نصائح للمحافظه على الجسم صحي رشيق
 

اوصيك اختي .. اوصيك اخي .. المحافظه على الجسم الصحي الرشيق ..

الموضوع مش موضوع رجيم .. انا وحده من الناس اللي ما تقدر تعمل رجيم .. طبيعتي ما احب الروتين والتقيد بقوانين وانظمه امشي عليها ..

لكن .. كلنا نشوف الامراض المنتشره بيننا هذه الايام .. توعين الصبح يقولون فلان صغير فيه سكر .. وآخر توه ما خلص ثانويه مريض بالضغط .. واخبار تضيق الصدر ..


راقبوا اكلكم .. بمعنى .. اعملوا بعض التغيرات بنظام الاكل ..

مثال

المتعودين ياكلون خبر ابيض او سندويش ابيض .. يبدلونه الى خبز اسمر والتأكد من ان كيس الخبز مكتوب عليه "خبز اسمر على شعير او بر" والله انه طعمه الذ وخفيف على المعده .. عكس الخبز الابيض تحسه كانك تاكل عجين


اللي يحب ياكل "شابوره" او البعض يسميه "بقصم" فيه اسمر وبه حبه سوداء لذيذ وخفيف ومفيد وصحي ..


بخصوص الارز والمكرونه .. ايضا فيه اسمر .. في البداية يمكن النفس تنفر منه .. بس صدقوني الجسم يحتاج اسبوع واحد فقط حتى يتعود على الطعم الجديد ..


شربوا حليب وزبادي بس اختاروا "قليل الدسم" ..


استخدموا الزبده .. بس بكميه قليله واختاروا الغير مملحه ..

بدلوا زيت القلي واستخدموا بدله زيت زيتون .. واجعلوا اغلب اكلكم في الفرن .. واحيانا اخرى على البخار .. واخرى على الشوايه .. وبكذا تقللون نسبة الدهون المستهلكه خلال اليوم ..


آخر وجبه جعلوها على الساعه 8 مساءا .. او قبل لا تنامون بثلاث ساعات على الاقل ..


حتى الحلويات .. الطريقة اللي بها زبادي أو حليب أو قشطه .. بدلوها بقليل الدسم ..

الحمدلله بلادنا الخليجية أسواقها مليانه من الخير وأنواع وأشكال من الأكل .. لازم نتفحص ونفكر قبل لنشتري .. ليش نترك الزين ونروح للشين ..

مارسوا حياتكم عادي .. بس تغييرات بسيطة في نظام الأكل .. صدقوني بتحسون بالخفة والنشاط ..

ولا تنسون رياضة المشي لا تتركوها ابد .. وطبعا جونا حار والمشي بره بيكون صعب مع العبايه والغطا .. فالحل هو أن تشترون مشايه كهربائية .. توجد بأسعار حلوه .. طبعا تختارون الخفيفة لغاية وزن 100 كيلو فقط .. ويمكن عندنا ببلادنا ولان سوقنا صغير وغير متنوع فتكون الأسعار شوي مرتفعه .. لكن بالسعودية ولان سوقها كبير .. فتجدون الأسعار حلوه وايد على حدود 1500 ريال تقريباً ..

وأحسن وقت الواحد يمشي فيه بيكون المغرب .. فانت/وانتي تحرقين الدهون المكتسبه لطول اليوم .. ولمن ترجعين من المشي تاكلين فواكه أو خضار مع حمام دافئ .. والى النوم طوالي ..

بهذه الطريقة الجسم راح يحرق الدهون المتراكمه طيله هذه السنين وبتلاحظون الجسم كيف صار انحف واخف وارشق واحلى ..

صدقوني .. عن تجربه .. واي اسئله انا حاضره لكم ..

تم تعديل العنوان ليوافق المضمون

الاشراف / مستكة_مستكة

شكرا اختي للنصائحك وللتنبيه
معلومات جيدة لكن المسألة يبي لها تعود ووقت وصبر

يعطيك العافيه
غالييتي
خصوصا السير الكهربائي افكر فيه دائما


وشجعتيني اشتريه




تسلمي

سنا الليل

بالعكس حبيبتي لانه غير عن الرجيم ..الرجيم هو اللي يبغيله صبر ومثابره ..
لكن لما تعودين نفسك ان اكلك وثلاجتك كلها اشياء صحيه ..ما تحسين انك تضغطين على نفسك ..
نفس الاكل ونفس الوقت بس اللهم انه قليل الدسم
مشكوره على مرورك


فيافي نجد

اي والله جربي المشايه .. حتى لو ما تبغين تنزلين وزن .. لازم تحرقين اي دهون اول باول للمحافظه على وزن مثالي ..

يعطيكم العافية وشكرا على مروركم موضوعي المتواضع

سما طيبه
شكرا على مشاركتك موضوعي الله يجزاك خير

مخملية الاحساس
وانا مثلك ما اواطن الماء .. مادري ليش .. بس هالايام اغصب نفسي .. لا حرمني من مشاركتك الحلوه

جزاك الله خيراختي عابره سبيل نصائح جيده بارك الله فيك

شكرا على مرورك الجميل

مشكورة اختي عالموضوع
الانسان لازم يعدل عاداته بالطريقة اللي توفرله صحته وماله ونفسيته
اهم شي للجسم الصحي الاعتدال في الاكل
يعني تاكلين اللي يكفيك مو كل اللي يجي على بالك ويمر قبالك
والحركة مهمة تمارين خفيفة تسوينها وانتي في البيت
ويكون لها وقت معين مثلا بعد صلاة العصر
الانتظام على التمارين اللي تخفف اماكن تخزين الدهون
لان كل وحدة عندها اماكن معينه تخزن فيها الدهون يعني شغلة وراثة
مثلا الارداف تسوين تمارين الارداف
البطن تسوين تمارين البطن وهكذا
والاجزاء الاخرى من جسمك ماتهملينها تهتمي بس التركيز على اماكن تخزين الدهون