|
أهلي ضيقو صدري ومليت
مساء الخير
انا رجل عمري 23 وياكثر ما يعانون اللي في هالعمر من إهانات وفراغ وفقر واستحقار :( من كان عمري 12 سنه وانا اسوق واخدم اهلي وامي وابوي هم اللي ربوني على كذا اشتر هذا وبع هذا وجب لنا هذا ورح باختك وجب اختك وراجع في هذا وودنا للمستشفى لاتروح اليوم المدرسه ودنا للمكان الفلاني لين صار عمري 15 وصارت تكثر علي المسؤوليات اكثر واكثر والله كأني متزوج 4 حريم ولما صار عمري 18 شرا لي ابوي سياره من ارخص السيارات وصارو يلزموني اسافر بأهلي يزورون قريباتهم واجلس معاهم يومين وثلاثه واسبوع وانا لحالي انا مو بمغلوب على امري او شي لا بس انا متربي على اني اي شي يقوله امي او ابوي خلاص امر ولازم تنفيذه واهلي عودوني على العزله وانه مالك الا بيتكم واهلك وبس ما يصير يكون عندك اصدقاء ولايجونك ولا تروح لمهم يعني على بالهم انهم يربوني على المراجل اي مراجل اللي يربوني عليها هذي عندي اخ متزوج من يوم كنت صغير وماله شغ في البيت طبعاً عنده مسؤولياته وعياله وتزوجوا ثنتين من اخواتي وتوظفو وصرت اكرههم لانهم كل ما جو في بيتنا صارو يطولون لسانهم علي ويأمروني على اساس ان امي تقول كذا وترا اذا ما سويت كذا بعلم عليك ابوي وانا والله ما اخاف منهم ولا من ابوي لكن ارحم امي واحاول ارضيها قسم بالله اني كرهت اخواتي وودي انهم ما يجون لبيتنا ابد الا العصر ويروحون وبس لانهم اذا جو يخربون على اخواتي اللي ما تزوجو ويخلونهم يرفعون اصواتهم علي وانا شخصيتي قويه عليهم وافرض عليهم احترامي بس اسكت عشان ما اسبب مشاكل لان امي دائماً مع اخواتي ضدي وابوي بعد الله يهديه حياناً يجن جنونه علي بدون اسباب والمشكله انه ما احد فكر فيني محتاج فلوس ولا مريض ولا ماكل تبن واختي المتزوجه وحده منهم دلوعه وتتدلع علينا وكل ما جت عندنا قومتني في الليل ودني المستشفى واذا رحت معها نجلس ساعتين وثلاث تحليل ومن ممرض لدكتوره وفي النهايه مافيها شي سليمه واسكت واقول يمكنها موسوه ولاشي وانا ادري انها مافيها شي بس مادري ليه تسوي كذا وانا انسان عاطل لا وظيفه ولا شي واهلي اكثرهم موظفين والله مااتذكر انهم مدو لي مية ريال الا امي وابوي الله يخليهم لي صح انهم بخيلين علي على اساس انهم ما يبوني اخرب وادخن ومدري وشو والله اني تعبت اعوذ بالله ما ارتاح ابد واكتشفت انه فيني ضغط وشعر ابيض في راسي المشكله اني انسان حساس واي شي يجي امي او يضيق صدرها على طول يضيق صدري واحياناً اصيح ويضيق خلقي وابوي مربيني تربية شياب انت رجال وانت وانت مايصلح تلبس بدله والصلاة ياويلك لو ما تصلي بس هذا الشي استفدت منه الحمدلله كبرت على حرصي على الصلاة واذا جا احد لابوي لو ما اجي اقهويهم واعشيهم يزعل اسبوع ويهزئني ولو اجلس برا البيت الين الساعه 1 يدق علي ويهاوشني ولو ماتجي تراني غضبان عليك وهو معودني من يوم اني صغير انه الاب ياويلك لو تعانده او تراده او تطلب منه شي ما يلبيه لا خلاص لا بدون نقاش وامي لا اشوى منه في الخمس سنوات الاخيره بس ولا اول كانت عصبيه وتطقني وحتى عند الأكل تهزئني كنها تقولي لا تاكل بس الله يهديها وعفا الله عن ما سلف اخوي الكبيركان قاسي علي بس الحين بعد ما كبرت ما يقدر يتكلم لاني صرت اطول منه واعرض منه وشخصيتي قويه عليه مايقدر يقولي شي بس برضه انا ما اقلل من قدره بالعكس استشيره وادري انه اعلم مني واحترمه قدام عياله وزوجته وابين لهم ان قدره كبير عندنا وايضا انا تربيت على اني اغار على اخواتي وامي بشكل كبير وما اخليهم ينزلون لحالهم ولا يتكلمون مع الرجاجيل ولايلبسون عبايه الا على الراس بالرغم من انهم يرفعون صوتهم علي بس من هالنواحي غصب عنهم يسمعون كلامي لانهم يعرفون ابوي ويعرفوني