|
اشتقت له وما ودي ابادر- حلت70
السلام عليكم ..
من اسبوع صار خلاف بيننا والصراحه انا نفسيتي تعبانه من وصلت الشهر الثامن .. المهم السبب انه اخذني مرتين للمستشفى بنفس اليوم .. شي غصب عني و مو بيدي تعبت وماعاد اقدر اتحمل وقلت له مابي اتعبك ونروح مره ثانيه لان عندك معهد بالليل بروح مع اخوي لاقرب مستوصف قال لا كلمي المستشفى اذا في موعد اليوم باخذك وماني رايح للمعهد "" انا فرررحت لان اول مره يسحب عالمعهد عشاني """ وفعلا اتصلت ولقيت موعد وقلبي موجعني ان المستشفى بعيد بس هووو رافض اروح لأي واحد لان هناك تأمين .. المهم وحنا بالطريق عصب علي وقال راح علي المعهد وثاني مره باليوم ماسك هالطريق و و الخ ولما وصلنا وبعد الفحص الدكاتره تجمعوا و وضعي صعب ومحتاجه تدخل جراحي وبلشوا فيني لاني حامل و لازم اشعه ولازم بنج حوامل و و الخ هو شافهم محتاسين ويستدعون بعض قال لي حتى الدكاتره غاثتهم << انا طالعت له نظرة مدري وش افسرها حزن ولا حقد ولا ايش بس اللي عرفت ان وقتها شعور غريب مدري القاها من تعبي ولا من اسلوبه .. المهم بعد ماخلصت وطلعنا و وصلنا بيت اهلي عشان بنتي عندهم قال خليك عندهم لين تتعااااافين < طبعا انا مجهزه اغراضي مع بنتي لان حاطه ببالي انام عندهم .. قلت طيب ونزلت و ثاني يوم سئلني فيه وجع ولا خلاص قلت فيه شوي وبعدها قلت له باقي 3 ايام قال ع ايش قلت ع يوم زواجنا قال اها قلت ابيك تفاجئني بشي لو مره قال مابي تتعودين قلت عادي واذا تعودت خلني اتعود عالدلع وكذا قال انا تعودت عالمستشفيات من اخذتك وانتي وجعانه خلاص ابخليك عند اهلك لين تتعافين واشبعي منهم و و و الخ .. منها انا زعلت لان من اخذته حملت والحمل تعبني ومايمدي ولدت الا طحت بسبب فقر الدم ومضاعفات الولاده وانا اعالج عن المضاعفات الا حملت مره ثانيه و جا الوحام من جديد والتعب و بنتي تحبي والشغل يهلك ماعاد فيني طاقه لشي ومناعتي ضعفت . جرحني اسلوبه وماكلمته من يومها .. واليوم يوم زواجنا ودي اكون معه وبصراحه اشتقت له بس مابي ابادر مثل كل مره ابيه هو يبدا ابي اجرب هالشعور وابي اشوف متى يكلمني .. ماباقي لي الا 11 يوم ان شاء الله و ادخل التاسع وعندي شغل كثير ببيتي وماجهزت للولد لسا واخاف انه يطول علي وانا ماااابي ابدأ وش الحل !!!!! حُلت الرد 70 http://www.66n.com/forums/showpost.p...7&postcount=70 |
رد: اشتقت له وما ودي ابادر بال
ياربي صبرني .. اول مره ما اكلمه يومين .. ومن كثر ما افكر ماعاد اقدر انام .. ودي اتصل عليه ودي ارسل له بس انا ماغلطت بشي و دايما انا اللي ابدأ حتى لو هو الغلطان بس هالمره احس صعبه
|
رد: اشتقت له وما ودي ابادر بال
اهتمي بصحتك
من قبل الزواج و هم يقولون لي الرجال ما يحب الحرمة المريضة 🙄 يعني ما ينفعك الا نفسك |
رد: اشتقت له وما ودي ابادر بال
بعد ولادتكك اخذي مانع قوي ونظمي وصحتكك اولى من كل شيء الحين فكري بنفسك وعالجي فقر الدم عشان الولاده وهو طنشي وبيدق ويجيك لاتخافي
|
رد: اشتقت له وما ودي ابادر بال
هاليومين ريحيه منك ومن مشاكلك وانتي انشغلي بتجهيزات المولود روحي اشتري الاغراض والا اطلبيها اون لاين وربحي نفسك واهتمي بصحتك ومردكم بترجعون لبعض ان شاءالله
الله يهون عليك وعلي |
رد: اشتقت له وما ودي ابادر بال
