|
أتزوج أو لا دلوني يا ناس؟؟؟
السلام عليكم ورحمة الله وبركاته
أخواني انا عضو جديد معكم وبصراحه لي 6 اشهر ونا متابع المنتدى وعجبني فيه الاحترام والردود الي مافيها جرح او تعدي على كرامة العضو موضوعي بختصار يمكن بسيط او تافه لكن احاسي يقول انه كبير جدا على الاقل بالنسبه لي انا يا زياد نفسي اتزوج واستقر وارتاح لكن خايف من كل شي شلون بترك امي لوحدها انا احبها لدرجه خياليه صدقوني أمي هي حياتي وهي كل شي بحياتي صدقوني مهما اتكلم ما اوفيها حقها تصدقون ونا اكتب الحين نزلت دمعه مادري ليش حياتي بختصار ماعندي يمين او يسار بكل بساطه عشت ماجربت الي يسونه شباب جيلي يمكن طلعت من مرحله الطفوله الي مرحله الرجوله تراني ما اتفشخر ابي اتكلم صدق ماتسمعون لكن تشوفون اصغر واحد من اخواني الشباب والبنات وحنا كثار عددنا 13 عمري 23 طلعت من الثنوي وتوظفت ودرست في نفس الوقت واشتغلت طلعت قرض من البنك وتوفقت وزاد راس مالي ودخلت مع اخوي شريك في ارض وارتفعت وطلعت قرض ثانيه مره المهم اشتغلت والحمد لله وفقني الله وكل شي بالحلال ولا لا اسهم ولا شي اخوي يبني بيوت ويبيع ونا اشرف عليها ويعطيني نسبه من الارباح لين دخلت معه شريك بالثلث وصرت اخذ الثلث من الارباح مع الاشرف اتجمعت الفلوس ريال فوق ريال وصار عندي ملبغ حلو اقدر اشتري فيه بيت بدون اقساط ولا شي وتخرجت من دراستي وانتقلت بوظيفه ممتازه براتب ممتاز ولله الحمد واشتريت سياره بس تدرون ايش مشكلتيي احس فيه شي ناقصني ابي وحده تشاركني حياتي تفهمني احس ابي اتكلم معها اخذ رئيها فهمتوني تراني ماعرف اتكلم فكرت اتزوج بس أمي اخليها طيب شلون اقدر أحس امي متعلقه فيني كثير وين ماراوح تدق علي حتى على الغدى او العشى كني طفل اذا بغينا نطلع تجي معي انا اشياء كثيره اتغداى انا وياها امي كبيره عمرها 65 سنه صدق انها ماتعرف تقرا ولا تكتب لكن هي الي وصلتني لهذا المستوى انا مدين لمي بحياتي احس اذا تزوجت بيضيق صدرها ونا مايهون على اشوف امي اخر عمرها لوحدا ابوي متوفي يمكن احساسي غبي بس لا تقولون هذا دلوعه امه بس انا قلبي طيب ابي اسعد امي حتى لو على حساب حياتي حتى لو ما تزوج طول عمري وامي تبيني اتزوج بس اذا فكرت بيني وبين نفسي اقول امي اخر عمرها تصير لوحدها كل واحد مع زوجته الا امي ويارب يصير يومي قبل يومها ولا اشوف ذاك اليوم الي تفارقني امي فيه يارب بكمل قصتي مع اني ادري انها مب مفهومه بس اعذروني تراني ارتحت انا كني هجمت عليكم بس اعذروني |
امك اكيد تبغى سعادتم وتشوفك عريس اليوم قبل بكره وتشيل اطفالك وتلعبهم ليش تحرمها من هذا الاحساس؟؟
انت شكلك ولد بار ولو اتزوجت واضح انك مارح تقصر بحق امك..دور على زوجه تقبل تعيش مع امك وبكذا انتهت المشكله.. |
زياد اول شي قصتك مفهومه بس تبي نصيحتي اتزوج وحده تخاف ربها ولا تحسس امك انها فقدتك لان ذا الشي بيدك انت صدقني يعني حسسها ان رغم اتيان زوجه جديده عندك فهي الأهم ياما ناس متزوجين ولأهلهم افضل ناس وبعدين امك ودها تفرح فيك بلاش دلع يمكن انا كلامي مو مفهوم بس حبيت انصحك وان شاء الله قريب اسمع انك عريس بالمنتدى
ومبروك مقدما |
وعليكم السلام ورحمة الله وبركاته
