|
ضغطني حتى انفجرت فيه حلت رد52
في مشكلتي السابقه رجعت لزوجي بشروط
وكلها نفذها بدون استثناء وكنت عايشه ملكه تقريبا رغم بعض المنغصات (من طرفه) وانا حاولت اسعده قد ما اقدر المهم قبل اسبوع عورني ضرسي وكان مزاجي متعكر اخذني زوجي الطبيب ورجع البيت يمزح وينكت وانا قلت بجديه: لو سمحت تعبانه ثاني يوم رجعت انا طبيعي وهو جلس ينتقدني واني مزاجيه مارديت سويت له قهوه وحلا وقمت ارتب اغراضي جا يقول لي ماتقهويتي لايكون للحين منفسه علي! قلت له لا والله بس ما ابغى اشرب حار عشان ضرسي بعدها رحت اقول للشغاله تعمل حاجه جاء يقول ليه تعصبي عليها قلت ماعصبت بس اطلب منها شي انت تتخيل اني معصبه قال انتي مو طبيعيه.. لاتنكدي علينا وجلس ينتقد امور غريبه وتركته ثاني يوم ارسلت له صباح الخير واسفه لو ضايقتك امس وهنا غلطتي هووووب كبر راسه دخل البيت معصصصصب لا كلام لا سلام وهواش طنشت قال الخميس انزلك لاهلك؟ قلت اوكي اللي تشوفه ونزلني عندهم بدون ما اطلب كلمته من عندهم عطاني مشغول ومارجع رد ارسلت له بالليل: تصبح على خير حبيبي شافها ولا رد وجا ثاني يوم اخذني ولا سلام ولاكلام قربت بصافحه.. صدني وحتى العلاقه الخاصه هجرني له تقريبا عشر ايام قربت منه صدني ثاني يوم جا يهاوشني على شغله وطلع هو غلطان فاهم غلط قال طيب ومشى لا اعذريني ولا شي برضو طنشته رغم انه ظلمني بهالشغله بعدها قلت له ابي هالمشوار قال مالي مزاج اوديك قلت اوكي براحتك.. وطنشته رغم انه قال لي كلمه بذيئة عملت نفسي ما سمعتها اليوم اسأله تبي عشاء؟ قال (بدون نفس) ايش طابخه قلت له الذ مكرونه (بابتسامه) قال بعدين اكلها وبنتي بعدها صاحت تبي اكل رحت غرفت لي ولها جاء يهاوش: ليه متجاهلتني؟؟ قلت له انت قلت بعدين! قال بعدين مو بعد سنه (بعصبيه) يعني بعد نص ساعه قلت اسفه الحين اجيب لك رحت غرفت له وتركته ياكل ودخلت غرفتي ابكي وهو ما سأل فيني طلعت وقلت له ممكن اتكلم معك بالغرفه (بهدوء) عصب: ما ابي اكلمك ولا اسمع صوتك هنا خلاص انا انفجرت قلت له لما اطلب اتكلم معك تجي هذا اقل شي تعمله من باب الاحترام وتعاملك الزباله معي ما اتحمله لك اسبوع مطين عيشتي من ولا شي وترى شارطه عليك تعاملني باحترام وقت ماحفيت عشان ترجعني واذا متحسف رجعني لاهلي عالاقل ما القى عندهم هالذل والنكد جلس يستفزني ويضحك مع الاطفال متجاهلني وكأني ما اكلمه هنا انغظت زيادة وقلت له: يا تعاملني بالحسنى يا تطلقني انت لو عندك كرامه طلقتني بس انت اجبن من الطلاق ورحت وتركته وانا كارهته لابعد حد وهو ببرود دخل ينام وكأنه انبسط لما قدر يستفزني لان له اسبوع ضاغطني ويدور الزله حلت الرد 52 http://www.66n.com/forums/showpost.p...5&postcount=52 |
رد: ضغطني حتى انفجرت فيه
للعلم انا ماغلطت فيه بحرف
وهو اسبوع زعلان بدون سبب ولاني بنت ذوق وراقيه ارسلت له قبل اسبوع اسفه حبيبي كان مزاجي متعكر لان ضرسي يألمني لمجرد اني ماضحكت على سخافاته وكنت مصدعه وقتها بس ماقلت له حرف هذا دايركت بعد ماخف ألم ضرسي ماني عارفه ليه لما احطه فوق الراس واداري خاطره واتعامل معه برقي يدوسني دوس ولما امسح فيه البلط يتأدب ويلزم حده |
