|
حوار بيني وبين زوجي.....الخ؟؟؟
بسم الله الرحمن الرحيم وبعد: الى اخوتي الاعزاء في المنتدى ابي منكم افكار وحلول عشان اسويها مع زوجي ابي اعيش معه مستانسه انا عارفه اني من دشيت المنتدى وانا ملعوزتكم بمشاكلي بس الصراحه نصايحكم مهمه كثير لي وفادتني صراحتن بس مشكلتي البسيطة والمزهقتني في نفس الوقت اني لما اقول حق زوجي يله نطلع نتمشى يزعل ويتضايق هل طلبي فيه شي؟ او انا غلطانة (بس الصراحة انا لما اشوف جيرانا وهم من اقاربنا تطلع ويا زوجها ما يقعدون في البيت اتنرفز واتضايق اشوفهم مع العين السحرية:( مو انه حسد بس اقول وش فرقها يعني عني انا ما اقصر معاه وغاليه عنده ويارب دوم واحلى منهم وش الي هم يسونه ويخلون ازوجهم يودونهم يمين ويسار وانا اذا ابي الخياط لازم اصيح واطلع الدموع عشان يوديني مع العلم اني انقنق فوق راسه واذا ما يبي يطلعني لازم يسالني وينرفزني لين اعيف الطلعة واقول خلاص بعدين يقول يله امشي يعني ما يطلعني بطيبت خاطر لازم قهر ون طلعنا يقول ها استانستي اسمعوا الحوار: ل: يا ابو فلان وشرايك اليوم نروح نتسوق ونتمشى ونقعد ونستانس. ر:انتي عارفة اني ما احب الاسواق. ل:بس انا ابي اغراض حق البيت طفشت والله ابي اشم هواء صار لي اسبوعين مدري شهر وانا ما طلعت من البيت ر:انا قلت لا يعني لا لا تزعجيني ل: حرام عليك كل ما اقولك تقول لا ليش ما تشوف ابو فلان ما شاء الله عليهم يطلعون ويتمشون ليش احنا لا وانت دايمن تقهرني ولا توديني لين تنشف ريقي ولا اصيح حرام عليك يعني ما تبي تمشيني ولا طلعني ولا تبينا نستانس مع بعض ر: انا مستانس في البيت وما ابي اطلع (اقوم معصبه واروح للمطبخ) بعدين ارجع واقول ها وش قلت؟ نروح ولا لا ر:الله يزعجك خلاص بنروح بعد العشاء بعد ربع ساعه يام فلان صلحي العشاء عزمت جارنا بو فلان بعدين اقول: يعني متى بنروح وتجي الساعه 11 م ودق الباب وش دعوه مو غريب كل يوم وهو عندنا يقول ر: يله امشي جعلك قرفت السوق وانت تدرين انه بعيد وندق مشوار على الفاضي ......الخ وبعدين تنتهي السالفة وما نروح نقعد متهاوشين وزعلانين عشان واحد نشبه كل يوم وهو عندنا. وبعدين خلاص انا عرفت اسلوبه معاي اذا ما يبينا نروح عزم الجار وفلان وعلان واذا وافق من البدايه انا نروح يغير عاد بدل ما يعزمه يروح عنده واذا قدّر الله ورحنا طول الطريق ها ان شاء الله راحت الضيقة يوم طلعتي يله بس انتي اصلن بس تبين تطلعين من البيت وتعذرين بها الاغراض ولا الولد تعبان انا ما اقولكم اسلوبي حلو بالعكس انا احسه زفت وما اعرف اطلب وهو بعد ما يساعد على انه يخليني اوكيه معاه يعني حياتنا اوكيه الحمد الله بس يعني هالنقطة شوي صعبه. ومثلا مرة خلاص وافق بعد طلابات وحبة راس ولما طلعنا ومع المناقشات والهواش داخل السيارة رجعني البيت وما رحنا ارجوكم عطوني حل معاه وكيف اتعامل وياه ابيه يكون فري وابي اغير اسلوبي بليز ساعدوني الله يرزقكم وشكر |
هلا اختي
في البداية الله يعينك ويوفقك لما يحبه الله ويرضاه حبيبتي احمدك ربك على الاقل اذا فكرتي زوجي ما يطلعك بس اقلها جالس معك في البيت والانسان مفروض ما يشوف الي احسن الا بعد ما يشوف الاسوء يعني فكري لو هو كل يوم طلعات وتمشيات وانت بالبيت بلحالك؟؟؟ راح يكون حالك اسوء بعد ما توصلك قناعه انك افضل من غيرك حاولي تحسنين علاقتك معاه لتصلي للافضل باذن الله ومن خلال حوارك لاحظت شي مهم وهو قولك شوف ابو فلان شوفي حبيبتي طبيعه الانسان ذكر ام انثى يكره المقارنه بالغير ويحب التميز عن الاخرين وانت بمقارنته برجل اخر تشعلين فتيل في داخله يعني اهم شي ابعدي عن المقارنه حتى بينك وبين نفسك زوجي غير كل رجال العالم ولا فيه احد زيه ولا مقارنه باحد اولا هو زوجك وحبيبك وابو عيالك اذا وصلتي لهذي القناعه راح تكوني مرتاحه بعدين اذا زوجك من النوع البيتوتي حاولي معاه بالتدريج وبالسياسه والدلع تتفقون على يوم بالاسبوع تطلعون فيه لو تمشيه بالسياره وكاس عصير وانتوا بالسياره بعد ودي اكتب تعديل لحوارك اذا :) اذا ممكن بكتب حوارك والتعديل جنبه بيكون بحرف الدال ل: يا ابو فلان وشرايك اليوم نروح للكارفور نتسوق ونتمشى ونقعد ونستانس. د: باقول نفس كلامك ر:انتي عارفة اني ما احب الاسواق. ل:بس انا ابي اغراض حق البيت طفشت والله ابي اشم هواء صار لي اسبوعين مدري شهر وانا ما طلعت من البيت د: ايه حبيبي انا عارفه انك ما تحب الاسواق بس البيت ناقصته مقاضي والاهم من كذا ودي اطلع معاك اغير جوي احس اني من زمان ما تمشيت معاك تكفى حبيبي لا تفشلني (( ادلعي عليه هنا )) ر:انا قلت لا يعني لا لا تزعجيني ل: حرام عليك كل ما اقولك تقول لا ليش ما تشوف ابو فلان ما شاء الله عليهم يطلعون ويتمشون ليش احنا لا وانت دايمن تقهرني ولا توديني لين تنشف ريقي ولا اصيح حرام عليك يعني ما تبي تمشيني ولا طلعني ولا تبينا نستانس مع بعض د: حرام عليك واهون عليك تكسر خاطري لو انا مو متاكده انك تحبني قد ما انا اموت فيك كان زعلت بس احمد ربك اني عاقله :) انا كل قصدي ودي نغير جو ونشوف شي جديد هاه حبيبي ما غيرت رايك ر: انا مستانس في البيت وما ابي اطلع (اقوم معصبه واروح للمطبخ) بعدين ارجع واقول ها وش قلت؟ نروح ولا لا ر:الله يزعجك خلاص بنروح بعد العشاء د: اقوم للمطبخ وانا معصبه واسوي له عشاه واذا جبته اقول له كنت مشتهيه اسوي لك اكله جديده واخليها مفاجئه بس انت الله يهديك عنيد وما تطاوعني والا كنت مخططه لليله حلوه بس خربتها علي بعنادك ... ومع الوقت بيلين واهم شي اذا قمتي زعلانه لا ترجعين و تسالينه مره ثانيه لا خلاص لا يعصب زياده انسي الموضوع ومشيه عادي وخليه مع الوقت يتحسف انه ما طلعك واهم شي حببيه بالطلعه يعني اذا طلعتوا لا يروح وقت المشوار هواش ومناقشات واذا بداها معاك حاولي باسلوب حلو ودلع تسكتينه يعني مثلا وهو معصب اضغطي على يدك او حطي اصبعك على فمه وقولي له خلاص حبيبي كونك طلعتني يعني كثير حتى لو الوقت متاخر لاني من جد كنت حابه اغير جو معاك الله يخليك لي ولا يحرمني منك واسفه اذا ازعجتك بس انت عارف اني مو بس احبك لا اموت فيك وانا متاكده انك ما طلعتني الا لانك تبغى تفرحني لانك تحبني صح؟ وطول ما تكونوي بالمشوار لو درتوا بالحاره كثري من شكره وحسسيه انه اسعدك بالطلعه ولو مشوار قريب ومع الوقت هو بيحب الطلعه معاك وبيصير يفول لك يله نطلع وعن قريب ان شاء الله :) اسفه طولت بس حبيت افيدك واتمنى اكون وصلت الي يغير زوجك تحياتي دلوعه زوجي |
اختي تتقبلي نصيحتي
طريقة كلامك مع زوجك مو حلوة حتى لو يبي يسمح لك جكارة فيك بيرفض ويعزم جار الجار وليش تجبين سيرة ابوفلان وعلان مو هيك المفروض تتوددي اله ولو انه حقك ما يضر حبيبتي خدي مني نصيحة الكلمة الحلوة والله تلين اثخن قلب تحياتي |
الله يعطيكم العافية على مروركم ونصائحكم بس للاسف انا ما اقدر ادلع او بالاصح ما اعرف اتغنج بس عندي بعض المحاولات الناجحه واتمنى هذا ينجح معه وبغير اسلوبي لعل الله يهديه ونطلع عاد نشم هوى زي العالم والناس.
