|
فـرجــوا عني..ابوي بدأ مراهقة الخمسين!!
تــكـفـــوون ثـم تـكـفـــــون ثـم ثـكــــــــــــفون لاتخولني ...!! التفكير والوساوس اللى براسي بتذبحني !! الهم اللى شايلته تعبني:( انا بِِكر أهلي ومتزوجه.. ولي اخوين الكبار متغربين لظروفهم .. يعني في بيت اهلي الله يحفظهم باقي اخواني الصغار الله يسعدهم ياربي..اثنين منهم بالمراهقه واثنين اطفال.. المشكله اني شفت بوادر,,وبالاصح اقدر أأكدها للاسف:(:( ان ابوي وللاسف مترزج مسيار <<وياصعب هالكلمه طلعت مني:( المشكله مو بس انا اللى اكشفت هالشيء للاسف اختي اللى عمرهـــ12 سنه إكتشفت هالامـر .. وهي عندها اساساً عقده من الرجال..وبعد هالموضوع صايرهـ يومياً تدق على بالليليل وتصيييييح وربي ان البنت تعور القلب همها لحاله شيء.....:( الشيء الثاني ان حياة ابوي وامي كانت ولله الحمد مستقرهـ وتجيها مشاكل مثل كل بيت مشاكل تمر وتعدي.. لكن بالفترهـ الاخيرهـ صايره مُلاحظه وبشكل واااضح ..(( ووش الحل معها..كيف اخليهم يرجعون مثل قبل)) بدرجة انكم لو تتخيلوني اني لما اروح لبيت اهلي اخوي الصغير اللى عمرهــ6 سنوات يقولي ان ابوي اليوم هو وامي تهاوشوا يعني عندهم صاير شيء معتاد للاسف:( وبدأ يأثر عليهم نفسياً وهذا الخوف..دايم خواني يشكون لي من مشاكل ابوي وامي المتكرره وقدامهم للاسف..يعني صاير ابوي شرارهـ على اتفه شيء يسوي سالفه!! واكيد يبي يبرر فعلته لذاته :( المشكله اني شُلة حركتي عن التصرف.. ابوي رافع مسؤوليته عن البيت والعيال وامي الله يحفظها هي اللى تتحمل مسؤولية البيت والماديات والعيال تقريباً كل شيء من امور البيت..يعني ابوي اذا جاء بس ياكل او ينام او عند التلفزيون..لاوبعد يعصب لما يشكي له واحد من اخواني او تشكي له امي عن مشاكل العيال والبيت..ياناس لازم يتحمل هو على باله يبي يعيش براحه وبدون مسؤوليه وبدون هم..صاير لابعد حد مايحتمل اي كلمه..ورافع يده تماماً من مسؤولية البيت يعني بالمنختصر(( ادري كثرت عليكم )) .. ** وش الحيله اللى بيدي وش اتصرف ووش اسوي هذا ابوي وهذي امي:( انا عارفه لو امي بتدري بتصير مشاكل مو طبيعيه للاسف..وخايفه اكلم ابوي ويقول مادامك دريتي خلاص قولي لامك ويعلنها..وخايفه اسكت وتزيد السالفه..فرجوا على الله يفرج عليكم دنيا وآخره..!! كيف ارجع الوضع الطبيعي..كيف ارجع الحياة المستقره للى فقدناها:( ** اختي الصغيره المنهارهـ وش اسوي معها حرام تعيش هالعذاب النفسي وتجلس كل يوم تتالم منه..مشكلتها حساسه مررهـ وعندها ابوي هو مثلها بحياتها..وهي للاسف عندها عقده من الرجال ماادري بعد هالسالفه اللى درت عنها كيف بعالج وضعها..احاول دائماً اثبت لها العكس لكن اللحين....!!! آســفـــه وربي ماادري وش اقول..مو قادهـ ارتب كلامي..دموعي غطت على كل شيء خلاصث تعبت من الهم:( (( من فرج عن مؤمن كربة من كرب الدنيا فرج الله عنه كربة من كرب يوم القايمه)) . |