اختي ترى فعلاً الريال يطفر ويمل اذا شاف زوجته دايماً تعبانه
وانتوا من تزوجتوا عشان الحمل وما ارتحتي بين الحملين اكيد بتكونين اغلب وقتج تعبانه من الحمل ولا من الولاده والبيبي اول شي اهتمي بصحتج عدددل مافي اغلى من العافيه ولو طحتي لاقدر الله مايقدر ريلج يعطيج من عافيته بعد ماتربين بالسلامه ان شاء الله اخذي مانع لازم ترتاحين شوي وتريحين جسمج وتجابلين ريلج بعيد عن التعب والمواعيد بالمستشفيات يمكن ريلج طفران ومضغوط عشان جي هذه طريقته واسلوبه ماعليج هذه فتره وتعدي ان شاء الله بخصوص ذكرى الزواج خلاص لاتكبرين الموضوع اذا ما اهتم شو يعني صدقيني ترى ابدا مو دليل انه مايحبج عادي يوم زواجنا يمر وريلي مايتذكره ومب بس انا وايد حريم اسألهم ونفس حالتي ف ليش اييب المشاكل والزعل والنكد عشان ذكرى زواجنا يمكن هو فعلا مايبغيج تتعودين على يوم في السنه ولازم هديه وحاله يمكن مايحب يتقيد ويمكن يخاف انه ظروفه ماتسمح وقتها اييب لج شي خبريه مثلا انه تبين هدية ولاده وخبريه تغيرون جو في فندق مثلا قبل الولاده ولا اتيبين طاري ذكرى الزواج اذا حسيتي هالامور ماتهمه لانها فعلا اختي غير مهمه لاستمرار الحياة الزوجية وبخصوص المبادرة ترى عادي ياما حريم يبادرون والموقف اللي صار يمكن ريلج يشوف انه مب غلطان واللي صار عادي دام مشتاقة له اتصلي فيه واسألي عنه بعيد عن الزعل والعتاب والمحاسبه التغلي ماينفع دايماً صدقيني وتذكري هذا الشي دايماااااا الريال يحب المرحه اللي ماتدقق وتحاسب وتعاتب ،، ويكره النكديه اهتمي حالياً بس بصحتج انتي والبيبي وفي بنتج وعقب ماتربين بالسلامه ان شاء الله ارتاحي ريحي جسمج وجابلي ريلج |
رد: اشتقت له وما ودي ابادر بال
تسلمون خواتي ماقصرتوا .. بعد ولادتي الاولى رفض اخذ مانع مع ان ترجيته كثير لان اولا تعقدت من الولاده وثانيا لان تعبت كثير وماصدقت خلصت لكنه رفض وكنت اقول عالاقل خل لما يكتمل دمي و استعيد صحتي واكون جاهزه جسديا و نفسيا لان انتوا عارفين الحمل ياخذ من الصحه كثير .. المهم صار وحملت قبل يكتمل كل شي لكن صبرت واستمريت ع ادويتي بدون ما اشتكي له من شي بس لما وصلت الشهور الاخيره وثقلت وبنتي ماتركد بس اركض وراها وماشاء الله ثقيله .. عشان كذا كنت بجهض عالخامس وبعدها عالثامن نزل البيبي قريب للحوض و ضغط ع الرحم و الورك و الم برجلي فضيع ومن غير الصداع المستمر و امراض كثيره جتني ورى بعض لكن لما تعبت حيل ماعاااااد اقدر اتحمل ابد ومالي غيره بعد الله يوديني ويجيبني بس انا اقول له اروح مع اخواني وكذا عشان مايقول عني مقطوعه هههههه .. وبالنسبه لتحهيز البيبي صعب لان مايسمح لي اروح مع احد نهائي و ماعندي فلوس .. يكفي لي اسبوع تورطت بمصاريف البنت وكل ماهذا اخذ من امي و امي على قد حالها بس مابي اكلمه واقول له هات لي حليب للبنت و و والخ .. هو اللي غلط علي وماقدرني .. مع ان يهتم فيني مرات ويحس فيني لما يشوفني اشتغل بالبيت وسهرانه عالبنت مايطلبني غدا عشان اشبع نوم و له مواقف كويسه كثير بس هالموقف الاخير طيّب نفسي وكرهته وقتها بس الحين اشتقت له :( و ادري انه متوقع ارجع بأي لحظه لان ياما رجع ولقاني قدامه بالبيت او اتصل و الح عليه يرجعني و و الخ او اكلمه اعاتبه ونتهاوش بعدها نتصالح ،، لكن هالمره عاتبت مره وحده وسكت عنه و اول مره كذا
