منتدى عالم الأسرة والمجتمع - لا ادري إذا كانت هذه مشكله ام لا .. افيدوني

منتدى عالم الأسرة والمجتمع (http://www.66n.com/forums/index.php)

- مساحة مفتوحة (http://www.66n.com/forums/forumdisplay.php?f=3)

- - لا ادري إذا كانت هذه مشكله ام لا .. افيدوني (http://www.66n.com/forums/showthread.php?t=125582)

لا ادري إذا كانت هذه مشكله ام لا .. افيدوني

السلام عليكم ورحمة الله وبركاته..

اولا اقدم الشكر لهذا المنتدى الراقي والقائمين عليه..

ثانيا يا اخواني عندي موضوع شغل تفكيري في هالايام وخاصة

ان الملكات والعزومات زادت عندنا..

ما اعرف لو تسمى مشكله ..

بس انا انطوائي ومنعزل إلى ابعد الحدود :24:

اليوم صادفني موقف كان في ملكه لصديق في الكليه وساكن بعيد شوي مسافة نص ساعه عن العاصمه..

كانت ملكة اخوه العود وصادف اني وصلت قبل الملكه بساعتين.. طبعا جلست وسلمت على الشياب فنادا

احد الشياب رجل يشتغل عشان يدلني على طريق المسجد كان وقت صلاة المغرب تقريبا.. ركبت السياره ورحنا انصلي والرجل شاب توه بس يشتغل والحمدلله على كل حال الشاب عنده هواياتي الي هي التصميم والكمبيوتر بشكل عام واستمتعت بالحديث حصلت احد يفهمني من هالناحيه وسوالف كثيره.. بعد صلاة العشاء وبعد ما سلمت على العريس طلبت وصف كيف اوصل للشارع العام عشان اوصل العاصمه جاء هالشاب وقالي اتبعني انا بدليك الطريق وانا ما سلمت عليه السلام المطلوب الحار فقررت اول ما يوصل للنقطة الفراق بيني وبينه بوقف وبسلم عليه واودعه وبروح العاصمه .. تبعته ووصلني للشارع وقف ووقفت خلفه طلعنا من السياره جاء وسلم وكل شي فجاه.. قال العباره الي تخوووووفني ( عطيني رقمك :24: :24: :24: :24: )... طبعا جاني خوف لاني اخاف يكون شاب وراه سوالف او مشاكل وبيورطني لاني انسان بيتوتي على قولت الناس وما اخرج من البيت وما اشوف الناس كثير ما لي سوالف سهرات وانا احب البيت مووووت فخفت لا يقولي او يتصل بي عشان نطلع لاني للحين ما اقدر اعرف من لقاء واحد وش ورى هالانسان وكيف يعيش حياته لو كانت هاديه ومحترمه ما وراها محرمات او مشاكل... طبعا ما اقدر ارده مو حلوه عطيته الرقم وشليت رقمه وسجلته طبعا في هاللحظه جاتني فكره ان زين شوي اشوف الدنيا وتكون لي علاقات وما كل انسان يحب يطلع وراه سوالف انا احسنت الضن بهالانسان بس شو تنصحوني يا جماعه ... اني اكون مثل ما كنت قبل جلوس بالبيت وبعيد عن المشاكل والصياعه بالبيت اعتبره ستر وملجاء لي ما اطيق بعاده :11:

بس يوم اطلع والله رجلي وظهري ونفسيتي تتعكر لاني ما متعود على الطلعات من اساسها بس نفسي تكون لي علاقات مو مثل الي تتخيلونها صياعه لا علاقات محترمه سوالف محترمه !!!!!!

شو هي نصيحتكم يا جماعه :15:

والله يابن الحلال انا مثلك بيتوتي ، والحمد لله وقتي مشغول مرة ، ولما أخرج عند اقاربي اطفش لأني أشعر انو الوقت اللي جالسين نضيعه في السوالف الفاضية ممكن اعمل فيه شغلات كثير في البيت .

أما بالنسبة لموضوعك : فلماذا لاتسأل عنه من يعرفه وخاصة صديقك العريس ( طبعاً بعد كم يوم ) . وبعدها اذا شفت ان سيرة الرجال ماعليها غبار توكل على الله وانت محصن نفسك بألادعية وانت حاطط في بالك أن ما يصيبك لم يكن ليخطئك .
وسلامتك.

