منتدى عالم الأسرة والمجتمع - إنت يا رجال..وإنتي يا حرمه..تعبنا وحنا ننصح فيكم..ادخلوا بسرعه

هذي بعض النقاط والنصايح اللي اتذكرها للتعامل بين الزوجين .. .. واتمنى تفزعون معي باللي تتذكرونه او تحبون تبلغونه للطرفين او احدهما .. وخلونا واقعيين وجادين .. الدعوى نشر غسيل !!

انتا يالزوج !! .. استح على وجهك .. شكلك بسروال وفنيله مهوب لائق ابدا. من زين كراعينك هالشهب وإلا من زين جسمك هالحين يومك تلبس كذا ؟؟ .. البس قميص مغربي محترم ونظيف ,, ولا يكون عقب نوم .. خله على الأقل يستر كرشكّ .. ولو لبست تكميلة رياضه محترمه ,, طلع الفنيله برا البنطلون :mad:

انتي يا حرمة اللي فوق :mad: .. ما يمنع تساعدين رجالك في اختيار قمصان البيت اللي هو يلبسها .. او حتى تشرينها انتي له .. وتهتمين انت تتابعين نظافتها بعد .. مهوب تشتكين من وصاختها وتخلينها معلقه قدامه يلبسها كل مافصخ ثيابه !! .. واحرصي كذلك على تخصيص ملابس يلبسها هو للنوم حتى ما يضايقك بريحة النوم والعرق ...

انتا .. هيه !! ماله داعي تنادي المدام بدون اسم وإلا تسميها بأسماء هي تكرهها .. اما شف لها لقب محترم ويوسع صدرها او على الأقل نادها بكنيتها .. ام فلان مثلا !!.. ونفس الشيء للمره .. :mad:

اذا سويتي له عمل معين من ترتيب او طبخ مثلا ,, اكيد تبينه يمدحك ويمدح شغلك ,, تراه يشوف بس ما تعود يمدح (طبعهم كذا) .. ما يمنع لو تسألينه عن رأيه في هالشيء مثلا وتبينين له الجهد اللي سويتيه .. ولو قال لك " وش الله حادّك؟ " قولي " علشان هالعيون اسوي اي شيء" .. مهوب لازم يقول لك " تسلم لي عيونك " .. بس تخيليه قالها !! :D :D

انت اسمع عاد :mad: .. ترى مهوب عيب ابد تتطيب للمدام .. وياليت بعد تزين ريحة اثمك بعلك فراوله من باطوق :D .. ولا يهمك غندور .. يابس والنكهه تروح بسرعه .. وياليت تكون قوارير الطيب عند مدخل البيت ,, مهوب عند التسريحه .. يتطيب منه اللي طالع !! لأ .. نبي اللي داخل البيت هو اللي يتطيب .. اهل البيت هم اولى بالريحه الزينه .

اهتمي بشكل زوجك قبل يطلع من البيت .. تابعي نظافة ملابسه .. وريحتها .. وتابعي نظافة النعال او الكنادر اللي يلبسها ,, ولا يلبس شراب متشقق :D ,, ترى الناس تذم زوجة الرجل الوصخ ,, مثل ما تذم زوج المرأه المهمله !!

على الغداء .. لا تقعد تناظر في الرز واللحم وتنسى المدام .. عطها نظره .. عطها لحمه .. عطها ابتسامه .. ولا تقعد تماطق بالمضغ :o ,, صكّ اثمك وانتا تمضغ !!

انتي بعد .. اهتمي بريحة الملابس والشعر .. ياناس ترى والله الريحه لها تأثير مهوب صاحي في التقريب والتنفير من الشخص المعفّن !! اتبهوا للروايح :mad:

اسرار البيت .. والمشاكل او الخلافات البسيطه بين الزوجين .... احذروا كل الحذر من خروجها عند الناس ,, مهما كنتوا مختلفين او بينكم شيء ,, لابد من اللإبتسامه قدام الناس وكتم الزعل ,, والا صرتوا بلحالكم فترى عقدة المرأه في دغدغة رجلينها :D وعقدة الرجال في دغدغة باطه :D !! والله يحط حيلكم بينكم !!

