|
أختي الكبرى منهاره من خطوبة أختي الصغرى .. المشكلة حلت
السلام عليكم ورحمه الله وبركاته
اخواني اخواتي اعضاء هذا المنتدى ترددت كثيرا هل اكتب مشكلتي اما لا وبعد تفكير طويل قررت اتوكل على الله واكتبها لكم وعسى وعلى ان اجد فيكم اخوان لي تساعدوني واهم شي تدعوووون لي ولاخواتي المشكله انا عندي اختين اكبر مني وحدة عمرها 27 سنه والثانيه عمرها 26 سنه المشكله بدات من شهرين وشوي راح اكتب المشكله وعسى وعلى تفهمونها وراح ارمز لكل وحدة من خواتي برمز يعني الكبيرة بحرف (ا) والصغيرة بحرف (ب) اختي (ب )صار لها سنه يطلبها شاب خلوق طيب من جماعتنا وكل مرة اهلي ياخرونه وياجلون خطبته من اختي عشان اختي ( ا ا)لين تتزوج لان حنا بعيلتنا مايسمح نهائي بزواج الصفيرة قبل الكبيرة ابوي كبير بالعمر خواتي الكبار المتزوجات كان مايزوج وحدة قبل الكبير لو وش ماصار لكن بحالتي اختي( ب) ومن كثر ابوي مايبغى الولد وافق يزوجه اختي (ب) قبل (ا )يقول انا خلاص كبرت واذا عشت لكم اليوم ماضمن اعيش بكرة ونفسي استر كل خواتك قبل مايصير فيني لاسمح الله شي المشكله انا اختي( ا )رافضه ان اختي( ب) تتزوج قبلها مع انها اول مرة سالنها وافقت لكن بعدين صارت تكرة اختي ب وماترد عليها وماتتكلم معاها ومن قبل ثلاث اسابيع اشوفها صارت تجيب طاري الانتحار كنت انا وخواتي مكذباتها لانه اختي هذي من اكثر خواتي دين ملتزمه تخاف الله صايمه تقوم الليل بارة باهلي يعني كل ماقلتلكم ملتزمه ملتزمه مادري وش غيرها وخلها كذا المهم انها بالحيل بالشهرين الى فاتو ماتتواطن صارت مرة عصبيه حقودة بس تسب وتسخط لنا اخت متزوجه كلمتها قالت تعالوا عندي انتي وياها يمكن تغير جووووووو وفعلا سافرت انا وياها ولكن مافاد معاها بالعكس زادت عصبيتها اكثر من اول المشكله وشي انا اختي ب الحين بس الاقيها تبكي وتقول خلاص ما ابغى اتزوج عشان اختي ا بالرغم من انها تحب خطيبها المشكله الى زادت النار نار ان اختي (ا)قبل ثلاث ايام تهاوشت هي وامي هوشه كبيرة وخذت السكينه تذبح نفسها وبالموت والحياة شلت انا واختي الثانيه السكينه منها مع انها اخر ماتوقعت تعمل الشي هذا لاني عارفه انها انسانه تخاف الله حاجه بيته ملتزمه يااخووواني وش اكتب وش اخلي لو اكتب من هنا لعشرين صفحه موفيلكم حجم المعاناة الى نعيش فيها انا واهلي حتى امي المسكينه تورطت ماتدري وش تسوي تقول هل اكلم ابو الشاب خطيب اختى واقولها خلاص ماعندنا بنات لزواج والا اشوف اخرتها عسى ربي يحلها والا يرزقها ابن الحلال انه قادر ولا يقدر عليه مادري انا اسالكم هنا هل نكمل الزواج وان شاء الله تعقل او نكلم ابو الشاب ونقول مافيه نصيب اتمنى كل من يقراء مشكلتي يدعي لاختي (ا) بالزوج الصالح قبل ماتغيب شمس بكرة انه واليه والقادر عليه يا اخواني انا خايفه نستمر بالزواج وترتيباته ونلاقيه ذابحه روحهااااااااااا امي وابوي وانا كل البيت شايل همها والمشكله الاكبر انا لو اختب (ب ) صغيرة بالعمر تقول ممكن تلاقي الزوج الى يعوضها خيرا منه توها صغيرة لكن حتى هي كبيرة 26 سنه حرام تقطع نصيبها صح والا لا لاتقولون اقنعيها لاني متت وانا اقنعهااااا ومتت وانا اتكلم عليه مافي فايدة يمكن كلامي مو مرتب بس اعذروني مادري وشلون ارتب المشكله فيه كلام كثير صار بس مو لازم اسردة بالله بالله ادعولها ان الله يرزقها ابن الحلال حطيتها امانه برقبه كل من قراء مشكلتي واتمنى الاقي باذن واحد احد حل للمشكله هذي انا عارفه انا اختي 27 عمرة موعانس لاسمح الله لان عادي عندنا بالعيله الى عمرها كذا يعني بنات عمومتي يتزوجون على عمر 30 سنه بالعيله عااااااااااادي بس المشكله ليش تتزوج اختي ب قبلها هذي الى جننها وخلها تعمل كل هالمشاكل اختكم بالله |
لاحول ولاقوة إلا بالله العلي العظيم ..
