|
مشاكلي مع السياقه
السلام عليكم ... شلونكم ؟
امبارك عليكم باجي الشهر .. وعساكم من عواده يارب امممم احترت وين احط موضوعي .. !! آنه من شهر 3 ماخذه الليسن ( رخصة القياده ) وامشي السيارة عادي ، وفيه ناس يقولون عني جريئة لأن من أول يوم خذيت الليسن صرت أمشي من المحرق لي البديع يعني مسافة نص ساعه او ثلث ساعه << وهَـ المسافة ب النسبة للبحرين بعيده نسبياً لأن المحرق ببداية البحرين والبديع بنهايته تقريباً بس أعاني من مشكلة جداً جداً عويصه ! وهَـ الشي امسبب لي مشكلة - كان من المفترض إن أبوي مشتريلي سيارة قبل ارمضان بس مع الأسف الله ما كتب بس الحمدلله فَ من المفترض إن امشي سيارة الوالد اللي اهيه " دوج 2007 " واحسها وايد اكبيرررررررررره ! وآنه ماني اطويله !! فَ ما اشوف زين حدود السيارة من جدام عشان امشيها والكل يقول لي عادي ومادري شنو مشيها وقدري المسافة ! حاولت من يومين إن امشيها .. توني طلعت من البارك بالغصب وأبوي معاي .. بس ما امداني طلعتها من البارك قلت له ما ابي امشيهاا اخاف واهوه قام يصارخ علي وقال لي .. عندج مده محدده على ما تتهيأين نفسياً بعدها تمشينها غصباً عنج لأن يخاف اتعطل عشان إن الجامعه ماعندي أحد يوصلني !! انزين شلون اتعود اسوقها وآآنه ما اشوف ! واهوه الله يهداه مو مقتنع يقول لي قدري المسافة وآنه ما اقدر اقدررر المسافة ما اعرف بتاتاً أخاف ادعم واروح فيها .... اتهقون عادي ومع الأيام باتعود ؟؟ وبقدر مع الايام اقدر المسافة ؟؟ مادري شاقول لكم .... بس رفيجاتي يقولون لي لا تمشينها لأنج ماتشوفين جوانبها عدل وأبوي رايح ويايي يقول لي لا مشييها !! وشلون اقدر اقدر المسافة ؟؟؟ هذا شي أما الشي الثاني .. - من ظليت اسوق وآنه اذا اركب السيارة مع أي أحد احط يدي على قلبي حتى لو عسى السايق شوماااخر إن شاء الله بس بعد أخاف !! وأظل طول الطريج على اعصابي ؟؟ هذا شي طبيعي ولا حالة نادرة ؟؟ - الشي الثالث ... آنه عندي مبلغ معين في حدود الـ 2000 دينار يعني ب حدود الـ 20000 ريال ف! افكر ادفعه مبلغ مقدم حق أي سيارة !! عشان أمشي أموري فيها عطوني سيارة اقدر ادفع لها هذا المقدم البسيط وابي الاقساط بعدين تكون أقساط بسيطة بحيث إن ما تأثر على مصروف شهري كله !! يعني رشحولي سيارات معينه بس ابي موديلها يكون من 2000 وطالع :d < طرار ويتشرط وبس .... يعطيكم العافية |
حياك الله..!!
خذي لك كورلا -صني -ديهاتسو - يارس كل هذولا اسعارها معقوله وبعضها بيكون قسطه اقل..!! اذا كانت الاسعار مثلنا..!! احترامي |
يحيك ويبجيك وبيت الله يوديك :)
امممم شاقولك ... اليارس الكل يقول لي السيفتي مالها مش ولا بد والديهاتسو قالوا لي نفس الشي ! انتوا جم عندكم قسط الساني ؟؟ وقسط التيدا تقريبببباً وتوني سألت ناس نصحوني آخذلي من الامارات يقولون هناك ارخص !! واللي عندهم خبره يفيدوني .... أبي ب اسرع وقت |
الهايونداي حلوين وصغار وتوفير بنزين عشان الاقساط
اما عن سيارة الوالد ضعي تحتك مسند بس المهم توصل رجلك لدعسة الفرامل والبنزين ومن ثم ما تاخذي كتير بكلام الناس اللي يخوف شجعي نفسك الهوندا crv spot حلوين وانا احبهم عندي واحده موديل الالفين سعرفها تقريبا 12 الف استرالي يعني حوالي 1000دولار امريكاني احسبيها على البحريني وانتي تعرفي ابحثي عن سياره صغيره وناعمه تليق بتلاميذ الجامعه مبارك مقدما |
حياك وردة..