شكرا على مروركم وانتظر نصايح ثانيه لا تبخلون علي |
اختي الكتوم الل يسخر لك زوجك يارب ويعينكم ..
نصيحة الدلع الدلع الدلع له مفعول خطير والحمدلله انه زوجك يكون معاك في البيت يعني ما يخليك محبوسه ويروح هو يستانس ويدور شوفي اني لا تقولين له بطلع وابقي كم يوم صابره وخليه محبوس معاك عشان يعرف الزهق اللي تعيشين فيه وبعدين عاد هو بروحه بيقول لك قومي نطلع اوافق الاخوات وبقوة في عدم مقارنتك زوجك باي شخص اخر وتذكري انه زوجك يملك العديد من المواصفات الحسنه اللي مب موجودة عند غيره .. اخيرا الله يسعدك ويهنيك ويبعد عنكم كل شر ولا تتسييييييين الدلع والغنج حتى لو تمثلين اشوي اشوي بصير طبيعة فيك |
اولا: هواسلوبه جي مايتغير متعوده عالبيت مثل مايموها بيتوتي
فانتي تغيريه وهذي السالفه ثانيا:لاتقولين له فلان وعلان طلع حرمته اهله طوايفه الرجال بصفه عامه مايحبون تجيبين سيرة حد اوتطالعي بحد يقولون لج هذا حياتج لاتطالعين بالناس وتقارنيني فيهم عرفتي شلون ثالثا:لاتحنين فوق راسه تعدين الطلب في اليوم اوالدقيقه اكثرمن مره هذا الشي يقفل براسه رابعا:النفسيةقديكون مضايق مايبي يطلع بهاليوم الفلاني اومضايقات من نوع ثاني فدوري لج يوم تحسيه مرتااح ولاتكثرين من الطلبات براحه عليه شوي شوي فزين منه ان هو معااج بالبيت مومخلييج لحالج كل يوم يطلع وانتي محبووسه وحبيبتي بسياسه يجي الرجال من عنده حيلة فليحتال بس مشكلتي موعارفه اشرحلج اوتنفعج الطرق والله يسعدج ويوفقج حبيبتي ياااااااارب اختج/ام عزيز |
أختي الكتوم أنت لازم ما قارنين زوجج بشخص ثاني المفروض أنج تبينين الصفات الحلوة إلي فيه وما تبينيله عيوبه مباشرة ( هالشي أنا جربته مع زوجي و وايد فادني و عرفت إني لما أقارنه مع شخص ثاني ما راح يسويلي إلي أبيه ) تقدرين أتقولين : أنت زوجي حبيبي و مو مقصر علي بشي كل شي أبيه توفرة لي بس لو تقوم معاي الحين نغير جو و نشتري شويه أغراض بكون أسعد إنسانه .. ممكن هالطريقه تنفع معاه جربي و ما أوصيج بعد كثري من الدلع و لا تقولين ما أعرف لأن الدلع موجود عند كل أنثى بس عليج تطلعينه
|
شكرا على مروركم ولعلني افعل ما قلتوه او اضبط الدور والله يعين
|
| الساعة الآن 12:18 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©