|
زوجي يبغى يجيب بنته من طليقته عندي فمارأيكم ؟ (حُلت و الحمد لله )
السلام عليكم ورحمة الله وبركاته إخواني الكرام يامن أشغلتكم بمشاكلي وهمومي ولكن والله ليس لي في هذه الدنيا بعد الله إخوان غيركم فأنتم أهل الحكمه وأهل المشوره وفيكم الخير وعندما أشاروكم وأخذ برأيكم أرتاح ورب البيت الحكايه ومافيها إن زوجي طلب من أهل طليقته بنته ..كلكم عرفتم سالفة طلاق زوجي لزوجته الثانيه وإن عندهم بنت صغيره رضيعه البنت عمرها سنه و8 شهور.. وزوجي مصمم غيريجيب بنته عندي لكي أربيها بيقول إنتي إن شاء الله تربيها أفضل وتعوضيها عن حنان أمها هومايبغاها عند أمها على حسب كلامه إنهم ناس ماراح يطمن على بنته عندهم عندهم ألفاظ وحشه وعادات غريبه ....وغيرأن أمها قويه وكلامها وحش هو ضغط على أهل طليقته عشان البنت وهم بالقوه وافقوا وأم البنت أتنازلت عنها سألني إيش رايك ياروعه هل أجيب البنت ؟أنا قلت له اللى يريحك أعمله وأنا راح أستخيرالله عزوجل في مجئ البنت عندي واستخرت الله أنا بصراحه متردده لمجيئها عندي .رحمة وشفقة بأمها حرام راح تفقدها وأنا أم وأعرف قلب الأم ثاني شئ خايفه من المشاكل اللى راح تترتب على مجيئها ولوفكرزوجي إنه يجيبها عندي ماراح أرفض حرام إيش ذنب المسكينه الضايعه وسطهم أنا قلت له هي المفروض تكون بحضانة أمها وإنت ملزم بالنفقه عليها وتسقط حضانة الأم وتنتقل لأبوهاإما بعد بلوغ البنت سبع سنين أو تتزوج الأم لكني وجدته مصروبقوه على مجيئها عندنا هي البنت راح تنفطم والأب مصر تتربى عندي بين أخوانها فمارأيكم إخواني أحبابي في الله |
صراحه موقفك صعب وانتي مشفقه على حال امها وهي تنازلت عنها بهذه السهوله والمفروض انها في حضانتها غريبه
ما دام ان زوجك مصر وامها موافقه توكلي على الله واكسبي فيها الأجر وكمان اجر طاعة زوجك وربنا يكتب لك اللي فيه الخير ان شاء الله |
هو اكيد افضل انها تتربى عندكم
لكن التعب عليك انتي بما انها اقل من سنتين اكيد راح يكون تعب لكن كل شي باجره والله يوفقك |
حاولي مع زوجك يردها لامها
والله ياروعه انها مسؤلية الواجد عياله وبيضربهم فما بالك بابنات الناس والله التربية مو سهلة ابدا وبكرة البنت تتسلط عليك انا كمان نفس حكايتك بس بقنعة انها تكون عند امها مهما كان مافي زي حضن الام وطمنينا عليكي |
هذه أولـــى مشاركاتي و أحببت أن تكون رداً على الموضوع هذا : رأي زوجك بتربية بنته في بيتكِ حق من حقوقه فهي أولاً و أخيراً تحمل أسمه ,, وأعلمي أن أجرك مضاعف عند رب العباد أولا / طاعه لزوجك , ثانياً / في هذه الطفله وأختلف مع من سبقني من ردود بأن هناك تعب عليك , لا تضخمي الأمور وتجهزين الدواء قبل الجرح !! أجعلي من تربيتك العدل والتساوي بين هذه الطفله وبين أبناءك فجميعهم أخوه , أحسني من تعاملك وعدلك فلا تعلمي يمكن تكون هذه الطفله هي السند و أحن عليكٍ من أبناءك ,, روعه هنيئاً لكِ بالأجر من رب العباد , وكسب رضاء زوجك ربنا الموفق |
السلام عليكم
قرات قصتك رايي انك تكسبين فيها الاجر يمكن تعوضينها عن حنان امها وتيصير تربيتك افضل من امها مدامها البنت صغيره تقدرين تكسبينها بلمعامله الطيبه واذا احترت اختي روعه استخيري وربي يوفقك ان شاء الله |