خخخخ
عيل اكثر حد بيستانس عليك هي زوجةو المستقبل
حلو انه الواحد يبتعد عن الاماكن المفتوحه
بس مو حلو انه ما يكون له صديق يطلع معاه
عيل لما راح يصير عندك اولاد شو المغامرات اللي راح تقولهم اياها!
وبعدين يا اخوي ترى الواحد لما يطلع ويصادق يتعلم من الحياة
باجر بتشتغل وراح تحتاج لخبره في التعامل مع زملائك وعملائك
انا اشوف ان هذي فرصه
وانت ناضج كفايه انك تقرر اذا تستمر في الصداقه الجديده ولا لا.

هنئيا لزوجتك فنادر من هو مثلك!!
ولكن لايمنع ذلك أنك تقيم علاقات اجتماعية طبعا مو ملزم تطلع معهم أو تسهر ولكن لابد للإنسان من أصدقاء ولا ينطوي على نفسه..

اقتباس:

المشاركة الأصلية كتبت بواسطة تذوقت الحنان ؟

شكرا على ردك اخوي

ههه والله انا مثلك يوم اطلع من البيت احس وقتي يضيع بدل ما اسوي لي شي مفيد مذاكره او شي ابرد بيها فأدي :d .

والله فكره ما جات في بالي اسأل عنه قلت بكتشف بنفسي >> قليل الخبره :15:

بسأل عنه صديقي الي دعاني اتوقع انهم يعرفوا بعض..

يعني احسن اسويلي علاقات واطلع من البيت شوي ؟؟:18:

اقتباس:

المشاركة الأصلية كتبت بواسطة 3thooooooob

اختي جزاك الله خير على ردك..

بالنسبه للاصدقاء ما انكر عندي اصدقاء ولا باس بعددهم وانا اختارهم بكل عنايه بس الموضوع اني ما احب اطلع جسمي يتعب ونفسيتي تنزل لتحت هي كلها مسالت تعود الوالد ما قصر يوم كنت صغير كبرت وهالعاده صارت في دمي :30:
الحمدلله انا ماني حزين اني جالس بالبيت بالعكس مبسوط لاني احب الجلسه بالبيت بس نظرتي شوي ابعد يوم اشتغل وكيف بتكون حياتي ما اتوقع ان زوجتي بتحب واحد 24 ساعه بالبيت بتمل منه وتطفش:21: !!
يعني رايك اني ابداء اسويلي علاقات واطلع شوي من البيت... شكرا^^

اقتباس:

المشاركة الأصلية كتبت بواسطة كل الغلا

اختي بارك الله فيك ..
يعني رايك اني اطلع شوي واكيد ما سهر السهر عيب وانا ما ابي اورط ابوي واجيب له سمعه سيأه ان اولاده اصحاب سهرات وحاله :(

يكفيني اني طلعت مره وحده في حياتي مع جينز وتيشيرت وكانه حاله اطراريه وابوي عرف لان في واحد شافنا واتصل على ابوي وخبره اننا طلعنا بهاللبس يا سبحان الله محد تاركنا على حالنا:( :(

شكرا جزيلا على الرد^^

اهلين اخوي .

الحقيقة رجعت وقريت موضوعك ثلاث مرات وشكيت كأنها بنت هي من تكتب هالموضوع ..؟

بعدين انت جالس تكرر وتقول صياعه وعلاقات وووو؟؟

انت رجال والي قاعد تسويه غلط ومشكلة فيه رجل بهذه الشخصية ..

اخوي حاول تراجع نفسك ولعلمك الرجال هو الي تمر عليه التجارب ويتعلم ما يجلس في بيته نايم ..!!

بكره تتزوج وتشيخ عليك حرمتك ولا حتى بتكون بعينها شي ..

اول مررة اسمع هالمواضيع رجاجيل كله بالبيت شنو نحن وين عايشييين
اللي اعرفه كل الشباب طلعه ووناسه واصدقااء
يعني انت لو تبي تصييع لاقدر الله في نااس جلسون على الكمبيوتر بالبيت ولاعندهم غير الصيياعه افهمهااااااااا:11:

الله يهديك اطلع وشوف الدنيا بس كله بحدووود:23:

يا سلام في ناس كذا الله يكثر من امثالكم البيتوتيين بس اتمنى بالبيت في بلاوي كثير بالنت والتلفزيون وبالخارج في اشياء مفيدة مثل صالات الرياضة والمكتبات والمعاهد والسفر مع اصحاب صالحين وبعدين وين المشكلة انت رجال واذا اتصل عليك الرجال وانت ماتريد تطلع قوله الصراحة