هلا فيك اختي وهدي بالك وكل مشكله لها حل
تصدقين كانك تتكلمين عن حالنا قبل كم شهر بس الحمدالله تغير والى الافضل والله لايغير علينا بدايه من يوم امي سمعت بالصدفه الوالد يكلم واحد بالجوال يبي يتزوج مسيار وامي قومت البيت فوق روسنا بصراحه انا وقفت مع ابوي وقلتله تتزوج ثانيه وبالحلال لامسيار ولاشي ودخلتها براسه تخيلي وبنفس الوقت امي ماكانت تكلمني لان بصراحه انا كل همي ابعد ابوي عن المسيار وكمان الي مشجعه واحد ماانطيقه ومو من نفس جنسيتنا .... وبنفس الوقت نصحت امي وقلتلها تغير اسلوبها ومعاملتها مع ابوي وتتشيك واذا شفتيه دخل علينا وكنت تخاصمين احد من اخواني اقطعي السالفه يعني بصراحه اعتبرت امي كانها واحده من زميلاتي ونصحتها بااشياء ماتوقعت انها تخرج مني اشياء خاصه لكن مابيدي الا هالشي لان صدقيني في خلل فبيتكم ولازم تنقذين اسرتكم والحين ماتتتتتتصدقين اللهم لك الحمد مع ان الوالد كان يبدأ يشتري اثاث جديد للملحق لكن تغير 180 د ونسي كل شي وحتى مااعاد جاب سيره ؟؟؟ والرجل مهما كبر ماايدور الا على الراحه والاستقرار والهدوء والله يهدي بالك ويرجع السعاده لبيتكم ويخليلك والديك واخوانك تحيتي اختك الهم |
:30: الله يعينك اختي
لأني بصراحه ماادري شقول مااقدر اقول غير الله يصبرك على ما بلاك |
مااقدر اقول غير الله يصبرك على ما بلاك
|
ماأدري شقولك
متزوج مسيار احسن من يروح يسوي بلا الله يصبركم والله يحنن قلبه على امك واخوانك |
اختي 00
اخطأت امك بتحملها للامور المادية 00 الرجل يحب ممارسة هذا الدور مع المرأة 00 ويحب المرأة التي يمارس معها دوره 00 اعلم انه مستفيد ويريد منها الاستمرار بالصرف 00 لكنه حتماً سيبحث عن امرأة اخرى يمارس معها رجولته ليعود ابيك انصحي الام بما يلي 000 ان تدخل نفسها في مشروع او اي شيء يستهلك مالها 00 وتطلب مصروف من الوالد وتعيش على قدرته 00 دون ان تطلب منه فوق طاقته ولايلزم هذا التصرف ان تخبريها بزواج الوالد 00 بالنسبة لاختك الصغيرة طمنيها ان الامر مؤقت وستحل الامور وان هذا ممكن ان يحدث بأي بيت |
مرت إحدى أعز صديقاتي بنفس التجربة
والمؤلم هي أكبر أخواتها والباقي من الكبار أولاد وكل واحد مشغول في ناحية والأم تحمل نفسها لبيت أهلها وصديقتي تعاني ... المرّ أن والدها قبل ترقيته إلى لواء لم يكن أحد يهتم لأمره وفجأة أصبح الكل يحبه ويبحث عن رضاه فأرضاهم على حساب عائلته وتزوج بمن هي في سن بناته ... وترك كل شيء لذا سأنصحك بما نصحتها به كل ماتمرين به أزمة وقت وستذكرينها بعد حين لذا عليكِ أن تساعدي والدتك وتذكريها مرات كثيره بأخوتك وأخواتك وبمالها عندالله إن هي صبرت ... لابد أن تظهري تماسكك وتحدثي مع أختك أن هذا مايحصل في كل البيوت وإن لم يتطرق إليها أحد حتى لاتتعلق برأسها فكره سلبية عن والدها ... أتمنى لك الخير وإن كنت أعلم أنك ستواجهين الكثير |