رد: ضغطني حتى انفجرت فيه
ياام روان هل انتي مستغربه تصرفه!! هذا المتوقع وهذا طبعه من قبل وقلتلك لما رجعتي انه بيبقى بطبعه الاستفزاز والتنكيد ويدور الزلات ومااخفيك يااختي كنت متوقعه بتطلعي بهالموضوع لان نفس مواضيعه السابقه لاجديدد .. الحل اصبري وتأقلمي وطنشيي كل تصرف منه ضرب ماعد يقدر يضربكك تأددب اما الباقي تحمليه مممكن عنده خلل بنفسيته او تجاهك بس طنشيه واعتبري كلامه ماصار ربي يكتب لك السعاده ويهديه لك
|
رد: ضغطني حتى انفجرت فيه
عندي تعليق ع موقف المكرونه اتوقع لو صرفتيله معكم وقلت تفضل كل معنا كان عصب عليك وقالك انا قلتلك بعدين مو الحين لان هدفه التنفيس عليك فيه نوعيات كدا
|
رد: ضغطني حتى انفجرت فيه
اقتباس:
ولازلت احس بخفقان بصدري لقيته صاحي ببرود ويقول ان فيه عاصفه وغبار وما اعرف ايش وتأكدي من الشباييك ما رديت عليه وطنشته مو طبيعي مابرد الا لما شافني بقمه غضبي من زمان ماتكلم معي بهدوء حسبي الله ونعم الوكيل |
رد: ضغطني حتى انفجرت فيه
عاد اذا تكلم ببروود مشيها وتكلمي معه وانسي او تناسي لاتوقفي ع هالمواقف ارجوك يعني لاتخليه يستفزك بمواقف تافهه ردي عليه وتكلمي عادي وبيني انك مروقه كمانن انتي ذكيه وحتتجاوزي الموقف بسهوله
|
رد: ضغطني حتى انفجرت فيه
اقتباس:
انا انحسبت علي جمله: انت اجبن من انك تطلقني بيجلس يمسكها علي ليوم الدين كل ماتورط بيطلعها رغم انه قايل لي اللي اردى من كذا وهو يفهم الطيبه ضعف فلازم استمر شاده معه يا ينعدل يا يطلق |
رد: ضغطني حتى انفجرت فيه
الله يعين على هالنوع من الرجال لما تلينين له وتعاملينه بحب واحترام يشوف حاله ويصير جاف ولما تبعدين عنه يجي ماكأنه صار شي ، توم وجيري مو حياة زوجية ، جربي التطنيش ووقت غضبه وف اي وقت لاتذكرين الطلاق ابداً لانه شي مستفز ومايجوز وتلعنك الملائكة وتنطردين من رحمة ربي ----
|
رد: ضغطني حتى انفجرت فيه
اقتباس:
يلومني ليه قبل اسبوع قلت له حبيبي تعبانه لما قال نكته سامجه وماضحكت يقول طيحتي وجهي ماكان بيضرك لو ضحكتي وانو كان قصده يخفف عني وكلام تاااافه ما كاني كنت شايله عصب وقالعه ضرس المصيبه انه خلال هالاسبوع تجاوز حده من ولا شي يعصب ولسانه يفلت كأني ذابحه احد من اهله كل هذا عشان ماضحكت عالنكته وقايل لي كلام بذيء وداعي علي بالامراض وانا عامله نفسي ماسمعت وياكل وينقد كل شي ويرمي الاغراض علي تعامل زباله بمعنى الكلمة لحد ما انفجرت فيه قبل شوي شياطين الدنيا نطت قدامي لاني كاتمه مني ويمكن لو طلقني رقصت وقتها |
رد: ضغطني حتى انفجرت فيه
للأسف كل واحد منكم ساكن في قصرة العاجي و و ماعندكم استعداد تفهموا بعض
|
رد: ضغطني حتى انفجرت فيه
كم عمرك وعمر زوجك؟؟
اولادك كبار ولا صغار ولا كبار؟؟ |
رد: ضغطني حتى انفجرت فيه
اقتباس:
ولا ابي افهمه بس يفكني من شره ويحفظ لسانه هذا ابسط حقوقي |
رد: ضغطني حتى انفجرت فيه
اقتباس:
بس اطفالي تحت الست سنوات للعلم هو الحين يشوف مقاطع مضحكه وروق بعد ما اهنته كأنه حمل ثقيل وانزاح منه يحارشني له اسبوع يبغاني اعصب وارد عليه وصار اللي تمناه |
