|
اقتباس:
صحيح أنا كمان كتبتلي حبوب (مش متذكره إسمه) عشان يقلل الدم و كمان يخفف الألم بس ما اشتريته لأني ما احتجته،، ما حسيت إنه الدم صار غزير لأنه طبيعة دورتي كانت كده، و كمان ما حسيت بوجع كثير بس شوي كالعاده يعني،.. فما اهتميت كثير ولا أخذت الحبوب أشكرك |
اقتباس:
يا هلا و مرحبا بأم عمر تكرم عينك ولو كم أم عمر عندنا يعني يا ستي أنا ما أخذت الهرموني لسبب واحد بس،، لأنه نفسيتي ما تستحمل الهرمونات هذه لأني جربت الحبوب و جربت الاصق و كانت نفسيتي صفر و كرهت نفسي و كرهت زوجي و ما استحمل شقاوة العيال والله كنت على أعصابي و متوتره دائماً و فوق كده أستخدمت اللاصق 8 شهور و زدت 10 كيلو ، تخيلي؟ فأول شرط بالنسبه لي كان إنه المانع يكون من غير هرمونات،، و لأني ناوية استخدمه مده طويله (من 3 إلى 5 سنوات إن شاء الله) فما حبيت أجازف فما كان عند غير هذه الخيرات 1- العازل الذكري (رفض قاطع من زوجي) 2- Diaphragm ( ما أعرف إسمه بالعربي) بس هو شي مثل الغطاء مصنوع من المطاط و تحطي شوي كريم على الأطراف و بعدين تحطيه داخل المهبل قبل الجماع بربع ساعه. و بعد الجماع تطلعيه و تغسليه و تقدري تستخدميه كل مره لمدة سنتين، و بعدين لازم تشتري واحد جديد، ما تقبلت الفكره 3- طريقة العد ( لا استطيع المجازفه و خاصة أن دورتي غير منتظمه) 4- طريقة العزل أو عدم الانزال داخل المهبل ( غير آمنه و نسبة الحمل عليه عاليه) 5- اللولب النحاسي لعدم وجود أي هرمونات فيه فبعد الخيارات هذه ما كان عندي غير اللولب النحاسي لأنه يتركب مره وحده و خلاص و يضل لمدة 5 سنوات فتوكلت على الله و سويت بحث في المواقع العربية و الأجنبية و ارتحت له لما قريت عن التجارب و كمان قريت إنه نسبة الحمل عليه أعلى من نسبة الحمل على اللولب الهرموني فتوكلت على الله و ركبته و قلت في نفسي إن حملت عليه فهو من إرادة الله ولا إعتراض على ذلك طبعاً ولكن أهون من لخبطة الهرمونات و تغير النفسية و عدم القدره على التحكم بها فببساطه هذا هو سبب اختياري له،، ولكن انتي أدري بجسمك و إذا يتقبل الهرمونات أو لأ و إذا فعلاً مش متقبله فكرة الحمل أبداً فأنصحك بالهرموني،، على الأقل جربيه 6 شهور أقل شي و بعدين تقدري تغيري للنحاسي اقري الموضوع هذا يمكن تستفيدي منه :) نداء خاص الى من تستخدم اللولب (احكي لنا عن تجربتك) على فكره تابعي معي في أشياء صايره معي حالياً ( يمكن حمل فوق اللولب) ما أدري بس راح أذكره التفاصيل بالنهاية بعد ما أرد على الجميع إن شاء الله |
اقتباس:
أهلين بالغالية بنت الحكمي الحمدلله على سلامة بنتك و الله يحفظها من كل شر إن شاء الله و الحمدلله على سلامتك انتي و كويس انك شلتيه و انك لحقتي عليه قبل ما يسبب لك إلتهاب كامل للرحم و أعتقد إنه اللولب إلي ركبتيه كان اللولب الهرموني، لأنه النحاسي ينظم الدوره أو على الأقل الدورة تنزل كل شهر فلما قلتي انه الدوره أحياناً تتأخر 3 شهور فهذه من أعراض الهرموني، و في ناس الدورة تختفي تماماً أعرف وحده ركبت اللولب الهرموني قبل 4 سنوات و كانت في البداية دورتها متقطعه وغير منتضمه و أحياناً تنزل بس نقط و أحياناً تكون غزيره و في الأخير اختفت تماماً بعد 7 شهور تقريباً . و الدكتوره قالت لها إنه جداً طبيعي حاولي تقنعي زوجك انكم تستخدموا الكوندوم مؤقتاً يعني إلين ترتاحي شوي و بعدين تقرري ايش تستعملي شكراً عزيزتي |
