ ثم ابدء مناجاتك مع من لاتختلط عليه الاصوات والغات سبحانه منها اللهم صب حبي في قلب زوجي صبا صبا -وارني ذلك- اللهم دبرني فأني لا أحسن التدبير امن يجيب الضطر اذا دعاه ويكشف السوءويجعلكم خلفاء الارض اله مع الله قليلا ما تذكرون اللهم انا الضطره وانت المجيب يارحمن يارحيم ياحنان يامنان ياجواد ياكريم وكرريها اللهم اجعلني افعل مايرضيه وهو يفعل مايرضيني وغيرها من الادعيه ولاتستعجلي الاجابة كما وصانا بذلك نبي الرحمة صلى الله عليه وسلم واتمنى لك التوفيق والسداد وثقي ان من جعل الله حسبه كفاه |
اشكركم الف شكر
وانا خلاص رجعت بيتي وان شاء الله مايخذلني لان هذي فرصته الاخيره دعواتكم,,, |
اقتباس:
انا كذلك خاطري اسمع شبعت اسمع خيانات بشتى الانواع عصر متعب اتعبتنا قصص الرجال .... |
اقتباس:
الحمد لله ..الله يهديه ويصلحه ويبعد عنه أولاد وبنات الحرام .. والله يجزاك على صبرك الجنة ويقومك بالسلامة ويرزقك بالولد الصالح .. |
اقتباس:
الحمدلله اختي ان سهل الله امرك الله يهدي زوجك ويصلحه ويسعدكم نسخه لعالم المشاكل المحلوله |
| الساعة الآن 02:23 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©