|
أرشدوني في هذا العريس
السلام عليكم
بطرح عليكم موضوع محيرني .. خاطبني واحد , على حسب ما سمعت من الي كلمتنا عنه انه محافظ على صلاته و مثقف و الخ بس انه من غير جنسيتي , و هذه الفقرة يبغالها تفكير .. بعد ما اخذت الحرمة الي شافتني و كلمت امي عنه رقمنا ( و الي هي زميلة لهذا الرجال في العمل ), سافرنا انا و امي و ابداً ما فكرت بالموضوع و أول ما رجعنا , اتصلت الحرمة و سألت امي اذا كنا فكرنا او لا و اذا ممكن يجي او لا فأمي قالت لها لسا ما سألت البنت و أبوها .. * أمي ماعندها مانع اني ارتبط بواحد من غير جنسيتي * أبي بعد ما أمي كلمته قال لها مو مشكلة, بس أنا احساسي انه وافق بس عشان ما يزعلنا * أنا جداً مترددة نجي للرجال , أول شي أهله عايشين في بلدهم , و طبعا ما حيقدروا يجوا الحين , الحرمة قالت لأمي مبدئياً يجي يتعرف على أبوها , فأمي قالت لها أوكي مو مشكلة و اتفقوا على انه يجي اليوم, و حيجي معاه زميله و زوجته .. بالنسبة لي , انا مو مقتنعة اخذ شخص من غير جنسيتي و بنفس الوقت ما ابغى اظلمه بس عشان الجنسية, وما عطيت امي الموافقة على انه خليه يجي , فأمي قالت لي هو جاي يجلس جلسة تعارف بس أدري يمكن هالكلام بدري عليه لأننا أصلا ما شفنا بعض و يمكن ما تحصل موافقة بس انا ما ابغاه يجي و بعدين أقول لأمي ما ابغى اخذ واحد مو من جنسيتي + أهله مو عايشين هنا + انه له في بلدنا سنة وحده بس يعني ممكن بأي لحظه يقول انا ما تأقلمت على الوضع هنا و برجع بلدي ** في بلدنا الي ما معاهم الجنسية يكون وضعهم مختلف كثير عن الي معاهم الجنسية , بس أنا ممكن أعطيه الجنسية بعد فترة طبعاً انا صليت استخارة و ربي يكتب الي فيه الخير قبل شوي جاني أخوي ( أصغر مني ) و قال لي من جدك راح تاخذي واحد من جنسية ثانية؟ , و أخبرني انه أبي شكله مو مقتنع كثير أبي مشكلته ما يقول لنا في الوجه لا انا ما ابغى , يخلينا على راحتنا بس لو صار شي يقول اصلا انا ما كنت ابغى المهم انه بعد ما جا اخي كلمني انا توترت كثير و خفت , و اخاف اليوم يبين علي شي لما اجلس مع الحريم هل أعتبر الي صار خيرة ولاّ كيف؟ و هل عادي لو قلت لأمي انا ماني موافقه حتى قبل ما اشوفه؟ جزى الله كل من مر على موضوعي خيرا كثيرا |
أختي العزيزة ..
هذا الزواج عشرة عمر ومعيشة على طول ..أي بمعنى تكونين معه على الحلو والمر .. وليس لمدة وينتهي الموضوع .. فاتخذي قرارك قبل الولوج فيه ... إذا كنت غير راغبة في هذا الزواج ( من غير جنسيتك ) .. فقطعيه من الاساس .. وكوني جادة في هذا الموضوع ... فهذا الموضوع لا يحتمل القسمة على أثنين .. وأخبري والدتك أو والدك أو أحد أخوانك انكي لا تريدين هذا الرجل الذي هو من غير جنسيتك ... وعليك بصلاة الاستخارة .. وأسأل الله العلي القدير أين يرزقك الزوج الصالح .. والذرية الصالحة ... أبو أيمن |
جزاك الله خير أخي على نصحك
و شكراً لمرورك |
إذا أنت مو مقتنعه فيه لا تأخذينه
صدقيني أهم شئ القناعه والاهم بعد الاستخاره الله يوفقك ويكتب لك الي فيه الخير يارب |
ياحبيبة قلبي والله حاسه فيك
اختي واقعه بنفس المشكله والله اني محتاره معاها لكن بأقولك مثل ماقلت لأختي اهم شيء الأخلاق والدين والخوف من الله وانه يقدرك ويحترمك حبيبتي صلي واستخيري وعادي ادخليه عليهم وتعرفي وماهي مشكله حبيبتي وشوفي نفسك بعدها وبعدين اهم شيء تصارحي ابوك باللي بخاطره اجلسي معاه جلسه خاصه انت وهو وقولي كل اللي بخاطرك انت كمان ترا الرجال لهم نظره ثانيه وان شاء الله ربي يوفقك وييسر أمرك ويرزقك الزوج الصالح والذريه الصالحه واهم شيء تكوني مقتنعه تماما حصنتك بلا اله الا الله |
استخيري وتوكلي على الله ان كنتي مرتاحه
وان كنتي مو مرتاحه ارفضي والله يوفقج ياااااااارب |
السلام عليكم أختى الغالية تابعى صلاة الأستخارة ولكن فرق الثقافة وطريقة التربية من بيت لبيت بتسوى مشاكل ما بالك من بلد لاخرى وانك تعيشى حياتك كلها بين بلدك الى تربيتى فيها وبها اهلك وبين بلد جديدة عليكى فكرى جيدا الزواج استقرار وبعد كده يفترض ان فيه ابناء كمان ان شاء الله تروى وفكرى مرة تانية لأن اختلاف الجنسية ما بفضلة كثيرا |
غاليتي لاتطالعي الجنسية صحيح ان الجنسية من الاولويات المهمة لان عادات وتقاليد البلاد ترى ذلك من وجهه اخرى بس اذاكان صالح وطيب فمبروك امااذا كنت غير مقتنعة صلي صلاة الاستخارة مرات عدة وادعي الخالق في اوقات الاستجابة ولاحظي ان الزواج مو لعبة تكافؤ بين الطرفين لما تضعي الاسباب استخرجي النتائج الايجابية والسلبية شوفي ايهما اكثر وبالتوفيق دائما |
أشكر كل من مر على موضوعي و نصحني
جزاكم الله خير |
بصراحه اهم شي الجنسيه............
ومثل ماقالو أخواتي اللي قبلي أستخيري والله يكتب مافيه الخير |
| الساعة الآن 09:22 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©