عقاب المرأه .. فيه تسلسل تم توضيحه في القرآن والسنه ,, يازوج اتبع الترتيب في العقوبه ولا تاخذ الحل الثاني او الثالث قبل الأول .. :rolleyes:

لا تكثر سب للمدام .. ترى تتعود عليها ومعاد يصير لها تأثير ,, خلك منتظم عمليةالهواش حتى يكون تأثيرها اقوى ويكون فعّال (وقاتل احيانا) :cool:

الصراحه مافيه مثلها ابد .. يعني لو فيه عيوب في احد الطرفين ,, فالمجامله والسكوت بتزيد المشكله وتزيد العيب ,, ولو الزوجه ما صارحت زوجها فمن بيقول له عن هالعيب ؟ ولو انت بعد ما علمتا مرتك باللي ماتحبه فيها ,, فمالك داعي ابد وانت تروح تسبها وتشرشحها عند الناس ... وتشتكي من اهمالها ومصالتها !!

الزوجه دايم مهمله وكسلانه ,,, ... لا تفكر ان حرمتك بتترك هالعادات فيها إلا لو قدرت تخليها تترك القرقره مع امها واخواتها في التلفون !! وهذا طبعا....... مستحيل !! ريّح عمرك

السوالف اللي تدور بين الزوجين ,, خلوها اسرار بينكم ,, وماله داعي الواحد منكم يقعد عند ربعه ويغازل زوجته !! او انتي بعد تقعدين عند اهلك وتعطين السماعه لأخواتك حتى يسمعون الكلام الحلو اللي يقوله لك

الزوجه .. يجب ان تكون صديقه لزوجها .. لكن تاخذ كورس اول في معنى الصداقه ,, وحسن المحاوره والإنصات ... حتى لو تكلم زوجها عن شيء ما يهمها ,, لازم تتفاعل معه وتكون امينة اسراره ..... هذا لو الزوجه فعلا حريصه على تقوية علاقة زوجها بها ... ومافيها عيب ابد لو الزوج بعد يشاور المدام في اي شيء ,, عطها اكثر من فرصه ,, جربها . :cool: . واحكم ..

يجب احترام افكار واهتمامات الطرف الآخر .. على الزوج انه يعطي زوجته فرصه ووقت كافي للتعبير عن اللي في خاطرها .. مهما طالت المده .. انتا نصفها الثاني ,, ولازم تحمل همومها وتتعرف على طريقة تفكيرها .. وتعدل الغلط فيه .

اختاري الوقت المناسب للبس الزين .. وللكلام والغرام ولكل شيء ناويه تسوينه ,, وقدري حالة الزوج في الوقت اللي تطري عليك تكلمينه في موضوع او تورينه شيء جايبته ,, او حتى تاخذين رأيه في فكره معينه !! وافهمي ان الزوج مهوب دايما مهيّا لإستقبال افكارك او كلاك ,,,,

مع وجود الأطفال في البيت .. تنسى المرأه زوجها تماما ,, او هو على الأقل يحس بهالشيء ,, ترى الرجل يحب يكون الطفل المدلل لزوجته ,, تماما مثل ماالزوجه تحب دايما تكون في نظر زوجها طفله .... احرصي على عدم إهمال الزوج من اجل الأطفال ,,, ولا تحرمينه من شيء بسبب الأطفال ,, دبري عمرك..عاد :D !!!

جلسات صامته + نظرات بالعيون ;) + هدوووووء + ابتسامه :D = لحظات رومانسيه يحتاجها الزوجين من فتره إلى اخرى .. اسكتوا شوي وخلوا العيون تفضفض :mad: :mad: ..

قطعة ذهب .. تورته .. ورد
.. قزازة عطر (صغيرة 50 مل) ,,, او حتى لعبة تجيبها لزوجتك ,,,, تسوى الدنيا عندها !! مهوب لازم تكون غاليه حتى تنتظر مناسبه وتجيبها .. لأ .. القيمه الحقيقيه في كونها جت منك انت .. لا تتردد ابد .. ولو ما امداك تروح تشري لها ,, لفّ على اقرب بقاله عند البيت وانتا راجع من الدوام واشتر لها قطعة كاكاو بريالين. :D . (مهوب كل يوم طبعا) عشان لا تروح حلاوتها ;)

وبكذا خلصنا وأخر مرة اكتبلكم نصائح :mad:

انشاء تستفيدوا واسفه مسوية نفسي عنتر زماني :D بس حبيت اغير شوي من الأسلوب :cool: