منتدى عالم الأسرة والمجتمع

( أبشركم انـخـطـبـت )

كنت قاعدة أتفرج عالتلفزيون ... متابعة مسلسل ..

وجاء مشهد زواج وحدة من الشخص اللي تحبه من زمااااان ...

قلبت القناة على قناة ثانيه ...

لقيت عرض أزياء فساتين عرايس...

قلبت القناة .. لقيت خطوات وضع مكياج العروس ...

سكرت التلفزيون وجريت الونة " تنهيدة كبيرة " تشقق الصدر

التفت علىّ أبوي اللي نسيت تماما انه كان جنبي ... قال لي أبوي :

خير إن شاء الله يا بنيتي ؟! وش فيك ؟! عسى ماشر ؟!

أنا تلخبطت ساعتها وفتحت له التلفزيون وقعدت ساكتة ...

إيه أكيد بسكت وش أقول ؟ أقول له ودي أعرس ؟؟؟ ( يعني أتزوج بالعربي ) ...

أقول له إن صاحباتي اغلبهم تزوجوا ؟؟؟

وإلا أقول له إني تمنيت أكون مكان بنت خالي في كوشتها وفي الزفة أمس ؟

أوف والله غثى .. يا بخت جداتنا ماتطق الوحدة العشر سنين إلا هي مخطوبة ..

وعلى الثنعش أعرست ..

وان وصلت البنت ثمنطعش ما اعرست قالوا عانس !!!

هذوليك البنات اللي عايشين صح مُهبْ حنا اللي نعجز ونوصل سن اليأس ما اعرسنا ...

أخخخ .. يُبه الله يفتح عليك وتخليني اعرس ... وتفكني من الدراسة ...

وساعة أنا غارقة في قاع هذي الهواجيس ويرن التلفون ويقطع حبل أفكاري ...

طالع الرقم أبوي وقال رقم غريب ... رد بلهجة رسميه :

- وعليكم السلام .....

الله يسلمك .....

الحمد لله بخير .....

ايه أنا أبوفلانة ( منيب قايلة لأحد عشان محد يعرفني ويضحك علي) ....

لا منت غلطان انا هو ...

ماعليك زود الله يسلمك ...

من معاي ياخوي ماعرفتك ...

والنعم .... تفضل وش السالفة اللي تبيني فيها ؟....

لا ماني مشغول ...

لهالدرجة الموضوع مهم ؟!...

تفضل تكلم شغلتني ...

والتفت أبوي علي وعطاني نظرة غريبة ..

أنا ساعتها قرصني قلبي مو من ردود أبوي بس من نظراته الغريبة ..

رد أبوي على المتصل : وش فيها زود طيب ؟...

لا بس مافيها أي ميزات عن الباقي ...

رد ابوي على المتصل : طيب وبعدين ... أيوه ....

طيب وش اسمك الكامل ؟

وش تشتغل بالضبط ؟

طيب من دلك علي وعطاك رقمنا ؟

لا الموضوع يا ابني مو بهالبساطة ....

العملية مش بيع وشرى وبس ...

الواحد لازم يسأل كثير ويحرص قبل يقدم على أي خطوة ...

لا موضوع انك تجي لبيتنا خليها بعدين ...

لين أسأل عن كل صغيرة وكبيرة ...

لا لما اكتفي من السؤال وأخذ المعلومات اللي تكفي .. باتصل عليك تجي ونتفاهم ويكون خير إن شاء الله ..

أنا كنت أتابع حركات أبوي وأنا متشققة من الفرحة ...

أخيرا انخطبت وبتزوج مثلي مثل غيري ...

يوووووه أخيرا بلبس فستان أبيض منفووووووش :14:

أخيرا بطلع أجهز واتقضى للزواج ...

بسوي زواج كبير مررررررة

وبحط زفة وطرحتي مابيها خليجية بخليها مبتكرة ...

منيرة منيب عازمتها هي وخواتها .. ماعزموني الأسبوع اللي فات على عرسهم ...

وبشتري أغراض واشيل واحط واخطط ... بيصدع راسي بس ولو لذيذ هالصداع ...

يوم قفل الخط ابوي التفت علي وهو مبتسم ابتسامة تعجب وهو ساكت ... قلت :

- هاه يبه ؟ متى بيجي يشوفني ؟

- منهو

- هذا اللي خطبني تو

- وشو؟!

- خطيبي اللي تو

- تموووووونين انتي ووجهك صار خطيبك على طول ماعندك وقت ..

- ايه يبه ترا بقولك هالمرة لا تطير العريس .. مثل ماطيرت ولد أم مساعد العام الماضي .

للحين تراها حازة في نفسي ..

ترا هالمرة بضرب عن الدراسة ...

والا الاكل مقدر اضرب عنه ...

يبه بعنس ترى راح عمري ...

والرسول حث على تزويج من ترضون دينه وخلقه ...

وهذا الخاطب قايل قلبي انه أجودي .. ترى ما اعرفه بس اتوقع انه كذا...

وترى العرس أهم من الدراسة عشان الجنس البشري ماينقرض ....

وبعدين من قال لك اني منيب مكملة دراستي والله بكمل

حسيت ان عيون ابوي بتطلع من شدة علامات التعجب اللي في وجهه .. بعدين انفجر من الضحك .

- هي انتي وين رحتي ... حدك حدك لا تشطحين !!!

- وش اشطح ؟!

هذي الحقيقة يبه والحقيقة ماتزعل .. وانت الله يطول لنا بعمرك علمتنا على الصراحة وحب الحقيقة

- أي عريس وأي هم؟؟!!

انتي مصخنة ؟؟

هذا المتصل مندوب شركة يبي يجي يوريني المكنسة الكهربائية العجيبة على قولته اللي تغسل وتنفخ وتطبخ ..

قومي نامي يابنيتي .. ولا تكثرين قعده قدام التلفزيون ... الحين بس عرفت ليه سكرتيه تو...

أنا لا تسألون عن وجهي ...

الله يقطع أم العجلة اللي تعرفونها ....

مشكلتي إني أجزم على طوووووول قبل أتأكد

استروا ما واجهتوا

انتهت القصة

وش رايكم في القصة ...........!!!!!

((( للأمانة هذه قصة منقولة من منتدى آخر حبيت انقلها لهالمنتدى لأني لاحظت الفترة الأخيرة إنه الإبتسامة فٌقدت فحبيت ارسمها للجميع هنا حتى لو بقصة منقولة )))

أختكم ... الحـــــــائرة

:17: