|
تعبانه
اكتب لكم وانا تعبانه من الدنيا كلها
تبهذلت سنين مع زوجي اللي عنده اضطراب نفسي مريت بكل انواع العنف: لفظي وجسدي ومادي ومعنوي ووو رحت لاهلي وطلبت طلاقي من المحكمه لانه رفض يطلق قال مايبغاني بس حاب يمرمطني ويبهذلني ويضيع عمري واصلا هو عامل لي حظر بالجوال وفاضحني بكل مكان يقول تبغى الطلاق لانها وحده فلتانه هو يحس ان له قيمه واهميه لما يمرمط زوجته انا واطفالي لنا حوالي 6 شهور ساكنين بغرفه عند اهلي ابوهم مافكر طول هالمدة يتواصل معي نهائي ياخذهم زياره من عند الباب مره بالاسبوع ويرجعهم بعد ساعتين واهلي بالبداية كانوا مرحبين وصاروا كلي شوي يتشكون تحركت ادور سكن قريب لي ولاطفالي.. ولقيت الحمدلله لكن ماوقعت العقد ولسى باقي أثاث وتجهيزات واهلي محسسيني اني غلطانه بقراري شغالين علي تأنيب ضمير الليل ورا النهار يقولوا ليه تطلعي والناس بتتكلم وكيف تعيشي لحالك بنفس الوقت قرفانين من الاطفال وكل شوي يتشكون منهم.. يقولون لي فلان فعل وفلانه قالت واولادي زي المربوطين.. مو قادرين يعيشون طفولتهم امس سلمت على والدي لقيته معصب يقول: ولدك ماتربى وكلمي ابوه ياخذه يومين يتأدب ويريحنا وهو عارف ان ابوهم خصمي بالمحكمة وبينا قضية وعامل لي حظر سكت وجلست ابكي بغرفتي من القهر والضغط من كل ناحيه بعدها بكم ساعه جلست مع امي وقلت لها فترة وتعدي قالت انتي اصلا تتمسكني حتى تعيشي لحالك واتهمتني اني فرحانه بكلام والدي ولقيته شماعه للخروج لما سمعت كلامها بكيت.. قالت: اف ملينا دموع ونكد وتركتني المفروض انتقل للسكن خلال اسبوعين كحد أقصى وعندما التزامات ماديه كبيرة.. لكن احاول ادبر بكل طاقتي ولا اعرف قضيتي بتنتهي طلاق او بيحولونها خلع لان ابوالعيال رغم انه مقتدر لكن له رغبه غريبه بتدميري كنت الفتره الماضية قويه.. او حاولت اكون قويه.. دخلت المحكمة لحالي.. رفعت الدعاوي وحضرت جلستين لحالي.. لفلفت على مواقع العقار لحالي.. اجرت لي سيارة لحالي.. اصرف على اولادي لحالي.. اخذهم المشاوير بنفسي.. ولامتهم بحضني طول الوقت.. احاول اتماسك عشانهم وحتى يحسون بأمان وان امهم سند لهم.. يا اخوان انا أمر بأصعب ازمه بحياتي كلها كلها كلها وجوعانه للدعم النفسي والمعنوي.. ارجوكم ادعموني بكلمه اخاف بلحظة انهار.. لان كل شي جالس يضغطني وادعوا لي أتطلق قبل رمضان بدون خلع.. انا انتظر معجزة يارب تتحقق |
رد: تعبانه
السلام عليكم ورحمة الله وبركاته
أختي الفاضله أنتِ انسانه شجاعه وقويه خذلك زوجك،، خذلك أهلك سندك، أبوك وأمك واخوتك وأخواتك كلهم خذلوك لكنك وقفتي على رجلينك ﻷجل أوﻻدك صدقيني أطفالك يسجلون كل شي يمر عليهم الحين وكل خطوه وقرار تتخذينه بينحفر بذاكرتهم فخليك قويه واستمدي هذي القوه منهم وعشانهم أكلمك أنا أبوي مات وانا طفله وأمي كانت ضعيفة شخصيه ما بقى أحد ما تدخل فينا وأذّانا وأمي كانت تسكت وما توقفهم عند حدهم مع ان خوالي أصغر منها وهي مربيتهم!!!! وللحين أنا منقهره على أمي ومنقهره منها بعد فأقولها لك برافو عليك انك ما انتظرتي أحد وبرافوا عليك انك وقفتي على رجلينك بلحالك وبرافو عليك انك اعتمدتي على نفسك والله يسهل أمورك ويكتب لك اللي فيه خير وصالح ويحفظكم من كل سوء وأنصحك إذا نقلتوا لشقتك ﻻ يعرف زوجك مكانها وﻻ بغى يشوف أوﻻده خل ياخذهم من بيت أهلك |
رد: تعبانه
اقتباس:
الله يخلي لك الوالده ويحفظها حاسه بمسؤولية كبيره تجاه اطفالي ارحمهم واحاول اجنبهم كل تعب جالس يصير ما ابغى هالفتره تسبب لهم صدمة نفسيه لا ابوهم راحمهم ولا اهلي متفهمين وضعهم وبنفس الوقت محد راضي يدعمني لو بكلمة حلوة اعرف المفروض ما انتظر دعم ومواساة واتحمل قراراتي لكن احنا بشر.. الكلمة الطيبة ترفعنا فوق انا مستغربه اهلي يضغطون علي وهم عارفين اني طالعه طيب خلوني اذا استقليت اطلع بذكرى طيبة اقصى شي قدموه لي غرفتي القديمة.. الله يعافيهم لكن مو فاهمه ليه يعيشوني بضغط نفسي رهيب تمنيت أترك بيتهم بذكرى طيبة فقط لاغير والله المستعان |
