زوجتي تريد الطلاق وانا موافق هل ما افعله صحيح ؟ ( حُلت و الحمدلله )
 

السلام عليكم ورحمة الله ,أولا احب ان اشيد بهذا المنتدى الجميل والأعضاء المميزون ,في الحقيقة مشكلتة زواجي معقدة ومتشابكة بداية الزواج كانت عن طريق الوالدة شافت بنت من الأقارب البعيدين واعجبت في جمالها وأخلاقها وشفت البنت شرعيا بعد خطبتها وجازت لي وتمم الله بخير(زواج تقليدي) وفي البداية كان بيننا تفاهم كبير تحول لحب من الطرفين وكانت طالبة ووقفت معها وساندتها حتى تخرجت وانا موظف بمركز مرموق بجهة حكومية هامة ودخلي ممتاز المهم رزقنا ببنوتة بعد سنة من الزواج وسمحت لها تولد عند أهلها (في مدينة تبعد عننا حوالي 1000كم ) وما قدرت اكون بجنبها يوم ولادتها لظروف العمل مع العلم انها هي اللي طلبت تولد عند اهلها وحاولت اقنعها تبقى عندي وتجي امها او امي لكن رفضت بعد فترة شهرين رجعت لي وهي متغيرة وكانت زعلانة لاني ما جيت يوم ولادتها مع اني سافرت لها طيران بعد الولادة ب5 ايام واهلي قامو بالواجب ثم راضيتها وجبت لها كل اللي بخاطرها ودلعتها وجبت لها شغالة ومجوهرات وعينك ما تشوف الا النور مرت الأيام بسلام وعدت سنتين حلوة بدون مشاكل لكن جت الطامة الكبرى في احدى الاجازات اللي قضيناها عند أهلي وصار خلاف بين زوجتي وبين اخواتي وصل للسب والتجريح وهم ما كانو يحبون بعض من الأول وانا كنت غير موجود بالبيت المهم جيت وقالت لي ودني بيت اهلي قلت لها الموضوع ما يستاهل انا والوالد نصلح الأمور بينكم وخلنا خواتي يعتذرون لها المهم استمرت على رأيها ووديتها عند أهلها وبقيت فترة 3 أسابيع ما تكلمني وانابعد طنشت ثم جيت لم ابوها ووضحت له الموضوع وراضانا ببعضنا ومشت سنة تمام لكن اسمرت من وقت للثاني تعكنن مزاجي بسبب المواضيع اللي راحت وسالفتها مع أخواتي ما راحت من بالها وتحملني مسئولية جرأتهم عليها رغم انهم اعتذروا والموضوع تقفل له سنة لكن تبعاته ما انتهت وكل فترة لازم نقاش عن هذي المواضيع الين طفشت وهددتها بالطلاق ان جابت ذ السيرة لكن استمرت تعاندني ووصلت بيننا لعدم الاحترام وسبتني وسبيتها ولعنتها هي وأهلها ووديتها بيت ابوها وصار بيننا نقاش حاد وغسلت شراعه هو بعد لأني وصلت حدي وهي الأن لها شهر والله مو رادني اطلقها الا حبي لها والبنية اللي بيننا وطلب الوالد اني ما استعجل بالطلاق وش الحل مع العلم انها تتعاج نفسيا لها شهرين بمعرفتي حسب طلبها والوالد كلم ابوها وطلب حل الموضوع لكن ابوها طلب فرصة لتهدئة الأمور وطلب تركها عنهم فترة عاد مدري اطلقها ولا ما العمل ؟

عفواً تم تعديل العنوان ليتضح المضمون
الإشراف

يا اخي المسألة ما تستدعي الطلاق ابدا ..

هذه الصدامات النسائية بين زوجة الاخ واخواته تحدث كثيرا ولست الوحيد التي تعاني منها ..

حاول ان تتفاهم مع زوجتك بروية وحثها على ضرورة احترام اخواتك لأنهن اصبحن عمات اولادك او على الاقل تجنب الاحتكاك الصدامي بينهن وبينها ..

مشكور يا سيد الرجال انت صادق الدعوة ما تستاهل الطلاق لكن والله تعبت من نقاشها الين مليت وما دري وش تبي مرة تقول يكررون الاعتذار وهذا مستحيل ومرة تقول ماب اشوفهم ولا ااقابلهم وهذا بعد مستحيل مع ملاحظة ان تعاملها مع والدي ووالدتي طيبة وهم يعاملونها افضل معاملة وكرماء جدا معهم والشئ اللي قاهرني اها هي اللي طلبت الطلاق ووحدة تطلب الطلاق تنقلع مهما حبيتها لكن الله يرشدني للصواب مع ان طلبها واضح انه للضغط على اهلي لأني واثق من حبها لي

شكرا جزيلا ابو مريم والله يستجيب لدعاك والله انا ادعي الله وانا انسان مستقيم مالي باللف والدوران والوضع اللي انا فيه محير هل انتظر فترة ام اذهب لوالدها واتفاهم معه ام اتزوج ثانية وانا مقتدر على ذلك والله محتار

انت زوجه واحده وغير قادر على ضبطها والتعامل معها بتعقل شديد وتفكر تاخذ الثانية بعد ؟!

اصلح العلاقة بينك وبينها بهدوء وذكاء واحتويها بحلمك وراعي مشاعرها وطبيعة أنوثـتها حتى لو كانت غلطانه واعتبرها مثل بنتك التي تحتاج للتوجيه والارشاد وراعي ظروفها النفسية ..

والزواج الثاني بدري عليه

يا رجل طيب جدا الله يعطيك العافية ويجزاك خير انا ما جبت سالفة الزواج الثاني من فراغ انا الآن لي شهر عزوبي قابلة للزيادة والأمور ما انحلت والوحدة ذبحتني انا لوحدي بالبيت مع الشيطان تجيني أفكار عمري ما فكرت فيها مع اني مشغول بالعمل والدراسات العليا والزملاء لكن في الأخير انا بشر واحتاج امرأة بجواري تحتويني وأحتويها انا تعبت من المشاكل والجدال العقيم مع حبي الشديد لزوجتي الا انها زودتها هي وامها في صفها يعني الزواج الثاني بالنسبة لي مرحلة تسبق الطلاق ولا أخفيك ان رغبتي الأولى هي عودة زوجتي وطفلتي لكن اذا لم يرد الله فلابد من تصرف يحميني من الوقوع في زلل