فضفضة متاخرة بالزواج
 

السلام عليكم ورحمة الله و بركاته

بداية اعذروني مش عارفه كيف أبدا معكم موضوعي
الموضوع مجرد فضفضة لاني ادري انكم بشر مثلي مافي بيدكم شي.
موضوعي هو تاخر زواجي عمري بالثلاثينات اكبر خواتي تزوجوا أربعة الصغار ما باقي إلا أنا والحمدلله على كل حال.
حزينة ماهو علشان الزواج ولا حب في الزواج ولا راح الزواج يزيدني في حاجة، حزني نظرة اهلي والناس وصديقاتي المجتمع كله احس انهم يقولون مسكينة ماهو ناقصة شي وما تزوجت😢
صبرت ويعلم الله وحده كيف امثل القوة ؛خايفة من اليوم الي يجي فيه وأضعف انا قوية بالله والحمدلله.
على كثر الكلام الي اسمعه ما يحرك شعرة فيني مدري لَيش
انا نفسي مستغربة لَيش ماني زي البنّات الي تقول ادعوا لي تكفون وتجلس نفسية وحزينة والناس الي حولها يحسون فيها.
عادي اطلع ومااترك مناسبة ما احضرها وعايشة حياتي بالطول والعرض " اتوقع لو تزوجت ما اخذ فرصتي بالطلعات والسفريات والوناسه زي وضعي الحالي.
فضفضة اليوم الوالدة قلت لها وحدة من المعلمات الي معي في المدرسة اليلة خطوبتها وقبل كم يوم وحدة بعد ماشاءالله الله يوفقهن " المهم قلت فلانة خطبتها اليلة قالت مدري وشلون البنّات يمشون سوقهن بالزواج ؛ قلت الله يوفقها هي دايم تقول ودها تزوج قالت وليه مايصير عندك هدف مثل البنّات يبغون الزواج ويتزوجون !
ماقدرت ارد على الوالدة كتمتها بقلبي واخذت السالفة بضحك قلت اصلا ماني شايفة واحد بالديرة كلها يستاهلني.

بالله عليكم الي عندها او عنده اخت او بنت او قريبة ما تزوجت لا تجرحونهم لا تصيرون انتم و الزمن عليهم.
حنا البنّات ايش بيدينا نطلع لشارع نقول تعالوا تزوجون يا عالم. !!!
انتي يالام او الاب بيدكم تقدرون تزوجون بناتكم امدح بنتك عند رجل يخاف الله الام أمدحي بنتك الاخوان الأخوات دبروا خواتكم
كفاية انانية كل واحد عايش حياته ماهو حاس بأخته.
اشوف ناس على قدهم من الناحية المالية ومن جميع النواحي الجمال وغيره ماشاءالله ربي موفقهم وتزوجوا ؛ تدرون لَيش وراهم اهل يسعون لهم ؛ نعرف انه رزق بس حتى الرزق هذا يبغى له سعي ..

العنوسة كثرت عندنا بالمجتمع لابد من حل وكل مشكلة ولها حل.
زماننا زمن فتن نسال الله السلامة ويحفظنا بحفظه ويغنينا بحلاله عن حرامه.

سبحانك اللهم وبحمدك اشهد ان لا اله الا انت سبحانك أستغفرك واتوب اليك.

رد: فضفضة متاخرة بالزواج
 

مرحباً أختي

كلامك جميل ومعبر وفيه رسالة وصلت إن شاء الله

ربي يبارك في حياتك ويرزقك قوة الإيمان وإنشراح الصدر والحياة السعيدة والزوح الصالح

رد: فضفضة متاخرة بالزواج
 

عليك بالصبر الجميل وراح يجي نصيبك بإذن الله ،، وراح تكتبي لنا مشاكلك بعد الزواج وحنا ندور لها حلول )؛

رد: فضفضة متاخرة بالزواج
 

رد: فضفضة متاخرة بالزواج
 

حبيبتي أسأل الله أن يغنيك بحلاله عن حرامه وبفضله عمن سواه

لك مني أسعى لك بدعوة خالصة من قلب صادق في ظهر الغيب في ثلث الليل الأخير

اللهم ارزقها الزوج الصالح التقي النقي وأرضها به وأرضه بها وأَسْبَغ عليهم من السعادة والرضا ما يليق بكرمك وجودك ورحمتك

رد: فضفضة متاخرة بالزواج
 

صدقيني هم الخسرانين
حاولي ان تبحثي انتِ بنفسك عن زوج صالح. يستحقك
عن طريق الخطابات أو موقع زواج ثقة كموقع العفاف
والله يوفقك أختي

رد: فضفضة متاخرة بالزواج
 

أسأل الله العظيم رب العرش العظيم ان يرزقك ويرزق بنات المسلمين بالزواج الصالحين يارب العالمين

رد: فضفضة متاخرة بالزواج
 

الحمدلله هذا الي ابغاه توصل الرسالة.
اللهم امين جزاك الله خير

رد: فضفضة متاخرة بالزواج
 

الحمدلله هذا حنا صابرين.
لا ان شاءالله وش مشاكله يكفينا الي شفنا بالحياة الله يعوضنا خير.

رد: فضفضة متاخرة بالزواج
 

الحمدلله نسأل الله يرزقنا الصبر.
جزاك الله خير على الدعوة ولك بالمثل.