سؤال للأزواج ...ممكن!
 

السلام عليكم ورحمة الله

ابسألكم بداية ادا وفيت لزوجي وحاولت اعدله اهتميت فيه من البداية ماتغليت وقلت ابي اتدلع , تصدقون ! حتى قلت له كلام الحب من ثاني اسبوع وانا موصدق حبيته كل لاني اعرف انه محروم من الحنان لان امه وابوه مابينهم مشاعر او اي اهتمامات مشتركة ولا اي نوع من الحب و دووم مشاكل مابينهم مشترك الا عدم اهتمامهم في عيالهم كلن على حل شعرة من بنات واولاد المهم تدرون وش جازاني بعد هدا كله؟
استغل فرصة دراستي عند هلي وكلم بنات وواعدهم وفوق هدا كله سرق دهبي رغم اني كنت ادا احتاج فلوس اعطيه بس مو دايم لاني كنت ابيه يعتمد على نفسه,.

الحين انا اكره هالانسان .......... الصغييير في نظري الى ابعد حد لانه خانني يوم انا صنته, وابي اتطلق منه وهو قدام الناس مسوي انه مايبي يطلق لسبب انه متمسك فيني وهو كداب صدقوني وهو مو متمسك فيني ولا شي , من باب ماابي اكون مكفرة للعشير هو عمره ماقالي كلمة غلط في حقي وماكان يمد يده علي بس في المقابل كداب ودايم يتدين من الناس لدرجة انهم اصبحوا يجون عندي انا يقولولن لي خلي زوجك يسددنا!
انا اتوقع انه مايبي يطلقني لانه طمعان في اني ارد له المهر لانه يعرف اني فلوس الحمدلله.

واللي يقهر اكثر ان هال....... حدد منو اللي بيتزوجها اول مايصبح عنده فلوس , بكيييييييت هداك اليوم ماتخيلت اول انسان في حياتي يخونني بها الشكل وتكون عينه على غيري وانا موعارفة تراني ماقرت في نفسي يوم كنت معاه اتجمل واتحدى طوايفه كلهم يكونون بحلاتي بس مايملى عينه الا الترااااااااب.

اصعب شي ان الحرمة تظن نفسها قوية وعارفة بكل شيء وفجأة تعرف عن زوجها اشياء تخليها تعرف انها كانت مغفلة بكل ماتحمله الكلمة من معنى.

الحين انا عايفت والله من كل قلبي وغير متأسفة عليه وماحس باي مشاعر تجاهه لاني اكبر من اني افكر في تافه مثله. انا عند اهلي ولكن هو رافض يطلق تتوقعون يامعشر الازواج انا قصرت في حقه؟ وبأمانه ردوا علي؟

حبيبتي
ما احب اخرب البيوت
بس هذا الريال ما يستاهل الواحد يشوف في وجهه حتى
هذا وانتو على البر
باجر لي صرتي في بيته شو بيسوي؟؟!!

يالغاليه هذا لسانه يفضحه
داخل على طمع

والله يا اختي مابعرف شو اقولك .. انتي ادرى بمصلحتك بس بالاول اتاكدي من خيانته ليكي .. كيف عرفتي انه كلم بنات وواعدهم ؟ اذا فقط سمعتي فلا تحمي عليه قبل ان تتاكدي لا تخربي بيتك بسبب القيل والقال ..
واذا كنتي متاكدة من الخيانة اعطي لنفسك ولزوجك فرصة يمكن يتوب ويرجع احسن وخاصة اذا بينكم اطفال فلازم تفكري فيهم قبل تفكيرك بنفسك عزيزتي ..
وان شاء الله الله يوفقك

حبيبتي هاذا فقير وحافي و منتف جذي ؟ عيل لي صار عندة خير شنو بسوي ؟؟ أنتي جاوبي .

الله يصلح الحال...هذا اللي أقدر اقول

فعلا المرأه تظن نفسها قويه وعارفه كل شيء وفجأه تكتشف أنها مغفله شعور صعب مررت به يجعلك تشعرين بطعم المراره في حلقك أختي أنت جاوبتي على مشكلتكي لما تكلمتي عن أسرته المشتته فهو نتاج لهذهالاسره فالاسره الصالحه تنجب أزواج صالحون فالتربيه هي الاساس واعتقد ان هذه الاشكال لا ينصلح حلها ابدا ألا من رحم ربي