|
رد: اشتقت له وما ودي ابادر بال
انزين خلاص اختي حالياً لاتتواصلين وياه
خاصة قلتي انه تعود انتي تبادرين ويحصلج جدامه دايماً اذا مشتاقة له ممكن تتصلين فيه مب عشان تبينين له انج مشتاقة خبريه انج تبين فلوس عشان تخلصين باجي الامور للبيبي وهو ملزوم يعطيج واطلبي من المواقع والله اسهل واريح عندج موقع نكست ويوصلون لين البيت خليه يعطيج رقم بطاقته واطلبي وهالمره بعد ماتربين ان شاء الله بالسلامه كلميه بجديه عن موضوع المانع وانه هالشي بيأثر على صحتج وانتي تبين تعطينه من وقتج واذا حملتي ماراح تقدرين تعطين عيالج حقهم ولا هو ناقشيه بهدوء يمكن مايبغيج تاخذين حبوب جربوا عالاقل العزل الطبيعي او اي وسيله ثانيه لانه في رياييل مايرضون حريمهم ياخذون حبوب |
رد: اشتقت له وما ودي ابادر بال
ماراح يرضى يعطيني بس انزل كرامتي عالفاضي راح يقول مالي دخل دبري نفسك ومن هالكلام .. و المانع رفض العزل ورفض الحبوب و رفض كل شي بس هالمره من اولد ان شاء الله وقبل الاربعين اخذ سواء برضاه او غصب عنه سواء قدامه او من وراه لان هلكت وفوق هذا يعايرني بتعبي وهو المسؤول .. بحاول امنع نفسي من التواصل معه لين هو يكلمني من نفسه حتى لو بعد سنه
|
رد: اشتقت له وما ودي ابادر بال
اختي هو فعلا ماله حق مايعطيج مصروف لعيالج وعشان تخلصين امور البيبي
كلميه حاولي مره ثانيه اذا رفض قولي له بضطر ادخل احد من الاهل اذا رفضت تعطيني لانه هذا حق من حقوقج ينفق عليج وعلى عياله وفي نفس حالتكم اظن افضل شي يعطيج مصروف شهري لج وللعيال بدون ماتكلمينه كل مره اما المانع ف اسألي شيخ دين اذا يجوز تستخدمين مانع بدون رضاه وعلمه في نفس حالتج |
رد: اشتقت له وما ودي ابادر بال
هو مايعطيني مصروف شهري بس اذا احتجت شي ياخذني للسوق وهو يحاسب او يمسكني المبلغ اللي ابيه بس بشرط مايتعدا ال300 ههههههه مع ان حالته ممتازه و راتبه كبير ماشاء الله بس حريص ع هالنقطه بسبب تربية اهله لان كلهم كذا ...
ولما اقول له ليه ماتعطيني بدون ما اطلبك يقول ماني مقصر عليكم بشي وفعلا اذا كنت عنده ما احتاج شي واذا طلبته يعطيني .. بس اذا كان زعلان يقول لي دبري نفسك عشان يضغط علي و اتورط وارجع له .. والحمدلله لقيت لي خوات هنا يحسون بمعاناتي وهالمنتدى هو المتنفس الوحيد لي .. الله لايحرمني من مساعدتكم |
رد: اشتقت له وما ودي ابادر بال
الله يهون عليك
بمجرد ما تطلعين بالسلامة لازم تعملين مانع وبما انه ما يحب يعزل مالك الاالحبوب وهي خاصة بالرضاعة وبعد 3اشهر اعملي اللولب خلي جسمك يرتاح خذيها نصيحة ما تنفعك الا صحتك مع الي مثل ازواجنا لما نمرض ما يحتملونا اذا اهتمي بنفسك زوجك شاب على ما اظن ليش مستعجل على الاولاد عندكم وقت استمتعوا بشبابكم لو كل 3سنوات تجيبين بيبي تقدري تجيبي فريق كرة قدم ههه طبعا حبيبتي لازم تقنعينه بذلك ويوافق وخلي الدكتورة تساعدك في ذلك |
رد: اشتقت له وما ودي ابادر بال
اي والله صحتي اهم شي .. وفعلا لسا شباب هو توه 27 تقريبا وانا 24 بس اهله يحبون الحمل بس انا مقرره ان من اولد ان شاء الله راح امنع لان والله جد الكل يقول لي ماتنفعك الا صحتك وبنت و ولد نعمه من الله وبكره لاخربت صحتي ولا طحت ولا شي .. مايهمه وعلى طووول راح يدور ع وحده متفرغه له وصحتها تمام و و الخ ..
