سؤال للمدخنين
 

السلام عليكم ورحمه الله وبركاته
عندي سؤال واتمنى ممن لديه الجواب الا يبخل علي
زوجي حفظه الله مدخن واسعى جاهده لكي يترك التدخين..لكن اليوم وانا اجهز ملابسه للغسيل وجدت سيجاره بس مو العاديه اللي انا اعرفها لا سيجاره وحده وملفوفه بورق بصراحه انا خايفه لاتكون شي ثاني طبعا انا يوم شفتها خليت الثوب مكانه وبلمح البصر ما ادري متى ولا وشلون اخذها يعني مافيه اي مجال اني اساله عنها
للعلم زوجي هالفتره حاله تغير ونزل وزنه وانا بصراحه افكار توديني وافكار تجيبني
تكفون وش رايكم ببالموضوع وش اسوي

ا تكون سيجارة لف .. ( حشيش ) .

الله اعلم بس تأكدي لا تظلمين زوجك يمكن انها سيجارة تالفة نساها بجيبة .

الله اعلم

يابنت الحلال .. الحين الدخان أشكال وأنواع وكل شوي طالع نوع جديد ..

يعني لايروح فكرك بعيد ..

انا مابي اظلمه وودي اكون متوهمه بس انا شاكه لو انه عاديه كان دخنها قدامي لانه يدخن قدامي عادي انا شاكه انها حشيش ليه
من جد مابي اظلمه مابي احس ان الكيان الشامخ اللي عرفته طول عمري باخلاقه ومشاعره وذوقه ينهد بلحظه
يارب اكون متوهمه يارب
بس وشلون ادري اني متوهمه وشلوووووووووووووون

اختي .......اذا كانت لف اكيد حشيشه....

وبالنسبه للاخ طيب ومتسامح يااخي مافيه فايده اذا كذبنا عليها......وش راح تستفيد؟؟؟؟ ناهيك على انه اذا تتاكد افضل علشان ترتاح

وبعدين تشوفينه يصفن كثير...وتشوفينه كانه دايخ....وضحكته مش طبيعيه معناته للاسف حشيشه...
عموما لاتخلين الشك ياخذ لامور بعيده كثير.....بس نسبه كبيره انها حشيشه....وحاولي انك تكلمين ناس يمونون عليه ويقتنع هو منهم...
ترى الللي يحششون يمووووووووووووت بس لاتقولين له انت تحشش

ما ادري ياخوي ما اشوفه دايخ ولا يضحك بالعكس دايم صافن وماله نفس حتى يحكي المشكله ودي اتكلم معه واصارحه باللي شفته بس وشلون اخاف يحسبني افتش من وراه المشكله هالبدله اللي لقيت فيها السيجاره بدله العمل وماعمري جهزتها للغسيل او حتى فضيت جيوبها بس سبحان الله ذذاك اليوم كانه شي ارسلني وفتحت الجيب وشفت اللي شفته والمشكله انه ماخلاها عشان اقدر افكر باي فكره تساعدني اني اساله ودي اساله بس بيزعل مني وبالنهايه اخاف اكون ظالمته بس فيه شي غامض قاعد يصير وشو مدري صراحه حاولت اتناسى الموضوع ولا كانه فيه شي بس هو في النهايه زوجي وللي يمسه يمسني احيانا اقول هذي خصوصيات واحاول اقنع نفسي باني اريح مخي وما ادخل نفسي بمشاكل بس حتى لو تناسيت وصار فعلا مثل ما انا اشك وش استفيد ؟؟؟ ياليت ترشدونني وش اسوي
للعلم زوجي من الشخصيات اللي تتميز بالغموض ومايحب احد يعرف عنه اي شي حتى انا زوجته يعني مافيه مجال اكلم اي احد يتكلم معه
وش رايكم وش اسوي؟؟؟

اختي الكريمة

السيجاره التي وجدتيها للاسف من خلال خبرتي في مجال عملي ووصفها لك فهي سيجاره حشيش انصحك بعدم

المواجهه معه حاليا لحين استشاره اخ لك اكبر في السن وحكيم يراقب وضعه ويسال عنه .