اغار وملتزم واذا زعلوا من شي قالو لي يالمطوع بس افتخر بهالكلمه بالعكس وفي الوقت الاخير صرتت انزلهم في الاسواق لحالهم لاني ما اقدر انزل معهم ما احب اطالع بعض الحريم باشكالهم المقززه اللي عباياتهم كأنها ثوب عرس المشكله ما يهدا لي بال اجلس اهوجس عسا ما تحرش فيهم احد عسا ماتعبت امي من المشي مع اخواتي عسا وعسا المشكله قلبي حي ما اقدر اموته عن التفكير والخوف عيد الاضحى وما ادراك ما عيد الاضحى انا وابوي نجلس في البيت لانهم يجون له رجاجيل وابوي معروف في الجماعه ويرجعون له في الانساب ومدري وشو احياناً اهلي ما يجلسن يسافرون لقريباتهم يتعيدون عندهم واخوي طبعاً ما يجلس يسافر في العيد م يبقى الا انا وابوي وعندنا ضحيتين وانا اللي اذبح وانا اللي اسلخ وانا اللي اقطع وابوي بس يجي يسمي على الذبيحه ولا عاد اشوفه وما الومه لانه ابو وعنده ولد لازم يعتمد على الله ثم علي ويرتاح هو واذا قلت له بجيب عامل يساعدني يقول وشو ما بقي الا ذي وانت وش تسوي هنا خلك رجال وثنتين موب ضارات معك عاد ليلة العيد تجهيز في المجلس والصباح بعد الضحايا اخلص الساعه 9 يبدون الناس يجون يمتلي المجلس وانا شاب على البريق مليان مويه قهوه وشاهي قهوه وشاهي وشياب ما يشبون من القهوه الله يطول بعمرهم ويجونا ناس تجار ولازم نبيض الوجه ولا ماني برجال ومن هالكلام الخلاصه من الكلام هذا كله انا وش اسوي تعبت على حساب صحتي وماعشت مثل الشباب اللي في عمري فرق بيني وبينهم الارض عن السما لدرجة اني اذا جلست معهم احس انهم اصغر مني واني سخيف اجلس معهم هذا اللي تعودت عليه انا مابي منكم الا تدعون لي واشوف وش رايكم وش تقولون وش تنصحوني وآسف طولت عليكم |
أنا مثلك تقريبا لكن أنا أكبر أخواني والمشكلة في امي الله يحفظها تخااااااف كثييييير وتعاملني كطفل وتبغاني اقعد في البيت وما اخرج الا مع اقربائي واذا خرجت نص ساعة وتدق علي حتى الصلاة اذا رحت اصلي تقول وين كنت يعني عندها عقدة ومادرت ان هذا الشي يدمرني ويؤثر علي والوالد الله يثيبه ماهو شايل هم التربية مخليها على امي رغم ان تعاملة زين يعني تربيته انك تاخذه قدوة ما يوجهك ويلا يعلمك واهم شي عنده بعد الدين طبعا والاخلاق الدرااااااسة وهذا سبب لي ((((((( العزلة ))))))) يالله خييييير ان شاء الله
|
هلاوغلا بأخوي
الله يعينك ياارب ماشاء الله عليك مستغربه للحين في شباب مثلك خبري الوآحد ماهمه الا نفسه وانت ماشاء الله شايل كل مسؤوليآت البيت فوق راسك , وبهالعمر الله لايضرك بس اخواتك مالهم اي حق يرفعون عليك اصواتهم وقفهم عند حدهم وتكلم معهم بس مو قدام امك واذا قالوا لك ودنا وجبنا ارفض اذا هم متزوجات يروحون لرجاجيلهم الله لا يهينهم انت مو مكلف فيهم وأبوك لازم تسمع كلامه وهو واظح انه شاد الظهر فيك الله يخليك له ولا تخذله ولب كل طلباته وعلى طاري الطلعه قل لأامك وأبوك انك مو صغير وانت تعرف مصلحتك بس مو تفلها عاد وتجلس برآ البيت 24 ساعه والله يعينك ويشرح صدرك ويسعدك يااارب <3 |
بسيطة ان شاءالله
يا أخي الكريم بداية لآ تشيل في قلبك حاجه وكل ماحسيت بكبت في داخل مشاعرك فضفض وبوح لنا ونحنا اكيد بنسمعك ونساندك ان شاءالله .,~ :: خصص يومين أو يوم في الاسبوع يكون راحه واستكنان ليك . :: مثلاً روح مكان تحب تروحو وترتاح فيه واجلس جلسه لحالك وفكر في تخطيطك لمستقبلك . واسترجع لحظات حياتك الحلوة . :: ولآ تسكت عن حقك يا أخي الكريم وخلي كلمتك مسموووعه بحوار رائع وان شاءلله بيسمعوك ويتفهموك . الله يوفقك ويسعدك : ) |
الله يعينك ويرزقك
كثير اللي مثلك وانا منهم بس انا اخف منك شوي لاني عصبي شوي وانت واضح انك ماشاء الله وسيع البال |
أكثر من الإستغفار فهو علاج لكل مشكله :