انا قررت اتجاهله وبحاول قد ما اقدر ان مافكر فيه وبشوف لي شي يسليني عنه لين الله يفرجها |
رد: اشتقت له وما ودي ابادر بال
بس انا محتاره كيف اتصرف ؟
يعني اختفي من مواقع التواصل نهائي وحتى سناباته ما اشوفها ولا انشر شي وكذا ؟ ولا عادي اشوف سناباته بدون تعليق وانشر سنابات بنتي و سنابات عاديه يوميه كالعاده ؟ أي افضل |
رد: اشتقت له وما ودي ابادر بال
وعليكم السلام ورحمة الله وبركاته عودّتِ زوجك أنّك انت اللي ترجعي له, لأنّك كنت انت اللي تصعدي الأمور في خلافاتكم لكن المرّة هذه هو زوّدها شوية من ناحية أنّه يعاتبك على ما ليس بيدك ! اهتمي بنفسك ولا تشغلي بالك بزوجك, لما يهدأ ويراجع نفسه مصيره يشتاق لك وهو اللي يراجعك, فاصبري ,,, أما عن طلبك الهدية, فهي في غير وقتها لا تطلبي منه أمور يعتبرها كماليات وغير مهمّة في أوقات يكون مزنوق ومشغول بأي شيء أو متضايق من أيّ شيء,,, ثمّ يا ليت تتنازلي عن ذكرى هي أقرب للبدعة ويعوّضك الله بخير منها ,, |
رد: اشتقت له وما ودي ابادر بال
معك حق هالمره انا ماني غلطانه ولا كبرت الموضوع .. وبالنسبه للذكرى ما ابي لاهدايا ولا شي كثر مابي كلمه حلوه بهالمناسبه بس حرمني من هالشي وجلس يعاتب ويسوي وانا بدون شي نفسيتي تعبانه بسبب الحمل والبنت والخوف من الولاده والتفكير بكل شي .. لكن ماجاوبتي ع سؤالي الاخير ..
|
رد: اشتقت له وما ودي ابادر بال
فعلا عودتيه وصار عادي معه يعرف انك بتردي
لا تلغي تواصلك في برامج التواصل ولكن اذا ينفع لا تشوفي حالاته وصوري اللي يريحك في نفس الوقت سوي اللي يريحك الله يعينك صحتك اهم واهم واهم |
رد: اشتقت له وما ودي ابادر بال
اقتباس:
ليش تختفي من مواقع التواصل نهائيا؟ خليك مثل ما كنتِ انشري كالعادة, ومن دون مبالغة, لكن قلّلي من اهتمامك بما ينشر هو ولا تعلّقي عليه, |
رد: اشتقت له وما ودي ابادر بال
ماصار شي جديد .. طبقت النصايح ونشرت عادي ويشوف سناباتي واشوف سناباته وبدون أي تعليق .. و لان بنتي تعبانه صورتها وكتبت الله يشفي لي بنوتتي << ان شاء الله تتحرك مشاعره ويحس فيني وببنته لان تعببببببببت من تحمل المسؤوليه وخاصه وهي تعبانه كل شوي يطلع لي شي ،، اذا ما حس ولا سئل راح يتضاعف زعلي لانه يكون عرف ان بنته مريضه و طنش
|
رد: اشتقت له وما ودي ابادر بال
شاف وما علّق << لكن بحط له عذر انه بالدوام وننتظر ونشوف
|
رد: اشتقت له وما ودي ابادر بال
خلص دوامه ولسا ماسئل و ولا شي .. والله شي يقهر المفروض من شاف سئل .. المشكله هو يحبها ومتعلق فيها ومايحب يجيها ادنى شي بس راكب راسه ويبي انا اللي ابددددأ
|
رد: اشتقت له وما ودي ابادر بال
اقتباس:
يمكن يتغلّى عليك أو يظن أنّها حيلة منك لتجعليه يبادر اصبري, ولا تكوني عجولة بالوصول للنتائج هو لا بدّ يكون بداخله متأثّر لكن يكابر |
رد: اشتقت له وما ودي ابادر بال
اقتباس:
والصوره كأنها للكل لكن كنت مسويه تخصيص له |
رد: اشتقت له وما ودي ابادر بال
طولي بالك وخليك صبوره ولا تستعجلي ...
