|
((سعــــودي ولا كويتـــي))&((تنصحـــوني أوافق على من ))
بسم الله الرحمن الرحيم
وبه وحده أستعيــــن السلام عليكم ورحمة الله وبركاته صباح \ مساء الخيـــــر للجميـــــــع... قبل ما أكـــتب لكم موضوعـــي وتشـــاركونـــي بحيرتـــي... أقول لكــل عضو وعضوه في عالــــــم الحياة الزوجيه يعطيــــكم ألـــف عافيـــه على روحكمــ الطيبـــه وعلى عطائكــــم الغيـــر منتهـــي... بقول لكم تفاصيل المشكله ورأيي فيها من ناحيتيـــن... *** انا متقدم لـــي أثنين من قاريبـــي... وكلهم عيـــال عمـــاتي.. بقول لكم مواصفات كل واحد ورأيي بكل واحد *** الأول عمره 22 ومتربيه معـــه من يوم خلقنـــا وساكنيــــن مع بعض في بيت واحد من صغرنـــا لان عمتي تطلقت من يومه صغير... وهو متعلق في أمه مره يعني ما يرفض لها طلب ويحاول يرضيهــا حتى لو كانـــت غلطانـــه... وعمــتي الله يخليها لعيالها من النوع العصبي والمسيطر يعني تحب كل شي يمشي على أوامرها... والولد أخلاق ما شاء الله عليه وعند كل الناس سمعته طيبــــه.. يعني مو راعـــي خرابيط ونفس الشي مو ملتزم يعني يصلي بس ما يحرص عليها مره... وباقي له شهرين ويتخرج من الجامعه بتخصص مهندس كمبيوتر وراح يسافر بره ويكمل لدكتوراه..>> الله يوفقـــه.. :::::رأيي فيه::::: أعتبــــره مثل اخوي ولا أحس ناحيته بأي شعـــور غير شعور الأخوه.. ومابيني وبينـــه إلا 7 شهــــور... وعارفتـه زين وعارفه طبايعه وعشان كذا مو متقبلـــه يكون زوج لي ويكون الإنسان اللي بعيش معاه باقي عمري... والشي الثاني ما أحب طريقة أسلوبه في الكلام...هو ما فيها شي بس أنا ما أحبها ليش مدري؟؟!! وما تغطيت منه الا وعمري 17 سنه << يالله لا تعاقبنــــا... يعني عارفته زين وعارفه شخصيته ولا يصلح لي ... والمشكلـــه أبوي يبينـــي أخذه لانه مربيــــه وعاجبـــه ويحبه مثل عياله... ومو متقبل أني ارفضه...حاولت معاه وقلت له أني مو متقبلتـــه نفسيــا ً وهو بحسبة أخوي بس رد علي الرد المعتاد...بعد الزواج كل شي يتغيـــر... :( والشي الثانـــي لو خذيتـــه ماراح يتغـــير شـــي في حياتي يعني اللهم أنه صار محرم لي في البيت وبس وهذا السبب من الأسباب اللي مخليتني أرفضه .. الوحده ودها تاخذ عايله جديده وتتعرف على ناس جداد مو أقعد طول حياتي بنفس العايله ونفس الأشخاص... وكلمت عمتي وقلت لها قراري وقالت فكري قلت ولدك مثل أخوي ما عندي غير الكلام هذا لاني تعبت من موضوعهم هذا وكان تاعب نفسيتي من عمري 15 سنه :( وأستخرت في الموضوع هذا وثبت على قراري بالرفض بعده... *************** الشخص الثاني ولد عمتــــي وعمره 24 ظابط تقدرون تقولون من النوع أللي أرتاح له لأن طبايعه حلوه ومن اللي أتمناها...ومتقبلتــــه كزوج... يعني يخاف ربه وحنون عند أهله ومرح ودمه خفيف بس فيه برود شوي يعني يومه سنه... وأمه أللي هي عمتي عسل وأخلاقها تهبل وتعطي الواحد على جوه بس لا يخلى الامر من العصبيه :) وأخته توأم روحي وصديقة الطفوله... يعني هذي العايله اللي حاسه اني برتاح معهم...لانهم يحبوني وانا احبهم بس المشكلـــــة اللي أعتبرها كبيره وهو أنه سعودي لا تفهموني غلط يا السعوديات ...:) أنا نصي سعودي:) بس المشكله أني انا بالكويت وهو بالسعوديه ... وصعبه اسكن بديره غير ديرتي...لاني ما أقدر أستغني عن أهلـــي وعن صديقاتي وجماعتي... وخايفه ان سكنت هناك ما اقدر أتحمل وأظلم عمتي وولدها معاي... ثاني شي انا باقي لي سنه ونص واتخرج من الجامعه ... ويقولون ان التوظيف صعب مره بالرياض يعني المواطنات يالله يحصلون وظايف كيف انا ؟؟؟ وهذا من أسباب ترددي بالموضوع... مع أن ولد عمتي هذا ...الشخص الوحيد اللي بالعايله أللي يناسب لي ونادر وجود رياجيل من هالنوع والحلو بالموضوع انه شاريني ولا يفكر يخطب وحده غيري...ومتمسك بإختياره...وهذا الشي أللي حبيته فيه... وأستخرت وكان شعوري عادي يعني ما تضايقت...بس ارتحت... ومن ناحية شعوري تجاهه عادي يعني مو متعلقه فيه ولا شي... لأن عندي قاعده بالحياة لا حب إلا بعــــد الزواج...:) ******** وفيه سبب يخليني ارفضهم ثنينتهم لأن صارت مشاكل بسببي وللأسف بين عماتي عشان سالفه الخطبه... وأحس أن صار بينهم حساسية عشان موضوعي ..وهذا الشي تعبني زياده... حتى أبوي انحط بموقف محرج بين خواته ولا يبي يزعل أحد فيهم.. بس هو مثل ما قلت مايل للأول لأنه مربيه وعارفه اكثر من غيره... تنصحونــــي أي شخص أوافق عليه؟؟؟ بخصوص الاول ما أظن فيه أمل أني أتقبله بس حبيت أوضح لكم الصوره كامله... أما الثاني هل تتوقعون أقدر أتحمل فراق أهلي وممكن من البنات اللي تزوجوا وراحوا لديره غير عن ديرة اهلهم يقولولي تجاربهم وهل ارتاحوا وقدروا يتأقلمون ولا لاء؟؟؟ ولا تنصحوني أني أرفض الأثنين...؟؟؟!!! ويمكن ربي يرزقني باللي أحسن منهم وبديرتي... أعتـــــــــــــــذر عن الإطالــــه بس حبيت اوضح لكم جميع الجوانب عشان يكون عندكم علم باطراف الموضوع... بحفظ الرحمن ريوف أنتظـــــــــــــر ردودكم الطيبـــــه.... |
الاول / وقلتي رأيك فيه .. وين المشكله ..
الثاني / ومعجبك .. أستخيري الله وتوكلي عليه .. قضية الغربه عن اهلك هاذي سنة الحياة وبعد الزواج راح تحطين همك الأول والاخير زوجك وأهلك لشتقتي لهم ــ الحمد لله كل شيء متوفر طائره ولا سياره شوي لينك عندهم ... ولا تجعلين قضية الغربه حائل يحول بينك وبين الزواج .. ( الدعاء والاستخاره أهم شيء ) |
ياقلبي الله يكتب لك الي فيه الخيرر ونصيحتي لك استخيري الله مره واثنين وثلاثه واذا نفسك رضيت بولد عمتك الي في السعوديه خذيه ومافيهاا بعد او غربه ان شاء الله حنا اهلك في السعوديه ابشري بعزك هههه
وتدرين دامه طيب وولد حلال فالبعد مو سبب للرفض والحمد لله دول الخليج صارت وحده والله يخلي الجوالات يعني ان شاء الله مافيها غربه انت بس استخير ي الله وتوكلي والله يسعدك وبشرينا يالغلا |
http://www.up07.com/upload-45/wh_24443899.gif
استخيري ثاني طبعا الاول حبيبتي ,, وعلى فراق اهلك بالبدايه راح يكون عليك ِ صعب بعدين راح تتأقلمي مع زوجك .. وفراقه بيكون الاصعب عليك ِ ,, واهلك راح تحسيهم اغراب .. اما على قولك تقدري تعيشي بغير ديرتك .. اي تقدري عيوني ,, انا اتزوجت وعمري 18 انا سعودية وزوجي كويتي ومايقرب لي .. ورحت عشت مع اهله في نفس البيت بالبداية ,, ووالله اهله صارو اقرب لي من اهلي واتعودت على نمط زوجي ,, وتخيلي عاد بعدها بسنة سافرنا امريكا عشان يكمل دراسته .. بس ماحسيت بذيك الغربة لأنه معي .. التأقلم سهل المهم الراحه ولد عمتك الثاني طالما تحسي انه مثل اخوك .. لاتفكري فيه هذا رأي ,, واتمنى افدتك حبيبتي .. استخيري واستغفري والباقي اتركيه على ربك .. http://www.up07.com/upload-45/wh_24443899.gif |
