اخواني واخواتي احتاج مواساتكم.
 

اخواني واخواتي من جد انا احتاج مواساتكم في مصيبتي
انا ما اتكلم عن مشاكلي لأي احد ولكن في المنتدى حسيت فعلا انو في اكتاف كتير ممكن ابكي عليها
الحكايه اللي حأحكيلكم هي حصلت من اكتر من سنتين ولكن طبعا ما زالت مأثره في كتيييييييييييييييييييييييير وراح تفهمو ليش لو انكم قرأتوها
بعد فتره مو طويله من زواجي عرفت اني حامل وفرحت مره كتير وزوجي كان يبا يطير من الفرح وكنت احافظ على نفسي مره كتير فترة الحمل ما آخد ادويه و اتابع مع دكتوره واعمل كل شي تطلبو مني
إلا
حاجه
وحده




الاكل
يمكن اللي حملت قبل كدا تفهمني
مره كنت اكره الاكل ومااقدر اكل غير سلطه و فواكه بس (و مو اي شي كمان)
المهم
وانا في الشهر السادس الدكتوره قالتلي انو البيبيراسه اكبر شوي من الطبيعي وهادا شي ما يطمن
طبعا قلقنا مره كتير
بعدين قالتلنا انو الولاده لازم تكون اول الشهر التاسع وقيصري وانو البيبي لازم يشوفو دكتور مخ واعصاب اول ما يتولد ويمكن يعملولو عمليه وفهمتنا ليش و اقتنعنا وعشان نطمن اكتر رحنا لبرفسور مره معروف فجده وقلنا نفس الكلام
استخرنا انا وزوجي وامي وكل العيله واتوكلنا على الله
ولدت زي ما قالت الدكتوره قيصري الاسبوع 36 من الحمل
وبعد ما كشفو على البيبي قالو انو تحتاج (جات بنت ) عمليه بس دحين كمان كم شهر وبصراحه المستشفى كانت تكاليفها مره كتير علينا فنقلنا ( ) مستشفى حكومي بعد 4 ايام من ولادتها و ماما كانت معاها على طول( لاني قيصري)
المصيبه الاكبر انهم اكتشفو انو عندها ثقبين في القلب ( تخلو انها قعدت في المستشفى الخاصه 4 ايام في العنايه الفائقه وما اكتشفو دا الشي) وقالو انهم ما حيقدرو يعملو عملية الدماغ لانو قلبها ما يتحمل
وبعد فتره شافها بروف في جراحة مخ الاطفال و قال الحمد لله ما تحتاج عمليه لانو اللي عندها مو (استسقاء) زي ما كانو يحسبو اللي عندها ضمور في جزء معين من المخ وها دا ممكن يعمل إعاقه
قلنا الحمد لله ما تحتاج عمليه بس بقينا و عدنا في القلب
دكتور القلب جزاه الله خير كان مره متعاطف معانا وكان دايما يشرحلنا ايش المشكله وايش احنا ممكن نسوي
بس مع الوقت حالتها مره اتدهورت كانت تتنوم في العنايه المركزه كل شهرين تقريبا وكانت دايما بأوكسجين حالها كان يقطع القلب
ولما سار عمرها 10 شهور دخلت المستشفى وماتت في ها بعد شهر

الحمد لله على كل حال


الله يخليلكم اولادكم ويحفظهم لكم
بس ممكن تتخيلو كيف كانت حياتنا بعدها
و المشكله اللي الى الان مضايقاني انو اهلي واهل زوجي بيلوموني على كل شي (عشان ما كنت اكل مزبوط)
مع العلم اني كنت ساكنه في (رابغ) وهي منطقه مره ملوثه يعني ممكن هادا كمان يكون السبب
صح ولا لأ؟؟

آآآآآآآآآآآآآسفعه لاني طولت عليكم بس حابه اعرف رايكم انا السبب؟؟




على فكره ابا اطمنكم اني جبت بنت تانيه زي القمر (الله يحفظها و يخليها لنا )و
وماشاء الله تبارك الله سليمه
ودحين عمرها 8 شهور

ياختي هذاقدر الله اكلتي بحملك ولاماكلتي انااختي ماكانت تكل الاخبز بس مع كذاجابت بنت زي القمر وعمرها دحين سنه ونص والحمدالله رزقي الله ببنوته ملت الدنياعليكي اماالاولى فكتب اجلها انها ستموت من كان عمرهافي بطنك اربعين يوم