الحقيقه انت ماغلطتي على زوجك وهو بنفسه نزلك ببيت اهلك وطلب منك المكوث عندهم ... فهو محتاج فترة بعد حتى يشتاق لك .. ارى ان تختفي نهائيا حتى من مواقع التواصل وتجعلين تفكيرك بصحتك وبراحتك النفسيه .. وذكرى الزواج ما يسوى ولا له طعم بجو النكد والتعب قدامك ٣٦٥ يوم بالسنه تنبسطين فيه وتلقين فيه كلام طيب من زوجك ... حبكت على هاليوم؟ |
رد: اشتقت له وما ودي ابادر بال
اوووف والله تعبببببت .. ياربي ساعدني وصبرني
|
رد: اشتقت له وما ودي ابادر بال
والله تعبت .. جربت اكون متواجده بالمواقع وانشر عادي وكذا مانفع .. و حتى لما على بنته ماعلق ولا شي .. واليوم جربت حطيت شغلات تبين شوقي له و نفس الشي يشوف وساكت .. تعبت من الصرف ومن المسؤوليه .. واشتقت لبيتي وبنتي عند اهلي تتعبني كثير وحتى هم ملّوا منها وتعبوا .. و امي مرات من عصبيتها تطردنا وبعدها تندم وتعتذر و اخاف اولد وانا هنا 😭😭😭😭 ماجهزت شي ومن الحين يجيني طلق مع ان باقي اسبوع تقريبا عالتاسع .. المشكله اني ماغلطت بحقه والله ولا كان اعتذرت ورحت له .. مدري شلووون اصبر على هالوضع وعلى شوقي له 😭😭😭
|
رد: اشتقت له وما ودي ابادر بال
الاخت روح هادئة ،، انت بعمر اختي الصغيرة والفرق بيننا يزيد عن 10 سنوات ،، لذا ربما نصيحتي لك لا تكون ملائمة لسنك ،، كونك اكثر اندفاعا وحيوية
رأي اصبري واصبري فقط ،، احتسبي الاجر وادعي دوما اللهم اجرني في مصيبتي واخلف لي خيرا منها ،، ايام فضيلة ادعي في كل وقت حتى وانت تلاحقي بنتك ،، استغرب انك مليت من بيت اهلك وفي موضوع سابق كنت تقولي ارتاح في بيت اهلي ويساعدوني في البنت لكن زوجك كان رافض انك تروحي ،، لا تحطي شغلات تعبر لا عن شوق ولا شيء ،، مارسي حياتك طبيعي ،، طالما ما اخطأت وهو من ذهب بك لبيت اهلك ،، فاصبري واصبري حتى تشوفين ايش بيسوي هو ،، شكله معتمد على حبك وشوقك هم اللي بيرجعونك |
رد: اشتقت له وما ودي ابادر بال
وش دعوا المبالغة تاركك بالشارع والا ببيت اهلك ؟
خلك اقوى لاتصيرين مطبوره وخير ياطير شاف ولا علق ؟! ليش متازمة مرة! انا حامل بالثامن وعندي بنت ولا سويت سواتك ! مرة مرة ماتتحملين انتي مب فاهمة شلون بنت ماتعدت ثلاث سنين تهبل فيك وتجننك !! مدري من الام انتي والا هي مرة صعب تمسكينها وتسكرين عليك انتي وهي بوحدة من الغرف وتنسدحين وترتاحين وتريحين العالم ! كلنا عندنا اطفال حركين وعادي متحملين الوضع ! هذاي جالسة اكلمك وانا منسدحة وبنتي تحوس عندي ومسكرة علي الباب . مب نهاية العالم ! خلاص يا بنت قوي قلبك بلاش دلع انتي ماغلطتي ليه تنهارين وتتبكبكين !! ياشيخة الحين اطلعي عند امك وقوليلها تعزم وحدة من خالاتك والا خواتك والا اي شيء وانبسطي وغيري جو . هو قالك بوضوح لا تزعجيني .. خلي عندك دم ! خلص حليب بنتك ارسليله مسج : هلا خلص حليب البنت جب علبة اليوم الله يعافيك . وارتااحي واسترخي .. تعودي انك تكونين اقوى مو اي شي يهزك ويذبذبك بصراحة تلاقينه لاهي مع اهله واصدقاءه ولاجاب خبر لا لسناباتك ولا لرسايل الشوق . |
رد: اشتقت له وما ودي ابادر بال
ياروح اثقلي انتي ماغلطتي المفروض يكون ضميرك مرتاح
استانسي مع اهلك واتركي عنك التفكير والمراقبه ولو ماتهتمين في سناباته يكون احسن حتى سنابك لاترسلين فيه شي يغث وينكد خليه يعرف انك مرتاحه فيه والا بدونه ترى ماطارت الدنيا كلها يومين ما انتي قادره تصبرين |
