|
أريد خاطبك .. يا صديقتي...al ameer
بسم الله الرحمن الرحيم قبل ثلاثة أسابيع تقريبا.. دقت على أمي وحدة تبى تخطبني حق ولدها وهو مهندس طيران..عازب عمره 24 سنه بصراحة كل مواصفاته عجبتني .. وفي نفس الوقت دقت وحدة ثانية تباني لأخوها من أبوها وهو مهندس طيران .. عازب .. عمره 24سنه وهم صديقين هو و الخاطب الأول بس الثاني ما عجبني.. قالوا عنه إنه لعوبي ويدخن وما يحافظ على الصلاة بعكس الأول بتقولولي وين المشكله وافقي على الأول!!!!!!!!!!1 المشكله إن وحدة من معارفنا درت بالسالفة عن الأول وجت لبيتنا وقالتلي : سمعنا فيه مهندس جا يخطبج ...شوفي هو ما يناسبج .. أختي قالتلها .. أي واحد تقصدين ؟؟ قالت ياالله كم مهندس جا يخطبج أختي قالت اثنين لفت علي وقالت: أحلفج بالله .. إذا جا أي واحد منهم بيتكم قوليله فيه فلانه بنت فلان زينه وحلوة وحبوبة وأحس إنهم يناسبون بعض"!!!!!! !!!!!!!!!!!!!!!!!!!!!!!!!!!!!!!!!!!! أنا ما قلتلها إني موافقه أو مب موافقه عشان تقول هالكلام بصراحة حزت وايد ف خاطري وزعلت وايد كيف تحلفني إني أقول هالكلام .. يمكن أنا أريده؟؟؟؟ وبعدين هلي بالعافية أقنعوني بالزواج مرة ثانية ... مع اني كنت رافضه فكرة الزواج بعد تجربتي الاولى انصدمت بصدق من البنت .. وتغيرت نظرتي لها ... يوم روحت .. رحت ارقد ما جاني النوم .. أفكر .. اليوم الثاني الصبح .. قمت سرت عند أمي قلت .. أنا مب موافقه .. سألتني عن السبب ماحبيت أقولها الحقيقة لا تحط فخاطرها عالبنت... قمت قلت لا لا ماريد أعيد نفس موال الزواج اللي طاف ماريد أتزوج الحين وقبل لا أطلع من حجرتها .. قلت لها ليش ما تقولين لهم بنت فلان زينه !!!! أمي كأنها فهمت السالفة .. وقالتلي ماعليج منها .. لا تهتمين بكلامها .. قلت لأمي .. خلاص يا أمي إذا مكتوب بيصير .. وإذا مب مكتوب ... ما بيصير أمي فديتها حاولت فيني .. بس خلاص كرهت هذا الرجال بليا سبب... مثل هالمواقف .. كيف الواحد لازم يتصرف؟؟؟؟؟؟ هل أطنش كلامها وأوافق عليه... مع إني خلاص رفضت ... بس في المرات الجاية أو أقولهم اللي قالتلي عليه و الله كل ماذكر السالفة استغرب .. ليش هذا يا بنات جنسي؟؟؟؟ al ameer |
واضح اختي انك طيبة القلب ، اسعدك الله وزرقك الزوج الصالح ، مؤكد ان صديقتك تقصد انكِ في حال لم توافقي خاصة يبدو انها تعرف تكرار رفضك للخطاب . لو كنت مكانك لأزحت موضوع صديقتي على جانب وركزت تفكيري بهذا الخاطب وفكرت بمستقبلي معه . هذا الاهم حبيبتي . وانا بصراحة لا ارى اي مبرر لأن تسجني نفسك بعد الطلاق ، الآن تأتيكِ فرص كثيرة والمجال امامك للاختيار ولكن بعد فترة ستقل الفرص واخشى عليكِ أن تندمي لإنك لم تستفيدي من الفرص التي وضعها الله عز وجل في طريقك ، هي نعمة فلا ترفضيها . بانتظار تبشرينا بالموافقة علشان نفرح فيكِ:14: |
حياج الله الغالية البتول
لا من هذي الناحية .. أنا خلاص رفضت... وهي ما تعرف عن الخطاب اللي يجوني.. لأني ماحب أتكلم بهالسوالف >>> باختصار كرهتها ومن جد ما أفكر في الزواج ... عمري 19 سنه و3 شهور.. ومطلقة من سنه .. كثر ما حبيت طليقي كثر ما أكره الرجال الحين .. السالفة نفسيا .. بس أخاف إذا وافقت عليه مثلا .. البنت تكرهني .. وتحط ف خاطرها .. إنها كانت تباه وأنا أخذته ... البنت جديه 100% وكلمتني قبل كم يوم .. تقولي : أشوفه ما وصل ؟؟ ليكون خذتيه ..ياويلج تراني حجزته قبلج!!!!!!!!!!!!!!!! تصدقين؟؟؟ قلت لها .. بارد على قلبج .. وعسل صافي.. خذيه بقشوره بعد .. وأنا كلمت وحده تعرفهم عن هذي البنت إنها زينه ووو مثل الكلام اللي قالته .. يمكن يكون من نصيبها قالت لا ما نريد وحده كبيره ترى هذيك البنت عمرها 25 سنه يعني أكبر عنه بس قدر الله .. وما شاء فعل وشكرا لمشاركتج ف موضوعي ... بارك الله فيج وحقق لج أمانيج |