من ثمار الإستغفار : 1- إنشراح الصدر والراحة النفسيه . فيه الطمائنيه والراحة النفسيه لأنه من ذكر الله قال تعالى (الا بِذِكْرِ اللَّهِ تَطْمَئِنُّ الْقُلُوبُ ) . 2- أنه حل لك مشكلة ولكل هم . قال رسول الله صلى الله عليه وسلم ( من لزم الإستغفار جعل الله له من كل هم فرجا ً ومن كل ضيق مخرجا ً ورزقه من حيث لا يحتسب ) . 3- الرزق ( المال والولد ) . قال تعالى : (فَقُلْتُ اسْتَغْفِرُوا رَبَّكُمْ إِنَّهُ كَانَغَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا) . |
الله يهدي ذا الأهل يعني ماعندهم حل
وسط ..ياأنهم فارطين السبحه للولد ومخلينه على كيفه بلا حسيب ورقيب.. ولا خانقين حريته مثل حالتك... _/شوف أول شي ياخوي جد ببحث عمل ادري عندنا ايجاد وظيفه صعبه ,,,والبطاله شائعه,,بس ابحث وأتعب بالبحث لأن الوظيفه بتغنيك عن غيرك وبتخلي لك شخصيتك وكيانك.. وبعد بتنشغل عن البيت والقعده فيه,,وكذلك بيكون فيه وسط أجتماعي لك وتكوين علاقاات وبتعد عن العزله.. _/ثانيا:أهنيييييك على بر واااااالديك وصبرك عليهم ورحمتك لأمك والله أنت ناااااااادر ماشاء الله عليك..وراح تشوف نتائج برك فيهم من التوفيق وتيسير الأمر بأذن الله _/بخصوص خواتك ياخوي لاتكون لين فتعصر ولاقاسي فتكسر,,أنا مابي أقويك عليهم لالالا ابد,,بس لازم تكون لك شخصيتك وخطوطك الحمرا الي ماحد يتخطاااااها... _/والطلعه أنا معك أنا ضدهم بحالة العزله الي مخلينك فيها أنت شاب ولازم تعيش عمرك,,,بس ياخوي والله من خوفهم عليك والله أغلب شباااااابنا ضااااايعين برى .. أهلهم معطينهم الضوء الأخضر بالروحه والجيه والنتيجه الأشياء الي نشوفها الحين بشباب وأنت أدرى.. لكن اطلع مع أصحابك وعيش عمرك,,بس قبل لاتطلع قول لمك وبوك خبرهم وقلهم برجع بذا الوقت عشان ماينقلقون عليك... الله ييسر أمرك,,ويصلح حالك.. |
بصراحه انا مافهمت مشكلتك ساعه تقول انك قوي الشخصيه وساعه تقول انك ضعيف وماتحب تزعل امك لأن خواتك يرفعون صوتهم بوجهك
مشاء الله من ناحية تربيتك واهتمام ابوك فيك هالشي يرفع الراس ياليت كل الشباب مثلك انا بتكلم بالنسبة لخواتك اي وحده ترفع صوتها عليك وقفها عند حدها بالنهاية انت رجل ومو اي شخص باليت يرفع صوته على الثاني اتجنب خواتك المتزوجات قد ماتقدر لأنك تقول هن السبب اللي يخلوون الللي اصغر يرفعون اصواتهم ومايحترمونك انت اقصر الشر المكان اللي هن فيه لاتجلس فيه انا ما اقول قاطعهن لكن خلهن يحسسنك بغلاك عندهن اممم من ناحية ضروفك المادية اذا على قولتك اهلك شوي حريصين بالفلوس ليش ماتتوضف وتصرف على نفسك وتبني مستقبلك والله ييسر لك امورك |
ماشاء الله عليك وانا اقرا موضوعك
رحت كم مره ادور عمرك احسك بالاربعين رجل واثق من نفسك قوي بالحق وانسان صالح بهالعمر .. مااملك لك الا وصيه وحده بالدعاء تحل كل العقد واتحدى تلح على ربي بالدعاء ولايستجيب لك اذا انا انسانه ماعرفك احترمتك وحبيت اخلاقك كيف ربي اللي يعلم سرك وجهرك ومطلع على امرك اكيد انك غالي عند ربي يكفي بس برك بوالديك.. |
السلام عليكم
بسم الله وما شاء الله ولا قوة الا بلاله على امثالك الله يحفظك اخي من كل سوء والله انك نموذج رائع لبر الوالدين ولكن اخطأت في حق نفسك بالسكوت عن حقوقك مع انه ممكن بالتدرج تذكر لاهلك تغيرات ومع مرور الوقت بيتقبلوها انا ما بقولك اتركك منهم وشوف نفسك معاذ الله لكن ولنفسك عليك حقا شوي شوي وخليهم يشعروا انك انسان بحاجة لتغيير جو وانه يكونلك صديق صادق امين بالاول حتلاقي منهم منع لهذا التغيير لكن مع الوقت راح يدركوا انهم هضموا بعض حقوقك وربنا يسهل امورك ويوفقك |
| الساعة الآن 06:40 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©