انا بقولك عن الهاتش باك لاني ماعرف عن السيدان شي اولا: الاسعار: هاتش باك قير عادي 1.6 ب 46000 ريال سعودي هاتش باك قير اوتو 1.6 ب تقريبا 49000 ريال سعودي هاتش باك قير اوتو 1.8 ب 56000 ريال سعودي هاتش باك قير عادي ست غيارات 1.8 ب 58500 ريال سعودي ثانيا: المواصفات: اقل نوع (السلق):قير عادي-طاسة(بلاستيك) 15"-مقاعد نص جلد ونص قماش-مافي كشافات. افخم شي (فل اوبشن):قير عادي ست غيارات او اوتو 4 غيارات-جنوط الومينيوم 15"-مقاعد نص جلد ونص قماش-كشافات-فتحة سقف-خشب-abs+ebd+ba(انظمة تحكم في الفرامل). ثالثا:القلب النابض: (ومااحلى نيسان في المكاين) ماكينة 1.6: 1600 سي سي 118 حصان عزم : 17 كلغ/متر ماكينة 1.8: 1800 سي سي 135 حصان عزم: 19 كلغ/متر (وممكن تركبلها مكينة الوحش فتك 4800 سي سي 280 حصان وبتصير طيارة)<<<امزح لاتصدق وان شاء الله اكون افدتك وما طولت عليك |
السلام عليكم ورحمة الله وبركاته اللهم صل على محمد وال محمد شلونج يا بنت بلادي آنا بقولك شلون كان تجربتي مع السيارات انا ياطويلة العمر كنت اسوق سيارة من لمن كان عمري 16 سنة وخذيت الليسن وانا باقيلي كم شهر وادخل ال18 يعني الحين خبرة 7 سنوات بالليسن وقبلها سنة ونص تقريبا يعني تقدرين تقولين 9 سنين خبرة فبكلمج من واقع خبرتي في السياقة هههه.. تربيت مع اولاد (اخواني واولاد عمي واولاد الخال) واناالوحيدة بينهم بنية فتعلمت منهم البلاسة والشيطنة حتى في السياقة علموني على السياقة بدون علم ابوي طبعا ! وتميت اسوق لج كل شي باقي بس باص ماسقت ههههههههه حتى وانيت عمي مال الشغل جربته المهم هذي التجارب في السيارات ولأني قمت اجرب كل سيارة هالشي عطاني جرأة في سياقة اي سيارة تكون تحت يدي ولا اتورط فيها ولا شيفي الشارع عادي اول مابدأت اتعلم واسوق تعرفين شنو؟ كنت اسوق سيارة صديقتي وكرسيدا كبييرة بس هم تعلمت مع اني ما اشوف عدل جوانبها بس كنت اقدر المسافات حتى بالدوار طيب الحين يى وقت ان اتعلم سياقة واخذ الليسن فكنت اسوق دوج وتعرفين اي موديل ؟ ههههه .. موديل 1980 عمره اكبر مني حتى .. وتخيلي بس الكبت هذا الي انا اسوقه..؟؟ بس ماكان ابوي مايخاف علي لان سياقتي عنده حالها حال اخواني الشباب بس كنت متهورة في السرعة بشكل مو طبيعي وامي بس الي كانت تخاف وتحلف على ابوي لا تعطيها ولا مادري شنو وتسوي مناحات الين ارجع البيت ههه فديتها طيب.. طبعا كنت في الجامعة وتعرفين المشوار لصخير وقبل ما يسوون الكوبري يعني كانت المسافة تاخد نص ساعة الى ساعة الارابع وكنت بهذا الكبت وبعد ازيدج ماكان اعرف ابركنها الا بروويس .. تعرفين ليش لاني كنت اروح ساحل الدراز واتعلم الرويس ههههههه كل يوم اروح ساعة او ساعة ونص اتدرب واتدرب حتى