والله ياأختي مدري وش أقول لكنها بالفعل مشكلة كبيرة !!! بأقولك كم حل وأنتِ اختاري المناسب ... 1/ إذا أختك (ا) عندها صديقة تحبها مرة وتثق فيها ممكن تكلمين صديقتها وتعلمينها اللي صاير، وتخلينها تكلم أختك أو تزورها وتحاول تهديها وتقنعها .. 2/ ممكن تكتبين لها رسالة تبينين فيها بعض الأمور، مثل: ـ خوفيها إن ربي يعاقبها ويحرمها من الزواج بسبب أفعالها وحقدها .. ـ فهميها إن الزواج صاير صاير لأن (ب) مو صغيرة ومالها ذنب عشان نحرمها من خطيبها، وبما إن الزواج بيصير فما راح تكسبين من هالتصرفات إلا كره الناس وبغضهم ولو درو عنك وعن تفكيرك بالانتحار مستحيل يخطبونك لأنهم بيعتقدون إنك مريضة نفسيا .. ـ ذكريها بالله وإن الزواج قسمة ونصيب وذكريها بعقوبة الانتحار وإن صاحبه خالد مخلد في نار جهنم .. 3/ خلي (ب) تكتب لها رسالة "أو تكلمها" وتقولها "طبعا مو صدق، لكن الكذب جائز للمصلحة" خليها تقولها إني خلاص عزمت إني ألغي هالخطبة وأنتظرك لما تتزوجين ولكن لو ماتزوجت بأجلس طول عمري أدعي عليك "تخوفها يعني" طبعا هي إما إنها بيأنبها ضميرها وبتراجع عن موقفها وتسمح بهالزواج، أو بتفرح وتصدق إن الزواج بيتكنسل وبهالحالة يتدخل أبوك أو أخوك ويرفض، وتصير (ب) رايتها بيضا وسوت اللي عليها قدام (ا) .. وأنا أشوف إن هالزواج لازم يتم والأيام كفيلة بإزالة اللي بخاطر (ا) وأنتم خلو عينكم عليها وانتبهوا لها ولاتخلونها تحتك مع (ب) أبدا، وخلو تعاملكم حلو معها ولاتثيرونها لأن محاولتها للإنتحار كانت عقب هوشة مثل ماقلتِ .. تجاهلوا تصرفاتها ولاتتكلمون في الزواج وترتيباته قدامها أبدااااااااا، وأتوقع إذا شافتكم جاديين بتعقل من نفسها إن شاء الله .. لكن لأنكم الآن مترددين، خوفتكم بالانتحار عشان تكنسلون السالفة نهائيا ... وماأتوقع إنها جادة بسالفة الأنتحار إلا إذا كانت مريضة ... الله يرزقها الزوج الصالح ويهديها ويردها لرشدها يااااااارب ... |
دعيت لها والله يتقبل .