ولي يجزاكم الجنه يااااارب .. ويفرج عنكم ويسعدكم ويهنيكم يارب .. وربي مالي الا الله ثم انتم .. ساعدووني.. وربي مو شايفه الشاشه من الدموع .. الموضوع تاكدت منه:( حياتي الزوجيه تاثرت غصب عني مو بيدي .. صرت طول الوقت مهمومه بس اناظر امي ودموعي حابستها بعيوني ولي يسلم قلوبكم علموني نورووني تكفووووون رااجيتكم قولوا لي وش اسوي.. اعلم امي بالموضوع او لا..؟؟؟ وخصوصاً قد سبق وقال ابوي لامي اني بتزوج عليك كمزحه يعني..وقالت له مابيردني الا الطلاق وبسافر لاهلي .. وعيالي يحبوني وهم اللى بيصيرون سند لي مو انت ... المشكله لو علمتها كل اخواني ظروفهم الدراسيه صعبه..لازم لهم الاطمئنان النفسي..وخصوصاً انهم بغربه!! وبتدمر نفسياتهم زياده على حياتهم:( المشكله ان امي عصبيه وطبعها حاره.. حاولت اليوم لمجرد اني اغير من اطباعها واسلوبها معاه بالتعامل قالت لي:بالحرف الواحد ((ليه انتي شايفه شيء على ابوك..شاكه بشىء ..سامعه شيء)) امي الله يهديها عندها ثقه عمياء بابوي بالعشره اللى معاه..يعني لو بقول لها احس انها بتنهار لانها الى الان تحبه وتعزه ويسوى عندها.. واخاف مااقول لها ويطول الموضوع ويستمر لفتره ((الله لايقدر)) ..وتصير قد تمسكة فيه الثانيه..ولو قلت عارفه النتيجه تكفووووووون ريحوني الله ريح بالكم (( برجع لردودكم باذن الله .. لكن نفسيتي ماتسمح لي ابداً اللحين..وصدقوني والله ثم والله ثم والله مايجيكم الا الدعــاء)) . |
بصراحه مادري وش اقولك لكن الله يصبرك
ولازم تراجعين نفسك ولا تخلين بيتك يتأثر مهما كان لاتدخلين الامور فبعضها لازم توزنينها ومن رائي اشوف انك تسكتين ولاتعلمينها وتنبهين اختك انها تسكت على الموضوع وتنساها وبنفس الوقت تحاولين بشتى الطرق تهدين من وضع البيت شوي يعني تنصحين امك بس بطريقه غير مباشره لان الامهات غالبآ مايحبون يسمعون من بناتهم نصائح وتحسسينها انها مقصره واهم شي حافظي على بيتك وانت بعد حاولي تهدين من الجو العائلي فبيتكم يعني تحاولين تشغلين الوالده اذا غير موظفه تنصحينها تدخل تحفيظ قرآن لان غالبآ وهم بهالسن يحسون بفراغ وان شاءالله فهمتي الي احاول اوصل لك وياليت تطمنينا بالاخبار وان شاءالله الامور الى الافضل والله يوفقك بحياتك العامه تحيتي اختك الهم |
انا اكره الرجل الذي لا يعدل
نفس الشيء صار مع امي تزوج عليها ابوي ولأسف ماعدل وتطلقت منه بعد عشرة اكثر من عشرين سنة وكانت ماتعرف تقرا وتكتب ولله الحمد دخلت مركز محو الامية ثم مركز تحفيظ القرآن وهي الآن الحمد لله وباحسن حال وتخبرني الله يحفظها بحالها آن ذاك يوم تزوج عليها ابوي وكان مايعدل بينهم وحالها الآن وتقول الانسان من غير العلم والايمان والتوحيد و قراءة القرآن لا يسوى شيء والله يا اختي انها مآسي مرت بها اغلب الاسر فاذا ضاقت بنا الدنيا مالنا الا الله ومثل ماقالت اختي التي قبلي اشغلي وقت فراغها وخاصة بالقرآن |
| الساعة الآن 12:23 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©