|
لا عدمتك يا زوجي الحبيب...
هذي رساله بسيطه لكل زوجه ترى زوجها امام عينيها كل يوم ولا تحمد الله على وجوده في حياتها... رساله لكل زوجه ( تظن ) ان زوجها جزء من الروتين اليومي الممل.... الى كل زوجه لا تشكر زوجها ولو لمره وعلى اقل مجهوداته... الى كل زوجه اقول لها....... احمدي الله اولا.... و اشكري زوجك ثانيا انه بحياتك.... وفي نفس الوقت رساله لكل زوج يترك زوجته تصارع هذي الحياه بدونه...الى كل زوج لم يترك بصمة وجوده في حياة زوجته....الى كل زوج مستغني وعامل فيها ( ثقيل ) على زوجته....والله حرام هذي الحياه تمر بدون مشاركتكم سوا... من الاسبوع اللي فات وانا جالسه عند اهلي لظروف صحيه.... :20: من الاسبوع اللي فات وانا بجهه وزوجي بجهه....:29: المسكين صار يخلص شغله ويطق مشوار ساعه الى ساعه ونص علشان يجي بس يطمئن علي.... وكل ما صار وقت رجعته للبيت علشان يداوم الصباح احس انه يترك قلبه معاي ...مو هاين عليه يطلع ويخلينا....الله يحفظه ولا يحرمني منه:o ( قولوا ما شاء الله لا قوة الا بالله....العين حق) مراجعاتي كلها كانت معاه ....ويتصل علي يذكرني بالمواعيد..:27: ..ويحمسني اذا شافني مكسله...الله يعطيه الف عافيه والله ما قصر... بس هذا الاسبوع...ما قدر يترك دوامه بسبب ضغط العمل....بس عقله وقلبه عندي...كل شوي يتصل ويطمأن....وطبعا لأن حبي زوجي مو معاي صار لازم اكمل مراجعاتي بنفسي...:18: الله لا يوريكم على الشحططه اللي انا فيها..:( طبعا محتاجه لمواصلات....متعوده ابو وليد يجيبني ويوديني...واليوم كان لازم ادبر عمري....ما لقيت ابوي واخواني اختفوا ....ما بقي الا السواق...قلبي صار برجولي مو متعوده عليه.:24: ..الحيت على اختي تجي معاي ويااااااا الله وافقت لانها هي كمان تعبانه من الدراسه....الحمد لله امنت السواق.... جيت اتكلم معاه اختفى صوتي من الخرعه .....خليت اختي تتفاهم معاه....قعدت اقول في نفسي ....الله يسعد قلبك يابو وليد ما حديتني على اجنبي اتعامل معاه.... :22: ..رحت لمستشفى خاص معروف بضخامته... اول ما دخلت دخت من كثرة هالموظفين والاستقبالات......وسبحان الله حاجه غريبه توني انتبه لها...لما اكون معاه ما انتبه لاي رجل ... واليوم لاني لوحدي حسيت كان الرجال اجتمعوا من كل حدب وصوب في هذا المستشفى ....تعالوا دوروا لي ما تلقوني....خرررررررررررعه:24: :24: والله لا قبلها ولا بعدها..... مسوين حركاااااااااات مالها اي داعي من التعقيدات في الاجراءات....ستين الف موظف ومثلهم موظفات ومية استقبال وكم واحد علاقات عامه .... وطبعا اماكن للناس العاديين واماكن للشركات الخاصه مثلنا ....ولاني اول مره ادخله...كان لازم ملف جديد.... وهات يا معمعه في الاجراءات....وستين توقيع ومية ورقه وتصوير اوراق الى مالا نهايه....وحوووووووووووووووسه... صرت من داخلي اغلي غليان....حسيت الدنيا حر مع ان المستشفى فخم وبارد....والله شوي وابكي....احتجت اتكلم مع موظفين رجال....بحياتي معاك يابو وليد ما احتجت اتعامل معاهم...اختي انتبهت للقلق الحاصل. سألتني اشفيك؟...صحت فيها :19: قلت تتسلين علي مع وجهك انتي بعد....انصدمت وصارت ما تمشي جنبي من خرعتها.... المشكله ان الشغله الواحده ما يكملها موظف او موظفه واحده....الورقه علشان تكمل والله مريت على بنتين وثلاثه رجال..:19: . جا دور الدكتوره....ما دخلت عليها الا واعصابي مييييييح تحت في الحظيظ.... اعطتني الدوا....رحت اصرفه ....علشان الاقي الصيدليه كان لازم برضو اسأل رجل....جا يعطيني الصيدلي الادويه ..قام يضحك يطالعني بنص عين ويضحك..:19: :19: :19: ..كنت باحذفه بالشنطه على وجهه....