شكي وغيرتي على زوجي ستفسد حياتي
 

مشكلتي اول مره بحياتي اطرحها لاحد وماطرحتها الا اني ابي انقذ نفسي وبيتي وزوجي من شكي وغيرتي الزايده عن الحدود واتمنى القى لها حل يشيلني من حيرتي

وهي من يوم كنت صغيره واانا اتعرض لضغوط نفسيه لاني حساسه جدا والضغوط من نوع اخر
تترجمت علي بوم كبرت وهددت حياتي مع زوجي
وهي لي اب الله يهديه ويحفظه الان مفتون بشي اسمه شغالات دايما وراء الشغالات كنت الاحظه يوم
كنت صغيره واتسأل ليش كذا ابوي وامي من النوع الصبور الى ابعد درجه الله يطول بعمرها ويجعله في ميزان اعمالها 00 واللي زاد الطين بله كانت امي تطلع للعزايم وتقولي انتبهي لابوك لايروح للشغالات ولاتتعدينه عشان يتورط فيك ومايروح للشغالات وكنت اتضايق من هالشي بس لعيون امي اسويه وكان ابوي
مايهتم مني يقولي روحي نامي ويصرفني باي شي علشان يروح واقعد طول الليل ابكي ادري انه راح للشغالات 000وكبرت ومرت السنين وانا على هالحال لين صرت احس ان كل اب يسوي اللي يسويه ابوي حتى لوكانوا ملتزمين 000كبرت واتزوجت حبيت زوجي بكل مافيني وحبني بكل مافيه كانت له علاقه قبل الزواج مع وحده مغربيه ولما تزوجني نشبت فيه وهو مايبيها لين افتكينا منها (عرفت هالشي بعد الزواج بشهر)المهم تركها لانه لقى فيني الدين قبل كل شي ووالله ماامدح نفسي استحي كثير يعني خجوله
وعلى قدر كبير من الجمال المهم صار يقول سمي وامري ماخلى بلد في نفسي ماوداني لها
0الحمد لله)المهم بدت غيرتي على زوجي وبدت شكوكي انا ساكنه مع اهل زوجي وعندهم خدامات صرت اشك فيه وصرت اغار عليه مع انه والحق يقال اللي يشوف تصرفاته يعرف انه مو حق هالخرابيط ولا ينزل نفسه لهم يخاف على نفسه من كل شي من الامراض ومن ومن ومن يعني حريييص على نفسه زياده على كذا جبت منه بنتين صاروا يسوون عيونه بس الشك بيدمر حياتي احيانا اشك اني اذا طلعت مكان وهو بالبيت راح للشغاله واقعد اتضايق ومااستانس بطلعتي واذا رجعت ولقيته مبسوط يلعب بليس فيني واقول ايه اكيد راح للشغاله 000وماابين له طبعا اعرف اني بعدها بطيح من عينه لاحظوا اعرف اني غلطانه بس شعوري غريب دايما تطلع صورة ابوي في بالي لدرجه اذا جتهم شغاله شابه اموووت غيره واتنكد لين تخلص السنتين حقتها واقول لام زوجي لاترجعينها انا ماارتحت لها واحيانا اقولها لزوجي ويطاوعني يقول ابشري وتامرين واحيانا اسوي مشكله معها واذا طلعوني غلطانه اقلب الدنيا على زوجي وانا ماودي انبهه لهم وابين له اني اغار من خدامه اخاف يحطهم براسه تعرفون الرجال00المهم سنه كامله وانا مرتاحه راحه لان كل الشغالات اللي عندنا عجايز وشايلتهم من بالي بس القهر ان امس جتهم شغاله فلبينه صغيره وشكلها مقبول وربي اني مانمت واحسها كابوس 000بدت الغيره وبدت الوساويس مع انها شكلها تنرحم بس والله ماادري هل اللي فيني مرض نفسي واحتاج علاج ولا لا
وبعد احيانا اذا شفته يناظر الشغالات اقول اكيد انه مثل ابوي ولا ليش يناظر شغاله اذا مرت ولا اذا جابت شي
00واحيانا اذا حكى عن شغاله وقام يقول هالكلبه احرقت ثوبي ووكان ودي اخانقها بس رحمتها انقهررررر
واقول مثل ابوي كان يسب الشغالات قدام امي ويروح لهم اذا راحت يالله والله الشك لعب فيني واحس ان بيتي بيخرب والسبب هالشك
ابي الحل تكفون بقدوم هالشغاله الجديده الوساوس بدت تلعب فيني وربي اني اول مره بحياتي اكتب مشكلتي وابي الحل وكيف الطريقه اللي تخلي زوجي ماينتبه اني اغار من الخدامات علشان مايلتفت عليهم