والله انا لو منك ما اتردد اربيها حرام امها فرطت فيهابالساهل وبكدة تزدادى حبا عند زوجك ويحترمك اكتر ويقدرك لانو طلاما طلب منك تربية ابنتة واثق فيكى مليون بالمية بانك ام حنونة بالله عليكى لا تخذلى زوجك وربى ابنتة وتكتسبى الاجر عند الله انها تتربى وسط اخوتها وفى حضن ابوها وبام مثل حنونة صدقينى ما هتندمى حرام البنت تربيها انسانة تقول كلمات بذيئة الا البنات لازم يتربوا بجو ملىء بالطهارة والنظافة بالله عليكى للمرة المليون لا تترددى ووافقى على طول
|
اختي الغاليه روعه
باي حق زوجك ياخذ بنته بصراحه وبدون زعل ومع احترامي هو شكله بينتقم كل الناس الي فاهمه وتخاف الله يتركون بناتهم عند امهم لين سن البلوغ او سبع سنوت وعلى ما افتكر امها مطلقه مرتين يعني مو بالسهوله بتتزوج بس شكله ضغط عليها ورفض يعطي مصروف لبنته علشان ياخذها برائي انك تقولي حرام الي تسويه البنت راح تكبر وتكرههك لانك حرمتها من امها وان اصر والام تنازلت فا احسني الله لان الله يحب المحسنين واحنا كلنا عارفين انك بتكوني قد المسؤليه الي راح يفرضها زوجك عليك وماراح تقصري معاها ولاتحرميها من حنانك لاكن والله حرام الي جالسين يسوه هالرجال ليش الانسان مايطبق شرع الله في كل اموره سبحانك يارب رحمتك يا ارحم الراحمين |
ام السوسه بارك الله فيك انتي رائعه دائما اختي روعه لن اضيف علي كلام ام السوسه كلامها صح 100/100حاولي ثاني مع زوجك ان يترك البنت عند امها
والله يعمل اللي فيه الخير |
اقتباس:
كلامك سليم اختي ام السوسه .. بعض الازواج يشبعون نزواتهم واللي يتورط الامهات و الاولاد .. وربي يعينك اختي روعه .. |
وعليكم السلام ورحمة الله وبركاته
حي الله الرائعة روعة طمنيني كيف الأحوال بعد الطلاق وكيف زوجك ومعاملته معاك؟؟ سبحان الله الأن فقط صاريشوف طليقته قوية والفاظها وحشة؟؟!!! أعتقد الأن عرفتي سبب جفاء زوجك عليك بالسابق لإن بعض الرجال إذا شعر أنه غلط في تصرفه وأقصد غلطه في إختيار الزوجة الثانية فإنه يكابر ومايعترف بالغلط بالعكس يسيء لمن أمامه ليحاول يظهر نفسه قوي ويبرر فعلته المهم نعود لموضوعنا : برأيي أعتقد أن البنت صغيرة جدااااااااا وتتربى في حضن أمها أفضل حتى تبلغ على الأقل 4 سنوات مع ضرورة إحضارها عندكم كل أسبوع لمدة يوم أو يومين حتى تتعود عليكم وإذا بلغت الرابعة سيكون وقت التربية وتعليمها الأخلاق عندها يمكنه أخذها ولكن أستغرب كيف أجبر الأم على التنازل عن بنتها؟؟...هل بالضغط عليها بتهديدها بحرمانها من النفقة؟؟ أم هي تريد التنازل عنها؟؟؟؟ |
لاحول ولاقوة الا بالله
كيف يقوى قلبك انتي وزوجك تاخذون طفله من امها واله اني اصابني حزن شديد على حالة الام كيف ستفارق طفلتها الصغيره كيف تنام في الليل وطفلتها ليست بجانبها كيف تستيقظ ولا تجد احد بجانبها كيف تخرج للتنزه ولاتسمع ضحكات ابنتها اللهم ارحم حالها واهد قلب ابيها تخيلت ان الطفله ابنتي وانها ستؤخذ بعيدا عني واصابني جنووون نصيحه لاتقبلي بها ابدا حتى لايعاقبك الله وتفارقي احد اطفالك |
الله يكون في عون هالابناء على مايفعلونه الاباء والامهات فيهم
