|
زوجي وسفراته
السلام عليكم ورحمه الله وبركاته
اااااه والله تعبت وطفشت ومليت حاولت اصبرت اتحمل ماااااااااااافي فايده انا كنتبت اكثر من مره عن سفرات زوجي كل اجازه لازم يسافر والعذر هو العمل لانه تاجر ولازم يسافر عشان يجيب بضاعه اخر سفره له كانت في اجازه الصيف وكان يقول ماراح اسافر في الصيف لاننا ناوين نسافر انا وهو فاجئني قبل سفرتنا باسبوعين بسفره قلت له مو انت تقول ماراح اسافر قال اذا ماسافرت الحين متى اسافر لازم اروح واعذار خرابيط المهم سكت لانه اذا رجع بيسافر بي المهم تأخر في سفرته واخر عشره ايام ما كلمني انا انشغلت عليه وخفت معقوله 10 ايام ولا يكلم وقررت اني ازعل عليه اذا رجع بالسلامه واقوله يشوف له حل ولا ابي اسافر ولا شي اهم شي يشوف حل نهائي لسفراته لما رجع كان باقي على سفرتنا يومين قلت ما ابي اسافر لازم تشوف لي حل في هالسفرات قلت له توعدني انك اذا سافرت كل 3 ايام تكلمني ومو كل اجازه تسافر على الاقل اجلس معنا في الاعياد تخيلو كل عيد مسافر عيد الفطر وعيد الحج والاجازه الصيفيه المهم قال اوعدك ماراح اسافر وبتعيد معكم السنه هذي قلت له سافر في عطله الحج وفي الصيف انا راضيه بس مو كل اجازه تسافر قال طيب ابشري واليوم جاي يقولي بسافر اذا عطلنا يا الخميس او الاحد قلت مو انت تقول ماراح اسافر قال لازم اروح اجيب بضاعه وهذا شغل تحملي قلت ليه توعدني وتخلف قال لما عرفت انهم قدمو العطله قلت فرصه اروح اشوف رزقي بصراحه انا مدري وش اسوي تعبت ما اقدر اتحمل الحياه هذي كل يوم سفر واتعيد لحالي مره وحده بس تعيدنا مع بعض وحتى في اول يوم العيد راح وسافر انا الي قاهرني اني مو مصدقه ان كل هذا شغل والي يخليني اتأكد اني شفت جوازه لما رجع من سفرته الي قبل هذي وشفت ان العشره ايام الي ماكلمني فيها قبل مايرجع كان رايح للفلبين ولما صارحته قال انا رايح عشان الفيزا دخلت بس عشان الفيزا وطلعت في نفس اليوم ونا شفت تاريخ الدخول والخروج عشره ايام قبل لا يرجع زوجي يخاف الله بس بصراحه ما اثق فيه حتى لما سافرنا مع بعض كان لازم يطلع لحاله في الليل وقوله بروح معاك يقول انا بروح لمقهى انترنت ماينفع تروحين صح كان مدلعني واستانست في السفره بس كانت طلعاته في الليل تضايقني رغم اني احيانا اشك فيه عشان كذا اروح انام بدري اشوف اختبره اقول اذا كان طالع عشان حريموخرابيط بيجي ينام على طول واذا طلعته مو عشان حريم اكيد بيصحيني وبيحلي معاي وكان كل مايجي لازم يصحيني واحيانا اقوله انا تعبانه بنام ( اختبره)) يقول انا مشتاق لك وابيك وكان كل يوم لازم ينام معي عشان كذا اتطمنت شوي قلت يمكن اكون ظالمته بس لما شفت الجواز ضاق صدري ليه يروح للفلبين؟ ليه يكذب علي صح اهوراح للدوله الي ياخذ منها بضاعه بس جلس اسبوع وطلع للفلبين وجلس 10 ايام الحين انا محتاره وش اسوي مليت من سفراته قلت له ترا بزعل عليك حرام كل سنه مانتعيد معك دايما مسافر يقول خلاص انا علمتك وفهمتك ان الشغل يحتاج سفر وانتي اصبري الي قاهرني انه مقصر في البيت يعني اذا خرب شي في البيت مايصلحه بسرعه اذا قلت اللمبات محترقه حقت المجلس وبيجينا ضيوف تخيلو لها سنه محترقه وما صلحها احيانا اعطيه مفارش يوديها للمغسله من الشتاء الي راح يعني من سنه حاطتها عند الباب وكل يوم يقول بكره وفي الشغل على طول يسافر مايفوت لكن في بيته مقصر ولا تتوقعون ان هذا بخل بالعكس هو كريم ويمكن بعد مسرف بس بارد من ناحيت بيته قولولي وش الحل سفراته وعدم اهتمامه بمسؤليه بيته انا قررت اذا بيسافر باخذ اغراضي وروح بيت اهلي بلا رجعه لاني تعبت وما اقدر اتحمل اكثر لاتبخلون علي بردودكم الحقوني بحلول قبل موعد سفره |
والله انا قرأت قصتك وما فيها شئ اختى زوجتك يشتغل ويسافر عشان شغله
ليش زعلانه لا تقولين الا الله يعينه وحاولى اختى تقربيه من البيت وخصوصا فى الاعياد حاولى تقولين له نروح عند فلان او نونس الاولاد وما فى داعى للقلق او الوسواس زوجك يبى يأمن حياتكم المستقبلية |
الف شكر على الرد
المشكله سفراته كثيره وفي الاعياد والمناسبات مايكون معانا هذا مو كله شغل |
ينقل الموضوع لقسم المتزوجين مكانه الأنسب
|
ومو كل اجازه تسافر على الاقل اجلس معنا في الاعياد تخيلو كل عيد مسافر عيد الفطر وعيد الحج والاجازه الصيفيه
اش معنا كل عيد ليش ما يجيب بضاعته في وقت ثاني ؟؟؟ حاولي معالجة موضوعك بهدو ومناقشه ومصارحه |
طيب اقترحي انك تسافري معاه..
|
صن رايز
زوجي موظف ويعمل بالتجاره في نفس الوقت عشان كذا لما تجي اجازه على طول يسافر وما يهمه عيد والا مو عيد يقول اهم شي الاقي فرصه اجيب بضاعه جديده شكرا للرد Crestalla اشكرك على الرد انا قلت له بسافر معاك يقول ما ينفع ما في امكانيه ماديه عشان تسافري معاي وهو بيسكن في شقه حقت صديقه ويقول صعبه تجين معي بستاجر سكن والماده ما تسمح لانه هو تاجر مبتداء له سنه في التجاره وتوه في بدايه الطريق |
اقترحي عليه يشوف له شخص فاضي يفهمه الشغلة ويسافر بدله ويعطيه تعبه وهو يتفضا لك حالتك صعبه مايصير كذا وبعدين التجارة ابوابها واسعة يعني لازم يسافر برا.
|
أختي العروس الله يعينك ويوفقك ويقرب لك زوجك ويجمعكم على الخير والمودة والطاعة
أختي عليك بالصبر هكذا الحياة كما يقولون ــ ما تصفى لأحد ـ لابد من المشاكل ,,,, الحمد الله وضعك العام جميل جداً وممتاز ويبدو إن زوجك من خلال الموضوع كريم وأخلاق ودين ... الحمد الله لكن هذي مشكلة بسيطة حاولي أن تصغريها في عينك حتى تصغر ,,,, صحيح أنه مخطأ في حقك من هذا الجانب لكن ما لك إلا الدعاء والصبر ... أنا عندي إقتراح إجلسي معه وناقشيه في الموضوع بطريقة أخرى قولي كم سفرة تسافر في السنة ثلاث أربع خذ راحتك سافر متى شئت بس بشرط سفره من السفرات بسافر معك .... يمكن هذا الإقتراح ينفع .... حل وسط |
كلام من القلب
اشكرك على الرد انا قلت له الفكره بس هو يقول انا لازم اجيب بضاعه على ذوقي وما اثق في احد غيري وانا عارف الاماكن والمصانع وصعبه احد غيري يروح الرِّفق انا كل شي اقترحته عليه قلت له مره اروح معاك ويقول ان شاء الله واذا جت السفره يقول ماينفع انا اودي لسياحه مو لشغل دايما يرفض اني اروحمعاه وهذا الي قاهرني |
| الساعة الآن 06:23 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©