على تقدير المسافات المهم ماتمت سيارة ماسقتها دوج وموستبيشي وفورد وجمس كرسيدا وهونداي وكورولا وساني بكل انواعهم واحجامهم بعد الدوج الكبت الي كان عندنا الي يشبهون الشفر اشتروا لنا دوج جيب علشان بس انا يحدون من سرعتي وجان يقدرون علي بعد ..!! خخخ تخيلي اروح الجامعة اسوق اقل تقدير 140 الى 160 واحيانا تفوق طبعا هذا الي في الدوج الاولي الشفر وكان 8 سلندر يعني جنون وتهور بس الحمدلله الحين عقلنا ^.^ يعني كل الي عليج يودونج على البحر تتدربين كا عندج البحر الي يم جسر المحرق وعندج ساحل الدراز الباحة الي عند الالعاب واااااااااايد تساعد على السياقة انا كنت دايما هناك والبحر الي كان قبال السيتي سنتر قبل مايسدون البحر كنت ارسم لي دوارات هههههههههههههههههه انا واخوي واتعلم على الدوار ايام جنون بس فن حلوة يمكن انا صار حظي اوفر نصيب منج لاني مع اولاد وكلهم ميكانيكه تقريبا وعلموني حتى اسوي بنجر واغير زيت واغير ماء لبطارية والاشياء البسيطة الي تحتاجها السيارة او اسوي كهربا سيارة يعني ادبر روحي مستحيل اتورط في السياقة واقدر احيانا اعرف علتها ادا اول ما افتح البانيت فيا زنووبة خذيها مني نصيحة تجرأي قد ماتقدرين روحي تدربي في باحة الكورنيش قد ماتقدرين تعلمي تقدير المسافات ركبي السيارة وقدري وانزلي وجوفي مقدارج صح ولا لاء؟ مو عيب في البداية كل شي بكون صعب بس شوي شوي يصير سهل بعد خليه تحدي بينج وبين نفسج واغلبي نفسج ^.^ ومثل ماقالت خالو قريين حطي لج موسودة ترفعج ههههههههه انا يازنوب كانت علي جبيرة على ريولي اليمين الي اضغط فيها على سليتر البترول وتخيلي كنت اسوق فيها ..!!! واروح الجامعة ..!!! بس كنت احط ريلي واشوف اخليه مايتعدى 80 في الهايوي علشان يمديني اطق بريك وكنت احيانا استخدم ريلي اليسار للبريك ومشت الامور .... شفتي هذا من الجرأة بس الحمدلله عدت على خير ولا سويت حوادث هههههه وتكسرت اكثر امممممم اما عن السيارة فانصحج بالموستبيشي ارخاص وهم اقساطهم مريحة ومايصرفون بترول ويدومون لج ويناسبون وضعج مثلا موستبيشي اوتلاندر جيب وتقريبا قيمتها 7100 دينار هذا موديل 2009 ولمن تدفعين القسط 2000 دينار يعني بتقل الاقساط وايد وتقدرين تدفعين القسط من 77 على ما اعتقد وطبعا الموديلات الاقل تكون ارخص من هالسعر عندج موستبيشي لنسر واايد فن موديل 2009 و 2010 واسعارهم رخيييصة بحدود الــ 6000 او اقل اللنسر مكيفهم باااااااااارد وبترول مايصرفون الفل مالهم اقل من 5 دينار ممتاز ههه ومايختربون بسرعة وتقدرين تستهلكين فيها مشاوير تصلح للمشاوير عدل بعد عندج الكورولا 2006 بعد تمام وماتصرف بترول وايد واسعارهم معقولة صارت الان ادا تبين روحي الزياني الي يم الجامعة العربية