رحمتك وسعت كل شيء شوفي يابنت الحلال زوجك اقنعيه بالطيب يخلي البنت عند امها لحد السن القانوني على الاقل لان الطفلة تحتاج لاشباع عاطفتها عند امها ... والله الطفل اللي بدون امه يجيء مكسور الحال حتى لو كان اللي يربونه منبع من الحنان والطيب ... |
هلاوغلافيكم أخواني وأخواتي جميعاً
هلافيكِ أم جمانه يانورعيني وقلبي ماتشوفي شريارب الحمدلله بالنسبه لمعامله زوجي بعد طلاق زوجته صارأحسن بكثيرعن أول ..فين كنا وفين صرنا والحمدلله ربي أعطاني على قدنيتي ياأخوان زوجي ماأجبرأحد ...وأنا بأحاول معاه إن يخلي البنت عند أمها لأنها صغيره وخايفه تتأثربفقدان أمها حرام بس أم البنت دائم ترسل لزوجي رسايل كلها سب وشتم وتحسبن عليه وتدعي عليه بالموت وبالمصائب والبلاوي وغيرألفاظها الوسخه ..وهي السبب اللى خلته يطلقها ويكون بعلمكم من تاني يوم لطلاقها أتصلت فيني وسبتني وقالت لي يالله أفرحي زوجك رجع لك مو هودا اللى كنتي تبغيه رديت عليها بأصلي والله ماأتشمت فيها ولاقلت لها كلمه تجرحها قلت لها الله العالم بمافي القلوب و أنا مافرحت بل حزنت على اللى حصل عشان بينكم بنت ..وكمان قلت لها يافلانه لوصدرمني شئ عليكي سامحيني والله شاهد علي والله يسامحنا كلنا وأنا ماأبغى منك شئ وزادت في كلامها وصارت تسب زوجي وتسب اليوم اللى اتزوجت فيه منه وتفلت على وجهي .... بالله هل هادا شئ يرضي ربنا ..هل هادا شئ يرضيكم عشان كدا زوجي معند معاهم وطبعاً طليقة زوجي موجوده بمدينه غيرمدينتنا قبل فتره زوجي راح يطلب يشوف البنت رفضت الأم تخليه يشوفها طيب مين السبب في العناد ؟ هي الله يهديها وشاكره لكل من مر وأدلى بدلوه تقبلوا ودي |
والله حرام اختي ياخذ البنت من امها
متخيلة شو يعني سنة و8 شهور يعني رضيعة وما شافت اشي من الدنيا كيف يحرمها من امها والله انا لازم ما ارد على مواضيع فيها اطفال لانو بتصير حالتي حالة بشفق عليهم كتير خليها حضن امها احن عليها ولما تكبر رح تحس حالها غريبة بينكم وشو ما حاولتي مستحيل تعامليها متل ولادك والله حرام اللي بيعملو الرجال باولادهم |
أفهموني ياإخوان
زوجي مايبغى يجبها هنا إلآلأنه عارف تربية أمها وإنه عندها ألفاظ أنا بنفسي سمعتها وشفت ايش تكتب لزوجي هوطلقها وحرمت عليه والى الأن تسبه وتشتمه ومافي رجال يتحمل الكلام اللى بتكتبه ؟؟ صاريقفل جواله ويجي يلاقي لها رسايل وإتصالات من أرقام غريبه ...يعني بصراحه إنسانه غريبه وللمعلوميه أم البنت عايشه عند أبوها وزوجة أبوها ماتبغاها بسبب اخلاقها ..وأمها متزوجه رجال ثاني وزوج أمها مايبغاها ولايبغى بنتها ..الله لايبلانا عيله مفككه يعني زوجي موهاين عليه بنته تتمرمط كل مكان وتتبهدل وأنا في حيره من نفسي وماني عارفه كيف أفكر..ولوقلت لزوجي كلام كدا ولآكدا يحسب إني ماأبغى بنته لكن أنا أستخرت الله عزوجل وتاركه الأمرله وحده تبارك وتعالى والله المستعان |
اذا كان الامر كذلك اختي
والام ما عندها مشكلة خذيها ولك الاجر لانو بصراحة شو بتتخيلي عيلة مفككة بهالشكل يكون تربايتها الله يعينك وان شالله تكون بنت الك |
السلام عليكم اختي روعه .. ماشاء الله تبارك الله .. انا ما اعرف قصتك من البدايه .. بس فهمت ان زوجك تزوج وحده ثانيه وانتي راضيه .. وزوجته تكلمك .. هذا اللي فهمت ..