|
يارب ياسميع ياعليم يا غفور إرزقها بالزوج الصالح
|
حرام عليكم فوق انها مسكينة حاملة هم كلام الناس اذا تزوجت الصغيرة
تقولون عليها حقودة ؟؟؟؟؟؟؟؟؟؟؟ حطي نفسك مكانها لو على نفسها ما عليها بتخليكم كلكم تتزوجون وتقعد هي لكن مجتمعنا ما يرحم والله ما يرحم واذا عرفوا الخطاب ان الصغيرة تزوجت قبلها تركوها يعني وش فيها اذا صبرت الصغيرة شوي حتى يجي نصيبب الكبيرة وربي ييسر لها يا قلبي عليها والله اني رحمتها وانتم خواتها ما ترحمون ؟؟؟ ترى ما قالت الانتحار وما جابت سيرته الا ان قلبها فيه من الهم والقهر والشعور بالظلم هذا بدال ما تدعون لها صرتم تقولون حقودة وربي يمكن ربي يبتليكم تصيرون مثلها لا حول ولا قوة الا بالله كل واحد همه نفسه يا اختي خلي الصغيرة تنتظر شوي ما طارت الدنيا اسال الله العظيم رب العرش الكريم ان يرزقها ( الكبيرة ) بالزوج الطيب الحنون اللي تتمناه كل البنات ااااااااااااامين ارحموها يا حبيبتي ارحموها |
والله اني اعرف ناس كثيييير يتزوجو قبل اخواتهم الكبار النصيب لو جا خلاص بعدين ليه تردو الولد واختك تحبه بكذا تزيدو حجم المعاناة في بيتكم يعني راح تكسرو بخاطر اختكم اللي تحب خطيبها وبعدين اذا فيه نصيب راح تتزوج اختك ان شاء الله انا تزوجت قبل اختي الكبيره واهلي كانو شايلين همها بس الوالد ما رضي يرفض قال اللي يجيها نصيبها الله يوفقها والله 5 شهور بس وتزوجت اختي والحمدلله ما يجوز انكم ما تزوجو اختكم وتحرموها من فرحتها الله يهدي اختك ويرزقها الزوج الصالح |
الله يرزقها الزوج الصالح ويهديها. أنا رأيي ما تخلي أختك ب تتخلى عن خطيبها و خلي أبوك و صديقات أختك ا الصالحات يقنعوها و قولي لها إإنه يمكن الله ييسر أمرها و يبعث لها نصيبها بحسنة عفوها عن أختها و مساعدتها لها. جربي حلول الأخت معذبة و إن شاء الله الله راح يفرجها عليكم.
|
والله انا دعيت لها بس معليش مو من حقها تقطع نصيب الصغيرة خلاص الزمن تغير انا اختي اصغر مني بخمس سنين وانخطبت قبلي ولا قطعت نصيبها وقلت الله يوفقها وفرحت لها من قلبي وربي عوضني وانخطبت بعدها بفترة ومرة مبسوطة الحمدلله..
هي عصبية وماقدرت تتحمل الموقف.. انا اشوف من الضروري جدا تعرضونها على طبيب نفسي ترا مافيها شي مب لازم تكون مريضة بس هو يتكلم معها ويعطيها مهدئات ويساعدها تخطي الازمة.. مايصير تخلونها كذا تذبح نفسها يعني اذا هي ملتزمة ومسكت السكين عل نفسها معناتها فقدت السيطرة على نفسها معناتها تحتا مهدئ ولو لفترة ولا ترا لو صار فيها شي ولا لقيتوها ميتة بذمتكم واذا كانت فعلا تحت انهيار عصبي ترا فعلا ممكن تموت نفسها.. وانا اعرف بنت كذا جاها انهيار عصبي نتيجة لمشكله واكلت حبوب ولقوها اهلها على وشك الموت على فراشها.. يعني هذي مسؤولية والبنت تعبانه ولا كيف تفسرين بنت بهالعمر ناضجة وملتزمة تسوي تصرفات زي كذا؟؟ اكيد مو قادرة تسيطر على اعصابها ارحموها وعالجوها وهدوها ولا ترا بتستفحل الحاله وبتسوي شي قوي.. نصيحتي الله يخليك خوذيها على محمل الجد لاني عشت تجربه قريبه من هالتجربه لازم طبيب نفسي وعلاج مهدئ.. لو رفضت بجيمع الطرق روحي انتي طبيب واشرحي له حالتها وشوفي وش ينصحك لان محاولة الانتحار مسؤولية كبيرة لا يجوز اهمالها.. |
الله يرزقها الزوج الصالح عاجلا غير اجلا
|
الله يرزق أختك ( أ ) بالزوج الصالح عاجلاً غير أجلاً
ويوفق أختك ( ب ) مع خطيبها ويرزقك انتي الزوج الصالح بالمستقبل القريب دمتِ بمودة. |
| الساعة الآن 10:56 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©