وانا احبه مافي مثله وربي مؤدب بس خايفه اخرب علي حياتي

تكفون نبهوني وفوقوني قبل لااغرق واضييييييييييع

أختي الكريمة ..
جميل جدا أنك قد توصلت للب المشكلة واستطعت التعرف على اسبابها
المشكلة تكمن في صورة معينة ترسبت في عقلك الباطن منذ الصغر
وهي تنعكس على حياتك الآن
وماكان لهذه الصورة أن تتغلغل في أعماقك لولا معايشتك وتصديقك لها
والحل هو أن تحاولي أخفاء معالم تلك الصورة برسم صورة أخرى عليها
صورة توحي بالتفاؤل والثقة وحسن النية

ساذكر لك فيما يلي عبارات معينة وستكون هذه العبارات هي خطوط اللوحة الجديدة التي نريد رسمها على القديمة
حاولي ترديدها في نفسك كلما شعرت بالشك والغيرة
ومع مرور الوقت ستجدين أن الصورة قد تبدلت

قولي لنفسك دوما
"أعوذ بالله من الشيطان الرجيم"
" أنا جميلة وزوجي يحبني والخادمة لن تكون أجمل مني "
" زوجي راق في تفكيره ولا يمكن أن يحط من منزلته ويخونني مع خادمات "
" ليس كل الرجال كأبي"
" سأتبع قول ربي ((إن بعض الظن إثم )) ولن أظن سوءا بزوجي "
"لن أنبه الخادمات لنقطة ضعفي ولن أدع لهن المجال لاستفزازي"
" اليقين لا يزول بالشكواليقين هو أن زوجي رجل صالح"

وأيضا كلما شعرت بالشك قومي بعمل صالح كالصدقة مثلا أو قراءة القرآن واستعيذي بالله من الشيطان
وبعدها سيترك الشيطان الوسوسة لك بذلك لأنك تستفزينه بالاعمال الصالحة

أكثري من الدعاء في جوف الليل بأن يرزقك حسن النية وأن يبعد عنك الوسواس وأن يهديء روعك ويثبت فؤادك على الحق

ياعمري الله يفرج همك00

الحرص جيد لاكن

لا تخربي على نفسك وعلى زوجك متعة الحياة

وحده ونص

والله كلامك اثلج صدري الله يثلج صدرك دنيا واخره

وبحاول اسوي اللي قلتي بالحرف الواحد واتمنى منك متابعتي ارجوك

لان احسك عقل راهي بالتفكير

انا هنا

كل التقدير لك

ترف شكرا

وين الاخوان الاعضاء تكفون ردوا لاتخلوني اندم اني كتبت مشكلتي في المنتدى

ارجوكم ساااااااعدوني

أختي

سواء كنت متعقدة من والدك أو لأ ، تغاري أو لأ ، تشكي أو لأ ؟

فمن الخطأ تركك للشغالة مع زوجك

يعني تتركي الحطب جنب النار ؟؟؟؟

حتى لو كانت شينة ، فما يجوز

تبغي أفضل حل

زوجك ماحد يخدمه غيرك و الشغالة لا تخليها تخدمه و لا تكلمه

و الشغالة لا تتركيها أبدا في البيت حتى لو كان زوجك ملاك

اخي روح الطير

انا طرحت مشكلتي ابي احد يعقلني وانت الظاهر زدت الطين بله

المشكله شكلك مافهمت الموضوع
الشغاله مو لي لاهل زوجي اللي انا ساكنه عندهم وانا اللي اخدم زوجي بعيوني000

ياوخيتي أنتي داخلك طيب ونيتك باذن الله أنها صافيه والدليل كلامك الأخير اللي أعتبره إجابه لموضوعك !!!!


أنتي تحبينه .. لأنه إنسان يستاهل الحب

حلفتي بأنه مؤدب .. ماحلفتي اللا وبداخلك إحساس صادق على أنه رجل يخاف ربه .

انتي خايفه .. يقولون من خاف سلم ، والخوف أمر طبيعي ولكن لا يتحول إلى ( مرض الشك ) !!

ومع ذلك حتى الخوف بأذن الله مستبعد من زوجك لأنه حسب كلامك رجل يخاف الله ومؤدب لذلك تعوذي من الشيطان ولا تتركين له مجال بداخلك وثقي بنفسك وبزوجك ...

أتمنى لك التوفيق