|
مطلقه ولها 4 اطفال وراتبها 3 الاف،،وحابه نساعدها بتأمين حياتها(هل من افكار)
السلام عليكم ورحمة الله وبركاته
اخوتي في الله احتاج لأفكار خيريه لصديقة اختي البنت مطلقه ولديها 4 اطفال وتسكن بالحالها في شقه للإيجار طبعا وراتبها لايتجاوز 3 الاف بعد ثلاث اسابيع بنسافر لها في الشرقيه نبغا نشوف وضعها كيف وحابين نساعدها فأذا ممكن عندكم افكار يعني انا اللي جا ببالي 1_اننا نساعدها بتأثيث البيت ونشوف نواقصه الأساسيه طبعا اذا ثلاجه اذا مكيف اذا ادوات مطبخ 2_حابين نجهز الأولاد اغراض المدرسه( من شنط ودفاتر واقلام وو و) طبعا على قد سنه وزياده طبعا فأيش رايكم ايش ممكن افكار اللي تقدروا عليه لو بسيط ساعدونا نحاول بإذن الله ان نوفره لها قدامنا ثلاث اسابيع على السفر والله يجعله في ميزان حسناتكم وربي يسعدكم وينور بصيرتكم ويسخرلكم ويرضا عليكم ويرضيكم |
بارك الله فيكم
كل هالافكار زينه لها و ممكن انكم بعد ما تزودوها بكل النواقص و تشترون لاوازم للمدرسة ممكن انكم تنطوها مصروف للبيت او مبلغ صغير علمود هي تتصرف فيه هذا اللي اجا في بالي |
الله يكون بعونها
3000 ريال وش بتسوي فيه للاجار ولا للاكل ولا للمصاريف اذا تحط اسمها عند جمعيه خيريه تهتم بالارامل والمطلقات والايتام راح يساعدوها بأذن الله الله يسخر لها اهل القلوب الرحيمه ويتم مساعدتها |
اشكر مروركم اللطيف
اخوتي ربي يسعدكم ويفرج همكم وينولك مرادك ويسخرلكم من في السموات والأرض احب اوضح نقطه هذي صديقة اختي من ايام الدارسه ومتجمعين البنات كلنا عشان نسافر لها ونساعدها هي ماتكلمت ولاقالت انها محتاجه بس اختي وباقي البنات حسوا فيها البنت كانت عايشه بأحسن حال وبسبب زوجها ضيع كل شي من يدها مارأيكم احنا موحابين نعطيها المبلغ بيدها لأنها بتتضايق وتتأثر حابين نشتري النواقص كهدايا للبيت الجديد اختي وصحباتها بيشترون الأشياء الأساسيه حابه انا اشتري اشياء وهدايا للصغار بس ايش فيه غير الملابس والأدوات المدرسيه؟؟؟؟ |
جزاكم الله خير
ولكن إن أمكن تدريبها على بعض المهارات التى ممكن تستفيد منها أوقات الفراغ لتساعدها بتوفير إبراد إضافي مثل أعمال الطباعة لبحوث الطلاب ، او التصاميم ، أوغير ذلك من المهارات الكثيرة دعواتنا لكم بالتوفيق |
بارك الله فيك اخي الذي لم تلده امي(الكبير)
فعلا راحت عن بالي هي مدرسه ولكن لايمنع ان تشتغل تتعلم على الطباعه وبعدين تتفق مع احد مكاتب التصوير وتطلب منهم اعمال منزليه تنفذها وترسلها لهم عجبتني كثير الفكره الله يرضا عليك يارب ويجعله في ميزان حسناتك بأطرح عليها الفكره واشجعها عليها كمان حتى لو تعلم اولادها الكبار اللي بالمتوسط ممكن يتسغلو وقت فراغهم في انجاز المفيد ربي يسعدك اخوي وينور بصيرتك ويسخرلك من في السموات والأرض ويفتح عليك فتحا مبينا ويزيدك من فضله ونعيمه حصنتك بلا اله الا الله وصلي اللهم وسلم على نبينا وحبيبنا محمد عليه الصلاة والسلام كما تحب ان نصلي عليه. |
للأسف ليست لدى افكار مفيده حالياً
ولكن ادعو لك ولها بالخير جزاك الله خيراً قليل من يحس هذه الايام بجاره او صديقه ويسعي لمساعدته قبل طلبها بإذن الله أجرها كبير |
اقتباس:
ماعندي غير الدعاء لكي الله يوفقك ويكثر من امثالك ويجزاك كل خير والله لما قريت الموضوع ذرفت عيوني دموع على عملك الخير والطيب الله ينفس عنك كربة من كرب يوم القيامة ويفرجها عليك دنيا واخرة |
والله بحكم عملي في جمعية خيرية
حاولي أنتي وصديقاتكي إنكم تسون لها (استقطاع شهري) يعني أول شي خذوا رقم حسابها ، ثم كل وحدة تروح للبنك وتسوي تحويل شهري للحساب بمبلغ معين (حتى لو يصير صغير يعني لو مية ريال ) لمدة سنة أو سنتين أو أكثر أو أقل هذي الطريقة زينة ....تدرين ليش؟ علشان صديقتكي ترتب أمورها على هالمبلغ لكن لو عطيتوها كل شهر فراح تصير أمورها ملخبطة شهر يجيها (1000ريال) وشهر (600ريال) وشهر (1500) يعني بالعربي راح تتلخبط امورها لكن إذا عرفت إن كل شهر راح يجيها مبلغ ثابت(زيادة على راتبها) فستنتظم أمورها نصيحة أخرى حولي إنتي وصيقاتكي إن تدفعون إيجار البيت (حتى لو لمدة 6شهور) لأن البيت هو أهم شي وكذلك أصعب شي خاصة إنها حرمة وما معها رجال وإذا ما قدرتوا تدفعون إيجار البيت فشوفوا أحد التجار يتكفل بايجار البيت بحكم شغلي بجمعية خيرية : فإن إيجار البيت هو من أهم الأمور (وباقي الامور تهون) أخيرا : لا يكون شغلكم (حماس غير منضبط) يعني تتحمسون أول الامر ثم تنسونها خليكم معها على طول الخط وتذكري إن قليل دائم خير من كثير منقطع) يكون في علمكي إن مثل صديقتكي هذي ما راح تتطلب منكم أي شي (يعني إذا عطيتوها راح تاخذ وإذا ما عطيتوها فما راح تسألكم) (يحسبهم الجاهل أغنياء من التعفف تعرفهم بسيماهم لا يسألون الناس إلحافا) وإذا تحتاجون إي استفسار فأنا في الخدمة |
اقتباس:
حبيبتي ام سعود كلام الاخ زوج في المستقبل عين العقل بارك الله فيك واعانك على عمل الخير،، دائما اتوسم فيك حب الخير ومساعدة الاخرين جزاك الله كل الخير |
| الساعة الآن 04:28 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©