رد: اشتقت له وما ودي ابادر بال
اسفه لو الكلام قاسي بس من حرتي عليك .. جالسة تتهورين انتي
هو الغلطان مو انتي فـ رجاء هليه هو يحس بزعلك ويحس بتانيب الضمير شوي خذي المصحف وقرري تختمينه مرة بهالايام الفضيله منها تلهين عنه ومنها تتعبدين ربي ارتاااحي واسترخي |
رد: اشتقت له وما ودي ابادر بال
ماحد فيكم فاهم علي ،، بقووووولكم بالتفصيييل وتحملووووووني ،،
انا ارتاح عند اهلي ما انكر هالشي وقلت لكم قبل لو يخليني ارتاح عندهم كم يوم وهو رافض .. ولما تركني مره بس ماكنا متزاعلين .. كان يمرني ونطلع و كل مايخلص غرض للبنت ع طول يجيبه لي عند الباب .. و اهلي كانوا يتحملوني لانه مو اكثر من 4 ايام .. ويكون في مده محدده ( لوقت معلوووووووم ) و اكون جايبه الاغراض اللي تلزمني بهالكم يوم .. امي الى الان ماتعرف شي ولا تدري متزاعلين ولا لا بس هي شاكه وقلت لها جالسين نتغلى على بعض ونتحدا مين يصبر عن الثاني اكثر .. و امي كبيره بالعمر و عندي اخت مطلقه وعندها بنت عمرها خمس سنوات و انا بنتي عمرها 11 شهر و حملي بنهاية الثامن .. لما اجلس برتاح امي تصير ورى بنتي وتشكي وتتعب ولما اقوم عليها اتعب انا و اختي يالله قايمه بالبيت وببنتها يعني هالمره و رب البيت انهم تغيررروا خاصه اختي تغيرت علي لسبب وكنت بنزل موضوع عنها لان في سبب لتغيرها ولما اناقشها تعصب علي .. و بيت اهلي يتعبني مع بنتي تدرون ليش ؟؟؟؟ لان مقدر اجلس بمكان لحالي انا وبنتي و امي من النوع اللي موسوسه لو بنتي تحبي وتوقف ع جدار او مركى ع طول تصرخ وتفز وتخرعني وافز معاها و اخر شي تكون بنتي واقفه عادي ماحولها شي وتقول تطيح تتعور وانا عارفه انها ماتتعور لان بنتي حررريصه توقف ولما بتحبي تنزل شوي شوي .. لما اشرب بنتي مويه تقول ذبحتيها خلص ( طيب بنتي بفترة تسنين وتحتاج تعويض سوائل ) امي ترفض هالشي حتى خدودها تقشروا .. جبت لها محلول من الصيدليه دايما نجيبه لها كل فترة تعبها و انها استفرغت بعده لان رضعت حليب ع طول ولعبت و امي قالت كللللله من هالمحلول لاعاد تعطينها ذبحها و الخ .. ابي انزل حفاضة بنتي واخليها تتهوى شوي لانها متحسسه ما اقدر .. وبنتي من جيت هنا مالعبت براحتها ولا لعبت معها و قبل امس بعد مانامت امي سرقت نفسي من الغرفه و طلعت بنتي لان ماجاها نوم.. وطلعت العاب بنت اختي و جالسه الاعبها و بعد ربع ساعه طلعت امي و شهقت ع طوووول مطلعه لها الالعااااب تبينها تاكلهم وتموت قلت يمه شوفي كلها العاب كبيره اعرف اختار ماجبتهم كلهم ،. قالت هذي تعورها و هذي و هذي قلت ليش قعدتي ع اساس نايمه قالت قعدني الازعاج !!!! قلت كل الالعاب هذي مافيييييييها صووووووووووووووووووووووووووت قالت قعدت لان خفت عالبنت تاكل لعبه شي وتغص و الخ ،، هذا كله نبذه عن شغلات بسيطه .. ولما نجلس بغرفه انا وبنتي مافيييي مفتاح بالغرفه وكل البيت شقه صغيره و سبحان الله من انظف الغرفه و نجلس بهدوء ع طول الغرفه تصير غاليه عالكل و. رايحين جايين عليها وتجي امي تفتح الباب تقول لاتسكررررين الباب عشان ماحد يجي يفتحه ويطيرها .. طيب يمه عطيني مفتاح تقول لا مفتاح تقفل بنت اختك ع نفسها .. خليه مفتوح .. لما