رد: ضغطني حتى انفجرت فيه
اقتباس:
يمكن ماعرف يتصرف لما كنت تتألمي من ضرسك وشاف انك سفهتيه فبغى يردها لك الله يصلح أحوالكم انت دي نفسك وحاولي تروقي اعصابك |
رد: ضغطني حتى انفجرت فيه
لا تكتمي الغيض وتجمعي المواقف وتنفجري فجأه هذا تصرف لاتحمد عقباه
اذا عدت على خير هالمرة لان شياطينك طلعوا المرة الجاية شياطينك وشياطينه يتقابلون وهم اللي بيرقصون لكم ويطقون اصبع بعد اهدي وتعاملي مع كل موقف على حده دعى عليك بالامراض تكلمي بهالموضوع مباشرة معاه لاتكتمينه تلفظ عليك بكلام غير محبب تكلمي معاه ان هالكلام عيب تقوله لي انا زوجتك وام عيالك سؤال هل تقولين له زوجي الحبيب مجامله فقط او تقصدينها فعلا وتحبين زوجك وابو عيالك ؟ مازلتوا كما انتم في نفس الدائرة عادت الاحداث نفسها يتكلم احيانا وانتي تردين احيانا بعكس ماكان يتوقع يصغر عقله ويزعل ويردها لك وينرفزك وانتي تكتمين وهو ينقهر انه مانرفزك فيزيد الجرعات ويزيد ويزيد وانتي تفقدين السيطرة وتنفجرين بوجهه هو يهدأ انه وصل لمراده كأنها حلبة مو منزل هالسيناريو لازم يتغير كيف ماادري |
رد: ضغطني حتى انفجرت فيه
شي غير طبيعي كلمه والثانيه طلقني وبروح بيت اهلي...انا مسويه جراحه هالفتره واعرف وضع الالم الاتعانينه بس مااحس لدرجة اني ماعندي استطاعه ابتسم او اقلها اسكت ...المهم واصلي التغيير واعتبري كأنه اللي صار ماكان
|
رد: ضغطني حتى انفجرت فيه
الحمد لله على العافية
ماوجع الا وجع الضرس انا حسيت بكل اللي تحسين فيه ويمكن اكثر عصب و خلع و لثة بس هو نيته ينسيك يعني زين حس فيك و انتي كأنك تقولين لو سمحت ماني رايقة لك فحس بالاهانة كان جاملتي او اعتذرتي بلطف |
رد: ضغطني حتى انفجرت فيه
لا حول و لا قوة الا بالله
الله يعينك يا اختي ... |
رد: ضغطني حتى انفجرت فيه
اقتباس:
معك حق 👍👍👍👍 |
رد: ضغطني حتى انفجرت فيه
انت لو عندك كرامه طلقتني
بس انت اجبن من الطلاق مادري ليش احس ان فيه احد محرشك على زوجك |
رد: ضغطني حتى انفجرت فيه
على طول فتره زواجكم ماعرفتي وش الاشياء اللي تنرفزه؟
لما غرفتي المكرونه ماحسيتي بقلبك إن التصرف غلط؟ وإنه بيستفز؟ برضو لما قال النكته فشلتيه أعرف إنك تتألمين لكن لو كنت مع صديقتك مثلا كنت بتتصرفين نفس التصرف؟ الغلط مو عليك لكن أنت اللي موجوده ونحاول ننبهك لحاجات تخلي حياتكم أحلى |
رد: ضغطني حتى انفجرت فيه
اي علاقة في الحياة لازم فيه طرف يضحي و يتنازل
خلاص كوني انتي المتنازلة و حتى لو تنرفز عليك اعتبري ان ما حصل شيء و ادمحي الزلات و مع الوقت بتكون علاقتكم مثل الاخوان والخوات في التعامل مع اخطاء بعضهم البعض يعني تعصبون ع بعض و ترجعون طبيعي بدون طاري طلاق و قلة احترام و مدري وشو أساسا الحياة الرسمية مملة جدًا مثل لما أرسلتي اعتذار انك ما ضحكتي احس ما له داعي كان جيتي له بعدها و ضحكتي ولطفتي الجو و قلتي ان امس أخلاقك قافلة من وجع الضرس و اللحين يا رب لك الحمد ارتحت لا تكن قاسيًا فتكسر و لا لينًا فتعصر انتي قاسية و ماشيه مثل الألف خليك مرنة |