صار يكلمني بميوووعه....يا اختي الوصفه قيمتها الف وثلاثمئة ريال....كيف تحبي تدفعينها؟ وصار يسوي حركات ما لامها دااااعي قهرني الله لا يسامحه... اخذت الكرت وعطيته ومشيت اموري....لمعلوماتكم....الكرت كرت امي مو لي....اشتريت الدوا على حسابها....الله لا يحرمني منها هي كمان....والدوا هو ابر منشطه للمبايض...الكلوميد ما نفع معاي ولا كاني تعالجت سنه كامله بالكلوميد...حسبي الله ونعم الوكيل....لا تنسوني من دعوه في ظهر الغيب دخيلتكم.... السواق انحرقت اعصابه....يا الله يا الله....كاننا احنا نشتغل عنده....الله يسعدك يابو وليد بحيااااااتك ما استعجلتني الله لا يحرمني منك .... رحت ابي اضرب اول ابره اضطريت اروح لمستشفى ثاني.....وبسم الله اول ما دخلت جو اثنين ممرضين ( نعم يا مدام؟) كأن حظي اليوم رجاااااااااااااالي خاااااااااااالص......ماعطيتهم وجه....رحت دورت على ممرضه والله يسعدها كانت متجاوبه... رجعت السياره والسواق صاير ينافخ من الزهق.... اول ما دخلت بيت اهلي طالعتني امي....تقول اشفيك وجهك مسود؟ قلت لاني بدون ابو وليد....رحت لغرفة البنات وقفلت على نفسي وبكيت....والله انا بدونك يابو وليد صفر على الشمال....مابقي احد ما احتجته في غيابك...بس والله مستغنيه عن العالم معاك... ولسا قدامي اسبوع كاااااامل من هذي الشحططه.....حسبي الله ونعم الوكيل.... معاه والله ما يحسسني باي شي من هذا كله ...يختار لي مقعد بعيد عن الرجال وهو يتمم الامور كلها.....مخدومه محشومه اللهم لك الحمد.....صدق عليه خرابيط اش كثر و افكار هدامه احيانا .....بس هو ولا عدمه.... لا عدمتك يا زوجي الحبيب |
الله يحفظك حبيبتي ويحفظ لك أبو وليد
والله يشفيك يارب كلامك أثر فيه كثير لأني جربته أثناء سفر زوجي مع إني كنت في بيت أهل ماينقصني شي والكل يهتم فيه بس سبحان الله الوحده من بعد ماتتزوج مالها إلا زوجها لو الناس كلهم معاها سبحان الخالق سبحانه |
الله يعينك عزيزتي...و ما تشوفين شر.. بالرغم من مرضك و يومك المتعب إلا أن كلماتك أسعدتني...الله يديم المحبة بينك و بين زوجك.. وفقك الله |
الله يرزقك ما تتمنين . .
ويخلي لك أبو وليد ويهديه ويسخره لك أكثر . . بس ولو طلع أبو وليد إنسان طيب جداً . . وياليت ما تشرهين عليه لأن معدنه أصيل . . بالتوفيق . . |
رزقكِ الله ماتتمنين .. وجمع بينكما على الخير .. |
الله يحفظ لك زوجك
ويرزقك بالذريه الصالحه امين |
الله يخليكم لبعض ويرزقني وإياكي بالذرية الصالحة
|
كلامك درر اختي العزيزة.. حقيقة كنت انوي كتابة موضوع قريب من موضوعك لكنني قرأت كلماتك وليس بعدها شئ أنا عكسك شعرت هذه الأيام بما تشعرين به لكن لأن زوجي على السرير الأبيض وتصدقين البيت من غيره مظلم واتمنى ابقى معه في المستشفى لكن والده مصر على البقاء هو معه .. صحيح أننا نختلف معهم .. نغضب منهم .. ونغضبهم احيانا لكن إذا حصل طارئ شعرنا بفقدهم فلو تذكرنا دائما حالنا في بعدهم عنا لتحملناهم فيما لايعجبنا منهم ولحاولنا ارضائهم بكل السبل .. اعلم انني اطلت الكلام وقد تكون كلمات مبعثرة لكنها ابت إلا أن تخرج بعد قرأتي لما خطت أناملك .. اسعدك الله مع أباوليد ورزقني واياك الذرية الصالحة عاجلا غير اجل ..
|
الله الله
الله يحفظه لك و يحفظك له و الله يبعد عنكم العين يا قلبي الف ماشاء الله و ان شاء الله دوم محبة و ود و احسان بينكم |
اقتباس:
يا هلا بالحلم الدافئ كلامك صحيح عزيزتي ....الله يهدي هالرجال اذا كانوا معنا شيبوا روسنا بدلعهم....بس اذا غابوا ...والله ما نسوى الف شكر على المرور الطيب |
| الساعة الآن 10:59 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©