السلام عليكم ياأختاه.... اولا احمدي الله واشكريه على هذه النعمه الي من الله بها عليكي وهي بنتك الثانيه عسالله ربي يخليها لكم وتكبر تحت ظلكم ان شاء الله وتشوفيها عروس
ثانيا ..حبيبتي ايضا احمدي الله واشكريه على ان الله اخذ امانته وهي بهالحاله بوقت بدري لان لو عاشت صدقيني عمرها قصير ورح تتعذب كل ما تكبر وهالشي صار مع ولد عمي توفى وعمره 7 سنين تعب كثير وكان راسه كبير وسوله حوالي خمس عمليات وما نجحت وعانت معه امه كثييييييييييير نفسيتها تعبت لما توفى لانها عاشت معه سنين ...
ولي سارله ماكان بسبب تغذيتها ولا في عامل وراثي من القرابه لاكن امر الله ....لا تلومي نفسك ولي صار مكتوب
وبعدين الطفل اذا مات يكون طير بالجنه .. طبعا يدخل الجنه بغير حساب بإذن الله كما انه يروي والديه بآنيه من فضه
ولا يدخل الجنه إلى بهما
اسأل الله ان يطمئن قلبك ويهدي سرك اللهم آمين

لله ما اخذ ولله ما اعطى وكل شي عنده بمقدار


ان شاء الله تكون بنتك شفيعه لك يوم القيامه
لان الطفل الصغير اذا مات يكون شفيع لاهله

والخيره فيما اختاره الله

ممكن لو كانت عايشه كانت تعذبت في حياتها عمليات ومستشفيات

الله يصبرك ويقوي قلبك

ويخلي لم القموره اللي عندك

الحمد لله الذي عوضك ببنوتة بصحة وعافية..
عزيزتي..
لله ما أخذ ولله ما أعطى..
وهذه رحمة من الله سبحانه وتعالى أن توفاها وهي صغيرة..
فلم تتعذب في دنياها وتشقى وتتعب بمرضها..

الله عوضك عليك اختي

الحمد لله انها ماكبرت اكثر وتعلقتي فيها اكثر

كان صارت حالتك اسوء

وهذا اختبار لك اختي


وان شاء الله معاك في الجنه يااارب

طيب الحمدالله الله عوضك ببنت على قولك زي القمر وين المشكله........... اذا الناس يلومونك قوليلهم هذا قضاء

وقدر مايخصه على فكره في كثير امهات حوامل يهتمون بالاكل رغم هذا يطلع الولد معاق او فيه مشكله بالاعصاب

او اي شي يعني كله مقدر من الله......

الله يعوضك خير يااختي وانا والله حاسة باحساسك لاني صار معايا مثل ماصار معاك بالزبط بنت مريضة بثقبين بالقلب واستسقاء وضمور في المخ بسبب المويات اللي ضاغطة على الدماغ وضمور شديد في العضلات وصعوبات في التنفس وكانت تعاني من البلغم على طول وتوفت وعمرها ثمانية اشهر ولا اظن انا السبب الحمد لله هاذا قدر ومكتوب والله اذا احب عبد ابتلاه ياا ختي هوني على نفسك وقولي الحمد لله .
وانا ولله الحمد عندي بنت ثانيه زي القمر عمرها 7شهور حملت فيها بعد وفاة اختها بشهر واحد .

الحمدلله ربي رزقك بغيرها

وهي أن شاء الله شفيعه لكم يوم القيامه

وباذن الله تكون سبب لدخولكم الجنه انتي وابوها


اما عن الأكل أنا اعرف وحده ما كانت تاكل خير شر لا فواكه ولا خضار ولا اي شي عايشه طول فتره حملها على المويه

ما تاكل غير بسكوت او كورن فليكس حتى الفيتامينات ما كانت تاكلها لا حمض فوليك ولا حديد ولا كالسيوم ولا غيره


وجابت بنتين توأم مثل القمر


ماهو شرط لأن الطفل ياخذ كل شي من جسم امه والمخزن بداخلها من معادن وفيتامينات وبروتين

ما اتوقع انه السبب الاكل يمكن اخذتي علاج في اول حملك سبب هالأشياء