رد: ضغطني حتى انفجرت فيه
يمكن ماقدرت اوضح مشكلتي صح
كاتبه بالموضوع اني تغاضيت عن تصرفاته لانه يرمي كلام من رجعت له وانا مطنشه عشان المركب يمشي ولانه التزم باهم الشروط قصه ليه ماضحكت عالنكته السخيفه فأنا بشر وهذا زوجي مافيها شي لو قلت تعبانه مالي مزاج وفعليا الم الضرس يتعب الفك فحتى الضحك مو على كيفنا والمريض عذره معه ولاني اعرفه يعمل من الحبه قبه راضيته ثاني يوم وطنشني وبدا مسلسل قله الادب معي وكأني عدوه مو زوجه كلامه جارح جدا وتعامله -- وانا اقابل تصرفاته بهدوء وابتسامه قام يزيد ويزيد ويزيد لحد ما انفجرت امس هنا هو رووووق وانبسسسسط ورجع لموال: ظهرتي على حقيقتك وكنتي تتصنعي الطيبه وانا تشبعت من القهر والنفور ما اشوفه رجل.. طفل.. ولا هو جدير بالصبر والاحترام اللي يقولوا كان ماكتمتي انا كنت مترفعه عن صغر عقله ومطنشه تفاهاته ومتغافله عن -- لحد ما زودها جدا معي اتق شر الحليم اذا غضب اذا حتى اطفالي الصغار يهزءهم قدامي ويقول لبنتي: ---- وهو عارف اموووت ولحد يقول كذا لعيالي وكنت كاتمه وساكته ما ابي مشاكل وحتى لما طلبت اتكلم معه بالغرفه كان بنيتي اسأله الى متى الوضع كذا شفته --- يقول انقلعي ما ابي اكلمك ورجع --- الاسلوب اللي تركته بسببه وكلام عيال الشوارع التشيب فانفجرت فيه ونمت وقمت وانا مقهوره منه الى حد الان كلامي عن الطلاق ورجعتي لاهلي حتى يفوق على نفسه ويتذكر كيف تمرمط حتى يرجعني والحين يهيني بالايام بدون سبب قلت له اذا مو قادر تحترمني رجعني لبيت العز اللي كنت فيه وخليك انت مع اوهامك و--- لسانك انا ما مر علي بالعالم واحد كذا يزعل من ولا شي ويصر يطوووووول الخصام كتبت بموضوعي كذا مره صدني واستحي اتعمق بالتفاصيل بس حتى لما اجلس جنبه واقرب يبعد ويقول وخري عنه بنرفزه واكمل قهوتي بهدوء ما كأني اسمع وحركات كثيره --- منه وقبل اروح لاهلي اقول له ما ابي اروح واحنا متزاعلين قال كولي.... !! ما ابي اسمع صوتك |
رد: ضغطني حتى انفجرت فيه
انا ما كنت ساكته على تصرفاته ضعف
ولا خوف منه كنت ساكته تقديرا له انتظر يطيح اللي برأسه وخلاص حتى الشغله اللي هو ظلمني فيها سامحته لوجه الله رغم انه اخطأ علي باتهام كذب واتضحت الحقيقة قدامه وطنش وراح حتى كلمة تطيب خاطري ما قال سكوتي لاني حبيت نتجاوز هالاسبوع وكنت مفكرة اعاتبه بوقت صفاء بعد أسبوعين ثلاثة شهر المهم اعاتبه بعدين واحنا رايقين مو وقت الخصام ازيد النار حطب لانه قاطعني وهجرني وتلفظ علي من ولا شي كان اكبر طموحه اطلع عن اتزاني وافقد السيطره على اعصابي هذا الشي مو قادرة افهمه ولا اعرف هل فيه رجال بالعالم مثله؟ ينقهرون اذا الزوجة تغاضت عن-- ويضغطونها لحد ما تنفجر عليهم طبعا المسلسل ما انتهى بتبدأ حلقات الحرب الحقيقية اليوم بيرفع هو درجة الاستنفار بحجة انو صار معه حجة يزعل لاني عصبت عليه وطلب الطلاق بس ----- اقلها لقى سبب يزعل عشانه مو زعلان بالايام من ولا شيء المحزن بالموضوع انا فعلا قدرته واحترمته بس بعد سلوكه تغيرت نظرتي رجعت ----واستصغره هو رجعني لدائرة انا تشافيت منها رجعت انظر له انه --------- |
رد: ضغطني حتى انفجرت فيه
حسبي الله ونعم الوكيل
|
رد: ضغطني حتى انفجرت فيه
اسأل الله ان يصلح شأنكم كله
وان يصلح ذات بينكم اختي حتى الصبر على سوء الخلق له اجر عند الله |
رد: ضغطني حتى انفجرت فيه
اقتباس:
ماتوقعت بيزعل لاني شاورته تبي تأكل.. قال بعدين ولأنه متعود يتعشى بعد العشرة ولأني دائما اغرف لعيالي بدري بس ذوقيا سألته.. وهو كان ناوي شر وبس اقتباس:
وعلى فكرة ترى قلت: حبيبي بليز مالي خلق تعبانه وهو زي الأطفال قال هذا جزاي بخفف عنك وقام وتركني.. كأني سابته هذا الموقف التافه صار قبل اسبووووووووع |
رد: ضغطني حتى انفجرت فيه
اقتباس:
لما اتشرشح بالايام واتهم زور اني طلعت بالليل لحالي ويسبني ويهددني يتزوج علي بسبه ظن خاطئ ولما يكتشف ان اللي طلعت اختي مو انا يقول طيب.. ويمشي وانا ابلعها واسكت بدون ما يبرر سوء ظنه فيني وبعدها بيوم يمرمط فيني الأرض والى البارح وهو يهاوشني قلت له بالصريح ما تبيني رجعني لاهلي امساك بمعروف او تسريح باحسان ام سب وافتراء وتجني.. لا ستوب يعني كذا انا قاسيه! سبحان الله |
رد: ضغطني حتى انفجرت فيه
اقتباس:
ورجعت بعدها ثاني يوم اعتذرت بلطف شفته شايط علي قلت يا بنت اتركيه يدخل كهفه (زي مايقولون) وعطيه مساحته الخاصه.. لا تضغطي عليه واتركه أسبوع كامل واشوفه امس زايد العيار علي ولسى بالويك اند متهمني زور وطنشت ايش باقي اكثر كان لازم اوقفه عند حده وللحين ناري ما بردت ودي الم عفشي واروح لاهلي بس ما ابي استعجل |
رد: ضغطني حتى انفجرت فيه
اقتباس:
هذا واحد مايبي هدوء ولا استقرار ما ادري ايش يبغى بالضبط !!! |
رد: ضغطني حتى انفجرت فيه
اقتباس:
هو رجعني لمرحلة الصفر خانقني له أيام.. لوم وعتب واهانه انخنقت منه وقلت له ياتعاملني بالحسنى والا طلقني ايش اعمل ما يبي يسمعني ولا يبي يتكلم معي فوقها يجرحني قدام الناس والأطفال والشغاله |
رد: ضغطني حتى انفجرت فيه
هنا مربط الفرس
ضغطك النفسي بسبب الاهانات امام الخادمه خاصة والاطفال عامه معك حق في ذلك لانه يصير الالم ضعفين بعكس لما يكون بينكم فقط اختي وقت تتصالحوا خذي منه عهد انه خلافاتكم تكون سريه ما تحس فيها الخادمه والاطفال ابدا لمراعاة نفسيتك ونفسية الاطفال |
رد: ضغطني حتى انفجرت فيه
اقتباس:
يقول الخدامه جايبها بفلوسي ولما قلت له لوسمحت بكلمك بالغرفة قال قدام الأطفال انقلعي ما ابي اكلمك فانفجرت فيه بنص الصاله قبل الأسبوع صارت خلافات كثيرة (منه هو) مرة كان معصب من تصرف تافه من اخوي وجاء سبني وسب عيلتي واننا ناس وقحة وانا مالي ذنب طنشته.. ثاني يوم باس رأسي واعتذر قلت مسموح لكن لاتكررها.. قال ابشري وهكذا بكل المشاكل السابقة من رجعت له وهو يهبب وانا اتغاضى بس هالمرة جاب العيد من ولا شي فعطيته على رأسه امس |
رد: ضغطني حتى انفجرت فيه
كلمت مستشارة اسرية
