من الغلطان أنا والا زوجي ؟؟ ياريت تشاركوني محتاجه لرأيكم
 

المشكله صارت امس


وطبعا ماعندي بعد الله غيركم أشكي لكم وأخذ برايكم وأشوف هل تصرفاتي صحيحه او غلط




أمس رحنا للسوق طبعا كان هناك ترتيب مسبق من قبل أسبوع وهو قال انا بتفرغ لك يوم الجمعه


وانا روحتي للسوق ضروريه لأن خلاص حامل وبطني كبير ما عاد تكفيني ملابسي لا بجامات ولا ملابس عاديه


المهم رحنا ,, (( نقطه أبي أوضحها انا وزوجي متفقين انه كلما أستلم الراتب يعطيني الف ريال لي خاصه فيني


ويقولي اصريفيها او احرقيها او جمعيها لك براحتك هي لك خاصه فيك انتي وداخله من ضمنهافاتورة جوالي ))


دخلنا السوق على بركه الله ,, ورحنا ودخلت محل الملابس وأخذت بلوزة, قام قال لي:


وجع قيمتها 160 ريال !! أنا ألتزمت الصمت ,,


مسكت بنطلون جينز قال لي: ووووووجع ب250 ريال !!!


وأخذت تنورة واخذت والخ....... وطلع الحساب 620 ريال ,,,


حاسبت وطلعت من المحل قلت له فيه محل حق اطفال نفسي اروح أشوفه قال : ok نروح نشوفه وانا وياه نمشي


يطالع بالحريم هذي سمينه بزياده وهذي نحيفه بزياده

وهذي عيونها واسعه وهذي عيونها صغيره

هذي فيها طول يروع كنها رجال

وهذي عبياتها حلوة وغريبه

وهذي ريحه عطرها قوووويه

وهذي حاطه بعيونها كحل ازرق

وهذي رومشها طويله

وهذي احس تناسبها هالبلوزة,,,,,,,,,,,,!!!!!


كل هذا وأنا ساكته ماقلت حرف واحد مع انها ماهي عادته يتكلم بكلام زي كذا او انه يطالع بالحريم بالطريقه هذي


بعدها طلعنا وطبعا حامل ومشت شي طبيعي بتحس انها شحنانه من كثر المشي


يوم ركبت السياره قال لي : وش فيك تلهين كأنك (( كلب))!!!


قمت أنا هنا خلاص أنفجرت قلت حرام عليك انا أمشي وتعبانه من المشي تروح تشبهني بالكلابه والله انك بالكلمه مالك حق تقولها


وقام قال انا أمزح !! قلت وش هالمزح السخيف زياده على حركاتك البايخه بالسوق تجي تشبهني بكلب

وتقول أمزح!!


قال انا اتفرج على أشكال الحريم ما تزوجت عليهم حتى تزعلين ,, قلت وغير الحريم جالس تحاسبني


في مصروفي مو انت تقول براحتك اشتري اللي تبين فيهم وش غيرك ما كنت كذا,, قال انا ماتغيرت بس انتي طريقتك


شينه والتعامل معك صعب..


قمت أنا التزمت الصمت وسكت وهو سكت والى الآن ما كلمنا بعض ,,,


من الغلطان انا والا هو وبكل صراحه واذا انا الغلطانه كيف أراضيه هالزعلان؟؟

صراحه إنتى ما غلطتى وهو طريقته كانت تنرفز

اذا ما قدم لك إعتذار وانا مستبعد هذا الشىء منه

فأنا من رايي كزوج إنك تتصرفين معاه بشكل عادى كأن ماصار شى بينكم لأن أكثر الأزواج حتى وإن كان هو الغلطان ما يعتذر او يعترف بغلطه الا من رحم الله وراح تشوفين ردة فعله معاكى عاديه

وهذى الطريقه أفضل من إنك تنتظرين منه إعتذار وكافى انك بينتى له انه كان سخيف فى حركاته بالسوق

لا تعتذرين له ياقلبي ولا شئ

هو الغلطان

بس زين منك انك وضحتي له انك زعلانه وسكتي

السكوت نعمه.

وهو بيستحي على وجهه وما اعتقد انه بيعيدها مره ثانية

تحياتي

همسه ولاء يمزح معي يقولي كأنك كلب الله لايعيده من مزحه ان كان الرجال يمزح مع زوجته بهالطريقه مابي مزحه


اختي انا ما انتظر منه اعتذار الآن عارفه ماراح يعتذر

بس انا عارفه زوجي عنيد ويركب راسه سواء غلطان او ماهو غلطان راح يسفهني


كم يوم هذي طريقته .. وش بيقول بالنهايه انتي السبب انتي ما تتفاهمين مع زوجك


الزوج المفروض مهما قال لزوجته ومهما سبها وشتمها تسكت وتقول ان شاء الله


ويسرد لي حديث الرسول صلى الله عليه وسلم اللي فيما معناه ( لو أمرت الزوجه ان تسجد لسجدت لي زوجها )

كانه فاهم الحديث او مستوعبه ,, وأبصم بالعشره انه مو فاهم كل كلمه بالحديث ,,

مشكور اخوي سيف الكلمه

على مرورك ومشاركتك

لا تزعلي الله يصلح ما بينكم ويتمملك بالخير

والله صراحه يا اختي من قرائتي للي كتبتيه ما شفت انك غلطان بشيء على العكس هو الي ظل يطالع الحريم ويعلق وانت ساكته مه انك حامل واعرف انو الحامل تكون عصبيه وانت استحملتي وبعدين شبهك .....
لا انت مو غلطانه ولا تعتذري منو وخلك طبيعيه وعاديه معاه

بالنسبة لتعليقاته عن أسعار الملابس فهي شي عادي يمكن يكون مصدوم بالأسعار وماهي من عادته يروح للأسواق

ومادامه ما منعك من أخذ ما تريدين فهو ما غلط بشي .


أما تعليقه الثاني فهو الغلطان لكن يبدو لي أنه من النوع المتبلد وما يميز بين الكلام اللي ينقال أو اللي ما ينقال

إذا كان هذا طبعه فالله يعينك عليه وأصبري ولا تردي عليه .

ويسرد لي حديث الرسول صلى الله عليه وسلم اللي فيما معناه ( لو أمرت الزوجه ان تسجد لسجدت لي زوجها )

كانه فاهم الحديث او مستوعبه ,, وأبصم بالعشره انه مو فاهم كل كلمه بالحديث ,,[/quote]


ياالله على هالرياييل ما خذو من الرسول عليه الصلاة والسلام الا هالحديث وان الشرع حلل اربع ونسو حديثه صلى الله عليه وسلم (رفقا بالقوارير)...(استوصوا بالنساء خيرا )


اختي انتي مو غلطانه ولا شي عشان تعتذرين منه هو اللي راكبه الغلط من ساسه لراسه ..الصراحه انه ما استحمل اروح السوق مع زوجي ولا افكر اني اروح معاه وروحاتي دايما تكون مع بنت خالتي او خواتي او حماتي اما معاه مستحيل اني اروح