رد: تعبانه
بصراحة ما كنت متوقع انك تعيشين بوضع اسري غير مستقر بهذه الطريقة
لاني لاحظت من ردودك على مواضيع اخرى انك انسانة متزنة وحكيمة وواعية وما توقعت ان زوجك مع ما تملكينه من حكمة واتزان وعقل ان يسعى لتعذيبك بهذه الطريقة وحقيقة استغرب من بعض الرجال الذين يملكون زوجه بهذه المواصفات من عقل وحكمة وصبر وتحمل ومسئولية ان تعامل بهذه الطريقة . الله يعينك ويجزيك أجر الصبر |
رد: تعبانه
ربي يفرج كربتك
اثبتي أختي أنت قويه بالله وخالي دموعك في اليل بثيها لله ارتاحي بإذن الله تجتازين هذه الصعاب لكن لابد من شويه صبر وتنالي مرادك ربي ينصرك |
رد: تعبانه
ماتضيق وتضيق وتضيق الا راح تنفرج
كوني على ثقه ان القادم احلى واجمل اهم شيء الصبر والرضى بكل الي صار والله بيرضيك وبيعوضك ايام جميلة استغفري حوقلي وصلي ودعي والله اكرم الاكرمين |
رد: تعبانه
أهلك يخشون كلام الناس عندما تستقلين بحياتك انزعاجهم من الاطفال مَرَده إلى كبر السن وربما لتزايد الأعباء وضغوطات الحياة .. كان الله في عونهم وحنن قلوبهم عليكِ أعرف انكِ داخليا مُتعَبَة جدا .. لكن حاولي التماسك أمام أهلك ولا تزيدي من الشكوى ... هذه حربك انتِ وحدكِ ولن يذوق مرارتها غيرك أطفالِك أيضاً يحتاجونكِ قوية تَحَمّلي قليلا .. وإن شاء الله عما قريب ستكونين مستقلة بحياتِك أسأل الله لكِ الثبات والقوة والعوض الجميل في نفسك وفي صغارِك |
رد: تعبانه
حبيبتي انتِ اقدمتي على خطوة الطلاق بعد مانفذت جميع السبل عندتس وصارت حياتتس مستحيله
قوتتس خوذيها من رب العالمين مهوب من البشر ولله والله مافيه احد منا بيعطيتس القوه اللي تنشدينها اختي عليتس بسهام الليل الدعاء الدعاء الله يغير حالتس في غمضت عين ماتدرين لعل الله يجبره على أمر انتي ماتوقعتيه يسويه مثل رجعه لتس وهو موافق على جميع شروطتس وشخصيه ثانيه نادمه مسخره لتس ولعيالتس هداه الله وتكون فيها خيره او يطلقتس اذا فيه خيره من غير تعب ومحاكم وقضاء ماتدرين بالأقدار خلي قوتس بالله ومن الله عليتس بسهام الليل فأنها لاتخطي اطلبي من رب العبد القوه وليس العبد ليس بين الله ودعوة المظلم حجاب ادعي ثم ادعي بماتريدين وسيحققها الله |
رد: تعبانه
آه يا نانا حاسه فيك وانا اختك ، والله اني امر بظروف مشابهة، لي عند عند اهلي مايقارب 8 اشهر ، متضايقين جدا من بنتي الله يصلحها تتكلم كثير وحركتها كثيره ماتجلس، حاولت افهمها كثير ياماما مايصلح كذا بس ماترد ، ابوي كبير بالعمر ومريض مايتحمل مرات يطقها من وراي واسكت مااقدر اقول شي،،
امي مره معي ومرات لا مدري وش اسوي ، موقفني اني قاعده ادرس ماستر الان ما اقدر اطلع علما ان مالي غرفه خاصه عند اهلي.. مضغوطه كثير كثيييير بشكل ماتتخيلينه لكن متأكدة انه ربي بييسرها وبتنفرج الحمدلله على كل حال اطلعي واستقلي بشقتك ماعليك من كلام الناس محد يهمه راحتك انتي وعيالك انا مؤيده لك تماما وان شاء الله انه يعتمد عليك الله يسخر لي ويسخر لك الارض ومن عليها |
رد: تعبانه
الله يسعدكم ويوفقكم على كلاماتكم الطيبة.. رفعتوا معنوياتي
الحمدلله انا الان جالسه اجهز للسكن الجديد اهلي صاروا رسميين معي جدا لا كلام ولا شي.. مجرد سلام.. اتوقع اذا نقلت بيجلس الفتور بينا شهر شهرين بعدين نرجع سمن عالعسل باذن الله ماعندي بهالدنيا الا اولادي واهلي ربي يسخرهم لي جزاكم الله خير جميعا |
| الساعة الآن 11:52 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©