اقتباس:
جزاك الله خير اخوي السيف المسلول ولاهنت على الرد السريع... في الشخص الاول مشكلتي أن الوالد مصمم أني أخذه وماهو متقبل رفضي.. ولكن الله يعين ويهونها... ودمت بخيـــــــر... |
اقتباس:
هلابك اختي العزيزه أمل الحياة... والله من قريت ردك تفائلت...:) ووصدق انك اسم على مسمى... وجزاااااك الله كل خير على الرد الطيب ودمتي بخيــــر... |
اقتباس:
هلابك أختي العزيزه RoOd... تسلمين على الرد الجميل... والله يكتب لي اللي فيه الخير ... وشاكره لك تفاعلك مع الموضوع... |
اختي من واقع تجربه شخصيه
انا كويتي وطول عمري عايش في السعوديه واهلي قسمين ناس في الكويت وناس هنا في الشرقيه ولكن اصلا من حائل........بالنسبه لي لو جاء النصيب اني اتزوج كويتيه ماراح اقول غربه او غيرها بالعكس بجيبها هنا وماعندي مشاكل.....مع اني افضلها تكون سعوديه خالصه لاني تعودت على هالبلاد يعلني افداها بعمري وروحي..ومستحيل مستحيل اني افكر يوم اني اغيرهااااااا. كل غايتي من هالكلام ..اني ابي اوصلك فكرة انك توافقين على السعودي طبعا بعد الاستخاره والتوكل على الله...ثانيا احتمال الوظيفه ماتكون مهمه كثير ... احتمال اللي في الرياض وضعه المادي طيب...وبعدين ياحليلهم اهل الرياض يهبلون...وتبارك الله الرياض مدينه عصريه وقمة في التطور وراح تجين وتشوفينها....>>>>>>مع اني طول عمري وانا بالغاليه الخبر وماابدلها بكنوز الارض لكن الرياض بعد غاليه علي. اما ولد عمتك اللي بالكويت ..مستحيل اختي مستحيل انك تتخيلينه زوج لك لسبب بسيط وهو انكم عايشين مع بعض..يعني حلاوة الزواج هو اكتشاف الزوج او الزوجه على مدة من الزمن....!! يعني ماادري بس احس انه راح يصيبكم الملل لانكم تعرفون بعض وعايشين مع بعض وراح يكون الزواج تحصيل حاصل.....وانت نفسك تقولين انه مو عاجبك ,,اذا قرارك واضح وضوح الشمس. توكلي على الله واستخيري والله يوفقك |
قضية أجبارك على رجل لا تُريدينه
غير جائز ولا يحق لوالدك أجباركـ ولك الحق في الرفض إلا إذا كان صالح وفيه ما تطلبه المرأة من الرجل فعليكٍ بالأستخاره ومخالفة هواء النفس |
السلام عليكم جميعا
اولا انا لا اجد مشكله بين الموافقه والرفض فانتي جاوبتي نفسك بنفسك اقتباس:
اما الثاني استخيري يالغاليه وكثفي الدعااء وتضرعي لربك وابكي وانتي تدعين ..بيني خضوعك لربك ..وانك ذليله له وصدقيني ربي ارحم بالعبد من امه .. فان كان كاتبلك الخير والصلاح مع اللي بالسعوديه بتاخذينه وان كان اللي بالكويت ايضا بتاخذينه واذا على الغربه لا تشيلي هم وحده من قريباتي وحيده امها حتى اصبح عمرها 16 سنه يعني هي وامها اكثر من علاقه صديقات واخوات واخذت واحد يدرس برا 6 سنوات وهي اللحين مسستاانسه اخر وناسه بالعكس ماخذه الغربه لها كاكتشاف تكتشف الدول والمدن والجو وتكون قريبه من رجلها.. انتي ناظري النواحي الايجابيه بالموضوع : زي مثلا انك بتكونين قريبه من مكه اكثر من كونك بالكويت فبهذا بيسهل انك بالاجازات تروحين مكه حتى وان كان اكثر من مره بالسنه .. وهكذا اتمنى لكِ التوفيق اولا واخيرا وان الله يسهل امورك اين ماكانت واين ماكنتِ |
| الساعة الآن 05:42 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©