ياأخي خذ الأمور ببساطه تزوج وأمك تسكن معك بنفس البيت وفرح قلبها بشوفة عيالك ونصيحتي لك إذا عندك خاله وعندها بنات متدينات إخطب منهم الله يوفقك لكل مافيه خير وصلاح |
بالعكسسسسسس امك راح تفرح لزواااجك
اهم شيء تختار المراه الصالحه اللي تحترم امك وتقدرها وتعدها مثل امهاا وانت بعد زواجك لاتترك امك كل يوم زياره لهاا واذا سافرت لازم تجيب هديه لها او في فترات متباعده تهديها شيء واذا ماقدرت تزورها تلفوون تطمن عليهااا وتسالها عن احوالها وش محتااجه المشكله في اللي يتزوج وينسى امه واهله واللي مافي خيرلامه مافي خير لزوجته هذي معرووفه توكل على الله وتزوج واذا على السكن خل سكن قريب جدا وملااصق لسكن امك وكل يوم تطمن عليها الله يسعدك وييسر امرك |
كرستاله ربي يعطيك العافيه والف شكر على ردك لي وفيتي وكفيتي
فنار الليل ربي يوفقك رفعتي معنوياتي وفهمتي الموضوع بس المشكله فيني ماودي امي تحس بشي ولا ودي يتغير عليها شي ابيها ماتحتاج لحد ابيها دايم فوق ولا ابي شي ينقصها ونا احس زواجي بيغير اشياء كثيره الزوجه لها حقوق ولا ودي اظلمها ولا ودي احسس امي انها وحيده وهي كبيره بالسن fah اسمك صعب ونا ودي ولله بنات خاله موجود بس كبار اصغر وحده اكبر مني با 10 سنوات غلا القلب اكيد امي بتفرح اانا متأكد بس تتوقعين ماراح يتغير عليها شي تتوقعين اذا تزوجت بفطر مع امي وبتغدا معها وبتعشا معها تسولف علي وسولف عليها وتعطيني من ها الحكي الي يبرد قلبها ونا أمشي لها وسايرها ووديها وجيبها وتحكيلي عن نخلها صدقيني على الاقل بيكون فيه تغيير لو 20 % وهذا الي ما ابيه انا حرمت نفسي من كل شي وكلي سعاده عشان امي حاولت اني اكبر بسرعه وافهم كل شي عشانها |
إختر إمرأة صالحة
تقبل العيش مع والدتك إن شاء الله مايسير تغيير في حياتك وتمون زي ماهي كانت مع أمك إلي يتغير عليك حياتك مع زوجتك |
ابد يازياد ماراح تترك امك وحيده ومو معنى انك اتزوجت انك تركت امك او نقصتها شي وزي ماقالوا الاخوات سكنها عندك ترى بتكون هي البركه في البيت اسأل الله ان يرزقك المرأه الصالحه وان يكسبك اجر محبتك وخوفك على والدتك
|
دعنــــي قبل ان ابـــــــدي رأيي ان اهنئ امـــــــــك على تربيتها لك فأنت كمـــا يبدو لــــي نعـــــــــم الولــــــــد البــــــار والان مـــا الحل صعــــب ان اقول لك ان تتزوج وانه لن يتغير شئ بلا هناك امور كثيرة ستتغير والا ستظلم بنت الناس معك فكما قلت الزوجة لها حقوق ايضا واي امرأة ستتفهم الحد المعقول من برك لوالدتك لكن ان تتفهم بقاءك مع والدتك 24 ساعة فأظن انك بحاجة لفتاة من نوع نادر اعذرني اخي انا واقعية واعلم كيف تفكر الفتيات ولكن هذا لا يعني ان لا تتزوج ليس حلا والدتك نفسها تود زواجك لكي ترتاح وتطمئن قبل ان يوافيها الاجل هذا شعور كل امهاتنا وانت يا اخي الكريم ارحها وتزوج وانجب اطفالا يسلونها وتربيهم كما ربتك ... وكل ما عليك اخي هو ان تتقدم لفتاة ملتزمة تخاف الله في والدتك وتوضح لها اثناء الرؤية مكانة والدتك وانها عليها ان تتحمل الوضع فيما بعد بحيث لا يكون لها عذر بأن لا تتقبل الوضع مستقبلا والله يكتب اللي فيه الخير . . . اسمــاء |
اقتباس:
ونعــــــــــم الرأي.. |
| الساعة الآن 08:58 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©