قالت انو زوجي يستمتع باستفزازي واني امس عطيته اللي يبي.. وارتاااح قلت لها ليييه طيب ولمتى قالت الله يعينك في رجال هذا طبعهم وانو الناس اللي من هالنوع تشعر بالنقص وانو المفروض استمر على برودي لحد مايمل قلت لها انا بشر ولي طاااااقة قالت خلاص اللي صار صار واليوم وبكرا اهجريه حتى يعرف ان المشكلة عنده وباليوم الثالث اكتبي له كلام مرتب لانو مايجوز الهجر اكثر من ثلاث بتبع نصيحتها واشوف رغم انو جد دمي محروق للأسف هالشي يأخذ من صحتي وتفكيري اتعس شي انك تعيش مع شخص يتلذذ باستفزازك |
رد: ضغطني حتى انفجرت فيه
تدرين يا روان! لستُ مستغربة سلوك وتصرفات زوجكِ بقدر استغرابي منكِ أنت! ما الذي كنتِ تنتظرينه؟! ما الذي تتوقعينه من زوجك؟! |
رد: ضغطني حتى انفجرت فيه
اقتباس:
يومين ثلاثة اربعة اسبوع مو يقرف عيشتي اسبوع كامل توقعت يتمسك فيني لانه بصعوبة شديدة رجعني مو يرفس النعمه برجوله توقعت يفكر لو لحظه بضبط نفسه مو مغيب عقله اسبوع كامل كأنه بغيبوبه توقعت مل من التلذذ باستفزازي لاني انظر لهالشي على انه مرض نفسي ينفرني منه ويحسسني انه ناقص رجوله |
رد: ضغطني حتى انفجرت فيه
تحتاجي تطنشي...اذا مر بهالحاله من بدايتها انتي ابتعدي ومارسي اشيا تحبيها بس عندك كمان مشكله انو اذا تمشكلتي معه تفكري في المشكله طول الوقت وماتستمتعي بوقتك
|
رد: ضغطني حتى انفجرت فيه
اقتباس:
ومستمتعه بوقتي بس كنت منفعله بعد حادثة امس dff |
رد: ضغطني حتى انفجرت فيه
غلط اللي سويتيه يا روان .
يفترض مهما صار ومهما حصل ما تنطقين بهالكلام ما تذلينه باللي سواه في سبيل ارجاعك وما تطلبين الطلاق على سبب تافه وكأنك طفلة وماتقولين لو كان عندك كرامة طلقتني! يابنت عيييب انت افسدتي كل شي كان في طريقه للاصلاح بسبب قلة صبرك. و اذا عصب بسبب سخيف و اذا كبر راسه ليه تعاملينه كأنه ندك ليه ما تخضعين له وتحترمينه كزوج انت فعلا اعتذرتي لكن للأسف اعتذار فيه كبرياء كبير وختمتيها بكلام لا ينبغي أن تتفوه به أي زوجة عاقلة صادقة في رغبتها باصلاح نفسها أولا و اصلاح حال زواجها اللي كان على وشك الانهيار لولا محاولات الزوج وحفيانه اللي يفترض أن تقدريه لا أن تهينيه به خصوصا بعدما أكرمك طيلة الشهر. اقولها لك بصراحة لو قلبنا اطراف المعادلة وصدر هالكلام من زوجك لك بنعتبره قمة الدناءة. |
رد: ضغطني حتى انفجرت فيه
يا روان من خلال كتاباتك هنا عن الموقف أنت لا تتحكّمي في كلماتك إطلاقا يا ليت ترجعي تقرئي ما كتبت بعد أن تهدئي هذا معنا وأمام الملأ فكيف كانت حالتك وهيأتك أمام زوجك اللي أنت مغتاظة منه! أما عباراتك : وترى شارطه عليك تعاملني باحترام وقت ماحفيت عشان ترجعني وقلت له: يا تعاملني بالحسنى يا تطلقني انت لو عندك كرامه طلقتني بس انت اجبن من الطلاق غلط في غلط خاصة وأنّه صدرت منك في أول موقف فيه مشاداة وبالتأكيد لما تراجعي نفسك تدركي حجم غلطتك, انت عارفة انّه مستفزّ لكنّك تظنّي أنّه سيكون وديعا بمجرّد أنك وافقت على العودة إليه لن يكون مثل ما تريدين إذا لم تكوني أنت مثل ما وعدت نفسك أن تكونين لازم تعرفي كيف تمتصي استفزازه بدل ما يجرفك هو أيضا يحتاج من يوجّهه ويذكّره, لكن أحد غيرك. |
| الساعة الآن 06:22 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©