اخليه مفتوح والصاله قدامنا بنتي تترك اللي بيدها و تطيرررر للصاله و لما تطلع يقولون تعالي خوذيها كبت الشاي تعالي و تعالي ،، تعبت نفسيا والله و جسديا هلكت بطني واصله لحلقي ويالله اتحرك ومع هذا اتحرك كثيررررر هنا وعندي اخو عصبي اكون منومه بنتي قبل شوي او من ساعه ولازم تصحى بوقت معروف عندي ومع هذا يصحى من النوم و يزااااقح و يضرب الباب وتفز بنتي و تخاف وبعدها يطير عنها النوووم ويجيها ارق ساعاات طويله .. وبنتي متعوده ع طيور الجنه و على مشايتها ، هنا من اشغل التلفزيون امي تقصر الصوت وتقول ازعجتونا وهذيك تزعل لان بس تشوف وماتسمع وجبت لها مشايه وتكسرت لان يجون اطفال هنا وكسروها لي مقدر اشتري كل يوم وحده . عشان كذا تعبت .. و امي بنفسها طردتني كذا مره و بعدها تتحسف والمشكله ان ماني مطلقه ع وجه ابيض ،، ماني عارفه مصيري اكره هالوضع .. وكله كووووم ومصاريف البنت كوووم ثاني و اهلي على قدددد حالهم يعني بالعربي الفصيح فقراااءءء ويالله متحملين نفسهم وانا لما جيت هنا مابي امرت حمل عليهم .. وعندي شغلي الخاص مصممة بس المشكله اللاب توب بالبيت ومابي امر بيتي .. و صرت احط نفسي بمواقف مع العملاء اخذ مقدم منهم و اوعدهم قريب اخلص الشغل وكل ماحد سئلني اقول اعذرني عندي ضغط بالعمل و من هالكلام ،، انا ماعمري اكلت حق احد والله وماعمري اخذت مقدم لانه مسؤوليه و امانه برقبتي ،، و كمان اخاف اولد هنا و مصاريف المولود لحالها تهد الحيل كيف بتصرف !!! وفعلا انا ماني صبوره و اكون صبوره اذا كنت عارفه وضعي بس كذا صعب ماتحمممل ، منتوا حاسين فيني بس لو تعيشون يوم واحد مكاني بتحسوون <<< هذا كلللللله اختصاااار لمعاناتي وما خفي اعظم هههههههههه |
رد: اشتقت له وما ودي ابادر بال
بقولكم ملاحظه بعد عشان ماتاخذون فكره سيئه عن امي .. هي تحبني اكثر خواتي لاني اصغر وحده وتحب بنتي بعد وحيل تتعب معنا وتحاول تريحني وتسوي كل اللي يطلع بيدها وهي اللي ربت بنت اختي .. بس مثلا لما تقصر صوت التلفزيون تكون خايفه ان اختي تنوم بنتها وازعجهم وبعدها تجي اختي تتمشكل معي .. وتخاف ان تصير علي مشاكل من اخواني و تخاف ع بنتي حيل ومو بس بنتي .. امي حيل حريصه عالصغار لدرجة الوسوسه وتراقب بنتي وبنت اختي وحتى اسلوبها كذا مع اختي وتحاسبها عالصغيره والكبيره مع ان بنتها كبيره بس امي ماتحب الاهمال ولو لثواني تحب الشخص يجي حاااار ويمشي ورى طفله مثل ظله بس انا بوضعي هذا مقدر اركض و اوقف كثير عشان كذا ببيتي اريح لي وهنا لما اجي ارتاح لازم ما اطول كثير لان اتعب .. هم يتحملون يومين ثلاث او اذا كنت طايحه من التعب وعندي ظروف صحيه مثل بالشهور الوسطى لما كنت بجهض والله حيل ارتحت عشان كذا حسبت بيبقون كذا دايم ههههههه
ولما جيتهم اول يومين وانا مسويه جراحه كمان داروني وريحوني كثيررر بس بعدها لا |
رد: اشتقت له وما ودي ابادر بال
هههه طب ليش الضحكة الي في الآخر
مادام الامر كذلك وانت تعبانة خلاص اعط لنفسك هواها وخليك مباشرة فلان احب ارجع البيت انا تعبانة واخاف يجيني الطلق مالك الا هذا |
رد: اشتقت له وما ودي ابادر بال
ضحكة قهر هههههههه ودي ابكي اصلا بس اول مره ما اضعف بسبب مشكله بيننا لان ماني غلطانه بس مره بكيت قهر لما امي طردتني وماقدر اروح له ..