أتمنى إن الوالدة ما تكون وصلتلهم ردج ..!! هذي أنانية من البنت ..!! الأمير إنتي ما خذيتيه منها ، جيه لو كانت تبى الريال ليش ما تحرك من قبل ..!!:16: ما أحب الظلم أبد ، ولا أرضى بأن تكسر مشاعر بهذه الطريقة http://www.66n.com/forums/images/icons/cry3.gif. اعذريني لو تفاعلت ، ما أريد أكون سبب في كرهج لها ، لكني جد ما كنت أدري إن في ناس إحساسهم بارد بهالطريقة << وايـــــــــد معصبة :d ..!! . . ربي يعوضج باللي أحسن منه إن وصلهم الرد ، و إن ربي كتب بيرجع لأن مثلج يستاهل الخير ;) . تحياتي لج ، إختج : خلك إيجــــــــابي ! |
سبحان الله ناس ما تحب الخير لأحد و ما تفكر الا بنفسها:29:
عزيزتي أنصحك تبتعدي عن صديقتك هذه و ما تخبريها بأخبارك أبدا :11: بالنسبة للعريس كان الأولى تصلي استخارة قبل الرد حتى لو انك كرهتي الموضوع من ورا صديقتك وفقك الله و هداك لما هو خير لك ان شاءالله نسمع الأخبار الطيبة:14: |
يجزاج الله كل الخير حياتي .. خلك إيجابي
بس خلاص الوالدة وصلت لهم ردي ... بعد ما تعبت وهي تقنع فيني ... راس يابس!!! وهو كان يبى رد ....<<< مستعجل عشان الرؤية الشرعية.... يالله ما صار نصيب ... بس يا حليلها .. هي للحين منتظرة يدق بيتهم ماتدري إنهم قالوا مانبى وحدة كبيرة .. ماريد أقولها أخاف تزعل .. أو تتضايق أو تحسب إني أكذب عليها .. مادري و الله شو أقولها ... الله يعين شكرا يالغالية وتسلمين ... والله يسمع منج ... آمين |
أختي moonlight2007
أنا ما أقولها شي .. مب عشان شي و الله .. بس أنا كذي مع الكل .. ومادري كيف وصل لها الخبر حتى يوم تطلقت .. كانت أول من يعرف .. مع إنه محد كان يعرف ..أبدا أبدا بس أمي وعمي حتى خواتي مايدرون!!! أختي قالت .. يمكن تغار منج على كثر الخطاب .. ماشاء الله من تطلقت للحين 9 جو... ومرة كنا ف حديقة عدال البيت .. فوحدة جت تقولي .. شو رايج تاخذين ولدي ؟؟ أحسكم على بعض لايقين .. والله ولدي زين ؟؟؟ أنا استحيت ومارديت عليها بس ابتسمت وهي راحت لعند الحرمة وقال ونحن وين رحنا .. صدقيني هي وهي وهي وتكلمت عني عند الحرمة باسلوب مب حلو .. وأنا كنت معتبرته مزح عاتبوني كلهم بعدين .. قالولي ليش ما سكتيها؟؟؟ قلت شو بنتضارب عالرجال؟؟؟؟؟ تتكلم لين ما تشبع والحرمة شلت الموضوع عن راسها.... يا الله خير من الله .. نحن ماندري شو كان بيصير... الله أعلم أما عن الاستخارة .. أنا حتى ما شفت الرجال ولا صار شي بس الأم جت هي وبنتينها وحرمة ولدهم و اليوم الثاني عالظهر جت هاي البنت وسدت نفسي عليه الله يسامحها ويوفقها بولد الحلال وشكرا لمشاركتج ... |
أختي الامير..............
بصراحة صديقتك ذي حومت كبدي....................... وش تبي بالضبط.....أعوذ بالله منها........... في البداية انقهرت منك وكان ودي أقولك بالطقاق وش عليك منها........لكن حطيت نفسي مكانك لقيت انها بتسببلي النفور منه .....يمكن عشان نفسها فيه....!! بس شوفي يا عزيزتي .........كل يوم بعد الصلاة قولي(( اللهم اكفينيها بما شئت وكيفما شئت)) وقولي..((اللهم اني اعوذ نفسي بكلماتك التامة من كل شيطان وهامة ومن كل عين لامة)) ثلاث مرات .. والله يكفيك شر عينها... |
اختي ليش تنشرون خبر خطبتك العين حق ياختي والموضوع ماتم وشوفي هالاشكال الي تجي بيتكم وتاخذ خطابكم عيني عينك
|
يا حبيبتي يالامير ... انتي نزلتي الاكل الذي اكله الان غصة في حلقي ... !!!
لما تؤكدين لهذه البنت عن قصة الخطبة ؟ و لما اصلا تتأثرين بها؟ الرزق جاء لك و ليس لها .. لذلك ماكان عليك ان تعيري لها اي اهتمام (اذن من طين و اخرى من عجين) يا حبيبتي .. الحياة حياتك و هو خطبك انت ... يعني لو اقتنعتي به .. كان عليك الموافقة .. على كل حال الندم الان قد لا ينفع لكن في المرة القادمة لا تكرري ما فعلتي .. و لا تكوني طيبة الى درجة مفرطة لكي لا يستغلك من حولك ! تحياتي لك |
| الساعة الآن 03:07 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©