اقتباس:
أهلين ندى صحيح إلي قلتيه، و حلو إنه ناسبك و استمريتي عليه كل الفتره هذه راح ترجعي تركبيه مره ثانيه بعد الولاده ولا كيف؟؟؟ الله يسهل لك الولاده و يرزقك طفل سليم و معافى ما بقى لك كثير ما شاء الله |
اقتباس:
ههههه صحيح ضحكت على نفسي لما كل شي خلص لأني أكبر خوافه مش بالساهل أتجرأ و اسوي أي شي عاد لو شفتيني وقت الولاده كنت موتي ضحك علي الله يحفضلك عيالك و عقبالك اللولب هههه |
اقتباس:
مشكوره على التذكير يا كرستالا و الله يعطي كل محروم نعمة الأطفال و الله يرزق اخواتنا الغاليات عاشقات حلم الأمومه الذريه الصالحه عاجلا غير آجل اللهم آمين بارك الله فيكي عزيزتي |
اقتباس:
مبروك و ان شاء الله ترتاحي عليه :) |
آخر التطورات،، و الله يجعله خير إن شاء الله زي ما قلت أنا ركبت اللولب 1 مارس و الدورة جاتني 27 مارس بالعاده دورتي تتأخر يوم عن الموعد في كل شهر، فأنا كنت متوقعه دورتي تنزل يوم 28 ابريل بس الحين دورتي متأخره 8 أيام،، و سويت تحليل الحمل البولي يوم الاثنين و النتيجة كانت سلبيه للحين مافي أي أثر للدوره و ما عندي أي أعراض للحمل اتصلت على دكتورتي و قالت إنه المفروض كل شهر تنزل بوقت محدد و طلبت مني أسوي تحليل ثاني يوم الأحد الجاي إذا ما نزلت الدوره قبله و إني أروح لها يوم الاثنين عشان تسوي فحص و تشوف ايش المشكله أمارس حياتي بشكل عادي و أسوي رياضه تقريباً 5 أيام بالأسبوع الشي الوحيد إلي لاحضته إني صرت نعسانه بزياده اليومين هذه و أتثاوب كل شوي بس مش حاسه بحساسية الصدر يعني ولا غثيان ولا أي شي فأنا استبعد إني أكون حامل الله أعلم ايش المشكله بس راح ابلغكم بالنتيجه إن شاء الله مع إني ما أقدر استنى إلين يوم الأحد عشان أسوي التحليل مره ثانيه عشان أتطمن بس أحسن لي استنى عشان النتيجة تكون صحيحه ادعوا لي الله يجعله خير :24: |
لاتخافي بأذن الله الدورة بتنزل في البداية تصير شوية لخبطة حتى يتعود الجسم عليه وبعدين تصير الدوره معك تماااام
أنا أن شاء الله ناوية على الأربعين أركبه والله يسهل على الكل ويرزق خواتي عاشقات الأمومة بالذريه الطيبه اللهم اميييين |
الحمدلله.. الحمدلله.. الحمدلله والله ما كنت متخوفه من الحمل أكثر ما كنت متخوفه من اللولب نفسه عملت تحليل دم و طلع سلبي يعني ماني حامل و كل شي سليم الحمدلله بس لسه مافي سبب لتأخر الدورة كل هذه المده ( 12 يوم) و الدكتوره عللت على إنه إضطراب هرمونات مو أكثر و قالت مثل ما دكتور أحمد قالي: إنه التفكير المستمر بالدوره راح يأخر نزولها الحمدلله الحين نفسياً ارتحت و ما راح أفكر كثير و إن شاء الله الهانم تشرف قريب |
| الساعة الآن 07:08 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©