اي صح بكمل بعد اكثر نقطة زاعجتني .. امي ماتحب تجلس بالبيت تحب تروح عند اخواني وخواتي وخوالي وعمتي والحين لها اكثر من اسبوع محبوسه بالبيت و رافضه تطلع وتسمعني كلام اووووف انا انحبست من جت هذي .. واسمعها تكلم جوال تقول ودي اجي بس مقدر اعذروني عندي فلانه واخاف ع بنتها لاراحت لبيتها اجي << اقول لها يا يمه ياحبيبتي روحي انا انتبه لبنتي تقول لا بالي يضل مشغول |
رد: اشتقت له وما ودي ابادر بال
أنتي غلطانه ليه تتسلفين عشان إحتياجات بنتك أرسلي له رساله بنتك ناقصها كذا وكذا ، ومثل ماقالت وفاء أرسلي له قولي تعبانه أبي بيتي أو خلي أخوك يوديك أو السواق وإذا جيتي بيتك خليك صامته بيني له إنك زعلانه من موقفه
|
رد: اشتقت له وما ودي ابادر بال
الموضوع طبيعي ومايحتاج يأخذ منحنى هو غلط علي أو أنا غلطت .. أو هو يعتذر لي أو أنا أعتذر
أتصلي على زوجك وقولي له تعال خذنا بنرجع البيت خلاص إرتحت عند أهلي والحين بأرجع بيتي وأنسي الموضوع ولا تفتحيه معاه .. وكأن شئ لم يحدث إلا لو هو فتحه .. فتكلمي بهدوء وقولي له .. أنا تعبانه من إبننا إللي في بطني وما بأدلع .. وكنت محتاجة منك أن توقف معاي حتى لو بكلمة حلوة .. لكن الله يسامحك |
رد: اشتقت له وما ودي ابادر بال
ما ابي اكلمه لان اعرف ردة فعله .. لو قلت له بنتك تعبانه بيقول مالي دخل ولو قلت له ناقصها كذا وكذا بيقول مالي دخل لا فيك ولا فيها دبري عمرك ولو قلت له تعال خذني بيقول خليك اصلا مرتاح كذا و انتي اشبعي من اهلك .. ولو ان رحت لبيتي و جا لقاني بيقول خير وش جابك ؟؟ << كل هالعبارات سمعتهم بس هو يكابر حتى لو مو مرتاح بدوني بيقول مرتاح وهو بقلبه وده ارجع اليوم قبل بكره .. بس دامني عارفه ردة فعله القاسيه اللي بعدها يلين ونتصالح ويجيني بس كذا اكون نزلت كرامتي و اكون انا اللي بادرت ومابي هالشي مابي يطلع مني حرف قبل ما هو يكلمني .. هو بس لو يتقدم خطوه بتقدم عشر
|
رد: اشتقت له وما ودي ابادر بال
اظنه شايف انه يعاقبك بتركك في بيت اهلك وهذا من شكواك انك تتعبين هناك
ومادامه ما يثمن روحتك او طلبك الرجوع ويعيرك بذلك فاصبري وان كانت عندك قطعة ذهب بيعيها واصرفي على روحك وبعد رجوعك ان شاء الله لو اكلت خبز وماء في بيت اهلك بينيله انك سعيدة ومبسوطة عشان ما يستعمله كوسيلة ضغط عليك |
رد: اشتقت له وما ودي ابادر بال
يازين امك الله يخليها لكم
مررررة تحب بناتكم الله يجزاها خير امك تحمليها وبيني لها حرصك والله يصلح ما بينكم يارب |
رد: اشتقت له وما ودي ابادر بال
اقتباس:
اقتباس:
|
| الساعة الآن 07:18 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©