بس نرجع للموضوع الاصلي .. انا من رايي ان البنت لازم عند امها .. بشروط .. وانا ارى ان الشروط منتفيه عند ام البنت .. يعني بيئة الام لاتصلح لتربية بنت صغيره .. واهل الام غير راضين عن وجود البنت .. وحياتهم مشتته وغير مستقره .. ما لك الا تاخذين البنت ... واحتسبي الاجر .. ولا تفرقين في المعامله بينها وبين عيالك .. اكيد ما اقصد انك بتعاملينها معامله سيئه .. ولكن المقصد ..... لاتعاملينها معامله خاصه .. يعني دلع بزياده .. ولا احد يضربها خليهم عادي مع بعض .. واذا عاقبتي عيالك وهي غلطانه معهم عاقبي الكل .. يعني لاتحسسينها انها مختلفه في اي شي ... لا من نا حية الدلع .. ولا من ناحية القسوه .. اتمنى تكوني فهمتي المعلومه اللي ابي اوصلها .. والله يجزاك كل الخير ويعطيك على قد نيتك |
انا رااي انه حرام البنت ياليت تكسبي فيها اجر وتربينها زي اخوانها مسكينه ضايعه بالوسط ولا تشيلين هم امها هي اللي تنازلت عنها
ربي يعينك على تربيتها وماتتوصين عليها ان شاء الله |
اقتباس:
وعليكم السلام نورعيوني دانه حبيبتي مافي وحده ترضى بزواج زوجها مهما كان أوصار بس أنا أنجبرت على الرضا عشان قلت دا شرع ربنا والله حلل للرجال التعدد وأنا لست ضد التعدد بس بشرط العدل وكمان عشان خاطرأربي أولادي وماأبغى أشتتهم وزوجي الله يسامحه لما حط فكرة الزواج برأسه وراني الويل وعذبني عذاب وبهدلني وهددني بالطلاق حتى بعد الزواج عمل فيني أعمال صعب الوحده تصبرعليها لكن الحمدلله الذي ربط على قلبي وجلست عشان أولادي وأتمسكت بالصلاه والدعاء والإستغفاروكنت أطلب من الله إن يربط على قلبي كماربط قلب ام موسى وأن يرزقني الصبروالسلوان وماتركت الإستغفارولاالدعاء ولاقيام الليل ولاأزكي نفسي الله يزكي من يشاء والحمدلله هادي هي النتيجه أساء الإختيار في الزوجه الثانيه وأنجنب بنت وطلق زوجته والله همي الوحيد هادي البنت دي اللى راح تتبهدل وسطهم الله يعين الجميع |
حبيبتى روعة
أولا فرحت جدا بأن ربنا كلل صبرك خير أنا متابعة مشكلتك منذ فتره والحمد لله على كل حال حبيبتى تكلمى مع زوجك بعقلانية قولى له أنا أم وما أرضاش ان واحده تأخذ عيالى منى لكن لو هى موافقه وراضيه تعطيكم البنت ومستغنية عنها يبقى مافيهاش كلام خديها وربيها واحسنى اليها أنا متأكده انك روعه كإسمك وسوف تتخذين القرار الصائب طمنينا عنك دائما |
يااااااااااااااااااااااااااعمري عليها
هالبنت وش ذنبها الله يرحم حالها شوفي يا قلبي اذا زوجك صادق أخلاق اهل أمها مو زينة وأمها تنازلت عنها بهالسهولة فخذيها وربيها واحتسبـــــــــــــــــــــــــــي الأجر و تكفيييييييييييين أكيد انك حرمة عاقلة ومنصفة لكن تكفييييين لا تفرقي بينها وبين عيالك عامليها زي عيالك بالضبط والله اسمع القصص اللي يدمى لها القلب من زوجات الأباء اللي ما يخافوا الله انا واثقة فيك بس ما في مانع اني اذكرك والذكرى تنفع المؤمنين لي عودة ان شاء الله |
إخواني الكرام أبشركم إن زوجي غيررأيه في إنو يجيب البنت عندي
