ريلي والسهر .. ما خليت شي ما سويته ..
 

السلام عليكم جميعاً ..

متزوجة من سنتين ونص بس ولا كأني متزوجة ..

والنتيجة طفلين كفلقة القمر ... كل مرة أعطيه فرصة علشانهم .. وإلا كان من زمان علاقتنا منتهية لأني مب قادرة ابداً أتأقلم على هذا الوضع ..

بتسألون المشكلة شو هي ؟

المشكلة أني ريلي واحد دايم السهر .. في القهوة وإلا ويا ربعه ما ادري وين .. وإلا في السينما .. من تزوجنا وهذا حاله .. هو طيب ويحبني بس مشكلته متعود ما يعرف يرد البيت وقت .. أنا اثق فيه ومتفهمة تعوده وتعلقه بربعه وسوالفهم بس اللي مكبر المشكلة اكثر انه يداوم في إمارة ثانية وما نلتقي إلا آخر الاسبوع وأنا طبعاُ ساكنة في بيت أهله .. يعني ما ينام عندي إلا ليلتين في الاسبوع بس .. تخيلوا ليلتين بس وبعد يسهر فيهم .. وما يرد البيت إلا خلاص تعبان ويبي ينام .. وإذا صار شي بينا يصير بكسل وبسرعة وبخطوات رتيبة وباردة ..في الفراش احس اني مع واحد عمره اربعين سنة مب شاب توه في العشرينات.. حاولت احتوي المشكلة بهدوء واحلها بعدة طرق منها :

1-الكلام والنقاش .. قلت له كل الاسبوع عندك ما حد يقول لك شي وهالليلتين خلهم لي .. عندك النهار بكبره روح وين ما تبي بس الليل لي انا .. والنتيجة .. كلام ووعود ما يتحقق منها شي ..

2- دلع وليالي رومانسية وحركات ما حركات كلها سويتها يستانس ويغمرني بالحب والحنان ليلتها بس ابداً ما كانت سبب انه يرد وقت ..

3- الباب قفلته مره عنه .. قام بوز وانقلب السحر على الساحر وسوى عمره هو اللي زعلان ليش تقفلين الباب عني ؟

4- لو ازعل يخليني ارقد بزعلي واحياناً يراضيني إذا كان مزودنها زيادة في السهر ونتكلم وننتهي بمواعيد عرقوب

5- قلت له خذ لنا شقة في الإمارة الثانية وخذنا وياك بنكون وياك طول الاسبوع واخر الاسبوع كيفك اسهر مثل ما تريد

بعد ما عجبه الاقتراح .. ما يريدنا نهد بيت ابوه .. لانه ما حد فيه غير امه وابوه ..

6- هددته مرة كنا متزاعلين اكلم ابوه عن هالسالفة .. بس ما سويت شي ابوه ريال كبير وبروحه مريض كافيه اللي فيه ..

7- اهلي ما اريد اوصل هالسالفة لهم .. ابوي بروحه عنده الضغط .. وأنا اصلاً ما اريد اصغر ريلي في عيونهم على سب هالسالفة ..

قلت بيصير عنده عيال وبيتغير عندنا اثنين الحين الله يحفظهم وهو مثل ما هو في موضوع السهر ..

خبروني شسوي كيف احل مشكلتي معاه .. والله تعبت واحس بقلبي مثل النار ... كل ويكند قهر وصياح وسهر لين الصبح اترياه يشرف ..

اكتب لكم مشكلتي الحين الساعة قربت على الثنتين الفجر وبعده ما شرف .. وين في السينما ويا الشباب .. وهذي اخر ليلة وباكر وراه دوام يعني ما بشوفه لين الخميس الياي ..

طرشت له توني اكثر من مسج اقوله مشتاقة لك تعال .. خاصة إنه ما صار بينا لقاء عاطفي من اسبوع .. عادي عنده

انا كان زوجي كذا يحب السهر وما يرجع الا مع الفجر مع اني كنت توني متزوجه يعني باقي عرسان واذا قلت ليش تسهر بر ى يقول ابغى اشم هوى واغير جو وبعدين طنشته وما صرت اسأله وسبحان الله بعد انجابي لولدي الاول خلودي صارت سهراته قليله والان عندي ثلاثة اولاد والله انه ما يطلع من البيت الا للضروره او العمل
يعني اختي ان شاء الله زوجك يتغير مع الايام ومع دعائك له بالهدايه واتمنى لك التوفيق حبيبتي وان يهدي لك زوجك يارب

توك اختي الكريمه انا زوجي كان مثلك وما تغير الابعد ثلاث سنوات وكل رجل وطبيعته...وتاكدي ان ماله علاقه مع غيرك....وانصحك ماتسالينه ابد واطنشينه وتشتغلي كان تدرسي او غيره ومع الوقت راح يمل.........

ينتقل لعالم المتزوجين



بوركتم

مشكورين على ردودكم الطيبة اللي رفعت معنوياتي ..

أنا ممكن اطنش عادي واخليه لين يمل .. بس المشكلة يا جماعة اني ما اشوفه غير آخر الاسبوع .. يعني المحصلة ليلتين ينام عندي بس وهذا اللي يقهرني ويخليني اعصب .. ليلتين هو موجود ومب موجود .. من ارقد العيال واقعد انتظره تخنقني العبرة .. تمر الساعة ورا الساعة وانا في ظلمة الليل بروحي لا انيس ولا ونيس ..

انا بعد مثلكم بس زوجي ينام طووووووووووووول النهااااااااااار وسهلر طول الليل مادري وين
مثل الاطرش بالزفة

وها الحال ما يرضيني بس شو اقدر اسوي اهدم حياتي واضيع مستقبل ولدنا


ليش بعض الريايييل ما يحسون شوي

انا معقود عليا وعلى وشك الانفصال
ومن ضمن المشاكل ان زوجى يريد ان يجعل اصدقائه واقاربه يسهروا عندنا بالبيت وما اعترض!!!
وقد نصحنى البعض انه سيتغير بعد الزواج
هل اعتبر مشكلتك هذه انذار لى ؟؟؟!!