الأفضل أن تأخذيها وتعطيها أخ لك تثقي فيه صاحب دين وهو عن طريقه يسأل عيادة مكافحة التدخين فهم أهل الإختصاص ويفرقوا بين التدخين والحشيش وكله سيء لكن سوء عن سوء وأقول لك لاتتساهلي فالنار شراره . وجزاك الله خيرا على فطانتك وحبك الخير لزوجك

يختي ترى السجاره لما احد ينساها بجيبه تتفتت شوي وتصير كأنها ملفوفه

ثاني شي طرف السجاره لونه بني زي الدخان العادي ؟

او لونه أبيض فيه خطين أو ثلاثه قبل نهاية الطرف

هذي أشكال السجاره العاديه


الحشيش يكون واضح انها ملفوفه والماده الي جوه تكون ثقيله شوي وتميل للبني الغامق


http://www.kenanaonline.com/figureGe...00390&arID=728

هذي صوره سجارة حشيش ولاحظي كيف الطرف حقها ملفوف

مع العلم ان هذي ملفوفه صح يعني الاغلب ماتكون اللفه مرتبه بالشكل هذا






:) :)

لاتحسبوني احشش وتقولون عشان كذا تعرف


لا والله بس اني قد شفتها ومسكتها وطلعت محتواها

وآخر شي كبيتها بالزباله

:)

السلام عليكم،


هناك أنواع من التبغ العاديّ جداً والمسموح به قانوناً يُباع في الأسواق ويندر وجوده إلا في محال السوبرماركت الكبيرة، وهو مُجهز لكي يلفّه المدخن بنفسه، ويأتي مع أنواع متعددة من اللفائف الورقية الخاصة بالسجائر.

هناك السيجار الكبير، وهي لفافة تبغ ضخمة لونها بنيٌ قاتم. مذاقها قويٌ للغاية ورائحتها مُختلفة تماماً عن رائحة السيجارة العادية. وهي مُرخصة وتُباع علناً في الأسواق، رغم أن تأثيرها الصحّيّ أسوأ بكثير من السجائر العادية والسجائر الملفوفة.

إذا تأكدتِ أنّ زوجك لا يستخدم أياً من النوعين السابقين، فاعلمي أنّ زوجك يحشّش. تأييداً لكلام الإخوة الكرام الذين سبقوني، وتحديداً "الأخصائيّ النفسيّ". إذ أنّ أكثر من يُدخن السيجار هم من الغربيين وليس العرب، وغالب من يدخنون لفائف التبغ مدمنون شرهون وفي أحايين كثيرة يكون لهم باعٌ في التحشيش.

إذا كان زوجك مدمن حشيش، فهذه ليست كارثة إن شاءَ الله، وليست نهاية العالم، ولا يجب أن تنهار صورته في ناظريك. المُدمن شخصٌ بحاجة إلى علاج ومساندة ودعم معنوي ونفسي وجسدي جبار، وأكثر من يستطيع تقديم هذا الدعم هو زوجته التي تلاصقه ليلَ نهار، بالإضافة إلى العلاج الطبيّ المتخصص من قبل عيادات معالجة الإدمان أياً كانت في بلدك الذي تقطنين به. إعلمي فقطْ شيئاً مهماً جداً - إذا ثبتَ أنّ زوجك مدمن حشيش، ولم يسعَ لعلاج إدمانه، ووقع تحت يد السُلُطات فإنه قد يكون عرضة للمساءلة والعقوبة. في السعودية مثلاً قد يقع تحت طائلة العقاب الشديد من حبس وجلد، عدا عن التشهير.

نصيحة أقدمها لك، استشيري شخصاً متخصصاً علمياً ومهنياً، كالأطباء النفسانيين، أو الإستشاريين والمعالجين المرخصين المؤهلين. حالة زوجك إن كانت إدماناً لا تتحمل الاجتهادات الفرديّة والنصائح المُبعثرة من كل من هبّ ودبّ، فكم أودت بالناس إلى المهالك.

وفقكم الله،

عبدالله،،،