المفتوحة هذيلة تقدرين تاخذين منهم سيارة مستعملة بس استعمال وكالة 3 شهور تقريبا وطايح سعرها وتكون موديل 2009 او 2008 تلاقين الي يرضيح واحسن السيارات ويقطسطونها لج بعد والله يوفقج وسامحيني على الهذرة الزايدة مسح الله على قلبك وانالك رغائبك ومنالك وجعل التوفيق حليفك في جميع امورج الحياتية والاخروية وابدل احزانج الى افراح وسرور وقضى لك الكريم حاجاتك :) لا تنسيني بدعواتج الصالحة في شهر الرحمة والغفران |
:d على قولت كريمووو .. س ل يعني سلام :d
مشكورين حبايبي على إقتراحاتكم وفعلاً فادتني .. وعطيت أبوي المبلغ ، وكا يقول إنه محتار بين الهونداي والساني وإن شاء الله خير عسى ربي يوفقكم تسلمووون وبسمات الروح هلوو فديتج آنه ابخير انتي شلونج عساج تمام ؟؟ :22: يووووه يا حظج يختي عندج اخوان يساعدونج لكن آنه وعلييييييييه آنه اكبر وحده بين اخواني وخواتي ف الشي صعب وأبوي الله يعين قمة التحطيم :d حتى لما كنت اتدرب كان يقول لي انتي مابتاخذين الليسن إلا في التراي الـ 20 :25::25: بس خذيته في التراي الـ 2 الحمدلله :23: هههههههههه بصراحة ما اتخيلج راكبه وانيت واتسووووقينه :30: والله ولووو إن مالي بارض اروح اتدرب او شي في مكان بس شكلي باروح يم جسر الحد المساحة اللي مناك باتدرب فيها أو في شارع الغوص في المحرق :29: أما الدراز ما احب اروحلها وفوق هذا بعيييييييييييييييد في آآخر الدنيا شيوديني من هني لي هناك قبل كنت اروح مضطرة ألحين ماعندي شغل هناك و ب النسبة حق طريق الصخير وعووو مااحبه اشطووووله لووو آنه منج اتملل اسوق لي هناك :28: بس الحمدلله جامعتي قريبة مسافة ربع ساعة من بيتنا للجامعة وادعيلي اتخررررررج وافتك باقيلي سنة الله يعديها على خيييييييير أما ب النسبة للسرعه أخاف اثبتها خبرج شوارعنا مو من كبرررررها يختج واقصى سرعه مشيتها اهيه 160 وآنه اسمع صوت التنبيه من السياره حق السرعه وخفت شوي وخففت السرعه لي 120 :17: :29: ولا يفوتج بما إن أقصى سرعه للشارع 120 والشارع امراقب ب الرادار ف عند نهاية الشارع لقيت المرور لاحقني عطاني مخالفة عن الرايبون ومخالفة سرعه ومخالفة حزام الأمان :29: وتسلمين يا قلبي عسى الله يوفقج وتسلمين على دعائج فديتج |
ياهلا ومليون غلا
بالغاليه الحبيييييييبه يا أحلى الورووود:d ماصدقت اشوف موضوع يخصك ومن فرحتي:17: بيك حبيت اسلم بس وللاسف مالي خبره بالسيرات :( |
واي فديت شيخة البنات آنه والله ياحبيلج
ونسني ردج ووجودج اتذكريني ب صديقتي مادري ليش بس صج فرحني ردج وسلامج عسى ربي ما يخلي هلج منج ياقمر |
عااادي اختي حتى انا ماشوف زين بس احط لي مخدة صغيرة واوكي
|
| الساعة الآن 11:06 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©