منتدى عالم الأسرة والمجتمع

سرت عند عمي الخميس وحسيته كان متحلفني شكله كان معصب لانه بنته علمته بكل شيء استوا من بينا بس والله كنت هادي وحاولت أجاريه بالكلام وقلت له اللي تحكم فيه أنا راضي أدري أنا غلط بحق بنتك بداية زواجنا ولكني اعتذرت منها وطلبت منها تسامحني وبعدين سالفه ما زادت عن اسبوع وعرفت اني غلطان واللي تحكم فيه لحين انا راضي لو تباني أطلق لحين بطلقها ولكن تراني احبها وأعزها ,,,,
طلب منها تنزل وسألها عندج شيء تبين تقولينه غير الكلام اللي علمتيني فيه قالت لا ..
قال انا سمعت منكم اثنينكم ولحين دوري وبيكون اخر شيء وعقبها كل واحد يتحمل قراره قلت موافق بس هي سكتت ولا ردت ...
بحاول اختصر كلامه قال اثنينكم غلطوا بحق بعض ناوين تبتدون صفحه يديده بحياتكم اوكيه مب ناوين وكل واحد شايل على ثاني ماله داعي تردون لبعض ,,,
قلت يا عم اذا بنرد على نمط حياتنا مثل قبل اذا أنا مب مستفيد شيء ولكن اذا هي ناويه تتغير وتتجاوب وياي بحطها بعيوني ... هي ساااكته,,
قال هذه شروطي واللي بيخالف يتحمل ...
1* نظام الاجنحه ممنوع لكم جناح واحد ترقدون فيه .
2* الاكل تاكلون ويا بعض حتى لواحد فيكم مب مشتهي.
3* لازم لكم ساعه باليوم تيلسون ويا بعض وتقرون القران .
4* زيارة أعمامج يا لجين واجبه بأي وقت يطلب فيه خالد .
5* لجين تكمل دراستها الجامعيه ( أنا رافض هذا الشرط بس ما اعترضت جدامه ).
6 * سهر برع البيت ممنوع ,, والسفر كل شهر بروحك ممنوع .
المهم انا وافقت على شروطه ولكن هي ما ردت يوم قال خلاص خذها واطلع
توها تذكرت تتكلم ويلست تقول بس هو مب من حقه يمنعني من زيارتك ومب من حقه يجبرني اتغشا ,,, هو عصب عليها وقالها من ساعه أسالج وأنتي ساكته يوم قلت خلاص خذها تذكرتي ,,,
قالها اسمعي زيارتي ما أبيج تزوريني أنا بيج كل أسبوع بيتج وعلى حسب ظروفي يعني ما أبيج تطلبين هاي شيء منه ,,, سالفة تغطية الوجه تراها من حقه ومب من حقي أحاسبه أو أناقشه فيها من يوم ما وافقت يملج عليج يعني هو المسئول عنج ..
طلعنا من عنده وطول درب وهي ساكته وأنا ساكت بعد ..
وصلنا البيت وما أشوف وحده اللي وسايره صوب جناحها ,, سالتها شو بلاج ليش ,, قالت تعبانه وأبا أريح شوي ,, قلت لها هذا المكان انسيه واذا تعبانه سيري جناحي اللي بترقدين فيه ,,,
غيرت رايها ويلست بصاله ,, وانا والله هادي ,, كنت حاس فيها تبا تستفزني ,, طلبت منهم يحطون العشاء ,, تخيل يلسنا حدود نص ساعه تقريباً وما طلبت من البشكاره تحطلها شيء ,, قمت بنفسي وحطيتلها صحن وقلت شو رايج أكلج بايدي ,, الله لا يواريك خذت صحن وحذف على الارض وقالت ما يخصك وبدات تصيح ,, قلت لها خلاص برايج حبيبتي لا تاكلين بس بظلين يالسه هني لغاية ما خلص ,, ويلست أكل بهدؤ ,, فجاه سمعت وحده وهي تصيح وتقول أنا اسفه ,, ما رديت عليها ,, وطلبت بنفسها من البشكاره تحطلها اكل ويلست ماسكه الملعقه وتحرك بالاكل من غير ما تاكل ,, وانا ساكت ,, خصلت وقمت وقلت لها تراني ساير الحجره اذا خلصتي تعالي ,, من غير ما أكلمها أو أنا قشها ,, طلعت الحجره وخلتني حدود ساعه وعقبها يات ,, وقفت عند باب الحجره ودموع أربع أربع ومن عند الباب وهي تهدد والله ما بخليك تلمسني ولا تي صوبي ولا برقد وياك على نفس سرير ,,, كنت قمة البرود ( مع من داخلي والله بموت قهر منها ) قلت ولا يهمج سرير بكبره لج ولا بي صوبج ,, ورحت أخذت المخده ولحاف وانسدحت على الكنب ,, هذيج ساعه دخلت ,, ولا رقدت الا عقب ما صلينا الفجر ,, كانت يالسه على سرير بس بشو تفكر طول هالوقت مادري ,, وأنا مرتمي على كنبه وساكت ومراقب ,, حسيتها أدور أي عذر عشان تطلع ساعه تقول بغير ملابسي ,, وساعه تقول أحس مب قادره أتنفس خليني أطلع من الحجره ,, وأنا والله ساكت وبس أشر بأيدي وقول ممنووووع ..
اليوم صبح كانت هاديه وتريقنا وهي ساكته وحتى الغدا بعد مر بهدؤ ..

بس مستغرب منها طول اليوم وهي صالة برسم ساعه ادخل عندها احصلها ترسم وساعه يالسه ودموع واضحه ,, ساعة القران طلبت منها ننزل بالحديقه عشان نقرا وافقت وكانت هاديه حتى يوم سالتها عن أشياء خاصة باهلي كانت ترد بهدؤ ومبتسمه بس ما مداها مجرد ما مسكت يدها الا وقلبت وحده ثانيه وركض صوب صالة رسم وقفلت الباب ولعاد طلعت منها ,, قلت خليها لغاية وقت العشاء ورقاد غصبن عنها بتطلع .