جلست معاه وأتكلمت بعقل ومنطق وأحسه إنه أقتنع ؟ والله ماخلاه يعاند إلابسبب رسايل طليقته الله يهديها ترسله وتشتمو دا غيرإنها تتصل عليه ويطنشها ..غيرتقوله الله يشيلك الله يكافيك حسبي الله عليك يا..................... وبسبب طولة لسانها وإنها ماهي متربيه تربيه كويسه دا غيرإنها مشعتره بين أبوها وأمها وهومايبغى بنته تتبهدل جلست معاه وكلمته وقلت له قال تعالى (( لاتضاروالدة بولدها )) وقلت له البنت لساعها صغيره لازم تكون بحضن امها ومالها ذنب لاتقطع عنها المصروف لأن الله راح يسألك عنها ..ماعليك في أمها من قهرها ترسلك وتسبك وقلت له ماكنت أحسن من الحبيب محمد صلى الله عليه وسلم سبوه وشتمه وقذفوه بالحجاره وقذفوا زوجته الطاهره الشريفه وسبوا بناته ومع ذلك هو سيد ولد آدم وهوخاتم المرسلين وهو المصطفى ماأثرفيه السب والشتم فإيش نحن عنده فالحمدلله حسيت إنو أقتنع يارب والله أنا مشفقه على الأم وعلى البنت كمان مهما كان أنا أم وأعرف قلب الأم وكمان أقنعته إن يغيررقم جواله عشان يرتاح من رسايلها الوحشه والحمدلله طلع رقم جديد اليوم ... بارك الله في كل من أدلى بدلوه وكنتم سبب إقناعي لزوجي الله يجزاكم الدرجات العلى في الجنه يارب دمتم بخير |
الله يبشرك بالخير اختي روعه .. وربي يعطيك على قد نيتك .. ولا يحرمك من اولادك و يفرحك فيها يا رب .. |
السلام
عموما ..الشور بيد زوجك و مطلقته و بتفاهم بينهما .. المهم .. أنه إذا صارت البنت عندك عامليها بأحسن معاملها و أحسني و ارفقي بها كأنك أمها موفقة تحياتي ام فاطمة |
بشرتينا ياروعة
عقبال زوجي يقتنع يااااااااارب ادعولي يخلي بنتة عند امها\\ وادا عند افكار اعطبني |
حاولي ان يترك بنتو عن امها احسن لها حضن الام ما يتعوض
لاكن لو امها هي الي ما تبيها اكسبي فيها اجر وربيها |
مافيها شي لما تربيها وتحسني تربيتها والله ليكي الاجر في كل خير هيا تعملو وصدقيني عامليها بما يرضي اللله وانتي حتحبيها ماالدنيا الا فانيه وماباقي الا وجه الكريم والواحد يبغى شي للأخره ولا تتأففي ولا تدري يمكن الخير يطلع فيها عن اولادك والله ماتدري
هادي الاجابه الصحيحه |
الحمد الله .. والخيره فيما اختاره الله .. الله يوفقك ويسخر لك زوجك ... وزين ما سويتوا .. الله يهدي امها
|
والله الله يعنيكم.. وانتي رائعة.. وربي يحبب فيك زوجك..
ويخليه لك.. وان شاء الله هذي تكون تجربة له.. وتكون فاتحة خير عليك... بالنسبة للبنت زين القرار اللي وصلتوا له.. واهم شئ اتقوا دعوة المظلوم.. وربي يحنن قلب امها.. وامها مريضة.. وربي يعينكم.. |
خلاص ياإخوان البنت راح تبقى مع أمها بإذن الله
والله مومدح في نفسي كل يوم أزن على راس زوجي إن يخلي البنت عندها وبلاش عناد هوكان مصمم على العناد بسبب أمها الله يهديها واللى عرفته منه إن أمها غيرت رأيتها وماراح تفرط في البنت وتبغى تربيها والحمدلله وافق يرسل لها مصروف لأنه البنت مسكينه ومالها ذنب الله يجزى كل من رد ويسترعليه دنيا وأخره يارب |
اخيتي بقولج قصه بنت عمي .. هي مطلقه وعندها بنتين .. بس تعاملها مع بناتها بكل شراسه وما اتحبهم وتتمنى اليوم اللي ابوهم ياخذهم منها .. الله يهديهاا .. تضربهم وقاسيه عليهم .. يمكن زوجج شاف ان طليقته من هالنوع وشافج انتي افضل عنها فتعاملج مع الاطفال وانج حنونه عليهم فحب انها تتربى عندكم .. والله العالم
بس انا مستغربه كيف رضوا يعطونه البنيه .. يعني مهما كان الام ما ترضى تتنازل عن عيالها وناس تلجا للمحاكم .. والله غريبه الله يوفقج اختي ويسهل امورج يارب |
يالله الحمدلله على كل حال
|
اقتباس:
الحمد لله الذي بنعمه تتم الصالحات الله يسعدك اختي روعة ويجعلك قرة عين له و يجعله قرة عين لك ... تم حل المشكلة ونسخة لعالم المشاكل المحلولة إغلاق |
| الساعة الآن 01:50 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©